ULÚKU 2

Ɛ́gɛ́nɛ̄ é ma kú Ujísɔ̄si ā

1Eko ɔ́ɔmā, Usisa Ɔgɔ́stɔ̄si, ɔcɛ́ nɛ̄hi kú Uróm ā lɛ íne tá ɛjɛ̄ɛ̄jī ajɔ̄ɔ̄cɛ́ kú nū ka odúúdú ācɛ kéē nyɔ̄ gaá lɛ iyē kú wā tá táajɛ. 2É ka ɔlɛ́ kú aflɛ́yí nyā eko nɛ̄ Ukwirínīyɔ̄si wɛ igbómína kú Usiríya ā. 3Ɛjɛ̄ɛ̄jī ācɛ le pɛ́ nyɔ̄ gáā tá iyē uwā tāajɛ, ɔnyɔ̄ɔnyɛ ga igelī nɛ̄ŋ́cɛ́ kú nū. 4Ujósɛ̄fu le yɛ ŋmá igelī kú Unásārēti, ajɛ kú Ugálīli ā, le tá igelī nēé hī ka Ubɛ́tlɛhɛ̄m kú Ujudíya, ɛga nɛ̄ Udɛ́fīdi, ɔcɛ́ ā ŋmá ā. 5Anú mɛ́mla Umerí, ɔyípɔ̄nɔ̄nyā nōó cokónu ka anúɔ í lɛ ā, nyɔ̄ gaá tá iyē tāajɛ á. Umerí kē yīīpú. 6Eko nēé bá Ubɛ́tlɛhɛ̄m ā, eko nɛ̄ Umerí í ma ɔyí ā le yá. 7Ó le ɔyí ɔ̄cɛnyīlɔ kú aflɛ́yí kú nū ma. Ó lɛ ɔ́ gbō mla īlī ō le gbō ɔyípɛ̄, kwú ɔ̄ ú gwutá ipú ikpati ō lɛ ɔdōlé kú ɛbɛ́ tū ɔ̄, ohígbū ka ɛga í jɛ̄ uwā inūgbɔga ŋ́.

Ācogbāálá le pɛ́ ī yɛ nyɔ̄ gaá má ɔyípobene ā

8Ācogbāálá bá ajɛ abɔ́ɔ, bá gē gbō aálá kú uwā ipácí otú. 9Anɔ́ɔ alelékwū-ōtɛ̄hɔ̄ kú Óndú ā le hɛ́bɛ̄cɛ ɔtāhɛ̄ uwā á, ofiyajɛ kú ɛgahi nɛ̄hi kú Óndú ā lɛ uwá yɛjīlatá bɛ̄ɛka ojuja ā. Ufí le uwá kwú nɛ̄ɛ̄nɛ̄hi. 10Amáŋ alelékwū-ōtɛ̄hɔ̄ ā da uwá kahíníī, “Aá híīī yúúfi ŋ́! N bī ɔ̄kā olɔhi wā gē lɛ aá, nōo géē yá kú odúúdu ācɛ kéē gwéeyē nɛ̄hi. 11É lɛ ɔ̄cɛ nōo géē nya aá tá ā ma lɛ aá ícɛ nyā, ipú igelī nɛ̄ Udéfīdi ŋmá ā ɛɛ́! Anú ā wɛ Ohɔ́ɔnyɛtá, nōo wɛ Óndú ā á. 12Ɔdā nōo géē cābɔ̄ lɛ aá ka ɔdā nɛ̄ aálelékwū-ōtɛ̄hɔ̄ ka ā wɛ ɔkwɛyi ā wɛ ka, aá géē má ɔyí obene éyi nēé lɛ īlī ogbo ayí obene gbō ɔ̄ iyē gwutá ipú ikpati o lɛ ɔdōlé kú ɛbɛ́ tū ɔ̄.” 13Anɔ́ɔ ikpííkpó ɔ́ɔmā, alɛwa kú alelékwū-ōtɛ̄hɔ̄ le pɛ́ wɛ̄ɛcɛ gaá gbɔɔ́ ō gwíijē í cɛ̄tra Ɔwɔicō tɔ̄há á.

14É gwó kahíníī,

“Ālɔ̄ cɛ̄tra Ɔwɔicō nōo yɔ̄ ɔkpáncō, ɛga olicō fíyɛ́ dúú ā.

Ɛbɔ́ kóō yɔ̄ lɛ ācɛ nɛ̄ ɛlā uwā hī ɔ́ ɔtū ā.”

15Eko nɛ̄ aálelékwū-ōtɛ̄hɔ̄ ā nyɛ̄ɛ̄ ŋmá ɛgiyí uwā kwúcē le pɛ́ tá ɔkpáncō ā, ācogbāálá ā da iyī uwā kahíníī, “Ālɔ̄ le yɛ tá Ubɛ́tlɛhɛm abālɔbányā gaá lɛ ɔdā nōo yá nɛ̄ Óndú ā yá kú ālɔ̄ le jé nyā má.” 16Anɔ́ɔ é páápá le yɛ á. Eko nēé lɛ Ujósɛ̄fu mɛ́mla Umerí pīyɛ̄ ā, é má bā ɔyí ā gwutá ipú ikpati ō lɛ ɔdōlé kú ɛbɛ́ tū ɔ̄. 17Eko nɛ̄ ācogbāálá ā lɛ ɔ́ má ā, é lɛ ɛjɛ̄ɛ̄jī ɔdā nɛ̄ aálelékwū-ōtɛ̄hɔ̄ ka lɛyíkwu ɔyípɛ̄ ā kpó ka lɛ uwá. 18Odúúdú ācɛ nēe pó ɛlā nɛ̄ ācogbāálá ā kā ā le kpó hídáagó. 19Umerí blakwu odúúdu aɔ́dā nēe bá nyā kpó lɛ ɔ́ kpó tū ɔtū kú nū gē gbafíyóó kwu uwá. 20Ācogbāálá ā kwúcē ī tá ipácí ɛgiyí aálá kú uwā, bá gē gwíijē ī kɛlā ī cɛ̄tra Ɔwɔicō ohígbū ɔdā nēé pó mɛ́mla ɛ̄nɛ̄ é má ā, ó lɛ ɛ́gɛ́nɛ̄ alelékwū-ōtɛ̄hɔ̄ da uwá kpɛ́mm ā.

É lɛ Ujísɔ̄si apī hɛ́

21 # Ulīf 12.3; Ulúk 1.31 Eko nɛ̄ ɛ̄cī ɔ́mahātá kú ɔyí ā le yá ā, nēé lɛ̄ ɔyípɛnɛ̄ńcɛ́ ā apī hɛ́ ā, é kwú ɔ̄ ú hī Ujísɔ̄si, iyē nɛ̄ alelékwū-ōtɛ̄hɔ̄ je kéē le ce ɔyí ā gbɔbū kéē yīīpú nū ā.

Ujósɛ̄fu mɛ́mla Umerí kwú Ujísɔ̄si ú ga Agblīihɔ-nɛ̄hi ā

22Eko nɛ̄ ɛ̄cī nɛ̄ Ujósɛ̄fu mɛ́mla Umerí cíkā ō gwu iyē ā le yá ā, ɛ́gɛ́nɛ̄ é tá ɔ̄ ipú íne kú Umósīsi ā, anɔ́ɔ é kwú Ujísɔ̄si ú ga Ujerúsālɛm gaá kwu ɔ̄ ú lɛ Óndú ā. 23#Oyɛb 13.2,12Ɛ́gɛ́nɛ̄ ɛlɔ̄ɔwɔicō ka lɛ ā “Odúúdú ɔyínɔ̄nyīlɔ aflɛ́yí dóódu mɛ́mla ɔyí ɛbɔ́lɛ́ aflɛ́yí dóódu nōo wɛ ɔbá, é géē hɛ́ ɔ̄ lɛ Óndú ā.” 24#Ulīf 12.6-8É le pɛ́ nyɔ̄ gaá je okóohō ɛpa ámāŋ ka ɔklɛbɛ́tɛ ɛpa gwɛ́ɛya ɛ́gɛ́nɛ̄ nēé ka ipú íne kú Óndú ā.

25Eko ɔ́ɔmā ɔ̄cɛ éyi yɔ̄ nɛ̄ iyē nū lé ka Usímīyɔn. Ó lā Ujerúsālɛm. Ó wɛ ɔ̄cɛ nōo gē yá ɔdā okpaakpa, klla ī le ojīlīmā ce Ɔwɔicō. Ó kē yɔ̄ ī gbēyī kú Ɔwɔicō kóō wā í lɛ ācɛ Ísrɛ̄lu nyatá. Alelékwū kú Ɔwɔicō ā yɔ̄ mla anú. 26Alelékwū Ihɔ lɛ okónu ce lɛ ɔ́ koó géē yēeyī kóō lɛ ohɔ́ɔnyɛtá nɛ̄ Ɔwɔicō cokónu ka anúɔ géē tɛ̄hɔ wā ā má. 27Alelékwū lɛ ɔ́ bī ga ipú Agblīihɔ-nɛ̄hi ā ɛ̄cī ɔ́ɔmā. Anɔ́ɔ eko nɛ̄ Umerí mɛ́mla Ujósɛ̄fu lɛ Ujísɔ̄si nōo wɛ ɔyí obene ā, bī wā ipú Agblīihɔ-nɛ̄hi kéē gaá lɛ uculo nɛ̄ íne ka kéē yá ā yá, 28Usímīyɔn mīyɛ ɔyí obene ā bɔ́tū anɔ́ɔ ó lɛ ahínyá tá Ɔwɔicō á, kahíníī,

29“Óndú um, abālɔbányā, okónu nɛ̄ a ce ā, a le ɔ́ yá ɛɛ́,

mabɔ̄ ɔ̄cocɛ̄hɔ̄ kú uwɔ tā kóō gekwú ɛbɔ́ mɛ́ɛ́nɛ.

30N bī ikpēyī kú abɔ̄yī um lɛ ɔ̄cɛ nōo géē nya ācɛ ɔlɛ́ uwɔ tá ā má ɛɛ́.

31Ohígbū ka ami abɔ̄yī um lɛ ohɔ́ɔnyɛtá nɛ̄ a je lɛ odúúdu ācɛ ā má ɛɛ́.

32 # Ayis 42.6; 49.6; 52.10 Ó géē bī ɔlá ofíyajɛ, nōo géē nya aílɔ́wá tá ā gé lɛ uwá.

Ó kē géē bī ojīlīma gé lɛ ācɛ ɔlɛ́ uwɔ, Ísrɛ̄lu.”

33Ádā kú ɔyí ā mɛ́mla ɛ́nɛ́ nū le kpó hídáagó ohígbū ɔdā nɛ̄ Usímīyɔn ka lɛyíkwu ɔyí uwā ā. 34Usímīyɔn da Ɔwɔicō kóō lɛ ɔhā hɛ́ ce uwá, anɔ́ɔ ó da Umerí, ɛ́nɛ́ Ujísɔ̄si kahíníī,

“Ɔwɔicō lɛ ɔyí nyā fu kóō yá kú ācɛ alɛwa kéē gwōnū,

ó klla kē í yá kú ācɛ kéē jegicō ajɛ kú Ísrɛ̄lu.

Ó géē lɛbɛ̄ɛka ɔdocābɔ̄ nōo géē pī ācɛ ahɔ̄ ā. Ācɛ alɛwa géē tá ɛlā kú nū.

35cɛ́ɛ́ ó géē kɛlā nēé gbo tayínū ā tɛ́ɛcɛ péee.

Ɔtūnōbí nɛ̄hi géē yá uwɔ lɛbɛ̄ɛka ɔkpacańgelí nōo gē gwu ɔ̄cɛ ā.”

36Ɔ̄cɛnyā ōhilókplícī nɛ̄hi, ɔ̄comɛ́ɛbɛ kú Ɔwɔicō éyi yɔ̄ nɛ̄ iyē nū le ka Ána, ɔyínɔ̄nyā kú Ufánūwɛlu nōo ŋmá ipɔ́ɔma kú Ássa. 37Ɔbá nū gekwú iháyí ɔ́mahāapa nēé lɛ iyī uwā ā. Ó lɛ iháyí ofɛnɛ cɛnɛ yá ɛɛ́ nōó húmáyī wɛ ɔnyowkú yɔ̄ mɛ́ɛ̄ á. Ó gē nyɛ̄ɛ̄ ŋmá Agblīihɔ-nɛ̄hi ā ŋ́. Kwu otú mɛ́mla ɔlɛ́ɛnɔ, ó gē gwōkónu ī gbɔ̄ɔkɔ klla ī gbō Ɔwɔicō ɛ̄gbā. 38Eko ɔ́ɔmā piíí ā, ó gā ipú Agblīihɔ-nɛ̄hi gaá lɛ ahínyá tá Ɔwɔicō. Ó klla le ɛlā ka ohígbū ɔyí obene ā lɛ odúúdu ācɛ nēe bá yɔ̄ ī gbēyī Ɔwɔicō kóō lɛ ācɛ kú Ujerúsālɛm nyatá ā.

Ujósɛ̄fu mɛ́mla Umerí pīyɛyí ga Unásārēti mɛ́mla Ujísɔ̄si

39 # Umát 2.23 Eko nɛ̄ Ujósɛ̄fu mɛ́mla Umerí lɛ odúúdú ɔdā nɛ̄ íne kú Óndú ā dɔɔ̄kā kéē yá ā yá kwɛyí ā, é kwúcē le tá ɔlɛ́ uwá Unásārēti kú Ugálīli. 40Ɔyí obene ā le jɛ̄, kwú pīya ijímkpa ɔkpíyē. Ó jéeyī nɛ̄hi, Ɔwɔicō klla yɔ̄ gē hɔ́hā ce ɔ́.

Ujísɔ̄si, nōo wɛ ɔyípɛ̄ ā le tá ipú Agblīihɔ-nɛ̄hi ā

41 # Oyɛb 12.1-27; Obla 16.1-8 Iháyí dóódu ádā mɛ́mla ɛ́nɛ́ kú Ujísɔ̄si gē ga Ujerúsālɛm ɔnū ucɛ kú onyatá. 42Eko nɛ̄ Ujísɔ̄si wɛ iháyí igwɛ́ɛpa ā, é le pɛ́ tá ɔnū ucɛ ā ɛ́gɛ́nɛ̄ é tɛtɛ gē yá ā. 43Eko nɛ̄ ucɛ ā mɛ ā, Ujósɛ̄fu mɛ́mla Umerí gbɔɔ́ ō ga ɔlɛ́, amáŋ Ujísɔ̄si, nōo wɛ ɔyípɛ̄ eko ɔ́ɔmā, le hɛ́tá igbīhi ipú Ujerúsālɛm. Ádā mla ɛ́nɛ́ nū í jé ka ɔyípɛ̄nɛ̄ncɛ́ ā le hɛ́tá igbīhi ŋ́. 44É gbɛlá koó yɔ̄ mla igwú kú ayípɛ̄nɛ̄ncɛ́ kú Unásārēti ohile ā nɛ̄ n, anɔ́ɔ é yāwu ɛ̄cī odumkúlu ā, anɔ́ɔ e gbɔɔ́ ō tíne nū ipú aɔ́máapú nū mɛ́mla ācɛ nēe jé uwā ā. 45É pīyɛ̄ ɔ̄ ŋ́, anɔ́ɔ é le cīgbīhi ga Ujerúsālɛm yɔ̄ ī tíne nū. 46Ɛ̄cī ɔ́mɛtá ā, é lɛ ɔ́ pīyɛ̄ ipú Agblīihɔ-nɛ̄hi ā, abɔ̄ o cīce mɛ́mla aítíca kú ācɛ Ujíyu, yɔ̄ gē jāhɔ lɛ uwa klla yɔ̄ ī da uwá ɔ̄kā. 47Odúúdú ācɛ nēe pó ɛ́gɛ́nɛ̄ ó bī ohílīpú yɔ̄ í le dɔɔ̄kā klla yɔ̄ ī cīla ɔ̄kā ā le kpó hídáagó. 48“Eko nɛ̄ ádā nū mɛ́mla ɛ́nɛ́ nū lɛ ɔ́ má ā, é le kpó hídáagó nɛ̄hi, anɔ́ɔ ɛ́nɛ́ nū da ɔ́ kahíníī, ɔyí ɔdíyá nɛ̄ a yá alɔ lɛ āa? Ádā awɔ mla um le jaŋ́dō húmáyī tíne awɔ.” 49Ó tá uwā ohi kahíníī, “Ɔdíyá nɛ̄ aá cíkā ō tíne um āa? Aá jé ka n cíkā o yúklɔ́ ipú inu ɔlɛ́ Ádā um ŋ́ nɛɛ? 50Amáŋ é jɛ́yí kú ɛlā nōo ka nyā ŋ́. 51Anɔ́ɔ Ujísɔ̄si kwúcē le tá Unásārēti mla uwá á. Ó lɛyítáajɛ lɛ uwá. Ɛ́nɛ́ nū le ɛjɛ̄ɛ̄jī aɔ́dā nēe bá ā kpó tū ipú ɔtū kú nū. 52#1 Usám 2.26; Aíit 3.4Ujísɔ̄si le jɛ le pīya ijímkpa. Ó jéeyi nɛ̄hi, ó klla téeyī olɔhi kú Ɔwɔicō mɛ́mla ákú alɛɛcɛ.

Currently Selected:

ULÚKU 2: IFBCL

Highlight

Copy