Ọyịkụra 7

Okutẹ Eerọnị ộ vara ẹwụ

1Dị Ẹnẹyịmavara va kà a yi Imosiisi dị ọ ka: Ọnị ọ raà mẹ ka Imosiisi ọ̀ yà anka Ohomorihi avọọ ini eyi Ihwarawo. Eerọnị ẹnẹbẹnị Imosiisi ọ vaa kà ịrẹyị Imosiisi yị ohinọyị anka ọnịsẹ avọọ nị. 2Ẹnẹyịmavara kà avaba ịsị ọnị ọ̀ọ kà yọ dị ọ vavọọ kà a yị Eerọnị. Eerọnị ọ va naa kà a yị Ihwarawo ka ọ̀ hụrẹ Anisirẹrị nịnị ụvọ dị ẹ̀ jịnẹ hụụnị ẹkụra anị nị. 3#Ụkọ 7.36Dị Ẹnẹyịmavara kà ama ọnị vaa mẹ ka ayị Ihwarawo ọ̀ katẹngụ. Ọnị ọ̀ọ daka mẹ̀ ụkọrọ ịvọpa irenyi-irenyi ịnị ẹtẹ Ijipiti. 4Ihwarawo ọ yị vaa dọ ịrẹyị anịị tụ́ ịzọọ. Ịjọnọọ dị ọnị tana ụvọ za Anijipiti dị ọnị ọ̀ va kụ́ aza anị Anisirẹrị dị ọnị ọ̀ kụ́ wa ógu-ógu hụụnị ẹtẹ Ijipiti. 5Ọ kà ịhị ọnị ọ̀ọ tana ụvọ za Anijipiti dị ọnị kụ́ aza anị hụụ ịda ẹnịnị nị, Anijipiti vaa yẹ ka ọnị ọ̀ vị Ẹnẹyịmavara nị. 6Di Imosiisi ọnịrị Eerọnị na mẹ anka ịsa ẹnị Ẹnẹyịmavara kà yị wa ka ẹ̀ mẹ gẹdẹ-gẹdẹ nị. 7Imosiisi vị ịrayị ẹbẹẹna di Eerọnị ọnị vị ịrayị ẹbẹẹna tụra ẹẹta dị ẹ vavọọ va na kà ịrẹyị yị Ihwarawo.

Okụtẹ Eerọnị ộ vara ẹwụ.

8Ẹnẹyịmavara ộ hị́ Imosiisi ọnịrị Eerọnị dị ọ rẹ ka 9Ihwarawo ọ̀ọ kà a ka ẹ̀ mẹ̀ ụkọrọ ịvọpa dị ọnị ọ̀ yẹ ka ịzẹyịza ẹ yaa kà nị, dị ẹ kà a yị Eerọnị ka ò ne okutẹ anị tịtẹ ọvịdị Ihwarawo. Ọ kà okutẹ ọnọọ vaa vara ẹwụ. 10Ịzẹyịza di Imosiisi ọnịrị Eerọnị si hu aa nọ ịda Ihwarawo nị. Ịjị e tù ịzọọ, dị ẹ mẹ ịsị Ẹnẹyịmavara kà a ka ẹ̀ mẹ nị. Di Eerọnị ne okutẹ anị tịtẹ ọvịdị Ihwarawo ọnịrị ene pè sị ụvọ za ịjọva nị. Di okutẹ ọnọọ sị vara ẹwụ nị. 11Di Ihwarawo hị́ aza anị ana yẹ ịsa beri ọpọchị ọnịrị ọnịvọpa ene hi Ijipiti gụ nị. Dị ẹnị rẹ sị ịvọpa ẹnịnị mẹ̀ ịsa oni Imosiisi ọnịrị Eerọnị mẹ nị. 12Di ẹnị re ne okutẹ ẹnịnị hi ẹtẹ dị ẹ vara ẹwụ nị. Ama dị okutẹ Eerọnị na, dị ọ za okutẹ Anijipiti ẹnẹẹ, dị ọ mụnẹ wa nị. 13Ihwarawo vị ana sị sị ayị anị katẹngụ anka Ẹnẹyịmavara mẹ̀ vịdị kà a. Ọ yị zẹẹ ka ọnị ọ̀ dọ ịrẹyị Imosiisi ọnịrị Eerọnị tụ́ ịzọọ.

Enyi ene hi Ijipiti ệ vara anya.

14Dị Ẹnẹyịmavara rẹ hị́ Imosiisi dị ọ ka: Éē re ka ayị Ihwarawo vị ana kị kà geri-geri, ọ yị zẹẹ ka aza ẹnẹẹ ẹ̀ na. 15Dị ọ ka ọ̀ na gẹrị Ihwarawo ẹnẹnẹ aa nọ ini okuha Ịnayịrị. Ọ kà ọ̀ na jẹẹ ụtọ okuha Ịnayịrị òo zi ọ. Ọ kà àa na dị ọ sị okutẹ ana vara ẹ́wụ́ ịhyọọ rị ụvọ. 16Dị ọ kà a yị Ihwarawo ka Ẹnẹyịmavara ana vị Ohomorihi Anihiburu ọ tụ́ ọ hi ọ nị. Ọ kà ọ̀ kà a ka ọnị ka ọ̀ hụrẹ aza anị ụvọ dị ẹ̀ na hẹkẹ ọnị ịnị ụnọmị. Dị ọ rẹ ka ọ̀ kà a yọ ka ọnị ka ộ yị va dọ ịrẹyị anị tụ́ ịzọọ. 17#Ẹtẹ 16.4Dị Ẹnẹyịmavara rẹ kà a yọ ka ọnị ka ọsọnị ọ vaa mẹ ka ọ̀ yẹ ka ọnị ọ vị Ẹnẹyịmavara nị. Ọ kà ọ̀ rẹ kà a yọ ka ọ vaa sị okutẹ ana yarị ọ aanị nya enyi ini Ịnayịrị, dị ọ vara. 18Avaba ivovo ene hi ini Ịnayịrị vee sú, di okuha ọnọọ kụkụ aa dà agụ. Anijipiti e yi kuku ve zuu hú enyi anị.

19Dị Ẹnẹyịmavara rẹ kà a yi Imosiisi dị ọ ka ọ̀ Kà ẹ yị Eerọnị ka ọ̀ sị okutẹ anị dị ọ̀ tana ụvọ anị hi enyi ene hi Ijipiti ọnịrị orosi nịnị vaka imisi ne beri avaba ìrìkù enyi. Avaba ẹnịnị vaa vara. Avaba aha anya vee hi ịnị ẹtẹ Ijipiti nị. Avaba enyi ene hi ini ẹnya odenyi nịnị ọnịrị odu vị ana vaa vara anya. 20Di Imosiisi ọnịrị Eerọnị vavọọ mẹ anka Ẹnẹyịmavara mẹ̀ kà a gẹdẹ-gẹdẹ nị. Di Eerọnị yà eyi Ihwarawo ọnịrị anụkọrọ anị dị ọ tana okutẹ anị tụ́ ẹba, dị ọ sị nya enyi ini okuha Ịnayịrị nị. Dị avaba enyi ọnọọ vavọọ vara tịtẹ nị. 21Ivovo ene hi ini Ịnayịrị ê wusu, di enyi ọnọọ kụkụ ta ngụ agụ nị. Anijipiti e yi kuku hú enyi anị. Dị hi avaba aha ịnị ẹtẹ Ijipiti nị. 22Dị ọnịvọpa ene hi Ijipiti ẹnị rẹ vavọọ mẹ ịvọpa nị. Ayị Ihwarawo ọ sị sị kà geri-geri. Anka Ẹnẹyịmavara mẹ̀ vịdị kà a, Ihwarawo ọ yị zẹẹ ka ọnị ọ̀ dọ ịrẹyị Imosiisi ọnịrị Eerọnị tụ́ ịzọọ. 23Di Ihwarawo si hu aa nọ ini eehi anị nị. Ọ yị hyakụ sị ayị ro nọ ịnị ịrẹyị ọnọọ. 24Dị avaba Anijipiti aa chị ẹtẹ ụtọ okuha Ịnayịrị ka ẹnị è re enyi hú nị, agụvị ka enyi ini okuha Ịnayịrị ọ yị kụkụ rụra wa hú. 25Ọ sị mẹ ẹkụhị ịhịmba ọnị Ẹnẹyịmavara maanị sị ịsa nya okuha Ịnayịrị.

Currently Selected:

Ọyịkụra 7: EBTP

Highlight

Copy