Oyinyima 27

Ayiziiki mẹmẹ mẹ̀ aduwa yị Ijekọvụ.

1Ịnị ụmẹ ọnya, Ayiziiki ộ ta bo ọ yị hyakụ kuku zụ re ẹtẹ. Ẹkụhị ọnya dị ọ hị́ Iisọ ozi anị ana vị ọzọkụ dị ọ ka, “Ozi emi.” Di Iisọ ka, “Hèé, ụ mẹ ka.” 2Di Ayiziiki ka: Éē re ka oni o si bo aanị, ọnị ọ yị yẹ ịhị oni ee sú. 3Agụvị avọọ sị ọkịta ọnịrị ahaba anị dị ọ̀ na ngụ avị dị ọ̀ wụ̀ uye va yị ọnị. 4Ọ kà ọ̀ Chịnẹ ẹ di o zoza anka ẹngụ oni oni sì ịrẹyị anị, dị ọ̀ sị ọ va yị ọnị dị ọnị ọ̀ rị ọ. Ọ kà ọnị ọ̀ọ sị ọ rị dị ọnị mẹ̀ aduwaa yọ di ọnị ò ve sú.

5Ịjị Ayiziiki maanị ee pe Iisọọ kà ịrẹyị, Irebeka tangwa aa wụ́. Di Iisọ ọnị si hu aa naa ngụ avị ka ọnị ọ̀ na wụ̀ uye ọnọọ vẹ nị. 6O mè si tu, Di Irebeka ne tù Ijekọvụ ozi anị dị ọ ka, “Ọnị ộ wụ́ áda anị màa kà a yị Iisọ ẹnẹbẹnị anị ka 7ọ̀ na wụ̀ uye, dị ọ̀ chịnẹ ẹ anka ẹngụ ọnị ọnịị̄ sì, dị ọ sị va yị ọnị. Ọ kà ọnị ọ̀ọ sị ọ rị, dị ọnị ọ̀ yà ọvịdị Ẹnẹyịmavara mẹ̀ aduwaa yọ dị ọnị ò ve sú.” 8Di Irebeka rẹ ka, “Ozi emi, ịsị ọnị ọ̀ọ kà a yọ kẹnẹ, ọ̀ wụsẹ vavọọ mẹ̀ ẹ. 9Ọ kà ọ̀ nọ ịnị ịsụpa ẹnẹẹ dị ọ̀ sị ozi ịdẹ ẹẹva ana banyị va yị ọnị. Ọ kà ọnị ọ̀ọ sị ọ mẹ, dị ọnị chịnẹẹ anka ẹngụ ana ada anị sì ịrẹyị anị, 10dị ọ̀ sị ọ na yị ada anị dị ọ̀ rị ọ, dị ọ̀ zụ ma aduwaa yọ di ò ve sú.” 11Di Ijekọvụ kà a yị Irebeka ọnyị anị dị ọ ka: Ọ́ọ́ yẹ ka ẹngụ Iisọ ẹnẹbẹnị anị vị ẹyị-ẹyị, ọnị ẹ yị nyị ẹyị hi ẹngụ. 12Ọ kà ada anị ọ nyẹngụ na sị ụvọ zama ọnị re, dị ọ sị mẹẹ ka vi oni ee si ka oni ò vene e nị. Ịjọnọọọ di ahịka ozirenu ọnị na dọ nị, dị ọnị ọ yị va dọ aduwa. 13Di ọnyị anị ka, “Ọ̀ọ na tụ́ ozirenu hi ọ, ozirenu ọnọọ ọ za ọnị. Ama ọ̀ na mẹ̀ ọnị mẹ̀ yị kà a aanị, ọ ka ọ̀ na kụ́ ezi ịdẹ ẹnẹẹ va yị ọnị.” 14Di Ijekọvụ na kụ́ ẹvụ ẹnẹẹ va yị ọnyị anị nị. Dị ọnyị anị chịnẹ ẹ anka ẹngụ ana ada ẹnịnịị̄ sì nị. 15Di Irebeka sị awuru Iisọ ene zoza hu ana a sị yọ tẹ, di o si chire, Ijekọvụ ozi anị ana vi ozweyi nị. 16Dị ọ sị ụpa ẹvụ ẹnẹẹ di o si kú ụvọ Ijekọvụ ọnịrị ịpa ọrọkọ anị ẹnẹ ẹ̀ yị nyị ẹyị nị. 17Dị ọ kụ́ uye ọnị ọ chịnẹ ẹtẹẹtẹrẹ aanị ne beri ịbụrẹẹdị ọnị ọ mẹ tụ́ ọ, dị ọ kụ́ ọ yị Ijekọvụ nị.

18Di Ijekọvụ ne tù ada anị dị ọ ka, “Ada amị!” Di ada anị ka, “Hèé, ye re ẹwụ ọnị ọ vị ini ezi emi?” 19Di Ijekọvụ tụ́ ohi dị ọ ka, “Ọnị Iisọ ozi anị ana vị ọzọkụ yọ nọ. Ọ kà Ịsị ọ ka ọnị ọ̀ mẹ, ọnị ọ sị ọ mẹ. Dị ọ ka ọ̀ kwẹẹtẹ yaayịtẹ dị ọ̀ rị uye ọnị ọnị wụ va yọ, dị wa mẹ̀ aduwaa mị.” 20Di Ayiziiki ka, “Ozi emi wéē juntu re ịsa wụ o!” Di Ijekọvụ ka, “Ẹnẹyịmavara Ohomorihi anị ọ maanị sị ụsẹ zị yị ọnị nọ.” 21Di Ayiziiki ka, “Ozi emi Ijekọvụ, ka vẹ da re dị ma sị ụvọ za wụ re e dị ma yẹ aa vị ẹwụ Iisọ ozi mịị yọ nị, à vị ẹ yị vị ẹwụ.” 22Ịzẹyịza di Ijekọvụ kà pè Ayiziiki ada anị, dị ọ sị ụvọ re e nị. Di ọ ka, “Ọngwẹ Ijekọvụ m maa wụ́ aanị nị, ama ụvọ ọnọnị vị ụvọ Iisọ.” 23Ayiziiki ọ yị yẹ ẹ agụvị ka ụvọ anị vị ẹyị-ẹyị anka ụvọ Iisọ ẹnẹbẹnị anị. Di Ayiziiki va mẹ̀ aduwaa yọ nị. 24Di ọ ka, “Ịzẹyịza ẹwụ wáá vị Iisọ ozi emi nị?” Di Ijekọvụ ka ọnịị yọ nị. 25Di Ayiziiki ka, “Sị̀ uye ọnọọ va mị, màa sị ọ rị, dị ma mẹ̀ aduwaa yị wụ.” Di Ijekọvụ sị ịsa naa yọ, dị ọ rị ọ nị. Dị ọ rẹ sị eche yọ, di o hú ọ nị. 26Ịjọnọọ, di Ayiziiki ada anị ka, “Tere vẹ ozi mị, di we ku mi irenu.” 27#Ihib 11.20Ịzẹyịza di Ijekọvụ tere pè e, dị ọ za a kú ayị, dị ọ ku ọ irenu nị. Di Ayiziiki jị awuru anị agụ, di o nyima di aa mẹ̀ aduwaa yọ nị. Dị ọ ka, “Awuru ozi emi aa dà agụ ozoza anka agụ ẹtẹ ana Ẹnẹyịmavara raà mẹ ka ọ̀ vị ẹtẹ ize. 28Ohomorihi vee chire eguhii hi aarẹ awụ, dị ọ mẹ̀ ka ịsa ịnị aarẹ awụ ọnịrị eche awụ ò zoza ẹtẹẹtẹrẹ. 29#Oyn 12.3Anẹkụra nịnị vị ana vaa hẹkẹ ẹwụ, di e yee kú ẹtẹẹ yị wụ. Ẹwụ waa vị ọga tụra avaba ẹyịnyara awụ ịrẹsụ nị. Ẹnịnị vi ene vee kú ẹtẹẹ yị wụ. Aza ene èe chì hi wụ, vị ọnị ọnị vee chìi hí. Aza ana àa ka o zee yị wụ, vị ọnị o vee zee yị.”

Iisọ ộ da ịpẹ Ayiziiki ka ọ mẹ̀ aduwa yị ọnị.

30Ayiziiki mẹ̀ sị aduwa mẹ̀ yị Ijekọvụ dị ọ maanị yị na jịnẹ chee kẹnẹ, di Iisọ ẹnẹbẹnị anị hụụnị ube vẹ nị. 31Dị ọnị rẹ chịnẹ uye anị ẹtẹẹtẹrẹ, dị ọ sị ọ va yị ada anị nị. Dị ọ ka, “Ada amị kwẹẹtẹ, dị wa rị uye ọnị ẹmị ozi ewu sị vẹ, dị waa mẹ̀ aduwaa yị mị.” 32Di Ayiziiki ada anị ka, “Ẹwụ ẹnị ọ vị?” Di Iisọ ka, “Ẹmị Iisọ yọ nọ, ẹmị ana vị ozi ọzọkụ awụ.” 33Di ẹngụ Ayiziiki aa banyị pápàpà, dị ọ ka, “Ẹnẹ vịdị wụ̀ uye va yị mị ọnị mị rị avaba anị dị ụ vavẹ? Wáá yẹ ka ma raà mẹ̀ aduwa yị ọza ọnọọ! Aduwa ọnọọ vị ana aa sẹẹ tụra a ịrẹsụ.” 34Iisọ mẹ maanị wụ́ ịrẹyị ana ada anị kà, di o nowu zẹtẹ, di aa tụ orere booboro dị ọ ka, “Nda, aarịhịnị kwogwo, navọ ẹwa rẹ mẹ̀ aduwaa yị mị de!” 35Di Ayiziiki ka, “Ọhụva awụ ộ mẹ̀ apẹ vẹ, ọ va raà dọ aduwa ọnị mị yaanị mẹ̀ yị wụ.” 36#Oyn 25.29-34Di Iisọ ka, “Wéē re ka Ijekọvụ obooro ọ vị nị. Ụpẹ ọhụva ọnị ọ maanị aa vaa rị mị ẹtẹ ahụ yị. Ộ vịdị sị mị dọ udi ọzọkụ, ọ rẹ va sị aduwa ana a yaanị mẹ yị mị dọ.” Di Iisọ da ịpẹ yị ada anị dị ọ ka, “Ẹ yị kụkụ daba nyị aduwa ana vọ tịtẹ yị mịị?” 37Di Ayiziiki tụ́ ohi dị ọ ka, “Ma raà kà a ka ọnị ọ vaa vị ọga awụ nị. Avaba ẹyịnyara anị vị ana vaa hẹkẹ ẹ. Ịsa aarẹ ọnịrị echee vị ana vaa mẹ̀ yọ ẹtẹẹtẹrẹ. Booro aanị ẹ yị nyị ịsị mị kụkụ zụ mẹ yị wụ, ozi emi.” 38#Ihib 12.17Di Iisọ kà ayị ada anị dị ọ ka, “Nda, ẹ yị daba nyị ịsa ikonya ọnị ụ kụkụ zụ mẹ yị mị? Ada amị, aarịhịnị navọ wa rẹ mẹ̀ aduwa yị mị de.” Di Iisọ nyima, di ee nowu booboro nị. 39#Ihib 11.20Di Ayiziiki ada anị ve tụ́ o ohi dị ọ ka, “Ẹtẹ ọnị ụ vaa ra ẹ yị vaa zụụ mẹ̀ ịsa. Eguhi o yi vee chiree tụ́ ịnị ẹtẹ awụ. 40#Oyn 36.8; 2 Ohi 8.20Ụ vaa kụ ịrẹkụ di we ve re ịsa rị nị. Ụ vaa hẹkẹ ọyịnyara awụ nị. Ama ịhị wàa vaa kà a ka wẹ yị kụkụ dọ, dị ụ dọ ẹngụ awụ hụrẹ ẹ ụvọ.”

41Iisọ vị ana kụkụ nyayịnẹ aa kụ́ ayị Ijekọvụ agụvị aduwa ana ada anị mẹ yọ. Di Iisọ ka a ịnị ayị anị ka ma yẹ ka ada anị ee vee sú. Òo wusu, dị ọnị wụ Ijekọvụ ọyịnyara anị. 42Ama a naa sị ọ kà yị Irebeka ka aanị Iisọ ozi anị maa kà nị. Di Irebeka wụsẹ na hị́ Ijekọvụ dị ọ ka, “Iisọ ẹnẹbẹnị awụ aa mẹ eto ka ọnị vaa wụ̀ wụ, dị ọnị ọ̀ sị dà ọyịkụ ha. 43Agụvị avọọ ozi emi, ịsị ọnị màa kà a wụ̀, vavọọ mẹ̀ ẹ. Kwẹẹtẹ wee zwee nọ ịda Ịrabanị ẹnẹbẹnị amị ana yà Ịharanị. 44Yà ịzọọ pè e da, dị ọyịkụ ẹnẹbẹnị awụ ọ̀ nẹtẹ 45Ịjị ayị anị ọ̀ọ sị nẹtẹ, di ayị ịrẹyị ọnị ụ mẹ̀ ẹ hi ọ nị, dị mị tụ́ va sị wụ hụụ ịzọọ. Mẹ yị maanị vaa yaayịtẹ di ezi emi ẹyịva wusu ẹkụhị ọnya ini eyi amị.”

46Di Irebeka kà a yị Ayiziiki dị ọ ka, “Anẹẹ Anihiti ọnị Iisọ na nyị aanị ẹ raà kụ́ o du mi eyi. Ijekọvụ ọnị ọ̀ọ rẹ na nyị Anihiti ẹnẹnị ene hi ịzẹnị aanị, ẹ yị vi isu amị sị gụrị ẹtẹ avọọ?”

Currently Selected:

Oyinyima 27: EBTP

Highlight

Copy