Ọyịkụra 6

Ẹnẹyịmavara ô wo oto ẹdọha yị Anisirẹrị

1Dị Ẹnẹyịmavara va hị́ Imosiisi dị ọ ka: O vee re ịsị ọnị vaa sị mẹ Ihwarawo. Ọ kà ụkata-ụkata ọnị vaa sị za a ka ọ̀ hụrẹ wa ụvọ ka ẹ̀ jịnẹ hụrẹ Ijipiti nị. Ụkata-ụkata ọnị vaa sịị za a ka ọ̀ dụ wa jịnẹ nị. 2#Oyn 17.1; 28.3; 35.11; Kụra 3.13-15Di Ohomorihi rẹ kà a yị Imosiisi dị ọ ka: Ọnị ọ vị Ẹnẹyịmavara nị. 3Ộ kà ọnị ộ sị ẹngụ zụ̀ Abụrahamị ọnịrị Ayiziiki ne beri Ijekọvụ kà ẹnịnị ệ yẹ ka ọnị ọ vị Ohomorihi Ochẹtẹẹngụ nị. Ọ kà ama ọnị ọ yị sị ẹngụ anị zụ̀ wa ka ẹ̀ yẹ ka ọnị ọ̀ rị Ẹnẹyịmavara nị. 4Dị ọ rẹ ka ịsị ọnị dọ ka ọnị vaa mẹẹ yị wa vị ana jị jẹẹ geri-geri. Ọ kà ọnị ka ẹtẹ Ikanaani ẹnị ẹ vị ọzọga tụ́ aanị, vị ọnị ọnị vaa sịị yị wa, dị ahịka ẹnị ẹ kụkụ nyị nị. 5Ọ kà ọnị ụvọta ọ raà wụ́ owu anị Anisirẹrị aa na Anijipiti maa sị ụyaa rị wa. Ọ kà ọnị aa dọ wa tụ́ ka asị ẹ kụkụ vị ọrịhị ẹnịnị. Ọ kà ụkata-ụkata ọnị aa sịị dọ wa tụ̀ nị, dị ọnị rẹ mẹ̀ ọkarẹyị yị Anijipiti nịnị. 6Dị ọ rẹ ka agụvị avọọ ọ̀ na kà a yị Anisirẹrị nịnị ka ọnị ka ọnị ọ̀ vị Ẹnẹyịmavara nị. Ka ọnị vaa kụ́ wa jịnẹ dị ẹ yị kụkụ vị ọrịhị Anijipiti nịnị. Ọ kà ọnị aa dọ wa tụ́, ama ọnị vaa sị ụyaa rị Anijipiti nịnị ẹtẹẹtẹrẹ. 7Ọ kà ọnị aa sị wa mẹ aza anị, dị ọnị vị Ohomorihi ẹnịnị. Ọ kà ọnị ọ̀ọ vavọọ sị ọ mẹ, ẹ vaa yẹ ka ọnị Ẹnẹyịmavara vị Ohomorihi ẹnịnị nị, ka ọnị ọ kụ̀ wa hụrẹ Ijipiti ka asị ẹ kụkụ vị ọrịhị ẹnịnị nị. 8Dị ọ rẹ ka ẹtẹ ọnị ọnị kà a ka ẹ yị zụ nyị ka ọnị ọ̀ yị sị yị Abụrahamị ọnịrị Ayiziiki ne beri Ijekọvụ avọọ, ịzọọ ọnị aa kụ wa nọ nị. Ọ kà ọnị aa sị ẹtẹ ọnọọ yị wa dị ọ̀ vị ẹtẹ ẹnịnị. Ọ kà ọnị ọ vị Ẹnẹyịmavara nị. 9Di Imosiisi vavọọ na kà a yị Anisirẹrị nịnị nị. Ama ẹnịnị ẹ yị dọ ka ịzẹyịza yọ agụvị ka ụya ọhịmị ẹnị ẹ yaa rị ịnị ụkọrọ ọrịhị ẹnị ẹ yaa mẹ ọ kụ́ du wa eyi. 10Di Ẹnẹyịmavara va kà a yi Imosiisi dị ọ ka: 11Ọ̀ na kà a yi Ihwarawo ohinọyị Anijipiti ka ọ̀ hụrẹ Anisirẹrị ụvọ vị ẹ jịnẹ hụụnị ẹkụra anị. 12Di Imosiisi tụ́ Ẹnẹyịmavara ohi, dị ọ ka Anisirẹrị ẹ yị hyakụ dọ ịrẹyị anị tụ́ ịzọọ, Ihwarawo óó kuku vee tụ́ oni ọsụkọrọ ohi nị?

Ịrẹha aneehi Imosiisi ọnịrị Eerọnị

13Ẹnẹyịmavara ộ kà ịrẹyị Anisirẹrị ọnịrị Ihwarawo ohinọyị Anijipiti yị Imosiisi ọnịrị Eerọnị. Dị ọ mẹ ọda ka Imosiisi ọnịrị Eerọnị ẹ̀ na kụ́ Anisirẹrị nịnị jịnẹ hụrẹ Ijipiti nị.

14Ịrẹha ohivihyẹ ohweje ọnya-ọnya m maa vaa hị́ aanị nị. Ezi Irubẹnị ana vi ozi ọzọkụ Isirẹrị ẹ vị Ịhanọkị, Iparu, Ihezironi ọnịrị Ikami. Ẹnẹẹ ẹ vị ịrẹsụ Irubẹnị nị. 15Ezi Isimiyọnị ẹnị vị Ijemuweri, Ijamini, Ohadi, Ijakini, Izohari ọnịrị Ịsọọrụ ọnị ọnyị anị vị Anikenaani. Ẹnẹẹ ẹnị rẹ vị ịrẹsụ Isimiyọnị. 16#Ịrị 3.17-20; 26.57,58; 1 Ịtọ 6.16-19Ezi Ireevi m maa vaa hị́ aanị nị anka a mẹ̀ chịrẹ wa tụ́ ini iwe, Igerisoni, Ikohati ọnịrị Imerari. Ireevi ộ ra ịnị ẹhẹ mẹ ịrayị ẹchịhịnọnyị tụra ẹwụrịhịmba di o ve sú. 17Ezi oni Igerisoni ma, ẹnị mẹ̀ vị ịrẹsụ-ịrẹsụ ẹ vị Iribini ọnịrị Isimeyi nị. 18Ezi Ikohati vị Amịramị, Iziha, Ihebirọnị ọnịrị Uziyẹrị. Ikohati ộ ra ịnị ẹhẹ mẹ ịrayị ẹchịhịnọnyị tụra ẹwụrẹta. 19Ezi Imerari vị Imahiri ọnịrị Imusi. Ẹnẹẹ ẹ vị ịrẹsụ Ireevi nị anka a mẹ chẹrẹ e tụ́ ini iwe. 20Abiramị ọ na nyị ọyịnyara ada anị ana vị ọnẹẹ ana aā hị́ Ijokebedi. Ọnị ọ ma Imosiisi ọnịrị Eerọnị yọ nị. Amịramị ộ ra ẹhẹ mẹ ịrayị ẹchịhịnọnyị tụra ẹwụrịhịmba. 21Ezi Iziha vị Ikora, Inihwegi ọnịrị Izikiri. 22Ezi Uziyẹrị ẹnị vị Imisayeri, Erizahwani ẹnịrị Isitiri. 23Eerọnị ọnị ọ na nyị Eriseba ana vị ozi Aminadabi. Eriseba vị ọyịnyara Inahisoni. Eriseba ộ ma Inadabi, Abihu ọnịrị Eriyaza ne beri Ịtama yị Eerọnị. 24Ezi Ikora vị Asiri, Erikana ọnịrị Abiyasahwi. Dị ẹnẹẹ ẹnị rẹ vị ịrẹsụ Ikora nị. 25Eriyaza ana vi ozi Eerọnị ọ na nyị ọnya ini ezi Iputiyeri. Ose anị ọnọọ ọ ma Ihwinehasi yọ nị. Ẹnẹ ẹ vị ohivihyẹ ohweje Anisirẹrị nị. Ịrẹsụ-ịrẹsụ a hị́ wa nị. 26Eerọnị ọnịrị Imosiisi ẹnẹẹ gẹdẹ-gẹdẹ Ẹnẹyịmavara kà a yị ka ẹ̀ na kụ́ Anisirẹrị jịnẹ hụrẹ Ijipiti nị. Ọ kà ọ̀ kụ́ wa jịnẹ ógu-ógu. 27Eerọnị ọnịrị Imosiisi ẹ na kà a yị Ihwarawo ohinọyị Ijipiti ka ẹnị aa kụ́ Anisirẹrị jịnẹ hụrẹ Ijipiti nị.

Eerọnị ọnịrị Imosiisi ệ saasa ọda Ohomorihi

28Ẹnẹyịmavara ộ vịdị kà ịrẹyị yị Imosiisi ọ mẹ̀ yà Ijipiti. 29Dị ọ kà a yọ ka ọnị ọ vị Ẹnẹyịmavara nị. Ọ kà ọ̀ kà a yị Ihwarawo ohinọyị Anijipiti avaba ịsị ọnị kà yọ. 30Ama di Imosiisi kà yị Ẹnẹyịmavara ka ọnị maa sụ́ ụkọrọ aanị, Ihwarawo wáá vaa dọ ịrẹyị anịị tụ́ ịzọọ?

Currently Selected:

Ọyịkụra 6: EBTP

Highlight

Copy