Oyinyima 20

Ịrẹyị Abụrahamị ọnịrị Abimẹrẹkị

1Abụrahamị ộ hụrẹ Imamire, dị ọ zi oze Ịnẹgẹvị dị ọ na yà ịnị akakana Ikadesi ọnịrị Isuri nị, dị ahịka ịnị ẹkụra Igera ọ ra nị. 2#Oyn 12.13; 26.7Abụrahamị mẹ̀ yà ịzọọ dị aa hị́ Isera ana vị ose anị ọyịnyara anị nị. Di Abimẹrẹkị ana vị Ohinọyị Igera ọnị va tụ́ na sị Isera ka ọnị aa nyị ọ nị. 3Ama ịnị ịrahụ ịhị ọnọọ gẹdẹ-gẹdẹ, dị Abimẹrẹkị ra ụra re Ohomorihi nị. Di Ohomorihi kà a yọ dị ọ ka, “Wéē wusu, ẹwụ ọnọnị, agụvị ọnẹẹ ọnị ẹ na sị avọọ. Ọ̀ ka ọ́ọ́ yẹ ka ose onose yọ nị?” 4Ama Abimẹrẹkị Ộ yị kanyị Isara. Di Abimẹrẹkị ka, “Ẹnẹyịmavara ẹ yị nyị ịsị ọza mẹ vị ọ́ọ́ vaa wụ̀ ọ kẹnẹ nị?” 5Ọ rẹ ka ọ́ọ́ yẹ ka ọnị ọ kà a yị ọnị ka ọyịnyara anịị yọ nị? Di Isera ọnị ụvọta ọnị rẹ ka ẹnẹbẹnị anị Abụrahamị vị nị. Ọ kà ọnị ọ yị nyị ariro odivi tụ́ ịnị ayị dị ọnị ka ọnị aa nyị ọ, ọ ka ayị ọnya ọnị sị na nị. 6Di Ohomorihi kà a yọ dị ọ ka: Ịzẹyịza ọnị ọ yẹ ka ayị ọnya ọ vavọọ sị mẹ̀ nị. Ọ kà ọnị ọ rẹ ẹ̀ yị zẹẹ ka ọ kanyị ọ nị ka ọ va rị ịvị ọnị Ohomorihi. 7Ọ kà Booro aanị ọ sị ose ọnọrụ ọnọọ varẹma naa yọ. Ọnọrụ ọnọọ vị ọnịsẹ, ọ vaa mẹ̀ aduwaa yọ, di o yi kuku sú. Ọ kà ama ò yị và a naa yọ, ọ̀ yẹ ka vị ee sú nị ne beri avaba aza anị nị.

8Ịzẹyịza ẹnẹnẹ viri-viri eyinẹhẹ anị, di Abimẹrẹkị kwẹẹtẹ dị ọ hị́ ozida anị dị ọ kà avaba ịsa ọ maanị re aanị yị wa nị. Angwa ô hí aza ẹnẹẹ ẹtẹẹtẹrẹ. 9Di Abimẹrẹkị va hị́ Abụrahamị dị ọ họ̀ ọ dị ọ ka, “Sị ọ mẹ yị aanị? Ọ kà sị ọnị na mẹ̀ ẹ dị ọ maanị mẹ ka ọnịrị anẹkụra anị ọ̀ maanị na mẹ ịvị ọbanyị? Ọ kà ịsị ọ mẹ̀ ọnị aanị ọ yị vọrọ.” 10Di Abimẹrẹkị rẹ kà a yị Abụrahamị dị ọ ka, “Sị ọ daka ro dị ọ maanị mẹ?” 11Di Abụrahamị ka, “Ịsị ẹ mẹ ka ọnị ọ̀ vavọọ mẹ yị: ọnị o ro ka ẹ yị nyị ọza ene hí angwa Ohomorihi ịnị ẹkụra ọnọnị, di oni ro ka ẹ nyayịnẹ hụ agụvị ose anị dị ẹ wụ ọnị. 12Ọ kà àa ka à na kà adẹnyara anị ọ vị nị. Ọ kà Ada ẹnịnị vị ọnya, ama ọnyị ẹnịnị vị irenyi-irenyi, dị ọnị nyị ọ nị. 13Dị ọ rẹ ka Ịjị Ohomorihi ka ọnị ọ̀ hụụnị eehi ada anị dị ọnị ọ̀ọ zịịzị, dị ọnị ka ọgụvọ ọnya ọnị ọ vaa mẹẹ yị ọnị yị: aha tụra aha ẹnị ẹ̀ẹ nọ, ọ̀ kà a ka ẹnẹbẹnị anị ọnị vị nị.” 14Di Abimẹrẹkị kụ́ atẹmẹ, ụnọ, ezi ahụ anọrụ ọnịrị ezi ahụ anẹẹ, dị ọ kụ́ wa yị Abụrahamị nị. Dị ọ sị Isera ose anị varẹma yọ nị. 15Di Abimẹrẹkị ka: Ọnị ọ̀ nyị ẹtẹ oni ee re aanị nị. Ịzị èe zee e eyi kẹnẹ, ọ ra ịnị anị. 16Dị ọ rẹ kà a yị Isera dị ọ ka, “Ọnị ộ sị ẹkẹhị achuchu ẹẹhị yị ẹnẹbẹnị anị. Ọsọnị vaa vi ivenu ini eyi aza anị ka ọnị ọ yị mẹ̀ ẹ ịrẹyị ọnyọọnyị. Ọzọza rẹ va yẹ ka ẹ yị nyị ịsa odivi ọnị ụ mẹ.” 17Di Abụrahamị va mẹ̀ aduwa hi Ohomorihi dị Ohomorihi va mẹ ka ẹngụ Abimẹrẹkị ọ̀ ta nị. Di Ohomorihi rẹ mẹ ka ose Abimẹrẹkị ọnịrị ezi ahụ anị anẹẹ ẹ̀ zụ ma ozi nị. 18Ẹnẹyịmavara ộ vịdị raà hụ agụvị Isera ose Abụrahamị mẹ ka avaba aneehi Abimẹrẹkị ẹ̀ vị ọbọrị.

Currently Selected:

Oyinyima 20: EBTP

Highlight

Copy