Oyinyima 29

Ijekọvụ ọ na ngụ ịda Ịrabanị

1Di Ijekọvụ sị ụsẹ anị hụụ ịzọọ dị ọ na ngụ ịnị ẹtẹ aza ana ra éyi ọnị ọyịị̄ zịị vẹ nị. 2Ẹkụhị ọnya di o re ịkangga ọnya ịnị avị ịzọọ nị. Ô re ka atẹmẹ ọnịrị ẹvụ ọgụ ẹẹta ệ hụtụ pè ịkangga ọnọọ agụvị ka ịzọọ aa dà enyi hụrẹ yị wa di é hú ọ nị. Ịrẹta ene e si kú ịkangga ọnọọ ộ banyị ẹtẹẹtẹrẹ. 3Avaba ịsụpa ẹ̀ẹ sị gụ hi ịzọọ, di aza ana aa kụ́ waa rị dudu zina ịrẹta ọnọọ hụụnị ịkangga ọnọọ, dị ẹ sị enyi yị ịsụpa ẹnịnị. Ẹ̀ẹ raà sị enyi yị ịsụpa ẹnịnị, di e re dudu sị ịrẹta ọnọọ kú ịkangga ọnọọ irenu.

4Ijekọvụ mè re wa dị ọ ka, “Ọhụva amị, ịzị ụ hụrẹ vẹ nịnị?” Dị ẹ ka Ịharanị ẹnị hụrẹ vẹ nị. 5Di Ijekọvụ rẹ ka: Wáá yẹ Ịrabanị ozi Ịnahọ̀? Dị ẹnịnị rẹ ka ẹnị ệ yẹ ẹ nị. 6Di Ijekọvụ ka, “Ọ́ọ́ dà hi kẹ?” Dị ẹnịnị ka, “Ọ dà hi. Irechẹrị ozi anị ọ hyakụ kụ́ atẹmẹ aa vẹ avọọ nị.” 7Di Ijekọvụ ka ọyị ọ sị zẹtẹ, óò yi tù ka à kụ́ ịsụpa gụ. È sị enyi yị atẹmẹ ẹnẹẹ, dị ẹ̀ kụ́ wa na rị. 8Dị ẹnịnị ka, “Ho! à yị vị avaba ịsụpa gụ ta, ẹnị dudu zina ịrẹta ene kú ịkangga aanị, ẹnị e yi zụ ká enyi yị wa ọ.”

9Ijekọvụ mẹ maanị ee yii pè waa kà ịrẹyị kẹnẹ, di Irechẹrị ộ kụ́ atẹmẹ ada anị aa vẹ nị. Ọnị ọọ̄ kụ́ waa rị nị. 10Ijekọvụ mè re Irechẹrị ozi Ịrabanị ẹnẹbẹnị ọnyị anị ọnịrị atẹmẹ ada anị, di Ijekọvụ wụsẹ na, di o ne zina ịrẹta hụụnị irenu ikangga ọnọọ nị. Dị ọ ká enyi yị atẹmẹ Ịrabanị ẹnẹbẹnị ọnyị anị nị. 11Ịjị o si enyi ká yị wa, di Ijekọvụ na hara Irechẹrị nị. Ộ jẹ pooro dị ọ mẹ orere kẹ, di ee sụ ùnè nị. 12Di Ijekọvụ kà a yị Irechẹrị ka aazị ada anị ọnị vị nị. Ọ kà Irebeka ọ ma ọnị nị. Irechẹrị mẹ̀ maanị wụ́, di o zwe na kà a yị ada anị nị. 13Ịrabanị mẹ̀ wụ́ ịrẹyị Ijekọvụ ozi ọyịnyara anị, di o zwe na gẹrị ọ, dị ọ hàrà a kú ayị, dị ọ sị ọ vẹ ini eehi nị. Di Ijekọvụ kà avaba ịsa ana mẹ yị Ịrabanị nị. 14Di Ịrabanị ka, “Ho, ozi anị ọ vị nọ.” Di Ijekọvụ yà ịda anị ụhwẹ ọyịvụrụ ọnya nị.

Ijekọvụ mẹmẹ nyị Iriya ọnịrị Irechẹrị

15Ẹkụhị ọnya di Ịrabanị hị́ Ijekọvụ dị ọ ka, “Vị ọ́ọ́ maanị vaa hẹkẹ ọnị kẹnẹ ọọhẹ agụvị ka ẹnị ẹ mẹhị vị anda nị? Ọ kà ọ kà a yị ọnị dàre sị a vọrọ ka ọnị o si si ọ ụta.” 16Ịrabanị ộ ma ezi anẹẹ ẹẹva. Ana vị ọzọkụ ọ rị Iriya, di ozweyi ọnị rị Irechẹrị nị. 17Â nyị ịsị ẹ ka ọnị ọ̀ maanị mẹ Iriya eyi, ama Irechẹrị ọnị ô zoza, wèe re e kẹnẹ aa vá wụ. 18Irechẹrị Ijekọvụ sì nị. Dị ọ kà a yị Ịrabanị dị ọ ka: Ọ̀ jẹẹ ọnị ọ̀ mẹ̀ ụkọrọ yọ ịrayị ịhịmba dị ọ si Irechẹrị ozi anị ana vi ozweyi gà ọnị. 19Di Ịrabanị ka, “Ọ̀ọ sị ka ọnị ọnị va na sịị gà ọza ẹnẹsa, ọnị a vọrọ ka ọnị ọ̀ sị gà nị. Ọ̀ ka ọ̀ ya ịzẹnị pè ọnị.” 20Ijekọvụ ộ mẹ̀ ụkọrọ ịrayị ịhịmba yị Ịrabanị agụvị Irechẹrị. Ịrayị ịhịmba ẹnẹẹ vị ana yà anka ẹkụhị chee kẹnẹ ini eyi Ijekọvụ, agụvị ka o reè sì ịrẹyị Irechẹrị.

21Ịrayị ịhịmba ẹnẹẹ mẹ̀ sị gụ, di Ijekọvụ va hị́ Ịrabanị dị ọ ka: Ọ sị ose anị yị ọnị dị ọnị ọ̀ nyị ọ agụvị ka ịrayị ịhịmba ọnị ọ jị ọ sị gụ. 22Di Ịrabanị kụ́ avaba anẹkụra ọnọọ gụ, dị ọ mẹ̀ ịsa yị wa nị. 23Ẹtẹ mẹ̀ si hozi, di Ịrabanị sị Iriya na yị Ijekọvụ nị. Di Ijekọvụ ọnịrị Iriya sị sụ nị. 24Ịrabanị ộ sị ozi ahụ anị ọnẹẹ ọnya ana aā hị́ Iziripa yị Iriya ka ọ̀ naa zị ọ ụtụ nị. 25Eyi mẹ̀ sị nị, di Ijekọvụ ve re ka Iriya ọnịrị sụtụ nị, ẹ yị vị Irechẹrị. Di Ijekọvụ va hị́ Ịrabanị dị ọ ka, “Sị ẹ vẹ dị ọ mẹ̀ ọnị apẹ, Ọ kà Aanị ka ẹ yị vị agụvị Irechẹrị ọnị mẹ̀ ụkọrọ yọ, Sị ẹ vẹ dị ọ maanị vene ọnị aanị?” 26Di Ịrabanị ka, “Ọza ọ mā si ozweyi gà ọnọrụ tụ́ ọzọkụ ịnị ẹkụra ẹnịnị ọnọnị. 27Dị ọ ka ọ̀ jẹẹ ẹnị ẹ̀ jẹ ịrajẹ ọsọnị mẹ ọsẹ ọnya da, dị ọnị ọ̀ rẹ sị Irechẹrị yọ dị ọ mẹ̀ ụkọrọ ịrayị ịhịmba tụ́ ọ yị ọnị.” 28Di Ijekọvụ ka ooho nị. Ịjị a sị eche Iriya rị mẹ ọsẹ ọnya, di Ịrabanị sị Irechẹrị ozi anị ọsa yị Ijekọvụ dị ọ nyị ọ nị. 29Di Ịrabanị rẹ sị ozi ahụ anị ọnẹẹ ọnya ana aā hị́ Ibiriha yị Irechẹrị ozi anị ka ọ̀ naa zị ọ ụtụ nị. 30Di Ijekọvụ ọnịrị Irechẹrị aa mẹ ẹvarose nị. Ijekọvụ ô sì ịrẹyị Irechẹrị huna Iriya. Dị ọ rẹ mẹ̀ ụkọrọ ịrayị ịhịmba tụ́ ọ yị Ịrabanị nị.

Ezi ọnị Iriya ma yị Ijekọvụ

31Ịjị Ẹnẹyịmavara maanị re ka Ijekọvụ o yi sì ịrẹyị Iriya, dị ọ mẹ ka Iriya ọ̀ ma ozi nị. Ama Irechẹrị ọnị vị ọbọrị. 32Iriya ô zyẹẹ dị ọ ma ozi ọnọrụ ọnya nị. Dị ọ yị ọ Irubẹnị nị. Ọ kà, “Ẹnẹyịmavara o si re ka ọnị aa rị ụya. Ọ kà ọnị ộ yẹ ka ọva anị kuku vee sì ịrẹyị anị booro aanị.” 33Ộ dà kù di Iriya ree zyẹẹ nị. Dị ọ rẹ ma ozi ọnọrụ ọsa nị. Dị ọ ka, “Ẹnẹyịmavara ộ wụ́ ka ọza o yi sì ịrẹyị anị, agụvị avọọ ọ rẹ sị ozi ọnọrụ ọsa yị ọnị aanị nị.” Dị ọ ka ọnị ọọ ọ rị Isimiyọnị nị. 34Iriya o re zyẹẹ, dị ọ rẹ ma a ọnọrụ nị. Dị ọ ka, “Ọnị ộ yẹ ka ọva anị vaa vàa ka ọnị vẹ ọgọnị, ọnị mẹ̀ sị ozi ọnọrụ ẹẹta ma yọ aanị.” Dị ọ ka ọnọọ ọ rị Ireevi nị. 35Di Iriya re zyẹẹ, dị ọ rẹ sị ọ ma ọnọrụ nị. Dị ọ ka, “Ọnị kụkụ aa gā Ẹnẹyịmavara.” Dị ọ hị́ ịrẹha ọnọọ Ijuda nị. Ọnọọ ọ ma, dị ọ varẹma na jẹẹ nị.

Currently Selected:

Oyinyima 29: EBTP

Highlight

Copy