OŌYƐBƐ̄CƐ 4

Ɔwɔicō je ɔdōcābɔ̄ lɛ Umósīsi

1Anɔ́ɔ Umósīsi tóohi kahíníī, “Ɔ̄cɛ í jé ŋ́ nɛ̄ ācɛ kú Ísrɛ̄lu í cɛ̄ ɛlā kú um ŋ́ klla tá kóō jāhɔ̄ lɛ ɛlá nɛ̄ n ka ā bɛ́ɛ? Ɔdí nɛ̄ n géē yá, ɔ́dāŋ nēé ka ka awɔ í hɛ́wɛ̄ɛcɛ ɛgiyí um ŋ́ bɛ́ɛ?” 2Anɔ́ɔ Ɔwɔicō da Umósīsi ɔ̄kā kahíníī, “Ɔdí nāa bī abɔ̄ abɔ́ɔ ā?” Ó kahíníī, “Okwutɛ nɛ̄.” 3Anɔ́ɔ Ɔwɔicō da ɔ́ kahíníī, “Lɛ ɔ́ tá fīyajɛ.” Abɔ̄ Umósīsi le ɔ́ tá fīyajɛ ā, ó kwú pīya ɛgwā. Anɔ́ɔ Umósīsi le kwu ŋmá ɛgiyí nū á. 4Amáŋ, Ɔwɔicō da Umósīsi kahíníī, “Túkpɛɛ́ kú ā lɛ abɔ̄ bī ɔ̄ ugbé kú ā kwú ɔ̄ ú.” Anɔ́ɔ Umósīsi túkpɛɛ́ kwú ugbé ŋmá ajɛ á, anɔ́ɔ ó kwú pīya okwutɛ abɔ̄ kú nū á. 5“Yá ɛ̄nyā kóō mafú lɛ uwá ka Ɔwɔicō kú aádáádā ūwā, Ɔwɔicō kú Ébrahām, Áyísīki, mɛ́mla Ujékɔ̄pu, le hɛ́wɛ̄ɛcɛ ɛgiyí uwɔ.”

6Ɔwɔicō klla le ɛlā ka lɛ Umósīsi igbɔhá kpɔ́ kahíníī, “Kwú abɔ̄ kú uwɔ ú wu awulú kú uwɔ.” Umósīsi kwú abɔ̄ kú nū ú wu awulú kú nū. Eko nɛ̄ ó kwú ɔ̄ ú wɛ̄ɛcɛ ā, ó le má ka abɔ̄ ā ɔ́ɔ le gbagwú kwúláá bɛ̄ɛka áfū ā. 7Anɔ́ɔ Ɔwɔicō kahíníī, “Kwú abɔ̄ kú uwɔ ú cīgbīhi í wu awulú ā kpɔ́.” Eko nɛ̄ ó kwú ɔ̄ ú ŋmá ipú awulú ā, ó le má ka, ó kwú yá lɔhi mɛ́ɛ́lɛ́ bɛ̄ɛka ɛga o hile kú ɔkpíyē kú nū ā. 8Anɔ́ɔ Ɔwɔicō kahíníī, “Ɔ́dāŋ ka uwá í cɛ̄ɛ̄lā kú uwɔ ŋ́, nɛ̄ ɔdā nɛ̄ ō ī hɛ́ ācɛ idáagó kú áflɛ́yí ā í cɛ̄ uwā eyīgēdēe ŋ́, úklɔ́ ōhídáagó ámōōmɛ nyā géē pī ɔtū kú uwā abɔ̄.

9Ɔ́dāŋ ka nááná nāa le ɔdā ōhídáagó ɛ́plɛ́ɛpa ā kpó yā, nēé nē é cɛ̄ɛ̄lā kú uwɔ ŋ́ kpɔ́, anɔ́ɔ é tá ō jāhɔ̄ lɛ ɔ̄dā nāa ka ā, lɛ éŋkpɔ̄ ōhī hɛ́ ŋmá Unáyilu cɛ́ɛ́ a lɛ cē bá ajɛ. Éŋkpɔ̄ ā í je pīya oyī.”

10Amáŋ, Umósīsi kahíníī, “Óndú Ɔwɔicō kú um, Ń jé ō kɛlā lɔɔlɔhi ŋ́. Ń kē je pīya ɔ̄cɛ ō jé ō kɛ̄lā ŋmífī nāa gbɔɔ́ ō kɛlā gā um ā ɛ́ɛ́ ŋ́. N gē kɛlā ɛmɛɛma klla ī hɔ́gwū.” 11Anɔ́ɔ Ɔwɔicō da ɔ́ kahíníī, “Ɔ̄nyɛ yá okónu kú ɔ̄cɛ ā? Ɔ̄nyɛ ī je ɔ̄cɛ pīya odokónu, ámāŋ odahɔ̄ ā? Ɔ̄nyɛ géē yá kú ɔ̄cɛ kóō mɛ́ɛbɛ, ámāŋ gē je ɔ́ pīya opeyī ā? Ó wɛ ami nōo wɛ Óndú ā ŋ́ nɛɛ? 12Nyɔ̄ abālɔbányā, N géē tá uwɔ abɔ̄ kú ā kɛlā, n kē í dā uwɔ ɛlá nāa í ka ā.” 13Amáŋ, Umósīsi kahíníī, “Óndú um, ‘Kóócōō’ tū ɔ̄cɛ ɔhá ɛhɔ̄ nyā.’”

14Ɔwɔicō kwú cɔ̄nū mla Umósīsi, anɔ́ɔ ó kahíníī, “Árɔ̄ni ɔyínɛ́ uwɔ í wɛ ɔ̄cɛ Ulífāyi ŋ́ nɛɛ? N jé kóō jé ɔ̄ kɛlā lɔhi. Ó yɔ̄ ī wā gáā jīla uwɔ ɔwɛ dúú ɛɛ́, eko nɛ̄ ó ī má uwɔ ā, ɔtū géē he uwɔ. 15A lɔfú da ɔ́ ɛlā nɛ̄ n da uwɔ ā glá. N géē tá aá ɛplɛ́ɛ́pa abɔ̄ kú aá kɛlā, n kē í da aá ɛpɛplɛ́ɛpa ɔdā nɛ̄ aá í yá ā.

16Ó géē wɛ ɔkɛ̄lā kú uwɔ. Anú géē kɛlā lɛ ācɛ ā kwɛyí uwɔ á. Cɛ́ɛ́ a géē lɛbɛ̄ɛka Ɔwɔicō ā, a géē da ɔ́ ɔdā nɛ̄ ó í ka ā. 17A kē í bī okwutɛ nyā abɔ̄, nāa géē bī yá ɔdā ō hídáagó.”

18Umósīsi le cīgbīhi ga ɛgiyí ohilí nū Ujɛ́tro, anɔ́ɔ ó da ɔ́ kahíníī, “N tíne ká n̄ nyɔ̄ gaá lɛ ācɛ ɔlɛ́ um nēe bá ajɛ kú Íjīpiti ā jila. Ká n̄ lɛ jé ɔ́dāŋ ka é yēeyī kpɔ́ ɛ́ɛ́.” Anɔ́ɔ Ujɛ́tro da ɔ́ kóō nyɔ̄ ɛbɔ́.

19Anɔ́ɔ Ɔwɔicō da Umósīsi, eko nɛ̄ ó yɔ̄ Umídiya ā kahíníī, “Lɛ cīgbīhi ga Íjīpiti ohígbū ka odúúdú ācɛ nēe tíne kéē ŋmó uwɔ ā, le pɛ́ gekwú ɛɛ́.” 20Anɔ́ɔ Umósīsi kwú ɔnyā nū mɛ́mla ayí nū nɔ̄nyilɔ ú kpó cɛyí ijakī, kwú okwutɛ nɛ̄ Ɔwɔicō da ɔ́ kóō je ā ú bī abɔ̄. Anɔ́ɔ é kwúcē le tá Íjīpiti á.

21Óndú ā da Umósīsi igbɔhá kpɔ́ kahíníī, “Eko nāa le tá Íjīpiti, má ka a lɛ odúúdú aɔ́dā ō hidáagó dóódu, nɛ̄ n je gā uwɔ ā yá ipéyī Uféro. Amáŋ n géē je ígbɔ́tū lɛ ɔ́, cɛ́ɛ́ kú ɔ̄ híī cɛ̄ lɛ ācɛ ā nyɔ̄ ŋ́. 22A géē da Uféro kahíníī, “Ami Óndú ā kahíníī, “Ísrɛ̄lu wɛ ɔyínɔ̄nyīlɔ aflɛ́yí kú um á. 23#Oyɛb 12.29N da uwɔ kahíníī, “Habɔ̄ ɔyínɔ̄nyīlɔ kú um tá kóō nyɔ̄ gáā gbō um ɛ̄gbā. Ɔ́dāŋ ka a tá kú ō híī nyɔ̄ ŋ́, n géē ŋmó ɔyínɔ̄nyīlɔ aflɛ́yí kú uwɔ.” 24Óndú ā le jīla mla Umósīsi ɛga nēé gbo otú ɔwɛ o yɛ ga Íjīpiti ā, anɔ́ɔ Ɔwɔicō tíne ō lɛ ɔ́ ŋmó. 25Anɔ́ɔ Usipóra kwū ɛcɔ̄ ō lulé ú, le ufíyé kú apī kú ɔyí nū hɛ́, anɔ́ɔ ó kwú ɔ̄ kwu Umósīsi ikpó. Anɔ́ɔ ó da Umósīsi kahíníī, “A wɛ ɔbá um ipú oyī nɛ.” 26Ohígbū uculo kú apī nēé hɛ́ nyā ā, ó da Umósīsi kahíníī, “Awɔ wɛ ɔbá kú oyī gā um á.” Anɔ́ɔ Ɔwɔicō í ŋmó Umósīsi gɛ ŋ́ má.

27Anɔ́ɔ Óndú ā da Árɔ̄ni kahíníī, “Nyɔ̄ ga ipú ígbíli kú ā gáā jīla Umósīsi ɔwɛ.” Anɔ́ɔ ó le yɛ gáā jīla Umósīsi ɛyí ɛfu kú Ɔwɔicō ā, ó lɛ ɔ́ kwú bɔ́tū. 28Anɔ́ɔ Umósīsi lɛ odúúdú ɛlā nɛ̄ Ɔwɔicō ka lɛ ɔ́ eko nɛ̄ ó kóō kwúcē ga Íjīpiti ā kpó ka lɛ Árɔ̄ni. Ó le ɔdā ō hídáagó nɛ̄ Óndú ā da ɔ́ kóō yá ā kpó ka lɛ ɔ́ dúú.

29Anɔ́ɔ Umósīsi mɛ́mla Árɔ̄ni le pɛ́ i yɛ tá Íjīpiti á. Anɔ́ɔ é le odúúdú anyākwɔ́cɛ kú ācɛ kú Ísrɛ̄lu ā kpó hīgwú wā í le jīla ɛga éyi. 30Anɔ́ɔ Árɔ̄ni lɛ odúúdú ɛlā nɛ̄ Ɔwɔicō ka lɛ Umósīsi ā kpó ka lɛ uwá klla lɛ odúúdú ɔdā ō hídáagó ā kpó yá ipéyī uwā. 31Anɔ́ɔ odúúdú ācɛ ā cɛ̄ɛ̄lā ā eko nēé klla le pó ka Óndú ā ɔ́ɔ gā ɛgiyí ācɛ ɔlɛ́ nū Ísrɛ̄lu, klla lɛ ōwē kú uwā má ɛɛ́ ā. É túkpɛɛ́ lɛ eyī pīya kláajɛ le ɛ̄gba gbā Ɔwɔicō.

Currently Selected:

OŌYƐBƐ̄CƐ 4: IFBCL

Highlight

Copy