OHÚTU 39

Ujósɛ̄fu mla ɔnyā kú Upɔ́tīfa

1Eko nyā, ācɛ Íssmɛ̄lu ā kwú Ujósɛ̄fu ú ga Íjīpiti. Anɔ́ɔ é kwú ɔ̄ ú lá lɛ Upɔ́tīfa nōo wɛ igabɔ́ kú ɔlɛ́ ɔcɛ́, nōo klla wɛ otrɛ̄yí kú ācogbāajɛ kú agbla kú ɔcɛ́ ā. 2#Ācot 7.9Óndú ā yɔ̄ mɛ́mla Ujósɛ̄fu, anɔ́ɔ ó cɛ̄ lɛ ɔ́ jɛ̄ gɔbū ipú ɔdā dóódu nōó lɛ abɔ̄ kwu ɔ́ ā. Ó lā ɔlɛ́ kú ɔ̄cɛ Íjīpiti, ɔkpani nū 3Anɔ́ɔ ɔkpanī nū ā le má ka Óndú ā ɔ́ɔ yɔ̄ mla anú. Ka anú ɔ́ɔ yá ɛ́ɛ nɛ̄ ɔ́ɔ gē gɔbū ipú ɔdā dóódu nɛ̄ ɔ́ɔ gē yá ā á. 4Ucē kú Ujósɛ̄fu kwú he Upɔ́tīfa ɔtū nɛ̄hi, anɔ́ɔ ó kwú ɔ̄ ú yá ɔ̄cocɛ̄hɔ̄ kú abɔ̄yī nū á. Ó klla kwú ɔ̄ ú yá otrɛ̄yí kú ɔlɛ́ nū mɛ́mla ɛjɛ̄ɛ̄jī aɔ́dā nōó lɛ ā. 5Oŋmá eko nyā gɔbū ā, ohígbū Ujósɛ̄fu, Óndú ā le ɔhā hɛ́ ce odúúdú ɔdā nɛ̄ Upɔ́tīfa lɛ ɔlɛ́ nū mɛ́mla ɛhɔ̄ ɔlɛ́ nū ā. 6Upɔ́tīfa kwú ɛjɛ̄ɛ̄jī ɔdā nōó lɛ ā ú kpó tū Ujósɛ̄fu abɔ̄, anɔ́ɔ ɔdā dúúmā í wɛ ɛlā nū gɛ ŋ́, ń táafú ɔdōlé ōfōōfūnū. Ujósɛ̄fu jōklóbīya klla héyīfuú nɛ̄hi.

7Anɔ́ɔ eko kpiī ā, ɔnyā kú ɔkpani nū ā gbɔɔ́ ō hɔ́ɔkɔ Ujósɛ̄fu. Anɔ́ɔ ó gbɔɔ́ ō da ɔ́ kóō gwutá mla anúɔ á. 8Amáŋ Ujósɛ̄fu tá klla da ɔ́ kahíníī, “Mɔ́ɔ̄, ɔkpanī um ī lɛ ɛlá wu ɔdā dúúmā ɔlɛ́ nyā ɛ́ɛ́ gɛ ŋ́, ohígbū ka n yɔ̄ amānyā. Ó klla kwú ɔdā dóódu nōó lɛ ā ú kpó tū um abɔ̄. 9Íkwu dóódu nōó lɛ ɔlɛ́ nyā nɛ̄ n lɛ dúú á. Ó lɛ ɔdā dúúmā tayínū gā um ɔlɛ́ nyā ŋ́. Ń táafú ŋ́, awɔ nōo wɛ ɔnyā nū ā. Ɔwɛ nyá nɛ̄ n géē yá ɔdōbɔ̄bí ɛ́gɛ́nyā cɛ́ɛ́ ká n lɛ íne kú Ɔwɔicō bīya āā? 10Anɔ́ɔ nááná nōó gē da Ujósɛ̄fu ɛlā ɛcī ga ɛcī, ó cɔ̄kɔkpɛkɛ lɛ ɔ́ nyɔ̄ í gwutá mla anú ŋ́.

11Amáŋ, ɛ̄cī éyi, Ujósɛ̄fu le yɛ tá ipú inu gaá yúklɔ́ kú nū, ɔ̄cocɛ̄hɔ̄ dúúmā í yɔ̄ abɔ́ɔ ŋ́. 12Ɔnyā ā kwú abɔ̄ ú kwú úwé kú Ujósɛ̄fu, anɔ́ɔ ó da ɔ́ kahíníī, “Wā í gwutá mla um.” Amáŋ, Ujósɛ̄fu tá, le úwé ā plla wu ɔ́ abɔ̄. Anɔ́ɔ ó le kwu bɛ̄cɛ ŋmá inu á. 13Eko nōó má ka, Ujósɛ̄fu le úwé kú nū plla wu ɔ́ abɔ̄ klla le kwu bɛ̄cɛ ŋmá inu ā, 14ó le ācocɛ̄hɔ̄ kú nū ā hīgwú anɔ́ɔ ó da uwá kahíníī, “Aá má ɛnyā gā um ɛ́! Ɔ̄cɛ Uhíbru nyā nɛ̄ ɔbá um bī wā ɔlɛ́ ā yɔ̄ ī cá alɔ ɛcá. Ó wā ipú inu ɛgiyí um gaá hɛ́ um báajɛ, anɔ́ɔ n le ɔkɔcɛyí le ɛgba dɛ̄ ɛ́gɛ́nɛ̄ ɔfú kú um jɛ̄ lɛ ā á. 15Eko nōó le pó ka n le ɔkɔcɛyí le ɛgba dɛ̄ ā, ó habɔ̄ úwé kú nū tá wu um abɔ̄, anɔ́ɔ ó le kwu bɛ̄cɛ ŋmá inu á.” 16Ɔnyā ā bī úwé ā jāā gbéeko nɛ̄ ɔbá nū gā ɔlɛ́. 17Ó le ɔ̄kā ékpónú ɔ́ɔmā ka ɔbá nū kahíníī, “Ɔfiyɛ kú uwɔ, ɔ̄cɛ Uhíbru nɛ̄ a bī wā ɔlɛ́ ā, wā inu ɛgiyí um gaá cá um ɛcá. 18Amáŋ, eko nɛ̄ n le ɛgba dɛ̄ gbōmgbōm ā, ó mā úwé kú nū tá wu um abɔ̄ le kwu bɛ̄cɛ ŋmá inu.”

19Eko nɛ̄ ɔkpani kú Ujósɛ̄fu le ɛlā nɛ̄ ɔnyā nū ka lɛ ɔ́ ā pó ā, ó le cɔ̄nū nɛ̄hi. 20Anɔ́ɔ ó le Ujósɛ̄fu kwú, kwú ɔ̄ ú tá agbá, ɛga nēé gē kpó aálagbá kú ɔlɛ́ ɔcɛ́ bá ā. Anɔ́ɔ Ujósɛ̄fu klá agbá abɔ́ɔ á.

21 # Ācot 7.9 Amáŋ, Óndú ā yɔ̄ mla Ujósɛ̄fu, klla le ɔhā hɛ́ ce ɔ́. Ó le yá kú ɛlā kú Ujósɛ̄fu kóō he otrɛ̄yí kú aálagbá ā ɔtū 22Anɔ́ɔ ó kwú ɔ̄ ú yá otrɛ̄yí kú aálagbá ohile ā, ɔdā dóódu nōo yá abɔ́ɔ ā yɔ̄ abɔ̄ kú Ujósɛ̄fu. 23Otrɛ̄yí kú aálagbá ā í gē leyīkwu ɛga dóódu nɛ̄ Ujósɛ̄fu gē leyīkwu ɔ́ ā ŋ́, ohígbū ka Ɔwɔicō le ɔhā hɛ́ ce ɛjɛ̄ɛ̄jī ɔdā dóódu nɛ̄ Ujósɛ̄fu yá ā.

Currently Selected:

OHÚTU 39: IFBCL

Highlight

Copy