OŌYƐBƐ̄CƐ 8

Abaná le fu klɛ́ɛcɛ

1Anɔ́ɔ Óndú ā da Umósīsi kahíníī, “Nyɔ̄ ɛgiyí Uféro ká ā da ɔ́ ka Óndú ā kahíníī, ‘Mā ācɛ ɔlɛ́ um tá kéē nyɔ̄ gaá lɛ ɛ̄gbā gbā um. 2Amáŋ, ɔ́dāŋ ka á cɛ̄ lɛ uwá nyɔ̄ ŋ́, n géē yá ācɛ ɔlɛ́ uwɔ italā bū ɔwɛ kú aábaná ō tū klɛ́ɛcɛ ɛga dóódu kú ajɛ ɔlɛ́ uwɔ. 3Ísu kú Unáyilu ā géē cē aábaná klá ɛcɛ nēe géē pɛ́ ga ipú agblɔ̄cɛ́ kú ɔlɛ́ uwɔ, ipú inu ogbiyɔ̄lā kú uwɔ, ipú ɔlɛ́ kú aígabɔ̄ mɛ́mla ɔlɛ́ kú ācɛ ɔlɛ́ uwɔ. É kōō í pɛ́ ga ipú ocíbú ō yá igbō kú uwɔ dúú. 4É géē tómbili pla uwɔ mɛ́mla ācɛ ɔlɛ́ uwɔ mɛ́mla odúúdú aígabɔ̄ kú ɔlɛ́ uwɔ.’”

5Anɔ́ɔ Óndú ā da Umósīsi kahíníī, “Da Árɔ̄ni kóō kwú okwutɛ kú nū ā ú nāndaa ce eyī ísu, áyɔ́kpá nɛ̄ŋcɛ́, njɔlɔ mɛ́mla obugā, kéē tū abaná klɛ́ɛcɛ, cɛ́ɛ́ kéē klá ajɛ kú Íjīpiti.” 6Anɔ́ɔ Árɔ̄ni lɛ okwutɛ kú nū nā pīya cíla éŋkpɔ̄ dóódu kú Íjīpiti á. Anɔ́ɔ aábaná le tū klɛ́ɛcɛ wā í klá odúúdú ajɛ ā. 7Amáŋ, ācɛ ō yá imabɔ̄ kú Íjīpiti ā, le abaná tū wā í klá ajɛ kú Íjīpiti dúúdú fíyɛ́ ɛ́gɛ́nɛ̄ Árɔ̄ni yá ā.

8Uféro lɛ Umósīsi mɛ́mla Árɔ̄ni kpó hīgwú, anɔ́ɔ ó kahíníī, “Aá lɛ ɔkɔ gbā lɛ Ɔwɔicō kóō kwú aábaná ā ú kpó ŋmá ɛgiyí um mɛ́mla ācɛ ɔlɛ́ um. N géē cɛ̄ ká ācɛ kú Ísrɛ̄lu kéē nyɔ̄ í lɛ ɛya gwó lɛ Óndú ā, Ɔwɔicō kú uwā.” 9Umósīsi tá ɔ̄ ohi kahíníī, “Ó géē he um ɔtū nɛ̄hi ká n̄ lɛ ɔkɔ gbā ohígbú uwɔ. Amáŋ kwú eko nɛ̄ n géē gbɔ̄kɔ lɛ Óndú ā ohígbū uwɔ, aígabɔ̄ mɛ́mla ācɛ ɔlɛ́ uwɔ. Cɛ́ɛ́ aábaná í mɛ ŋmá ajɛ nɛ̄ odóódu í gáā hile gɛ ŋ́ ayíka ipú ísu kú Unáyilu ōfōōfūnū.” 10Uféro tá ɔ̄ ohi kahíníī, “Le ɔkɔ gbā lɛ Óndú ā ohígbū um óócí” Umósīsi kahíníī, “N géē gbɔ̄kɔ ohígbū uwɔ óócí ɛ́gɛ́nɛ̄ a ka ā, cɛ́ɛ́ kú ā lɛ jé ka Ɔwɔicō ɔhá dúúmā í gla Óndú ā, Ɔwɔicō kú alɔ ā ɛ́ɛ́ gɛ ŋ́. 11Aábaná ā géē pɛ́ nyɛ̄ɛ̄ ŋmá ɛgiyí uwɔ. É géē hile ipú ísu kú Unáyilu ā ōfōōfūnū.” 12Anɔ́ɔ Umósīsi mɛ́mla Árɔ̄ni nyɛ̄ɛ̄ ŋmá ɛgiyí Uféro á. Anɔ́ɔ Umósīsi le ɔkɔ gbā lɛ Ɔwɔicō, ohígbū aábaná nɛ̄ ó tū klá Uféro, ɔcɛ́ ā. 13Óndú ā le yá ɛ́gɛ́nɛ̄ Umósīsi gbɔ̄kɔ lɛ̄ ā. Aábaná ā lɛ pɛ́ gekwú ŋmá agblɔ̄cɛ́ kú Uféro mɛ́mla ipú ɔlɛ́ kú aígabɔ̄ mɛ́mla ɔlɛ́ kú ācɛ kú Íjīpiti ā. 14Anɔ́ɔ ācɛ kú Íjīpiti ā lɛ uwá tīkwū klá ɔhá gídígbóó á.

15Eko nɛ̄ Uféro má ka aábaná ā le pɛ́ gekwú ɛɛ́ mā, ó lɛ ɔtū kú nū yá lɔfú kpɔ́. Anɔ́ɔ ó jāhɔ̄ lɛ ɛlā kú Umósīsi mɛ́mla Árɔ̄ni ŋ́ kpɔ́ á, ɛ́gɛ́nɛ̄ Óndú ā tɛtɛ ka ā.

Ɛlá

16Anɔ́ɔ Óndú ā da Umósīsi kahíníī, “Lɛ da Árɔ̄ni kóō lɛ okwutɛ kú nū fíyajɛ. Cɛ́ɛ́ ka úmúlá kú odúúdú ajɛ kú Íjīpiti ā kóō kwú pīya ɛlá.” 17Anɔ́ɔ Árɔ̄ni le okwutɛ kú nū ā fīyajɛ á. Anɔ́ɔ odúúdú úmúlá kú ajɛ kú Íjīpiti ā kwú pīya ɛlɛ́ɛ́lá. Ɛlá ā kē le tū klá odúúdú ācɛ mɛ́mla aɛ́bɛ́ á. 18Ācɛ ō yíimabɔ̄ kú Íjīpiti ā, cēyītīkwū kéē lɛ ɛlá kú uwā tū klá ɛcɛ, amáŋ é yá ɔ̄ glá ŋ́. Anɔ́ɔ ācɛ mɛ́mla aɛ́bɛ́ ā kwú pīya ɛlɛ́ɛ́lá. 19#Ulúk 11.20Anɔ́ɔ ācɛ o yíimabɔ̄ ā lɛ tá ɛgiyí Uféro gáā da ɔ́ kahíníī, “Ɔwɔicō abɔ̄yī nū yá ɛ̄nyā á.” Amáŋ ɔtū kú Uféro le lɔfu kpɔ́. Ó jāhɔ̄ lɛ Umósīsi mɛ́mla Árɔ̄ni ŋ́ kpɔ́, ɛ́gɛ́nɛ̄ Óndú ā tɛtɛ ka lɛ ā.

É le iju tū klɛ́ɛcɛ

20Óndú ā da Umósīsi kahíníī, “Cāŋjɛ ɔ̄cɔ̄ɔ̄cī ká ā gaá gbēyī Uféro ɛga nɛ̄ ó wā ī yɛ ga ɔkpá ā, kú ō da ɔ́ kahíníī, ‘Ɛ́gɛ́nɛ̄ Óndú ā ka lɛ ā yɔ̄ á, mā ācɛ ɔlɛ́ um tá kéē nyɔ̄ gáā lɛ ɛ̄gbā gbā um ipú ígbíli. 21N pi uwɔ ahɔ̄ ka, ɔ́dāŋ́ ka á cɛ̄ lɛ uwá nyɔ̄ ŋ́, n géē yá uwɔ italā o ŋmá lɛ ō tū ɔ́wá kú iju klá awɔ, aígabɔ̄ kú ɔlɛ́ uwɔ mɛ́mla ācɛ ɔlɛ́ uwɔ. Aíju géē tū ɔlɛ́ kú ācɛ kú Íjīpiti mu. É klla í klá ɛga dóódu kú ajɛ ā. 22Amáŋ, n géē lɛ ajɛ kú Ugóssɛn, ɛga nɛ̄ ācɛ ɔlɛ́ um lā ā cētá. Ɔ́wá kú aíju dúúmā í gáā ga abɔ́ɔ ŋ́. N géē yá lɛ ā cɛ́ɛ́ ká ā jé ka ami nōo wɛ Óndú ā yɔ̄ ī yúklɔ́ ipú ajɛ nyā á. 23Ɔwɛ ɛ́gɛ́nyā nɛ̄ n géē kɔ̄ ācɛ ɔlɛ́ um ŋmá ācɛ ɔlɛ́ uwɔ á. #8.23 ɔkpá ō pīyabɔ̄ kú íkée oōkɔ̄, ācɛ Uhíbru oōfūla. Úklɔ́ ō hídáagó nyā í yá óócí.’” 24Anɔ́ɔ Óndú ā le yá lɛ aá. Ó le ɔ́wá kú aíju tū klá inu kú ɔlɛ́ ɔcɛ́, Uféro mɛ́mla inu kú aígabɔ̄ kú ɔlɛ́ nū, mɛ́mla odúúdú ajɛ kú Íjīpiti. Aíju ā le ífi bī wā odúúdú ajɛ kú Íjīpiti.

25Anɔ́ɔ Uféro le Umósīsi mɛ́mla Árɔ̄ni hīgwú. Ó da uwá kahíníī, “Aá nyɔ̄, kú aá gaá lɛ ɛya gwó lɛ Ɔwɔicō kú aá ipú ajɛ kú Íjīpiti ā. 26Amáŋ, Umósīsi tá ɔ̄ ohi kahíníī, “Ó lɔhi ō yá lɛ ā ŋ́. Ohígbū ka ɔdā nɛ̄ alɔ gáā bī gwɛ́ɛya lɛ Óndú ā, Ɔwɔicō kú alɔ ā, wɛ ɔdēēlihɔ kú ācɛ kú Íjīpiti. Ɔ́dāŋ́ ka alɔ gbɔɔ́ ō bī ɔdēlihɔ kú ācɛ kú Íjīpiti ā gwɛ́ɛya ipéyī uwā, é í tá ɛcɔ̄ klá alɔ. 27Alɔ géē ga iyāwu kú ɛ̄cī ɛtá ga ipú ígbíli ā piíí, cɛ́ɛ́ kú ālɔ̄ gáā lɛ ɛya gwó lɛ Óndú ā, Ɔwɔicō kú alɔ, ɛ́gɛ́nɛ̄ ó da alɔ lɛ ā.”

28Uféro tá uwā ohi kahíníī, “N géē cɛ̄ lɛ aá nyɔ̄ gáā gwɛ́ɛya ā lɛ Óndú ā, Ɔwɔicō kú aá, ipú ígbíli. Amáŋ aá gáā nyɔ̄ ligbó ŋ́. Aá lɛ ɔkɔ gbā lɛ Ɔwɔicō ohígbū um mɛ́ɛnɛ.”

29Anɔ́ɔ Umósīsi da ɔ́ ka, “Ɔkwɔɔkwu nɛ̄ n nyɛ̄ɛ̄ ŋmá ɛgiyí uwɔ, n géē gbɔ̄kɔ lɛ Óndú ā, cɛ́ɛ́ óócí, aíju ā í n hī uwɔ, aígabɔ̄ kú ɔlɛ́ uwɔ mɛ́mla ācɛ ɔlɛ́ uwɔ tá. Amáŋ ā híī plla alɔ igbɛ́ɛ̄nyā kú ā lɛ ācɛ ā oōnyɔ̄ gaá gwɛ́ɛya lɛ Óndú ā ci gɛ nóó.”

30Umósīsi nyɛ̄ɛ̄ ŋmá ɛgiyí Uféro, le ɔkɔ gbā lɛ Óndú ā a. 31Óndú ā le yá ɛ́gɛ́nɛ̄ Umósīsi gbɔ̄kɔ lɛ ā. Ó kwú ɔ́wá kú aíju ā ú kpó ŋmá ɛgiyí Uféro, aígabɔ̄ mɛ́mla ācɛ ɔlɛ́ nū. Iju ékpónú í hile ŋ́. 32Amáŋ, Uféro le ɔtū kú nū yá lɔfú kpɔ́. Ó cɛ̄ lɛ ācɛ kú Ísrɛ̄lu ā nyɔ̄ ŋ́.

Currently Selected:

OŌYƐBƐ̄CƐ 8: IFBCL

Highlight

Copy