OHÚTU 25

Ipɔ́ɔma kú Ébrahām ɔhá

(1 Úklɔ́ 1.32-33)

1Ébrahām lɛ ɔnyā ɔhā lɛ nɛ̄ iyē kú nū lē ka Ukɛtúra. 2Ó ma ayí nēe bá ā lɛ Ébrahām: Usímran, Ujɔ́kssan, Umédan, Umídiyan, Íssbāk mɛ́mla Ussúwa. 3Ujɔ́kssan wɛ ádā kú Ussɛ́ba mɛ́mla Udɛ́dan á. Ayí kú Udɛ́dan wɛ Assúrim, Ulɛ̄tussím, mɛ́mla Uleyúmim. 4Ayí kú Umídiyan wɛ Ɛfá, Ɛ́fa, Uhánɔ̄ku, Abída mɛ́mla Ɛ́ldaa. Odúúdú aɛ́nyā wɛ ayí kú Ukɛtúra. 5Ébrahām kwú ɔdā dóódu nōó lɛ ā ú kpó lɛ Áyísīki. 6Amáŋ, ó kpó ɔdā ɛhi lɛ ayí kú anyā ɔhá nōó lɛ ā. Eko nōó yēeyī kpɔ́ ɛ́ɛ́ mā, ó le uwá nū ŋmá ɛgiyí Áyísīki, ɔyí nū, ga ajɛ kú ɛnɔ̄ɔ̄cī.

Ikwū mla oōnyi kú Ébrahām

7-8Ébrahām wɛ iháyí ofu ahātá ce igwɛ́ɛhɔ̄ (175) le hīlókplícī nɛ̄ɛ̄nɛ̄hi ɛ́ɛ́ nōó kwú á. 9Áyísīki mɛ́mla Íssmɛ̄lu, ayí nū le ɔ́ nyi ikpámílī kú Umákpēla ipú ajɛ nōo yɔ̄ ɛnɔ̄ɔ̄cī kú Umámre nōo wɛ ákú Éfrɔn, ɔyí kú Usɔ́ha, ɔ̄cɛ Uhɛ́ti ā. 10#Ohút 23.3-16Ipú ajɛ nɛ̄ Ébrahām lá ŋmá ɛgiyí ācɛ Uhɛ́ti ā, nēé nyi anú mɛ́mla Usára ɔnyā nū á. 11Igbīhi ikwū kú Ébrahām ā, Ɔwɔicō le ɔhā hɛ́ ce Áyísīki, ɔyí nū, nōo lā pīyɛ “Obugā kú ɔ̄cɛ nōo má um āa.” (Ubiyelaháyīrɔ̄yi)

Ipɔ́ɔma kú Íssmɛ̄lu

12Ɛ̄nyā wɛ ipɔ́ɔma kú Íssmɛ̄lu, ɔyí kú Uhága, ɔfiyɛ nɔ̄nyā kú Usára, nōo ma lɛ Ébrahām ā. 13Ɛ̄nyā wɛ iyē kú ayí kú Íssmɛ̄lu ɛ́gɛ́nē é ma uwá lɛ ā á: Unɛ́báyɔ̄tu, Ukɛ́da, Adbíil, Umíbsam, 14Umíssma, Udúma, Umássa, 15Uhádādi, Utɛ́ma, Ujɛ́tɔ, Unáfissi, mɛ́mla Ukedɛ́ma. 16Aɛ́nyā wɛ ádáádā kú aípɔ́ɔma igwɛ́ɛpa ā á. É kē le iyē kú kpó ce aípɔ́lɛ́ mɛ́mla aɛ́ga nēé lā ipú aáklɔ̄kpɛ ā. 17Íssmɛ̄lu wɛ iháyí ofɛhīlī ce igwó ahāapa (137) ɛ́ɛ́ nōó kwú á. 18Ipɔ́ɔma kú Íssmɛ̄lu lā ɔtāhɛ̄ kú Uhavíla mɛ́mla Ussɔ́ɔ, ɛnɔ̄ɔ̄cī kú Íjīpiti, ɔwɛ o yɛ lɛyíkwu Asírīya. É lā ɛgɛyɛ́ɛ́yí ŋmá ipɔ́ɔma kú Ébrahām ɔhá.

É le Ísɔ mɛ́mla Ujékɔ̄pu ma

19Ɛ́gɛ́nyā nɛ̄ ɔ̄kā kú Áyísīki, ɔyí kú Ébrahām yɛ lɛ ā á. 20Áyísīki wɛ iháyí ofɛpa ɛ́ɛ́ nōó lɛ Urebéka, ɔyínɔ̄nyā kú Ubɛ́tūwɛlu, ɔ̄cɛ Arámu nōo ŋmá Umɛsopotámīya ā. Ulában wɛ ɔyínɛ́ nɔ̄nyīlɔ kú Urebéka á. 21Áyísīki le ɔkɔ gbā lɛ Ɔwɔicō lɛyíkwu Urebéka, ɔnyā nū, ohígbū koó wɛ ɔdɔma. Óndú ā le ɔkɔ nōó gbā ā pó, anɔ́ɔ Urebéka, ɔnyā nū, le ipú yɔ̄ á. 22Ayípɛ̄ nēe bá ipú kú nū ā bá ī nya mɛ́mla īyī uwā ipú kú nū. Anɔ́ɔ ó kahíníī, “Ɔdíyá nɛ̄ ɔdā ɛ́gɛ́nyā ī yá um āa?” Anɔ́ɔ ó le tá ɛgiyí Óndú ā gaá le ɔ̄kā da. 23#Uróm 9.12Anɔ́ɔ Óndú á da ɔ́ kahíníī,

“Éwo ɛpa bā ipū kú uwɔ̄ á;

A géē ma ācɛ nēe gé bɛ́yíkwu iyī ūwā.

Éyi géē lɔfú fíyɛ́ ɔhá ā;

Ɔnyākwɔ́cɛ ā géē cɛ̄ ɛnɛ̄ŋcɛ́ kú nū ɛhɔ́.”

24Eko ō mɔyí kú nū le yá, anɔ́ɔ ó le áplɛ́ ma á. 25Ɔyí kú aflɛ́yí nōo wɛ̄ɛcɛ ā wɛ ɔnɔ̄wá, odúúdú ɔkpíyē kú nū wɛ ɔnwɔ̄ɔ̄nwū bɛ̄ɛka awulú ō lɛnwū ā. Ohígbū ɔ́ɔmā, é kwú iyē ú ce ɔ́ ka Ísɔ. #25.25 Ísɔ: É je iyē nyā kóō we Usíyɛ, nōo je pīya iyē kú nɛ̄ ipɔ́ɔma kú Ísɔ lā igbīhājɛ ā; Usíyɛ lɛbɛ̄ɛka iyē nēé hī “ɔnwɔ̄ɔ̄nwū” okónu Uhíbru ā.” 26É le áplɛ́ ɔ́mpa ma wɛ̄ɛcɛ lɛ abɔ̄ flá tū ijēnyīkpó kú Ísɔ, ohígbū ɔ́ɔmā, é kwú ɔ̄ ú hī Ujékɔ̄pu. #25.26 Ujékɔ̄pu: Ɔkɔ kú iyē nyā lɛbɛ̄ɛka iyē kú “ijēnyīkpó” okónu Uhíbru ā. Áyísīki wɛ iháyí ofɛtá, eko nɛ̄ ɔnyā nū ma ayí ā lɛ ɔ́ ā.

Ísɔ kwū ɔnyākwɔ́cɛ kú nū ú lá

27Eko nɛ̄ ayípɛ̄ ā le jɛ̄ ā, Ísɔ kwú pīya ofītɛ́ nɛ̄hi, ɔ̄cɛ nōo tá ipácí eko dóódu. Amáŋ Ujékɔ̄pu wɛ ɔ̄cɛ nōo ī yɔ̄cíí, nōo gē klá ɔlɛ́ eko dóódu. 28Ísɔ he Áyísīki ɔtū fíyɛ́ á ohígbū ɛbɛ́ nōó gē ŋmó gé lɛ̄ ɔ́ kóō lé ā. Amáŋ Ujékɔ̄pu he Urebéka ɔtū fíyɛ́ á. 29Ɛ̄cī éyi, abɔ̄ Ujékɔ̄pu yɔ̄ ī he eje ā, Ísɔ pīyɛyí ŋmá ɔtɛ́ ipácí. Ɛmiyɛ yɔ̄ ī ŋmó ɔ̄. 30Anɔ́ɔ Ísɔ da Ujékɔ̄pu kahíníī, “Le eje nɔ̄wá nɛ̄ a he nyā je gā um ká n lé, ohígbū ka ɛmiyɛ gáā ŋmó um ɛɛ́”. 31Anɔ́ɔ Ujékɔ̄pu da ɔ́ kahíníī, “Kwú ɔnyākwɔ́cɛ kú uwɔ̄ ú lá gā um gbɔbū ɛ́ɛ́.” 32Anɔ́ɔ Ísɔ kahíníī, “N gáā kwú ɛɛ́, ile nyá nɛ̄ ɔnyākwɔ́cɛ ā í tū gā um gɛ?” 33#Uhíb 12.16Anɔ́ɔ Ujékɔ̄pu kahíníī, “Lɛ ɛka gbo gā um gbɔbū ka a géē je ukpɛ̄ kú ɔnyākwɔ́cɛ kú uwɔ ga um.” Ísɔ le ɛka gbo kwú ɔnyākwɔ́cɛ kú nū ú le Ujékɔ̄pu. 34Anɔ́ɔ Ujékɔ̄pu le igbō mɛ́mla eje nōó he ā je lɛ Ísɔ á. Ó le lé le enyi gwá, anɔ́ɔ ó cāŋjɛ nyɛ̄ɛ̄ kú nū á. Ɔwɛ ɛ́gɛ́nyā nɛ̄ Ísɔ leyī gwō ɔnyākwɔ́cɛ kú nū bónū á.

Currently Selected:

OHÚTU 25: IFBCL

Highlight

Copy