OŌYƐBƐ̄CƐ 9

Ikwú kú ɛbɛ́ ɔlɛ́

1Anɔ́ɔ Óndú ā da Umósīsi kahíníī, “Nyɔ̄ ɛgiyí Uféro, ká ā da ɔɔ́ ka, ‘Ɛ́gɛ́nyā nɛ̄ Óndú ā, Ɔwɔicō kú ācɛ Uhíbru ā ka á, mā ācɛ ɔlɛ́ um tá kéē nyɔ̄ gáā lɛ ɛ̄gbā gba um. 2Ɔ́dāŋ́ ka a tá ō cɛ̄ lɛ uwá nyɔ̄, nāa bī uwā kpɔ́, 3n géē yá uwɔ italā o ŋmá lɛ o tū ōcē obɔ̄bí klá odúúdú ɛbɛ́ kú aá. Kwu aɔ́nya, aíjakī, aɛ́na mɛ́mla aálá, aínyankwūlūmī mɛ́mla aɛ́wū kú aá. 4Amáŋ, n géē lɛ aɛ́bɛ́ kú ācɛ kú Íjīpiti mɛ́mla ācɛ kú Ísrɛ̄lu ā kɔ̄ ɛyɛ́ɛ́yí hī iyí uwā tá. Aɛ́bɛ́ dúúmā nēe wɛ ákú ācɛ Ísrɛ̄lu ā í gáā kwú ŋ́. 5Ami nōo wɛ Óndú ā lɛ óócí tū kóō wɛ eko nɛ̄ n géē yá ɔdā nyā.’”

6Ɔŋmá ɔcī nū, Óndú ā lɛ yá ɛ́gɛ́nɛ̄ ó ka ā. Odúúdú aɛ́bɛ́ kú ācɛ kú Íjīpiti ā le pɛ́ gekwú. Amáŋ, ɛbɛ́ ékpónú kú ācɛ kú Ísrɛ̄lu ā í kwú ŋ́. 7Uféro le ɔ̄kā kú ɔdā nōo yá ā da, anɔ́ɔ é da ɔ́ ka ɛbɛ́ ékpónū kú ācɛ Ísrɛ̄lu ā í kwú ŋ́. Amáŋ Uféro le ɔtū kú nū yá lɔfú kpɔ́, ó cɛ̄ lɛ ācɛ kú Ísrɛ̄lu ā nyɔ̄ ŋ́.

Ipi Ínálēgbé

8Anɔ́ɔ, Óndú ā da Umósīsi mɛ́mla Árɔ̄ni kahíníī, “Lɛ abɔ̄ fú ewo ŋmá ɛga o pá ɛtɛ́ ā. Umósīsi gaá lɛ abɔ̄ fú ɔ̄ gicō ipéyī Uféro á. 9Ó géē je pahīla tū odúúdú ajɛ kú Íjīpiti bɛ̄ɛka úmúlá ō cīla mɛlíí ā, cɛ́ɛ́ ɛga dóódu nɛ̄ úmúlá ā í nyɔ̄ ā, ó géē je pīya ipí ínálēgbé nōo géē je pīya ipí o lokónu. Ó í ce ācɛ dóódu mɛ́mla ɛbɛ́ dóódu kú ajɛ kú Íjīpiti.” 10#Mafú 16.2Anɔ́ɔ é lɛ ewo fú ŋmá ɛga o pá ɛtɛ́ ā, é háyi ipéyī Uféro, anɔ́ɔ Umósīsi le ɔ́ tá gicō á. Ó kwú pīya ipí ínálēgbé nōo wā í ce odúúdú ācɛ mɛ́mla ɛbɛ́ kú ācɛ Íjīpiti. 11Ācɛ o yíimabɔ̄ kú Íjīpiti ā í hayi iyɔ̄bū Umósīsi glá ɛ́ɛ́ gɛ ŋ́, ohígbū ipí ínálēgbé ā. Ohígbū ka ínálēgbé ā ce uwá abɔ̄yī uwā dúú ɛ́gɛ́nɛ̄ ó ce odúúdú ācɛ kú Íjīpiti ā. 12Amáŋ, Óndú ā lɛ ɔtū kú Uféro yá lɔfú kpɔ́, anɔ́ɔ Uféro í jāhɔ̄ lɛ uwá ŋ́ má, ɛ́gɛ́nɛ̄ Óndú ā ka lɛ Umósīsi lɛ ā.

Ɔwɔ ō wɛ́ɛcɔ̄

13Óndú ā da Umósīsi kahíníī, “Cāŋjɛ ɔ̄cɔ̄ɔ̄cī óócí ká ā gáā jīla Uféro eyī, cɛ́ɛ́ ká ā da ɔ̄ ka Óndú ā, Ɔwɔicō kú ācɛ Uhíbru ā ka, lɛ ɛga je lɛ ācɛ ɔlɛ́ um kéē nyɔ̄ í lɛ ɛ̄gbā gbā um. 14Eko nyā ā, ń gáā yá aígabɔ̄ kú uwɔ mɛ́mla ācɛ ɔlɛ́ uwɔ ōfōōfū uwā italā ɛ́ɛ́ gɛ ŋ́, amáŋ n géē yá awɔ abɔ̄yī uwɔ italā dúú, o yá kú ā lɛ jé ka ɔ̄cɛ dúú í lɛbɛ̄ɛka ami ā ipú odúúdú ɛcɛ nyā ŋ́. 15Ɔ́dāŋ ka n lɛ abɔ̄ je gicō lɛ ōcē obɔ̄bí tū klá awɔ mɛ́mla ācɛ ɔlɛ́ uwɔ nɛɛ, á géē yɛ í kwú yíífi dúúdú ŋmá ajɛ. 16#Uróm 9.17O yá ɛ́ɛ́ ká n̄ lɛ ɔfú kú um mafú gā uwɔ ā, cɛ́ɛ́ kú odúúdú ɛcɛ kéē lɛ ofu kú ɔfú kú um pó ā, yá ɛ́ɛ́ nɛ̄ habɔ̄ uwɔ tá yēeyī á. 17A klá yɔ̄ ī yá ɔbɔ́ɔcɛ tú ācɛ ɔlɛ́ um kpɔ́. Á cɛ̄ lɛ uwá nyɔ̄ ŋ́. 18Ɛpléeko mā óócí n géē tū ɔwɔ o wɛ́ɛ́cɔ̄ wāajɛ, nɛ̄ ɛdɔ nū í yā jééjē ɛ́ɛ́ ŋ́ ipú ɔ̄kā ígbílé kú ācɛ Íjīpiti. 19Abālɔbányā ā, lɛ ɛhɔ̄ tū kéē lɛ odúúdú aɔ́dāajɛ kú uwɔ mɛ́mla odúúdú aɔ́dā o hile nɛ̄ a lɛ bá ɛcɛ ā kpó tū ipú áklɔ̄kpɛ. Ɔwɔ o wɛ́ɛ́cɛ̄ í yā klá aɛ́bɛ́ nēe bá ɛcɛ nēé kpó wā ɔlɛ́ ŋ́ mā, odúúdú uwā géē pɛ́ kwú.’” 20Aígabɔ̄ kú ɔlɛ́ ɔcɛ́ ā le ufi yá ohígbū ɔdā nɛ̄ Óndú ā ka ā, anɔ́ɔ é le aɔ́fiyɛ mɛ́mla aɛ́bɛ́ kú uwā kpó tū ipú inu. 21Amáŋ ācɛ nēé lɛ ɛlá wu ahɔ̄ nɛ̄ Ɔwɔicō pi uwá ŋ́ mā, habɔ̄ aɔ́fiyɛ mɛ́mla aɛ́bɛ́ kú uwā bá ɛcɛ.

22Anɔ́ɔ Óndú ā da Umósīsi kahíníī, “Lɛ abɔ̄ kú uwɔ nā kwu ɔkpáncō, ká ɔwɔ o wɛ́ɛcɔ̄ kóō yā klá odúúdú ācɛ, kwu ɛbɛ́ mɛ́mla ɔcí kú odúúdú ajɛ kú Íjīpiti.” 23Anɔ́ɔ Umósīsi lɛ okwutɛ kú nū miya kwu icō á. Anɔ́ɔ Óndú ā, le ɔwɔ o wɛ́ɛcɛ̄ mɛ́mla akpáabana tū kóō gbo wāajɛ. 24#Mafú 8.7; 16.21Ɔwɔ o wɛ́ɛ́cɛ̄ nɛ̄hi mɛ́mla ɔwɔ o límanya yɔ̄ i límanya ŋmá amu ga ánú. Ó wɛ ɛdɔ nɛ̄ ɛdɔ kú nū í yɔ̄ jééjéē ipú ɔ̄kā kú ígblé kú ācɛ Íjīpiti ɛ́ɛ́ ŋ́. 25Ɛcɔ̄ ɔwɔ ā yā wā í klá ɔdā dóódu nēe bá ɛcɛ ā, odúúdú ācɛ mɛ́mla aɛ́bɛ́ wɛ dúú. Ó le ɛjɛ̄ɛ̄jī aɔ́dɛ̄hɔ̄ nɛ̄ bá ipú ɛhɔ̄ ā kpó ca tāajɛ kpɛ́m, ó klla le aɔ́cí kpó cē wāajɛ. 26Ajɛ kú Ugóssɛn, ɛga nɛ̄ ācɛ kú Ísrɛ̄lu bá ā ōfōōfūnū nɛ̄ ɛcɔ̄ɔwɔ ā í yā ŋ́ má.

27Uféro lɛ ɛhɔ̄ tū, í le Umósīsi mɛ́mla Árɔ̄ni hīgwú. Anɔ́ɔ ó da uwá kahíníī, “Igbɛ́nyā n le íne kú Ɔwɔicō bīya ɛɛ́. Óndú ā lé ɛpɔ̄hi á. Ami mɛ́mla ācɛ ɔlɛ́ um lɛ ɛpɔ̄bí lé. 28Lɛ ɔkɔ gbā lɛ Óndú ā ohígbū um, ohígbū ka akpáabana mɛ́mla ɔwɔ o wɛ́ɛcɔ̄ nyā jɛ̄ ɛɛ́. N géē cɛ̄ kú aá nyɔ̄. N gáā kwú aá klá ajɛ igbɔhá gɛ ŋ́.” 29Umósīsi da ɔ́ kahíníī, “Ɔkwɔɔkwu nɛ̄ n le bɛ̄cɛ ŋmá ipú igelī nɛ̄hi ɔlɛ́ ɔcɛ́ ā, n géē gbɔ̄kɔ lɛ Óndú ā. Akpáabana mɛ́mla ɔwɔ o wɛ́ɛcɔ̄ ā géē mɛ, cɛ́ɛ́ kú ā le jé ka ɛcɛ ā wɛ ákú Óndú ā. 30Amáŋ, awɔ mɛ́mla aígabɔ̄ kú ɔlɛ́ uwɔ ā, n jé ka aá yúufi Óndú ā, Ɔwɔicō ɛ́ɛ́ ŋ́.”

31Odúúdú aɔ́dɛ̄hɔ̄ nɛ̄ bá ī héepu mɛ́mla aɛ́nɛ̄ e bá ī nwūla kpɛ́m ā, kwú kpó yíífi ŋmáajɛ dúúdú. 32Amáŋ, odúúdu īkpɔ̄dɛ̄hɔ̄ nɛ̄ ó gē nwūla eko ŋ́ mā, í kē je yíífi ŋ́, ohígbū ka é gē nwūla igbīhāajɛ.

33Umósīsi nyɛ̄ɛ̄ ŋmá ɛgiyí Uféro ā, anɔ́ɔ ó le abɔ̄ je gicō le ɔkɔ gbā lɛ Óndú ā. Anɔ́ɔ akpáabana mɛ́mla ɔwɔ o wɛ́ɛcɔ̄ ā mɛ, ɔwɔ í klla yā ɛ́ɛ́ gɛ ŋ́. 34Amáŋ, eko nɛ̄ Uféro má ka, akpáabana mɛ́mla ɔwɔ o wɛ́ɛcɔ̄ ā ɔ́ɔ mɛ ā. Ó klla le íne bīya kpɔ́. Anú mɛ́mla aígabɔ̄ kú ɔlɛ́ nū le ɔtū kú uwā yá lɔfú kpɔ́. 35ɛ́gɛ́nɛ̄ Óndú ā tɛtɛ ka ā. Ó cɛ̄ lɛ ācɛ Ísrɛ̄lu nyɔ̄ ŋ́ kpɔ́.

Currently Selected:

OŌYƐBƐ̄CƐ 9: IFBCL

Highlight

Copy