OŌYƐBƐ̄CƐ 3

Ɔwɔicō hi Umósīsi igwú

1Ɛ̄cī éyi, Umósīsi yɔ̄ ī gbō aɔ́dāajɛ kú ohilí nū Ujɛ́tro nōo wɛ ɔ̄cogwɛ́ɛya kú ācɛ Umídiyan ā. Ó le aɔ́dāajɛ ā kpó le hɛ́ ígbíli igbó, anɔ́ɔ é gā ɛfu kú Uhɔ́rɛ̄bu nōo wɛ ɛfu kú Ɔwɔicō ā. 2#Ācot 7.30-34Anɔ́ɔ Alelékwū-otɛ̄hɔ̄ kú Óndú ā le hɛ́wɛ̄ɛcɛ ɛgiyí nū bɛ̄ɛka ígblɛ́nyī ɔlá nōo yɔ̄ ī bɛ̄cɛ ŋmá ɔtāhɛ̄ ácí āa. Umósīsi má abɔ̄ ɔlá yɔ̄ ī yi ɔtāhɛ̄ ácí ā. Amáŋ, ácí ā í kē yɔlá ŋ́. 3Anɔ́ɔ Umósīsi kahíníī, “N géē túblá anú kú n lɛ ɛbɛ ohéyī nyā má lɔɔlɔhi. Ɔdā nōo yá ɛ́ɛ́ nɛ̄ ácí ā í je yɔlá ŋmá ajɛ ŋ́ mā a.”

4Eko nɛ̄ Óndú ā le má ka, Umósīsi ɔ́ɔ le eyī pīya yɔ̄ ī túbla ɔlá ā ajaajɛ ā, ó le ɔ́ higwú ŋmá ipácí ā, kahíníī, “Umósīsi, Umósīsi, Umósīsi” Anɔ́ɔ Umósīsi kahíníī, “Ami yɔ̄ á.” 5Anɔ́ɔ Ɔwɔicō da ɔ́ kahíníī, “Ā híī wā ajaajɛ ŋ́, lɛ áblákpá kú uwɔ plla ŋmá ikpó. Ohígbū ka, ɛga nāa háyi ā, wɛ ɛga otīihɔ.” 6Ó klla da ɔ́ kahíníī, “Ami wɛ Ɔwɔicō kú ádā uwɔ á, Ɔwɔicō kú Ébrahām, mla Ɔwɔicō kú Áyísīki, mla Ɔwɔicō kú Ujékɔ̄pu á.” Anɔ́ɔ Umósīsi kwú eyī í tayínū. Ohígbū ka ó yɔ̄ ī yúufi kóō má eyī kú Ɔwɔicō.

Óndú ā lɔfú

7Anɔ́ɔ Óndú ā kahíníī, “N le ōwē kú ācɛ ɔlɛ́ um nēe bá Íjīpiti ā má ɛɛ́. N klla le ikwū nēé je ohígbū ōwē nɛ̄ aɔ́kpani uwā gē yá uwā ā pó ɛɛ́. N jé ɛjɛ̄ɛ̄jī ōwē nēé yɔ̄ ī má ā. 8N gáā hɛ́ uwā tá ŋmá abɔ̄ kú ācɛ kú Íjīpiti ɛɛ́. Ká n̄ lɛ uwá kpó bɛ̄cɛ ŋmá ajɛ ɔ́ɔmā, ga ajɛ olɔhi nōo wɛ ajɛ o gbiyē nɛɛ ā. Ajɛ kú ācɛ Ukénan, ācɛ Uhɛ́ti, ācɛ Ámɔn, ācɛ Upɛ́ris ācɛ Ujɛ́būs mɛ́mla ācɛ Uhám. 9Abālɔbányā, n le ikwū nɛ̄ ācɛ ɔlɛ́ um Ísrɛ̄lu, je ā po ɛɛ́. N le ōwē mɛ́mla ɛ́gɛ́nɛ̄ ācɛ kú Íjīpiti bá ī pīya uwá tū lɛ ā má ɛɛ́. 10Wā, n géē tū uwɔ ɛhɔ̄ fu Uféro kóō lɛ ɛga je gā awɔ ká ā lɛ ācɛ ɔlɛ́ um, ayí kú Ísrɛ̄lu ā kpó bɛ̄cɛ, ŋmá ajɛ kú Íjīpiti.”

11Amáŋ Umósīsi da Ɔwɔicō kahíníī, “Ɔ̄nyɛ nɛ̄ n wɛ ɛ́ɛ́ nɛ̄ n géē ga ɛgiyí Uféro, ɛ́ɛ́ nɛ̄ n kōō í kpó ayí kú Ísrɛ̄lu ā bɛ̄cɛ ŋmá Íjīpiti ā?”

12Anɔ́ɔ Ɔwɔicō tá ɔ̄ ohi kahíníī, “N géē yɔ̄ mla uwɔ, cɛ́ɛ́ eko nāa lɛ ācɛ bītá wɛ̄ɛcɛ ŋmá Íjīpiti, a géē gbā um ɛ̄gbā ɛyí ɛfu nyā. Ɔ́ɔmā géē wɛ ɔdocābɔ̄ gā uwɔ ka ami tū uwɔ ɛhɔ̄ á.”

13 # Oyɛb 6.2,3 Amáŋ Umósīsi da Ɔwɔicō kahíníī, “Ɔ́dāŋ́ ka n gā ɛgiyí ācɛ ɔlɛ́ uwɔ Ísrɛ̄lu nɛ̄ n le da uwá ka, Ɔwɔicō kú aádáádā aá tū um ɛhɔ̄ fu aá, nɛ̄ é lɛ ɔ̄kā da um ka, ‘Ɔdí wɛ iyē nū ā?’ Ɔdí nɛ̄ n géē ka lɛ uwá āa?” 14#Mafú 1.4,8 Ɔwɔicō kahíníī, “Ami nōo wɛ ami ā. Ɛ̄nyā wɛ ɔdā nāa í ka lɛ uwá á. ‘Ɔ̄cɛ nēé hī ka Ami tú um ɛhɔ̄ fu aá á#3.14 Ami nōo wɛ Ami, AMI, ámāŋ N géē wɛ Ɔ̄CƐ nɛ̄ N GÉĒ WƐ“AMI” ɔkɛ̄lā ā lɛbɛ̄ɛka iyē kú Uyáweh ā, oŋmá ajaajɛ ā, é gē tá ɔ̄ ka Ujehófa.’ ” 15Ɔwɔicō klla da Umósīsi kahíníī, “Da ācɛ kú Ísrɛ̄lu ka ‘Ami, Óndú ā, Ɔwɔicō kú ádā uwā, Ɔwɔicō kú Ébrahām, Ɔwɔicō kú Áyísīki, Ɔwɔicō kú Ujékɔ̄pu ā tū um ɛhɔ̄ fu uwá á.’ Iyē kú um yɔ̄ abɔ́ɔ ogbéegbé ɛcɛ á, ɛ́gɔ́ɔmā nēé géē blakwu um ógbéegbé ɛcɛ á.

16Nyɔ̄ ká a gaá lɛ anyākwɔ́cɛ kú Ísrɛ̄lu ā túbá tɔ̄há. Ká ā da uwá ka, Óndú ā, nōo wɛ Ɔwɔicō kú aádáádā ā, Ɔwɔicō kú Ébrahām mɛ́mla Áyísīki mɛ́mla Ujékɔ̄pu ā hɛ́wɛ̄ɛcɛ ɛgiyí uwɔ. Da uwá ka n gā ɛgiyí uwā gaá le ɔdā nɛ̄ ācɛ Íjīpiti yɔ̄ ī yá uwā má ɛɛ́. 17N le ɔ́ ŋmótū ka n géē kpó ūwā wɛ̄ɛcɛ ŋmá Íjīpiti, ɛga nɛ̄ é yɔ̄ ī yá uwā ōwē nɛ̄hi ɔ́ɔmā, cɛ́ɛ́ n lɛ uwá kpó ga ajɛ o lɔhi. Ajɛ kú ācɛ Ukénan, ācɛ Uhám, ācɛ Ámɔn, ācɛ Upɛ́risi, ācɛ Uhɛ́ti mɛ́mla Usébūsīt.

18“É géē jāhɔ̄ lɛ ɛlā nāa gáā ka lɛ uwá ā. Cɛ́ɛ́ awɔ mɛ́mla anyākwɔ́cɛ kú Ísrɛ̄lu ā géē ga ɛgiyí ɔcɛ́ kú Íjīpiti ā, gaá da ɔ́ kahíníī, ‘Óndú ā, Ɔwɔicō kú ācɛ Uhíbru ā le jīla mla alɔ ɛɛ́. Abālɔbányā ā, alɔ gē gbɔ̄ɔkɔ gā uwɔ, lɛ ɛga je lɛ alɔ, kú ālɔ̄ ga iyāwu kú ɛ̄cī ɛtá, ipú ígbíli, ká alɔ gaá lɛ ɛya gwó lɛ Óndú ā, Ɔwɔicō kú alɔ.’” 19N jé ka ɔcɛ́ kú Íjīpiti í gáā habɔ̄ aá tá nyɔ̄ ŋ́, ń táafú ŋ́ ukpābɔ̄fú ōfōōfūnū nɛ̄ n. 20N géē bī ɔfú kú um lɛ yá uwā italā bū ipú aɔ́dōōbɔ̄bí ō tūufi nɛ̄hi nɛ̄ n géē yá abɔ́ɔ ā. Igbīhi nū ā, ó géē cɛ̄ kú aá nyɔ̄. 21#Oyɛb 12.35,36N géē yá kú aá téeyī olɔhi kú ācɛ kú Íjīpiti, cɛ́ɛ́ aá gáā tábɔ̄ áncā nyɛ̄ɛ̄ ŋmá abɔ́ɔ ŋ́. 22Ɛjɛ̄ɛ̄jī ācɛnyā kú Ísrɛ̄lu dóódu géē ga ɛgiyí ācɛnyā kú Íjīpiti ɔ́mpa uwā, mɛ́mla ācɛnyā kú Íjīpiti dóódu nēé lā ɔlɛ́ uwā āa, cɛ́ɛ́ é géē ba uwá ugóolu (oje ɔdɔ), oje nɛhɛ́ mɛ́mla īlī. Ācɛ kú Ísrɛ̄lu a géē bī ɔdā nēe bá ā le yá ayí uwā nɔ̄nyīlɔ mɛ́mla ayí uwā nɔ̄nyā ifa. É klla í kpó agbénú kú Íjīpiti kpó nyɔ̄ mla iyī uwā.

Currently Selected:

OŌYƐBƐ̄CƐ 3: IFBCL

Highlight

Copy