Oyinyima 19

Ebira odivi ọnị Anisodọmị mẹ̀

1Ini oruva ịhị ọnọọ, dị anggẹẹrị ẹẹva ẹnẹẹ na sị ngụ Isodọmị nị Ịrọọtị ọnị vị ana yaayịtẹ ózee ana na ngụ ịnị ẹkụra. Ịrọọtị mè re wa, di o zwe na gẹrị wa, dị ọ tana tụra ẹtẹ kụ́ wa nị. 2Dị ọ ka, “Nda, aarịhịnị ẹ ngụ ini eehi ozida ẹnịnị, dị ẹ sụ ne ẹhẹ. Ọ rẹ ka ẹ̀ Jẹẹ ọnị ọ sị enyi vẹ dị ẹ sị nyịna ahụ ẹnịnị. Ọ kà eyi ọ̀ọ si nị ụhwọọ, dị ẹ kwẹẹtẹ ẹnẹnẹ viri-viri dị ẹ̀ẹ na.” Dị anggẹẹrị ẹnẹẹ ka, “Eyiye, ọ jẹẹ ẹnị ẹ̀ sụ ini orere.” 3Dị Ịrọọtị aa yịị da ịpẹẹ yị wa, dị ẹ va dọ, dị ẹ va ngụ ini eehi nị. Ịrọọtị ộ mẹ̀ ịsa yị wa ẹtẹẹtẹrẹ. Ộ wara akara ọnị ọza ọ̀ yị sị òwù tụ́ yị wa, dị ẹ rị ọ nị. 4Ee vee tù ka aza ẹnẹẹ ẹ̀ na sụ kẹnẹ, dị anẹkụra Isodọmị ka hi ẹhẹ dị ẹ kara irehi ịzị aza ẹnẹẹ yà nị. Avaba anẹkụra ọnọọ saka-saka huu na ngụ ezweyi anọrụ ọnịrị azọkụ ẹ kara irehi ọnọọ nị. 5#Ọdọ 19.22-24Dị ẹ yaa ta Ịrọọtị ubo dị ẹ ka: Aza ana vẹ ịdị anị oruva ịsọọnịị yọ, ịzị e hi? Ẹ ka ọ kụ́ wa hi ẹhẹẹ yị ẹnị ka ẹnịrị wa aa sụ. 6Dị Ịrọọtị jịnẹ di o gu oze, di o ne tù aza ẹnẹẹ 7dị ọ ka, “Ẹwụ nịnị ẹyịnyara amị, aarịhịnị asị ụ mẹ̀ ebira odivi ọnọọ nịnị. 8Ọ kà ọnị ọ nyị ezi anẹẹ ẹẹva, ẹnịnị ệ yị yẹ ọnọrụ. Ọ kà ẹ jẹẹ ọnị ọ̀ kụ́ wa hi ẹhẹ yị wa dị ẹ̀ mẹ wa óò mè zee wa eyi. Ọ kà asị ẹ kanyị azọga ẹnẹnị, ka ịda anị e chi nị.” 9Dị ẹ ka: O jesi hụrẹ oze, ẹnẹ vị ọnị ọzọga ana va ra ịzẹnị ana aa vaa kà a yị ẹnị ịsị a vọrọ ka ẹnị ẹ̀ mẹ. Ẹ rẹ ka ọ̀ yị mẹ hẹẹ, ọnị ọnị vaa mẹ̀ ẹ o vee divii hu azọga ẹnẹẹ ajịnị nị. Dị ẹ yaa tụ́ Ịrọọtị ụvọ, di e yee sì ka ẹnị ẹ̀ na chaka oze nị. 10Dị aza ẹnẹẹ ene hi ini eehi va tana ụvọ tụ́ ẹhẹ, di e tura Ịrọọtị ngụ ini eehi, di e gu oze nị. 11#2 Ohi 6.18Dị ẹ mẹ ka aza ana gụ enoze è gu eyi nị. Ezweyi ne chire azọkụ ẹ vavọọ gu eyi nị. Ê si ụvọ sì oze pooro e yi re e.

12Dị azọga ẹnẹẹ kà a yị Ịrọọtị dị ẹ ka, “Áá nyị ọza ẹnẹsa ọnị ọ nyị tụ́ ịnị ẹkụra ọnọnị? Ẹ ka ọ̀ọ nyị ọyẹ, ọ̀ọ nyị ozi ọnọrụ àa vị anẹẹ, ọza tụra ọza ọnị ọ̀ nyị tụ́ ịnị ẹkụra ọnọnị, ọ̀ kụ́ wa jịnẹ hụụ ịzẹnị. 13Ẹ ka aza ẹ sị rụrụ ee nowu ka ebira odivi aza ẹnẹnị ọ sị banyị. Ẹnẹyịmavara ọ sị wụ́, dị ọ tụ́ ẹnị ka ẹnị ẹ va wụ̀ wa va ha nị. Ẹ ka vi ẹnị ee vee vú wa ẹtẹ aanị nị.” 14Dị Ịrọọtị jịnẹ dị ọ maanị na kà a yị ọyẹ anị ana aa vaa nyị ezi anẹẹ anị. Dị ọ ka, “Kwẹẹtẹ we zwe hụụnị ẹkụra ọnọnị nịnị ka Ẹnẹyịmavara ee vee vu ẹkụra ọnọnị ẹtẹ.” Dị ọyẹ anị ẹnị ee ro o ka vị aa mẹ̀ isiya nị.

Ịrọọtị ọnịrị aza anị ê zwe

15Eyi mè sị nị, dị anggẹẹrị ẹnẹẹ aa há Ịrọọtị eyi, dị ẹ ka: Ọ̀ kwẹẹtẹ, ọ sị ose anị ọnịrị ezi anị anẹẹ ẹẹva ene hi ịzẹnị di è zwe, ka e ve su tụ́ ịnị ụya ana a vaa sị rị ẹkụra ọnọnị. 16#2 Ipi 2.7Dị Ịrọọtị aa yịị mẹ vẹrị-vẹrị nị. Ama Ẹnẹyịmavara ộ vayị anị, dị anggẹẹrị ẹnẹẹ jị ụvọ chire ọnịrị ose anị ne beri ezi anẹẹ anị ẹẹva, dị ọ kụ́ wa jịnẹ hụụnị ẹkụra ọnọọ nị. 17Ẹ mẹ̀ raà kụ́ wa jịnẹ dị ẹ kà a yị wa ka, “Èe sì ịrẹyị ụhwẹ ẹnịnị, eē zwe, asị ẹ kana eyi ịrẹma, asị ẹ rẹ jẹẹ aha ọnyọọnyị ini ozi, Ẹ ka èe zwee nọ ịnị ataba nịnị, ka e ve wusu.”

18Dị Ịrọọtị kà a yị wa ka, “Nda, ẹ̀ navọ de, 19Ọ kà e reè nyị oni iyi da, ka ệ mẹẹ ẹ sị ọnị dọ ha, ama ọnị e yi zụ zwe nọ ịnị ataba. Ọ kà ọnị aa na, vị ịrẹyị ọnọnị aa za ọnị di ọnị sú nị. 20Ọ kà aarịhịnị, ẹkụra ọsọọ ộ gụrị ẹtẹ, o yi noze. Ẹ navọ ọnị ò zwe nọ ịzọọ di asị ọnị sú. Ọ kà Ẹkụra chee ọ vị nị.” 21Dị anggẹẹrị ọnọọ ka, “Ooho, ẹnị e yi vee vu ẹkụra ana aa kà aanị ẹtẹ. 22Ọ kà wụsẹ, wụsẹ òo zwe ọọ nọ ịzọọ. Ọ kà à yị vị o tù ịzọọ, ẹ yị nyị ịsị ọnị zụ mẹ.” Ịrọọtị ộ hị́ ẹkụra ọnọọ oweyi agụvị avọọ a kụkụ aa hị́ ọ Izowa nị.

Ohomorihi vu Isodọmị ọnịrị Igomora ẹtẹ

23Ọyị ọ sị hụrẹ dị Ịrọọtị va na ngụ Izowa.

24 # Imt 10.15; 11.23,24; Irk 10.12; 17.29; 2 Ipi 2.6; Ijudi 1.7 Dị Ẹnẹyịmavara zụ̀ ịra ana a sị ohuru tụ́ hi ịnị ẹkụra Isodọmị ọnịrị Igomora nị. Ẹbẹẹba Ẹnẹyịmavara zụ̀ ọ hụrẹ vẹ nị. 25Avọọ Ẹnẹyịmavara mè vu ẹkụra ẹnẹẹ ẹtẹ nị. Avaba ini ozi ịzọọ ne beri avaba aza ene hi ịnị ẹkụra ọnọọ ọnịrị avaba ịsị ẹ chị hi ịnị ẹtẹ ịzọọ vị ẹnẹ Ẹnẹyịmavara vú ẹtẹ saka-saka. 26#Irk 17.32Ose Ịrọọtị vị ana aa dụ Ịrọọtị ịrẹma. Ọnị ộ kana eyi ịrẹma, dị ọ vavọọ vara anọ jẹẹ ịzọọ nị.

27Ẹnẹnẹ viri-viri eyinẹhẹ anị, Abụrahamị ộ nọ ịzị ọ vịdị yà pè Ẹnẹyịmavara kà ịrẹyị. 28Dị ọ kana eyi nọ oze Isodọmị ọnịrị Igomora ne beri avaba ini ozi ọnọọ nị, di o re ka areyi anị ee simaa vaa hịrẹ pọpọrọpọ anka areyi ọrịra avọọ nị. 29Ohomorihi mẹ̀ vavọọ vu ẹkụra ini ozi ọnọọ ẹtẹ, Ohomorihi ộ tamayị Abụrahamị, dị ọ dọ Ịrọọtị tụ́ nị.

Ịzị Animowabi ọnịrị Anamọrị che hụrẹ.

30Ịrọọtị mẹ̀ na sị ngụ Izowa, angwa ee hi ọ, dị ọ hụụ ịzọọ dị ọ kụ́ ezi anẹẹ anị ẹẹva dị ẹ nọ ịnị ataba dị ẹ yà ịnị ụtẹha ọnya ịzọọ nị. 31Ẹkụhị ọnya di ozi anị ịpaapa kà a yị ana vi ozweyi dị ọ ka: Ada ẹnịnị o si bo, ẹ yị nyị ọza ịnị ẹhẹ ana vọrọ ka ọ̀ nyị ẹnị. 32Ọ kà vẹ dị ẹnị ẹ kà ada ayị eche, dị ẹnịrị ọ ọ̀ sụ dị ẹnị ẹ̀ zụ nyị ọza ana vọrọ ka ọ̀ dọ ẹnị ịrẹsụ. 33Ịzẹyịza dị ẹ kà ada ẹnịnị eche ịrahụ ịhị ọnọọ nị, di ana vị ọzọkụ na, dị ọnịrị ada anị sụ nị. Ada anị ọ yị yẹ ụmẹ ọnị ọ sị vẹ ọ yị rẹ yẹ ụmẹ ọnị ọ sị kwẹẹtẹ. 34Eyinẹhẹ anị, dị ana vị ọzọkụ rẹ kà a yị ana vị ozweyi dị ọ ka: ọ̀ọ yẹ ka ọnịrị ada anị ọ sụ ẹẹrị nị. Ọ̀ vẹ dị ẹnị ẹ̀ rẹ kà a eche ịrahụ ajịnị, dị ọnịrị ọ ọ̀ rẹ sụ, dị ẹnị ẹ zụ nyị ọza ana vaa dọ ẹnị ịrẹsụ. 35Ịzẹyịza, ịrahụ ịhị ọnọọ, dị ẹ rẹ kà ada ẹnịnị eche nị. Dị ana vi ozweyi kwẹẹtẹ dị ọnịrị ada anị na sụ nị. Ada anị ọ yị yẹ ụmẹ ọnị ọ sị vẹ, ọ yị rẹ yẹ ụmẹ ọnị ọ sị kwẹẹtẹ. 36Avọọ ezi Ịrọọtị ẹyịva mẹ̀ mẹ dị ẹ dọ ịrẹẹ hụụnị ụvọ ada ẹnịnị nị. 37Ana vị ọzọkụ ọ ma ozi ọnọrụ ọnya, dị ọ yị ọ Imowabi nị. Ọnị ọ vị ohiku Animowabi ve tụ́ ajịnị nị. 38Ana vị ozweyi ọnị ọ rẹ ma ozi ọnọrụ dị ọnị rẹ yị ọ Ịbẹnamị nị. Ọnị ọ rẹ vi ohiku Anamọnị ve tù ajịnị nị.

Currently Selected:

Oyinyima 19: EBTP

Highlight

Copy