ULÚKU 1
1
Ohígbū ɔdā nɛ̄ Ulúkú tɔ́kpá kú nū ā.
1Utiyófílɔ̄si, ɛ́jílá, ācɛ alɛwa lɔfú tīyē lɛ aɔ́dā nēe yá ɔtāhɛ̄ ālɔ̄ kpɛ́mm ā tá tāajɛ. 2Ɔdā nɛ̄ ācɛ nēe má aɔ́dā nēe yá ā ŋmá ajaajɛ klla bī ɔ̄ le tɔ́ɔna ā da alɔ ā nɛ̄ alɔ tá tāajɛ á. 3Ohígbū ɔ́ɔmā, abɔ̄ n lɛ eko tāajɛ lɛ ɔkwu ɔda nōo yá ā bū lɔɔlɔhi ŋmá ajaajɛ kú nū ā, n gbɛlá koó wɛ ɔdā olɔhi kú n̄ lɛ ɔ́ tá tāajɛ ɔgbɔɔgba gā awɔ. 4N tá ɔ̄ tāajɛ gā awɔ cɛ́ɛ́ kú ā lɛ odúúdú ɔkwɛ̄yi kú ɔdā nēé nwū uwɔ ā jé.
Alelékwū-ōtɛ̄hɔ̄ cokónu ɔyínɔ̄nyīlɔ lɛ Usɛkaríya.
5 #
1 Úklɔ́ 24.10
Ɛpléeko nɛ̄ Uhérɔ̄du, wɛ ɔcɛ́ kú Ujudíya ā, ɔ̄cogwɛ́ɛya éyi yɔ̄ nɛ̄ iyē nū lé ka Usɛkaríya. Ó wɛ ɔ̄cogwɛ́ɛya kú ígwu kú Ábīja. Ó lɛ ɔnyā, nōo ŋmá ipɔ́ɔma kú ācogwɛ́ɛya dúú. Iyē kú ɔnyā ā lé ka Ɛlísābēti. 6Uwá ɛplɛ́ɛpa wɛ ācɛ ɔkwɛ̄yi iyɔ̄bū Ɔwɔicō. É gē lɛ íne kú Ɔwɔicō Óndú ā tū, klla gē yá ɔdā nōó ka ā lɔɔlɔhi. 7É lɛ ɔyí dúúmā ŋ́, ohígbū ka Ɛlísābēti wɛ ɔdɔma, uwá ɛplɛ́ɛpa klla le kpó gbo okplící ɛɛ́.
8Ɛ̄cī éyi, Usɛkaríya yɔ̄ ī yúklɔ́ kú ɛya ō gwó kú nū ɛyí ede ipú Agblīihɔ-nɛ̄hi ā, ohígbū ka ɔgba wā í ce ɔ́ ɛ̄cī ɔ́ɔmā. 9Ɛ́gɛ́nɛ̄ ó wɛ uculo kú ācogwɛ́ɛya kéē tá ūlī ā, ūlī nēé tá ā lɛ ɔ́ kwú kóō ga Agblīihɔ-nɛ̄hi kú Óndú ā gáā yi ɔtulalī ɔlá ɛyí ede ā. 10Eko nōó yɔ̄ í yi ɔtulalī ɔlá ā, ɛwa kú ācɛ bá ɛcɛ bá yɔ̄ ī gbɔ̄ɔkɔ lɛ Ɔwɔicō. 11Alelékwū-ōtɛ̄hɔ̄ kú Óndú gā ɛgiyí nū, ó wā í háyi abɔ̄lɔ́ná kú ede ō yi ɔtulali ɔlá ɛyi nū ā. 12Eko nɛ̄ Usɛkaríya lɛ ɔ́ má ā, ó le hɛ́gilígilí mla ufi nɛ̄hi. 13Amáŋ alelékwū-ōtɛ̄hɔ̄ ā da ɔ́ kahíníī, “Ā híīī yúúfi ŋ́, Usɛkaríya, ohígbū ka Ɔwɔicō lɛ ɔkɔ nɛ̄ a gbā ā pó ɛɛ́. Ɔnyā awɔ Ɛlísābēti géē ma ɔyínɔnyilɔ éyi gā uwɔ. Kwú iyē ú ce ɔ́ ka Ujɔ́ni.
14A géē gwéeyē, ɔtū klla géē he uwɔ,
ācɛ alɛwa kē í gwéeyē mla uwɔ eko nēé lɛ ɔ́ ma.
15 #
Áluk 6.3
Ohígbū koó géē wɛ ɔ̄cɛ nɛ̄hi ipéyī Óndú ā.
Ó gáā gwá ejé ɔlamu ámāŋ ka ejé olɔfú dóódu ŋ́.
Gbɔbū ɛ́ɛ́ kéē kōō ma ɔ́ ā ɔfú kú Alelékwū Ihɔ géē mu ɔ́ iyē.
16Ó géē yá kú ayí alɛwa kú Ísrɛ̄lu kéē kwúcē wā ɛgiyí Óndú ā, nōo wɛ Ɔwɔicō kú uwā ā.
17 #
Umál 4.5,6 Ó géē wɛ ɔ̄cɛ nōo lɛ alelékwū mɛ́mla ɔfú bɛ̄ɛka ákú Ɛláyíja, ɔ̄comɛ́ɛbɛ nɛ̄ncɛ̄ ā.
Ó géē wā gbɔbū ɛ́ɛ́ nɛ̄ Óndú ā gáā wā ā.
Ó géē ka aádā gwó mɛ́mla ayí uwā kpɔ́. Ó géē yá kú ācɛ nēé géē lɛyítāajɛ lɛ aíne kú Ɔwɔicō ŋ́ mā ká gbɔɔ́ ō lɛyítāajɛ bɛ̄ɛka ācɛ okpaakpa ā.
Ó géē lɛ ācɛ nɛ̄ Ɔwɔicō fu lɛ iyī nū ā tútū gbēyī eko nōó í wā ā.
18Usɛkaríya da alelékwū-ōtɛ̄hɔ̄ ā ɔka kahíníī, “Ɔwɛ nyá nɛ̄ n géē jé ka ɛlā nyā wɛ ɔkwɛ̄yi āa? Ohígbū ka n le gbo okplícī ɛɛ́, ɔnyā um kē le hīlókplícī dúú ɛɛ́.” 19#Udan 8.16; 9.21Alelékwū-ōtɛ̄hɔ̄ ā tá ɔ̄ ohi kahíníī, “Ami wɛ Ugébríyɛ̄lu nōo ī háyi iyɔ̄bū Ɔwɔicō á. Anú tū um ɛhɔ̄ ká n̄ bī ɔ̄kōolɔhi nyā gé lɛ uwɔ á. 20Abɔ̄ á cɛ̄ ɛlā kú um ŋ́ mā, o ŋmá abālɔbányā ā, á gáā kɛlā glá ŋ́ jāā gbéeko nɛ̄ aɔ́dā nēe bá ā le yá le yɛ. Ohígbū ka ɛlā kú um géē cɛ̄ piíí eko nɛ̄ eko le yá.” 21Abɔ̄ ɛ̄nyā yɔ̄ ī yá ā, ācɛ nēe bá ī gbēyī Usɛkaríya ā le hídáagó ɛ́gɛ́nɛ̄ ó le gbojī ipú Agblīihɔ-nɛ̄hi ā. 22Amáŋ eko nōó le bɛ̄cɛ ā, ó kɛlā lɛ uwá glá gɛ ŋ́. Anɔ́ɔ é le jé koó lɛ odée má ipú Agblīihɔ-nɛ̄hi ā ɛɛ́. Anú abɔ̄yī nu gbɔɔ́ ō yábɔ̄ lɛ uwá abɔ̄ ó kɛlā lɛ uwá glá ŋ́ mā ā. 23Eko nōó lɛ úklɔ́ kú nū yá kwɛyí ipú Agblīihɔ-nɛ̄hi ā, ó kwúcē le tá ɔlɛ́ nū.
24Eko nɛ̄ ɛ̄cī nyā le yɛ ā, ɔnyā nū, Ɛlísābēti lɛ ipú yɔ̄. Ó kē le kwu tayínū ipú ínu ɔyā ɛhɔ̄. 25“Ó kahiníi, ɛ́gɛ́nyā nɛ̄ Óndú ā gbonɛnɛ ga um yɔ̄ dúú! Ó kwú um ŋmá uwēyī mɛ́mla ɛcá kú ɔdɔma ɛɛ́.”
Ugébrīyɛ̄lu, alelékwū-ōtɛ̄hɔ̄ ā cokónu lɛ Umerí koó géē ma ɔyínɔ̄nyīlɔ
26Ɔyā ɔ́mɛhīlī nɛ̄ Ɛlísābēti yīīpú ā, Ɔwɔicō lɛ Ugébrīyɛ̄lu, alelékwū-ōtɛ̄hɔ̄ ā tɛ̄hɔ̄ ga Unásārēti nōo wɛ éyi kú igelī kú Ugálīli ā. 27#Umát 1.18Ó kóō lɛ ɛhɔ̄ cɛ̄ lɛ ɔyínɔ̄nyā éyi nɛ̄ iyē nū wɛ Umerí. Ɔnyīlɔ éyi nɛ̄ iyē nū wɛ Ujósɛ̄fu, nōo ŋmá ipɔ́ɔma kú Udéfīdi, ɔcɛ́ ā cokónu ka anúɔ í lɛ Umerí. 28Alelékwū-ōtɛ̄hɔ̄ ā le tá ɛgiyí Umeri, anɔ́ɔ ó kahíníī, “N hokónu tū uwɔ! Ɔwɔicō kóō yɔ̄ mla awɔ nōo téeyī olɔhi kú nū ā. Ákú uwɔ lɔhi fíyɛ́ odúúdú ācɛnyā á.” 29Ɛlā nɛ̄ alelékwū-ōtɛ̄hɔ̄ ka ā lɛ Umerí ɔtū wuklíicō nɛ̄ɛ̄nɛ̄hi, anɔ́ɔ ó yɔ̄ ī gbɛlá ɔdā nōo wɛ ɛyí kú ɛdɔ kú okónu nēé hɛ́ tū ɔ̄ ā. 30Anɔ́ɔ alelékwū-ōtɛ̄hɔ̄ ā da ɔ́ kahíníī, “Ā yúúfi ŋ́, Umerí, ohígbū ka Ɔwɔicō le ɔhā hɛ́ ce uwɔ ɛɛ́. 31#Umát 1.21Á géē yīīpú, géē ma ɔyínɔ̄nyīlɔ éyi. Kwú iyē ú ce ɔ́ ka Ujísɔ̄si.
32 #
2 Usám 7.12,13,16; Ayis 9.7 Ó géē wɛ ɔ̄cɛ nɛ̄hi, é géē hī ɔ̄ ka Ɔyínɔ̄nyīlɔ kú Ɔwɔicō nōo lɔfú fíyɛ́ dúú ā.
Óndú ā, nōo wɛ Ɔwɔicō ā géē je ɔ́ cɔcɛ́ ɛ́gɛ́nɛ̄ ádáádā nū, Udéfīdi lé ā.
33Ó géē cɔcɛ́ í gbō ācɛ kú Ísrɛ̄lu piyóó. Ó géē cɔcɛ́ piyóó.
34Umerí da alelékwū-ōtɛ̄hɔ̄ ā kahíníī, “Abɔ̄ ɛ̄nyā géē yá lɛ glá ā? Ń kē jé ɔ̄cɛnyīlɔ dóódu jéjéē ɛ́ɛ́ ŋ́.” 35Alelékwū-ōtɛ̄hɔ̄ ā tá ɔ̄ ohi kahíníī,
“Alelékwū Ihɔ géē wā í ɛgiyí uwɔ,
cɛ́ɛ́ ɔfú kú Ɔwɔicō nōo lɔfú fíyɛ́ dúú ā géē wā í klá awɔ.
Ohígbū ɔ́ɔmā, ɔyí nɛ̄ a í ma ā géē tīihɔ,
é kē géē hī ɔ̄ ka Ɔyínɔ̄nyīlɔ kú Ɔwɔicō.
36Le jé ka ɔ́máapu uwɔ, Ɛlísābēti nɛ̄ ācɛ ka koó gáā ma ɔyí glá gɛ ŋ́ mā, yīīpú ɔyā ɛhīlī abālɔbányā. Anú nōo le hīlókplícī ɛɛ́ mā. 37#Ohút 18.14Ó lɛ ā ohígbū ka ɔdā dóódu í yɔ̄ nɛ̄ Ɔwɔicō í yá glá ŋ́ nɛɛ ŋ́.” 38Umerí tóohi kahíníī, “N wɛ ɔ̄cocɛ̄hɔ̄ kú Óndú ā nɛ. Óndú ā kóō yá mla um ɛ́gɛ́nɛ̄ a ka lɛ ā mɛ́ɛ́nɛ.” Anɔ́ɔ alelékwū-ōtɛ̄hɔ̄ ā nyɛ̄ɛ̄ á.
Umerí táaha ga ɛgiyí Ɛlísābēti
39Ɛ̄cī hɛ́tíipú lígíí, Umerí hápáápá le yɛ tá igelī éyi kú ɔlɛ́ ɛyí ɛfu kú Ujudiya. 40Ó le bēhé ga ɔlɛ́ Usɛkaríya anɔ́ɔ ó le okónu hɛ́ tū Ɛlísābēti á. 41Eko nɛ̄ Ɛlísābēti lɛ okónu nɛ̄ Umerí hɛ́ tū ɔ̄ ā pó ā, ɔyí nōo yɔ̄ ipú kú nū ā jíliyē lɔfú lɔfú. Anɔ́ɔ Alelékwū Ihɔ kwú Ɛlísābēti ú. 42Anɔ́ɔ ó dɛ̄gba tɛ́ɛcɛ gbōmgbōm kahíníī, “Ɔwɔicō lɛ ɔhā hɛ́ ce uwɔ fíyɛ́ ɔ̄cɛnyā ɔhá dóódu. Ó klla le ɔhá hɛ́ ce ɔyí nɛ̄ a géē ma ā. 43Ɔ̄nyɛ̄ nɛ̄ n wɛ ɛ́ɛ́ nɛ̄ ɔdā ɛ́gɛ́nyā ī wā ɛgiyí um ā, ka ká ɛ́nɛ́ kú Óndú um táaha wā í má um ā? 44Ohígbū ka ɔkwɔɔkwu nɛ̄ n le okónu nɛ̄ a hɛ́ ā pó ā, ɔyí nōo yɔ̄ ipú kú um ā, le jíliyē nɛ̄hi ohígbū éeyē. 45Ákú uwɔ lɔhi, awɔ nōo cɛ̄ kú ɔdā nɛ̄ Óndú ā cokónu ka anúɔ géē gā awɔ ā, ɔ́ɔ géē yá ɔ̄ ɔkwɛyi ā!
Umerí gwííjē cɛ̄tra Ɔwɔicō
46Umerí gwííjē kahíníī,
“N cɛ̄tra Óndú ā ŋmá odo kú um.
47Ɔtū kē he um ohígbū Ɔwɔicō nōo hɛ́ um tá ā.
48 #
1 Usám 1.11
Ohígbū koó lɛ eyīnyinyi kú ami,
ɔ̄cocɛ̄hɔ̄ kú nū nōó wɛ ɔdā dúúmā ŋ́ má ɛɛ́!
Oŋmá abālɔbányā gɔbū ā, ɛjɛ̄ɛ̄jī ayááyí géē hī um ka ɔ̄cɛ nɛ̄ Ɔwɔicō lɛ ákú nū yá lɔhi.
49Ohígbū ka Ɔwɔicō nōo lɔfú fíyɛ́ dúú ā lɛ ɔdā nɛ̄hi yá gā um,
ɔdā dóódu í kē tōo le gbla anú ŋ́.
50Ó gē ményinyi ācɛ nēe ī gbā ɔ̄ ɛ̄gbā ā
ŋmá ayááyí ga ayááyí.
51Ó bī ɔfú nɛ̄hi kú nū le ācɛ
oyɔ́bɔ́ɔcɛ mɛ́mla ojuju kú uwā fíyákátā.
52 #
Ujób 5.11; 12.19 Ó gē kpó aɔ́cɛ́ olɔfú nɛ̄hi bá ajɛ ŋmá ɔcɛ́ kú uwā,
klla ī je aólɛhɔ́cɛ gicō.
53Ó gē kpó aɔ́dā olɔhi lɛ ācɛ nɛ̄ ɛmiyɛ ī ŋmó uwā ā kéē lé,
klla ī nū ācɛ olɛ agbénú ā nyɔ̄ abɔ̄ áncā.
54Ó lɛ okónu nōó ce lɛ aádáádā alɔ ā tū,
anɔ́ɔ ó wā gaá lɛ ācɛ Ísrɛ̄lu nēe ī cɛ̄ ɔ̄ ɛhɔ̄ ā tábɔ̄ á.
55 #
Ohút 17.7
#
1 Usám 2.1-10
Ó le bla kwu okónu nōó ce
le Ébrahām mɛ́mla ayááyí kú nū ā piyóó!”
56Umerí yɔ̄ mla Ɛlísābēti ɔyā ɛtá anɔ́ɔ ó nyɛ̄ɛ̄ le tá ɔlɛ́ á.
Ɛ́gɛ́nɛ̄ é ma Ujɔ́ni oyúbatísim ā
57Eko nɛ̄ eko lɛ yá kú Ɛlísābēti kóō ma ɔyí nū ā, ó le ɔyínɔ̄nyīlɔ ma. 58Aóladógbe mɛ́mla aɔ́máapú nū le pó ka Óndú ā lɛ ɔdā olɔhi yá lɛ ɔ́ nɛ̄ɛ̄nɛ̄hi, anɔ́ɔ odúúdu uwā gwéeyē nɛ̄hi ohígbū ɔdā olɔhi nɛ̄ Ɔwɔicō yá lɛ ɔ́ ā á. 59#Ulīf 12.3Eko nɛ̄ ɛ̄cī ahāapa kú ɔyí ā le yá ā, é le pɛ́ wā gáā hɛ́ ɔyí ā apī. Anɔ́ɔ é gáā je ɔ́ hī Usɛkaríya nōo wɛ iyē ádā nū ā. 60Amáŋ ɛ́nɛ́ ɔyí ā kahíníī, “Ehée! Iyē kú nū í wɛ Ujɔ́ni.” 61Amáŋ é da ɔ́ kahíníī, “Aá kē lɛ ɔmáapú dúú nōo lé ka Ujɔ́ni ŋ́.” 62Anɔ́ɔ é lɛ abɔ̄ yá lɛ ádā ɔyí, da ɔ́ ɔ̄kā iyē nōó tíne ō je lɛ ɔyí nū ā.
63Usɛkaríya da uwá kéē lɛ usiléeti bī gé lɛ anúɔ, anɔ́ɔ ó le tá tū ɔ́ kahíníī, “Iyē kú nū lé ka Ujɔ́ni.” Anɔ́ɔ ɛjɛ̄ɛ̄jī uwā le kpó hídáagó á. 64Ɔkwɔkwu ɔ́ɔmā Ɔwɔicō le Usɛkaríya ɔkɔ nwūla, anɔ́ɔ ó gbɔɔ́ ō kɛlā, gbɔɔ́ ō tá Ɔwɔicō ahínyá á. 65Aóladógbe ā le kpó hídáagó, anɔ́ɔ ɛjɛ̄ɛ̄jī ācɛ nyɔ̄ gaá yɔ̄ ī da aɔ́mpa uwā ɛga dóódu kú ɔlɛ́ ɛyí ɛfu kú Ujudíya ā. 66Ɛjɛ̄ɛ̄jī ācɛ nēe pó ɔdā nōo yá ā lɛ ɔ́ tɔ́ɔtu bá gē dɔɔ̄kā kahíníī, “Ɛdɔ ɔ̄cɛ nyá nɛ̄ ɔyí nyā géē wɛ eko nōó le jɛ ā?” Ohígbū koó céyēgēdē ka ɔfú kú Óndú ā yɔ̄ mla anú.
Usɛkaríya cɛ̄tra Ɔwɔicō
67Alelékwū Ihɔ kwú Usɛkaríya anɔ́ɔ ó gboō cɛ̄ ɛ̄hɔ̄ kú Ɔwɔicō á kahíníī,
68“Ālɔ̄ tá Óndú ā, nōo wɛ Ɔwɔicō kú ācɛ Ísrɛ̄lu ā ahínyá!
Ó gā ɛgiyí ācɛ ɔlɛ́ nū gáā nya uwá nyatá.
69Ó lɛ ɔ̄cɛ olɔfú nɛ̄hi tū gé lɛ alɔ
ŋmá ipɔ́ɔma kú ɔ̄ccɛ̄hɔ̄ kú nū Udɛ́fīdi,
kóō lɛ alɔ nyatá. 70Ó yá ɛ̄nyā ɛ́gɛ́nɛ̄ ó cokónu lɛ ācomɛ́ɛbɛ eko nɛ̄ncɛ nōo yɛ ā,
71ka anúɔ géē nya alɔ tá ŋmá abɔ̄ kú aólɛlā kú alɔ, ŋmá abɔ̄ kú
odúúdú ācɛ nēe ī wɔ́tū alɔ ā.
72Ó ka anúɔ géē ményinyi aádáádā alɔ, cɛ́ɛ́ ó lɛ
okónu nōo ce á yájīla.
73Ó gbo ɔkpá cokónu lɛ ádáádā alɔ, Ébrahām,
74ka anúɔ géē hɛ́ alɔ tá ŋmá abɔ̄ kú aólɛlā kú alɔ
cɛ́ɛ́ kú alɔ híīī yúúfi ŋ́, abɔ̄ alɔ í cɛ̄ ɔ̄ ɛhɔ̄ ā.
75Ká ālɔ̄ lɔfú le tīihɔ gē yá ɔdā nōo le kpaakpa ɛgiyí nū, ɛ̄cī dóódu kú ipú oyeeyi kú alɔ.
76 #
Umál 3.1
Awɔ, ɔyí um, é géē hī uwɔ ka ɔ̄comɛ́ɛbɛ kú Ɔwɔicō nōo lɔfú fíyɛ́ dúú ā.
A géē gbɔbū lɛ Óndú ā, ká ā lɛ ɔwɛ nōó í yɛ tútū.
77Ká ā da ācɛ ɔlɛ́ nū ka Ɔwɔicō í je íne nɛ̄
é bīya ā yá uwā ɛhi cɛ́ɛ́ ó lɛ uwá nyatá.
78Ohígbū ka Ɔwɔicō kú alɔ gbonɛnɛ klla ī ményinyi alɔ.
Ó géē nya alɔ tá ɛ́gɛ́nɛ̄ ɛnɔ kú ɔcɔ̄ɔ̄cī gē fíyajɛ ī nū obū ŋmá ajɛ ā.
79 #
Ayis 9.2
Ó géē fíyajɛ ŋmá ɔkpáncō klá alɔ nēe bá ipú ajɛ odobū kú
ikwū, o yá ɛ́ɛ́ kóō lɛ alɔ bī jé ɔwɛ ga oyēeyī kú ɛbɔ́.”
80Ɔyípɛ̄ ā le jɛ, kwú yá ijímkpa ɔkpiye mla ipú alelékwū. Ó lā ipú ígbíli jāā gbó ɛ̄cī nōó wā ipú ācɛ kú Ísrɛ̄lu.
Currently Selected:
ULÚKU 1: IFBCL
Highlight
Share
Copy
Want to have your highlights saved across all your devices? Sign up or sign in
