Oyinyima 21

A mẹmẹ ma Ayiziiki

1Ẹnẹyịmavara ô nyị Isera iyi anka ọ mẹ̀ vịdị kà a. Ịsị ọ ka ọnị aa mẹẹ yọ dị ọ mẹ̀ ẹ yọ ịzẹyịza nị. 2#Ihib 11.11Isera ô zyẹẹ, dị ọ ma ozi ọnọrụ ọnya yị Abụrahamị nị. Ịjọnọọọ Abụrahamị o si bo. Ụmẹ ana Ẹnẹyịmavara jị, ọ sị ma ozi ọnọọ nị. 3Di Abụrahamị yị ozi anị oni Isera ma yọ aanị Ayiziiki nị. 4#Oyn 17.12; Ụkọ 7.8Ịjị ozi anị ọnọọ sị gụ ẹkụhị ịhịnta ana a ma a, dị Abụrahamị jị ọ ụvẹvẹnẹ nị. Avọọ Ohomorihi mẹ̀ mẹ̀ ẹ ọdaa yọ nị. 5Abụrahamị vị ịrayị ẹchẹhị di a va ma Ayiziiki. 6Isera ka, “Ohomorihi ọ raà mẹ ka oni ò nyinyi. Avaba aza ana àa wụ́ vee pe onii nyinyi.” 7Dị ọ rẹ ka, “Ẹnẹ yaanị zụ kà a yị Abụrahamị ka Isera vaa kà ozi ịrẹva? Ọ kà ọnị ọ vị va si ozi ọnọrụ maa yọ ini unobo anị.” 8Ịjị ozi ọnọọ sị vịra dị a dụ ọ hụụnị ịrẹva nị. Ịhị ana Ayiziiki vavọọ hụụnị ịrẹva aanị, dị Abụrahamị nyayịnẹ rị eche anị nị.

9Ẹkụhị ọnya Isera ô re ka ozi Ihaga rị Anijipiti ọnị ọ ma yị Abụrahamị aa mẹ aahẹ. 10#Iga 4.29,30Ọ mẹ̀ vavọọ re e dị ọ kà a yị Abụrahamị dị ọ ka, “Dụ ọnẹẹ ọrịhị ọnọnị ọnịrị ozi anị jịnẹ! Ọ kà Ozi ọrịhị ọnịrị Ayiziiki ozi anị ẹ yị vaa gà ogu Abụrahamị.” 11Ịrẹyị ọnọnị ộ zị Abụrahamị ẹngụ agụvị ozi anị. 12#Iro 9.7; Ihib 11.18Di Ohomorihi va kà a yị Abụrahamị dị ọ ka: Asị ịrẹyị ozi anị ọnịrị ose anị ana vị ọrịhị avọọ du ọ ayị. Ọ kà Ịsị Isera ọ̀ọ ka ọ̀ mẹ, ọ vavọọ mẹ̀ ẹ, agụvị ka Ayiziiki a vaa sị hị́ ịrẹha irima anị nị. 13Ohomorihi rẹ ka ọnị rẹ vị vaa mẹ ka ozi ọnẹẹ ọrịhị ọnọọ ọ̀ vi anẹkụra ọbanyị agụvị ka ịpa Abụrahamị ọ chị hụrẹ nị.

14Abụrahamị ộ kwẹẹtẹ ẹnẹnẹ viri-viri, dị ọ sị ịsọyịrị dị ọ sị ịsa dà enyi dị ọ sị tụra Ihaga ịza nị. Dị ọ sị ọnịrị ozi anị tụ́ ẹhẹ nị. Di Ihaga si hu, di aa ngụ ịnị ụnọmị Ịbẹẹsẹba zị nị. 15Ịjị enyi ẹnị ẹ dà tụ́ ịnị ịsa ta, di Ihaga si ozi anị na tụ́ iruvo ọchị ọnya nị. 16Dị ọ kà na huu, ẹhụụ ahụ ịrẹkẹẹchẹhị, dị ọ na yaayịtẹ dị ọ và a chire nị. Ọ kà ọnị ọ yị zụ jẹẹ re ozi ọnọọ, èe sú. Ihaga mẹ̀ vavọọ yaayịtẹ ịzọọ, di ee sụ ùnè vavavaa nị. 17Ohomorihi ộ wụ́ ozi ọnọọ mèe nowu, di anggẹẹrị Ohomorihi yà ẹbẹẹba dị ọ va hị́ Ihaga dị ọ ka, “Ihaga, u mè re? Ọ kà Asị o rè hí angwa, ka Ohomorihi ộ wụ́ owu ozi ọnọọ ịzị ọ yà. 18Ọ kà kwẹẹtẹ dị ọ̀ na sị ozi ọnọọ rị ụvọ. Ọ rẹ anẹkụra ọbanyị ọnị vaa mẹ̀ ẹ nị.” 19Ịjọnọọ ọgọnị di Ohomorihi va ha a eyi, di o re ịkangga ọnya ana nyị enyi nị. Dị ọ na dà enyi tụ́ ịnị ịsa ọnị ọ za, dị ọ ka enyi yi ozi ọnọọ nị.

20Ohomorihi ô sere ozi ọnọọ, dị ọ vịra nị. Dị ahịka ịnị ụnọmị ọ ra nị. Ọ yara ne ọpa ẹnẹmẹhị. 21Ọ mè yà ịnị ụnọmị ịzị aā hị́ Ịparanị, dị ọnyị anị nọ ẹkụra Ijipiti dị ọ na nyị ọnẹẹ hụụ ịzọọ va yọ nị.

Abụrahamị ọnịrị Abimẹrẹkị ệ hị́ eku yị ẹngụ.

22 # Oyn 26.26 Ịnị ụmẹ ọnọọ di Abimẹrẹkị ọnịrị Ipikori ọga isoja anị na kà a yị Abụrahamị dị ẹ ka, “Ịsa tụra ịsa ana àaa mẹ, Ohomorihi vị ana aa sị ụvọọ tụ́ ọ yọ. 23Ọ kà ọ̀ hị́ eku yị ọnị ịzẹnị booro aanị ka o yi vee vene ọnị, àa vi ezi anị pooro na ngụ ezi anị ịrẹma-ịrẹma. Ọ kà ọ̀ hị́ eku ka ịzẹyịza ọnị ọnị ee sii pè e mẹ̀ ọnị re ve sii pè ọnị mẹ ne beri anẹkụra ịzị ọ ra aanị.” 24Di Abụrahamị ka, “Ọnị ộ vavọọ hị́ eku.”

25Ụmẹ ọnya Abụrahamị ộ sị ịrẹyị ezi ahụ Abimẹrẹkị na tụ́ Abimẹrẹkị ịrẹka. Ezi ahụ Abimẹrẹkị ẹ raà sị ụkata dọ ịkangga ana aza Abụrahamị chị. 26Di Abimẹrẹkị ka: Ọnị ọ yị yẹ ọza ana vavọọ mẹ. Ọ yị vịdị kà a yị ọnị, agụvị ka ọnị ọ yị vịdị wụ́ pooro ve tù ajịnị. 27Di Abụrahamị kụ́ atẹmẹ ọnịrị ụnọ, dị ọ kụ́ ọ yị Abimẹrẹkị nị. Dị ẹnị ẹyịva hị́ eku yị ẹngụ nị. 28Abụrahamị ộ kụ́ ozi atẹmẹ ịhịmba hụụnị atẹmẹ anị tụ́ aha irenyi. 29Di Abimẹrẹkị họ̀ Abụrahamị dị ọ ka, “Sị ẹ vi iruvo ozi atẹmẹ ịhịmba ọnị ọ kụ́ tụ́ irenyi aanị?” 30Di Abụrahamị ka, “Ọ̀ọ kụ́ ozi atẹmẹ ịhịmba hụụnị ụvọ anị. Ọnị ọ vaa sị zụ̀ ka ộ dọ ivenu tụ́ ọ ka ọnị ọ chị ịkangga ọnọnị nị.” 31Avọọ a sịị hị́ ịzọọ Ịbẹẹsẹba nị, agụvị ka ịzọọ ẹnị ẹyịva yà hị́ eku nị. Ịbẹẹsẹba: Iruvo ịrẹha ọnọọ ọ vị ịkangga (atẹmẹ) ịhịmba. A rẹ zụ kà a ka iruvo anị ọ vị Ịkangga ịzị a hị́ eku. 32Ẹ mẹ̀ vavọọ sị eku hị́ yị ẹngụ Ịbẹẹsẹba, di Abimẹrẹkị ọnịrị Ipikori ana vị ọga isoja anị varẹma aa nọ Anihwirisiti nị. 33Di Abụrahamị chire ọchị ana aā hị́ Ịtamasiki tụ́ Ịbẹẹsẹba nị. Dị ọ yà ịzọọ mẹ̀ aduwa yị Ẹnẹyịmavara, Ohomorihi ana yà ịzọọ pooro zịna-zịna nị. 34Abụrahamị ộ ra ịnị ẹtẹ Anihwirisiti nị ịzọọ ku ẹtẹẹtẹrẹ.

Currently Selected:

Oyinyima 21: EBTP

Highlight

Copy