Odeyi 1

Ụhwẹ Ọnịnị ọnị Ijeesu wo oto anị yị Odeyi anị nịnị

1 # Irk 1.1-4 Itiyohwịrọsị, ọta amị, ini iwe ọnị mị vịdị chẹrẹ, ma raà chẹrẹ avaba ụkọrọ oni Ijeesu mẹ ọnịrị ịsị ọ sị zụ̀ aza hụụnị ụmẹ oni o si nyima ụkọrọ anị 2pooro ne tù ẹkụhị ana a va sị sị ọọ nọ ẹbẹẹba ịdị Ohomorihi. Dị a va sị ọọ nọ ẹbẹẹba, ộ sị ụkata Ụhwẹ Ọnịnị mẹ ọda yị odeyi anị ọnị ọ nyị. 3Ị́rẹma isu anị, ộ vana sị ẹngụ zụ̀ ezirẹma anị ụmẹ ọrụrụ-ọrụrụ, ọ mẹ̀ ha hụụnị isu. Ê re e mẹ ẹkụhị ẹbẹẹva ini oze ana ahịka ọza ọ yị zụ jị ọọ ịrẹka ka ọ yàra. Ộ kà a yị wa ịjọva Ohomorihi mẹmẹ yà. 4#Irk 24.49Ẹ mẹ̀ sị wara gụ, dị Ijeesu hú wa ụvọ, dị ọ ka, “Asị ụ hụrẹ Ijerusarẹmị nịnị! Ama jẹẹ zí ẹyịza ana Ada amị wo oto anị ka ọnị vaa sịị yị wụ nịnị anka m mẹ̀ vịdị kà a wụ nịnị. 5#Imt 3.11; Ịmk 1.8; Irk 3.16; Ịjọ 1.33Ịyẹẹyẹ, enyi obooro Ị́jọọnụụ̄ sịị mẹ ọyịhwenyii yị aza nị. Ama yị ẹwụ nịnị, ọ̀ọ na aa mẹ ẹkụhị chee, Ohomorihi vaa sị Ụhwẹ Ọnịnị hụụ wụ nịnị enyi.”

Ijeesu ộ nọ ẹbẹẹba

(Imt 28.16-20; Ịmk 16.14-19; Irk 24.49-52)

6Ẹkụhị ọnya, odeyi nịnị ệ kụ́ gụ ị́dị Ijeesu, dị ẹ họ̀ ọ ka, “Ananyị yị, ụmẹ óó si tù booro aanị ọnị ụ vaa mẹ ka Anisirẹrị nịnị ẹ̀ kụkụụ mẹ ịjọva ẹngụ ẹnịnị?” 7Dị Ijeesu kà a yị wa ka, “Ada amị ọ nyị ụkata ẹkụhị ọnịrị ụmẹ nị, ẹ yị nyị áawụ nịnị rị ka wa yẹ ụmẹ ọnọọ nịnị. 8#Imt 28.19; Ịmk 16.15; Irk 24.47,48Ịjị Ụhwẹ Ọnịnị ọ̀ọ ká wụ nịnị vẹ, ụ vaa dọ ụkata nịnị, dị ụ waa kà ịrẹyị amị nịnị Íjerusarẹmị ọnịrị ịnị avaba Ijudiya ne beri Ịsamarịya ọnịrị ịzị ẹhẹ na ta ịrẹsụ hi.” 9#Ịmk 16.19; Irk 24.50,51Ịjị ọ maanị sị ịrẹyị kà yị wa, dị Ohomorihi sị ọọ nọ ẹbẹẹba nị. Ẹ́nịnị mèe yii re e, di eguhi vú ọọ hi wa eyi nị.

10Íjeesu mè si hu, dị ẹnịnị sị eyi pe ẹbẹẹba gegege ee re, di e re ka aza ẹnị ẹẹva ene chire awuru ọvwọọvụ ka ệ jẹẹ pe ẹnị nị. 11Dị ẹ ka, “Ẹwụ nịnị Anigariri, sị ẹ vẹ dị ụ maanị jẹẹ, dị ụ và eyi hịrẹ ee re ẹbẹẹba nịnị? Ijeesu ọnọnị ana hụụ ịdị awụ nịnị nọ ẹbẹẹba aanị, ọ rẹ vanaa vẹ, anka u mè re e ka ộ hịrẹ nọ ẹbẹẹba nịnị aanị.”

Imataya ộ dọ Ijudasi ịrẹsụ

(Imt 27.3-10)

12Apositeri nịnị ệ hụụnị ataba ọnọọ ana aā hị́ Ataba Orivi varẹma nọ Ijerusarẹmị. Ẹhụụ achẹva ịmẹẹrị ọ vị rịrị Ijerusarẹmị nị. 13#Imt 10.2-4; Ịmk 3.16-19; Irk 6.14-16Ẹ mẹ̀ vẹ, dị ẹ nọ ịnị aku ịnị ọtụrọsa ịzị ẹnịnị hi nị. Aza ene hi ịzọọ yị: Ipita, Ịjọọnụ, Ijemiisi ọnịrị Andụrụ, Ihwiripi ọnịrị Ịtọmọsị, Ibatoromiwu ọnịrị Imatiwu, Ijemiisi ozi Arịhwịyọsị, Ịsayịmọnị ana aā hị́ Izirọtị (Anakwẹngụhi) beri Ijudasi ozi Ijemiisi. 14Dị ẹnịnị sị ayị yị ẹngụ, dị ẹyaa mẹ̀ aduwa pooro nị, beri anyẹnẹẹ ẹnyị ọnịrị Imeri ọnyị Ijeesu ọnịrị ẹyịnyara Ijeesu nịnị.

15Ịrẹma ẹkụhị chee tụ́ ọọ, ọdọwụ nịnị ệ kụ́ gụ. Ẹnịnị vị ẹhụụ ẹchịhịnọnyị avọọ. Dị Ipita kwẹẹtẹ jẹẹ ịnị akakana ẹnịnị, dị aa kà ịrẹyị nị, di o ka: 16“Ẹwụ nịnị ẹyịnyara amị, Ụhwẹ Ọnịnị ộ vịdị mẹ ka Idevidi ọ̀ chẹrẹ ịsa ini oze Ijudasi tụ́ ini Iwe Ohomorihi. Ijudasi ọnọọ ọ sị oze zụ̀ aza ana va za Ijeesu nị. Ẹ yị zụ nyị ka ịrẹyị ọnọọ ẹyị sẹ. 17Ijudasi vịdị vị ọza ịnya ịnị akakana ayị, â nyị ọọ ka ọ̀ nyị ụvọ tụ́ ịnị ụkọrọ ọnọnị. 18#Imt 27.3-8Ẹkẹhị oni Ijudasi dọ ịnị ụkọrọ odivi anị, ọ sị na hị́ ẹtẹ ọnya nị. Ịzọọ ọ yà jị hụrẹ ẹbẹẹba, dị ọ dà akamava, di irivu anị ká hi ẹhẹ nị. 19Avaba aza ana ra Íjerusarẹmị ệ wụ́ ọọ. Agụvị avọọ, dị ẹ kụkụ aa hị́ ẹtẹ ọnọọ ‘Akẹrịdama’ ịnị ẹkụra ẹnịnị nị, oni iruvo anị vị ‘Ẹtẹ anya’. 20#Ahẹ 69.25; Ahẹ 109.8Â vịdị chẹrẹ ẹ tụ́ ini iwe ahẹ ụga ka: ‘Irehi anị vị ana vaa vị osusu, ẹ yị nyị ọza ana vaa ra ịzọọ.’ A rẹ chẹrẹ ẹ ka: ‘Ọza ẹnẹsa ọ̀ dọ ọ ịrẹsụ ịnị ụkọrọ anị.’ 21#Imt 3.16; Ịmk 1.9; Irk 3.21; Ịmk 16.19; Irk 24.51Agụvị avọọ ịnị aza ẹnẹnị ana aa saasa yịị zị, ẹ́yịrị Ijeesu mẹ̀ hụrẹ aa jịnẹẹ zịịzị 22hụrẹ ụmẹ ọnị Ịjọọnụ hụrẹ aa sịị mẹ̀ ọyịhwọzenyi ne tù ụmẹ oni Ijeesu sị hụrẹ ịdị ayị nọ ẹbẹẹba, â vọrọ ka à nyị ọza ịnya ẹnẹ ẹyịrịị va zụụ dọ ivenu tụ́ ọọ ka Ijeesu ọ sị ha hụụnị isu.”

23Dị ẹ nyị aza ẹnị ẹẹva nị. Ọnyara ọ rị Ijosẹẹhụ ọnị ịrẹha anị ọsa rị Ibarisabasi nị, ịrẹha ẹtẹ anị ọ rị Ịjọsịtọsị nị. Ịrẹha ọsa ọ rị Imataya nị. 24Dị odeyi nịnị mẹ̀ aduwa dị ẹ ka, “Ananyị yị, wâ yẹ ayị avaba aza. Agụvị avọọ sị zụ̀ yị ọza ọnị ụ wàa nyị ịnị ẹnị ẹyịva ẹnẹnị 25ka ọ̀ dọ Ijudasi ịrẹsụ ịnị ụkọrọ odeyi ọnọnị oni Ijudasi sị hụụnị anị, dị ọ zị nọ ịzị ẹ vọrọ tụra a.” 26Ịjị ẹ maanị sị aduwa mẹ̀, di e sì ọza ọnị ọ vọrọ tụra nị. Dị ahịka Imataya ọ za nị, dị ẹ sị ọọ vaka ezirẹma ẹwụrọnya ana vọ nị.

Currently Selected:

Odeyi 1: EBTP

Highlight

Copy