Oyinyima 28

1-2Di Ayiziiki va hị́ Ijekọvụ dị ọ mẹ̀ aduwaa yọ, di o hú ọ ụvọ dị ọ ka, “Asị ọ na nyị ezi Anikenaani ka ọ̀ vị ose anị, o! Ọ kà ọ̀ nọ ịda Ibetuwẹrị ada ọnyị anị ana ra Ịpadanaramị. Ọ kà Ịrabanị ẹnẹbẹnị ọnyị anị ộ ma ezi anẹẹ hi ịzọọ, òo tù ịzọọ, dị ọ nyị ọnya ịnị ẹnịnị. 3Di ọ mẹ̀ aduwa yọ dị ọ ka Ohomorihi Ochẹtẹẹngụ vaa mẹ ka ò zee yọ, dị ọ mẹ ka ọ ma ozi ẹtẹẹtẹrẹ. Ezi ewu ẹ vaa vị ohiku anẹkụra ọrụrụ-ọrụrụ nị. 4#Oyn 17.4-8Ọ kà ọ vaa mẹ ka ò zee yị ọnịrị ezi anị anka ọ mẹ̀ mẹ ka ò zee yị Abụrahamị. Ọ rẹ ka ẹtẹ oni Ohomorihi sị yị Abụrahamị ọnị ọ vị ọzọga tụ́ ịnị aanị, ọnị ọ vaa nyị nị.” 5Ịjị Ayiziiki vavọọ sị aduwa mẹ̀, dị ọ ka Ijekọvụ ọ̀ naavẹ nị. Dị Ijekọvụ si hu aa nọ Ịpadanaramị, ịda Ịrabanị ozi Ibetuwẹrị Anarami. Ọnị ọ vị ẹnẹbẹnị Irebeka ọnyị Ijekọvụ ọnịrị Iisọ nị.

Iisọ ộ nyị ọnẹẹ ọsa

6Â kà a yị Iisọ ka Ayiziiki ọ̀ mẹ̀ aduwa yị Ijekọvụ, dị ọ ka ọ̀ọ nọ Ịpadanaramị nị. Ọ rẹ wụ́ ka ịzọọ ọ ka ọ̀ na nyị ọnẹẹ hụrẹ nị. Ộ wụ́ ka Ayiziiki ọ rẹ kà a yị Ijekọvụ ọ màa mẹ̀ aduwaa yọ, ka asị ọ na nyị ezi Anikenaani. 7Ộ yẹ ka Ijekọvụ ộ wụ́ ịrẹyị ada anị ọnịrị ọnyị anị, ka o si hu zị nọ Ịpadanaramị. 8Ọnọọ ộ mẹ̀ ka Iisọ ọ̀ yẹ ka ezi Anikenaani e yi zee Ayiziiki ada anị eyi, 9avọọ di Iisọ nọ ịda Isimẹrị dị ọ na nyị ozi anị ana aā hị́ Imaharati tụ́ ịnị ọnẹẹ ọnọ vịdị nyị hi ẹtẹ nị. Imaharati vị ọyịnyara Inebayoti. Isimẹrị ozi Abụrahamị ọ ma wa nị.

Ijekọvụ ộ ra ụra re Ohomorihi

10Ijekọvụ ộ kwẹẹtẹ hụrẹ Ịbẹẹsẹba di o si hu aa nọ Ịharanị nị. 11Ô tù aha ọnya, ọyị mẹ ta, dị ọ jẹẹ ịzọọ nị. Dị ọ sị ịrẹta ọnya hụụ ịzọọ, di o si pè ịrẹsụ di aa sụ ara nị. 12#Ịjọ 1.51Dị ọ ra ụra di o re ka â nyị ọbụna ọnya ana jẹẹ ọnị ịrẹsụ anị na kà ẹbẹẹba. Di o re anggẹẹrị Ohomorihi ẹ màa hịrẹ di e re yee chi ịnị anị nị. 13#Oyn 13.14,15Di o re re ka Ẹnẹyịmavara ộ jẹẹ pè ọnị dị ọ ka: Ọnị ọ̀ vị Ẹnẹyịmavara ana vị Ohomorihi Abụrahamị ada anị ọnịrị Ayiziiki. Ọ kà ẹtẹ ọnị ọ hụtụ tụ́ aanị, ọnịrị ezi anị ọnị sịị yị nị. 14#Oyn 12.3; 22.18Ọ rẹ ka ezi anị ịrẹma-ịrẹma vị ana vaa rụrụ anka ezi ini eteesu avọọ. Ọ kà vị ọ vaa yara ngụ avaba ẹhẹẹ zị nị. Anẹhẹ vị ana va mẹ̀ aduwa ka ò zee yị ẹnị anka o mè zee yọ. 15Di Ohomorihi rẹ ka ọnị ộ jẹẹ pè e, ọnị vee sere e aha tụra aha ọnị ọ̀ọ nọ. Ọ rẹ ka ọnị aa sị ọ vaa vẹ ịnị ẹtẹ ọnọnị. Avaba ịsị ọnị ka ọnị aa mẹẹ yọ aanị, à yị nyị ka ọnị ọ yị mẹ̀ ẹ, ka ọnị ẹ yị vaa va ịrẹma anị. 16Di Ijekọvụ sị ha nị, dị ọ ka, “Wáá yẹ ka Ẹnẹyịmavara yà ịzẹnị dị ọnị ọ̀ yị yẹ nị!” 17Angwa kụkụ ee hi ọ dị ọ ka, “Ịzẹnị o zụ chire ọza angwa. Irehi Ohomorihi yị, oze ini ihinẹba ịzẹnị vị nị.” 18Ẹnẹnẹ viri-viri ini eyinẹhẹ anị, di Ijekọvụ kwẹẹtẹ, dị ọ sị ịrẹta oni o si pè ịrẹsụ, dị ọ hi ọ, dị ọ ká angwẹ kú ọ nị. 19Dị ọ ka ịzọọ ọ rị Ịbẹtẹrị nị. Ama ịrẹha ẹkụra ọnọọ ọ vịdị rị Iruzi nị. Iruvo Ịbẹtẹrị ini Ihiburu vi irehi Ohomorihi. 20Di Ijekọvụ zẹẹ Ohomorihi ịzẹzẹ dị ọ ka: Àa vị ka Ohomorihi ộ yà pè ọnị, di o sere ọnị ịnị ụsẹ ọnị ọnị aa zị aanị nị; ọ̀ọ sị ịsọyịrị yị ọnị, dị ọ sị ịta yị ọnị kú ẹngụ nị 21ọ̀ọ navọ ka ọnị ọ̀ sị ẹngwọọrọ vavẹ ini eehi ada anị, Ẹnẹyịmavara ọnọọ ọ vaa vị Ohomorihi anị nị. 22Ịrẹta oni oni hì jẹẹ aanị ọ vị ịzị a vaa dà irehi Ohomorihii tụ́ nị. Avaba ịsị ọ̀ọ sị yị, ọnị vaa sị agẹẹwụ anịị yọ.

Currently Selected:

Oyinyima 28: EBTP

Highlight

Copy