Oyinyima 30

Ụhị ọyịkụ̀ ana ya ịnị akakana Irechẹrị ọnịrị Iriya

1Irechẹrị ô re ka ọnị ọ yị ma ozi yị Ijekọvụ. Di o nyima di ee pè onyeyiza anịị kụ̀ ụ̄hị nị. Dị ọ ka Ijekọvụ ọ̀ yị si ozi yị ọnị ma, vị ọnị ee sú nị. 2Di ayị sị kụ́ Ijekọvụ, dị ọ ka, “Ọnị ọ́ọ́ vị Ohomorihi ana ka asị o re ozi ma nị?” 3Di Irechẹrị ka ọ̀ sị Ibiriha ozi ahụ anị ọnọnị di ọnịrị ọ ọ̀ọ zị, ịsavọọ ọ̀ ma ozi dị ọnị ọ̀ sị mẹ aanị. 4Ịzẹyịza dị ọ sị Ibiriha yị Ijekọvụ ka ọnịrị ọ̀ ọ̀ọ zị nị. 5Chee kẹnẹ di Ibiriha ee zyẹẹ, dị ọ sị ozi ọnọrụ ọnya ma yị Ijekọvụ nị. 6Di Irechẹrị ka, “Ohomorihi ka ọnị ọ yị rị ịvị. Ọ kà ộ wụ́ aduwa anị, ọ raà si ozi ọnọrụ ọnyaa yị ọnị.” Dị ọ ka ozi ọnọọ ọ rị Ịdaanị nị. 7Ibiriha ozi ahụ Irechẹrị o re zyẹẹ, dị ọ rẹ ma ozi ọnọrụ ọsa yị Ijekọvụ nị. 8Di Irechẹrị ka, “Ọnịrị onyeyiza anị mẹ̀ gẹ ịrẹvụ ọbanyị ọnị o si o hú.” Dị ọ ka ozi ọnọọ ọ rị Inahwitari nị.

9Iriya mè re ka ọnị ọ sị jẹẹ ọnị ọ yị kụkụ ma ozi, di ọnị rẹ sị Iziripa ozi ahụ anị dị ọ sị yị Ijekọvụ ka ọnịrị ọ ọọ zị nị. 10Di Iziripa ma ozi ọnọrụ ọnya yị Ijekọvụ nị. 11Di Iriya ka, “Ọnị ọọ dà nyị ịrẹsụ ọyịza.” Dị ọ ka ozi ọnọọ ọ rị Igadi nị. 12Iziripa ozi ahụ Iriya ọ rẹ ma ozi ọnọrụ ọhụva yị Ijekọvụ. 13Di Iriya ka, “Ọnị ọ dà rị aha kẹnẹ! Anyẹnẹẹ vị ana kụkụ vaa hị́ ọnị.” Dị ọ ka ozi ọnọọ ọ rị Aseri nị.

14Ịnị ụmẹ ọnya a màa mẹ̀ ịsa ịnị aarẹ ana aā hị́ ihwiti, di Irubẹnị ne hèé ẹbaatụ ịnị aarẹ nị. Di Irubẹnị kụ́ ọ va yi Iriya ọnyị anị nị. Di Irechẹrị hị́ Iriya dị ọ ka, “Aarịhịnị ọ̀ sị ịnị ẹbaatụ ẹnẹẹ ọnị ozi anị kụ́ va yọ avọọ yị ọnị de.” Ịnị ẹtẹ Anisirẹrị, ẹbaatụ vị ọnya ịnị avị ene hi ịzọọ. A sịị̄ mẹ ahọ̀nọ ene e ro ka ọ zụ mẹ ka ọnẹẹ ò zyẹẹ. E re ro ka ẹbaatụ ọ zụ mẹ ka ọnọrụ ọ̀ nyị ẹngụ anị. 15Di Iriya ka: Ọva anị ọnị ọ dọ ọnị avọọ ọ yị hụ ọ? Ọ kà o ree sì ka ọnị ọ dọ ẹbaatụ oni ozi anị kụ́ vẹẹ? Di Irechẹrị ka: Ọ̀ọ sị ẹbaatụ ozi ọnọọ yị ọnị, oruva di ọnịrị adarehi anị sụ aha ọnya. 16Oruva Ijekọvụ mẹ̀ hụrẹ aarẹ aa vẹ, di Iriya jịnẹ na gẹrị ọ nị. Di Iriya ka: ịdị anị aa sụ ajịnị nị o! Ọ kà ẹbaatụ oni ozi anị sị vẹ ọnị sị si ụta di o ve tù ọnị ụvọ nị. Ịzẹyịza di ahịka ọnịrị ọ sụ aha ọnya ịnị ịrahụ ịhị ọnọọ nị. 17Ohomorihi ộ wụ́ aduwa Iriya, di o zyẹẹ dị ọ ma Ijekọvụ ana vị ozi anị ọhụhị nị. 18Di Iriya ka: Ohomorihi ọ raà sị ọgụ anị yị ọnị agụvị ka ọnị ô sị ozi ahụ anị yị ọva anị. Dị ọ ka ozi ọnọọ ọ rị Iisaka nị. 19Iriya o re zyẹẹ dị ọ ma ozi anị ọhụhịnọnyị dị ọ rẹ vị ọnọrụ nị. 20Di Iriya ka: Ohomorihi o raà sị ẹyịza ozoza yị ọnị. Ọnị ọ yẹ ka ọva anị kụkụ vee tere ọnịị pe ẹngụ, agụvị ka ọnị osi ozi ọnọrụ ịhịnọnyị maa yọ. Dị ọ yị ozi ọnọọ Izeburuni nị. 21Iriya ọ rẹ vana ma ozi ọnẹẹ ọnya, dị ọ hị́ ọ Idina nị. 22Di Ohomorihi va tamayị Irechẹrị nị. Ohomorihi ộ wụ́ aduwa anị dị ọ mẹ ka ọ̀ zụ ma ozi nị. 23Ô zyẹẹ, dị ọ ma ozi ọnọrụ ọnya nị. Dị ọ ka: Ohomorihi ọ raà mẹ ka asị ụhị kụkụ nyị ọnị. 24Dị ọ ka ozi ọnọọ ọ rị Ijosẹẹhụ nị. Dị ọ ka: Ẹnẹyịmavara ọ̀ navọ ọ̀ rẹ sị ozi ọnọrụ ọsa yị ọnị.

Ohu oni Ijekọvụ ọnịrị Ịrabanị sẹ̀.

25Irechẹrị mẹ̀ sị Ijosẹẹhụ ma, ẹkụhị ọnya di Ijekọvụ hị́ Ịrabanị dị ọ ka: Ọ̀ navọ ọnị ọ̀ọ nọ eehi anị. 26Ọ kà ọ kụ́ ese anị ọnịrị ezi anị yị ọnị dị ọnị ọ̀ọ na. Ọ kà agụvị ẹnịnị ọnị aa mẹ ụkọrọọ yọ nị. Dị ọ rẹ ka ọ yẹ ọpa ụkọrọ ọnị ọnị mẹ yọ. 27Di Ịrabanị ka: Ọ̀ jẹẹ ọnị ọ̀ kà ịsa ọnya. Ọ kà ọnị mẹ̀ na zama ẹtẹ ọnị ọ sị yẹ ka Ẹnẹyịmavara ọ raà hụ agụvị Ijekọvụ mẹ ka ò zee yị ọnị. 28Dị ọ ka ọ ka ẹ yị ọnị sị a vọrọ ka oni o si ọ, dị ọnị ọ̀ sị yọ. 29Di Ijekọvụ tụ́ o ohi dị ọ ka: Ịrabanị ụvọta ộ yẹ ọnị mẹmẹ mẹ̀ ụkọrọ yọ. Ọ kà ộ yẹ ịsụpa anị mẹ há ịnị ụvọ anị. 30Ọ kà dị ọnị vavẹ, ịsụpa anị aa chee aanị, ama booro aanị ệ ta rụrụ. Ọ kà ịsa tụra ịsa ọnị ọnị ọ̀ọ sị ụvọ tụra vị anị Ẹnẹyịmavara aa mẹ ka ò zoza yọ. Dị ọ ka o si tụ́ ka ọnị ọ rẹ kụkụụ tẹsị aza anị booro anị. 31Di Ịrabanị ka: Sị ọnị aa sịị yọ? Di Ijekọvụ ka: Ọ̀ọ zẹẹ ka ọnị ọ̀ dọ ịrẹyị ọnị ọnị vaa kà aanị, ọnị ọ mẹ yị kà ka ọ̀ sị ịsa ọnyọọnyịị yị ọnị. Ọ kà ịsụpa anị vị ọnị ọnị aa yịị tẹsị anị. 32Ọ kà ọ jẹẹ ọnị ọ̀ ngụ ịnị avaba atẹmẹ ọnịrị ẹvụ anị na para hu ajịnị. Dị ọ navọ ọnị ọ̀ kụ́ avaba atẹmẹ ọnịrị ẹvụ ana àa dà achẹrẹ beri atẹmẹ ojooji. Ọ kà avaba ịsị ọnị ee sì ka o si si ọnị ụta ọ vị ọnọọ nị. 33Dị ọ rẹ ka ịhị oo ve re ịsa ọnị o sị yị ọnị ịrẹma ụhwọọ, ọ vaa yẹ ka ọnị ọ yị mẹ̀ ẹ rị. Ọ kà o ne re atẹmẹ ọnịrị ẹvụ ẹnẹ ẹ̀ yị dà achẹrẹ, àa vị atẹmẹ ẹnẹ ẹ yị vị ojooji, dị ọ̀ yẹ ka vi ọnị yi ẹnẹẹ nị. 34Di Ịrabanị ka ộ vavọọ zoza, ọ̀ vavọọ na mẹ̀ ẹ anka ọ mẹ̀ yị kà a avọọ. 35Ama ịhị ọnọọ gẹdẹ-gẹdẹ, di Ịrabanị nọ ịnị ịsụpa anị dị ọ tọ̀ọ́ avaba ịdẹ ọnịrị ọnyẹvụ aanị ana dà achẹrẹ, dị ọ maanị nyị ọvụ chee nị. Dị ọ rẹ tọ̀ọ́ avaba atẹmẹ anị ana vị ojooji nị. Dị ọ kụ́ avaba ọnị ọ maanị tọ̀ọ́ anị yị ezi anọrụ anị ka ẹ kụkụ si eyi pè wa nị. 36Dị ọ kụ́ ọnị ọ tọ̀ọ́ aanị na aha huu ana ahịka ọza aa zị ụsẹ ẹkụhị ẹẹta dị ọza ọ̀ va zụ hụrẹ ịzị Ijekọvụ yà na ngụ ịzọọ. Di Ijekọvụ ọnị re sị eyi pè ịsụpa Ịrabanị ana vọ nị. 37Di Ijekọvụ dà avọ́ ọchị ohwoohu ẹnyị aanị ana aā hị́ irivine, Iruzi arịmọndị ọnịrị irivine erimoni nị. Dị ọ dà achẹrẹ tụ́ wa, dị ọza ee re achẹrẹ ọvwọọvụ woro-woro ene hi ịnị ọchị ẹnẹẹ nị. 38Dị ọ kụ́ ọchị ẹnẹẹ hi ọvịdị ịsụpa ẹnẹẹ ịzị ẹ yàa hú enyi nị. Iruvo ọnọ sị kụ́ wa hi ịzọọ, ọ vị ka ịsụpa enee eè hú enyi ẹẹ̄ tụra ẹngụ. 39Ịsụpa ẹnẹẹ ẹ̀ẹ vavọọ tụra ẹngụ ọvịdị ọchị ẹnẹẹ, ozi ẹnẹ ẹ̀ẹ ma, dị ẹ dà achẹrẹ hi ẹngụ. 40Di Ijekọvụ gà ịsụpa ẹnẹẹ hi nị. Ộ kụ́ atẹmẹ hi aha irenyi, dị ọ kụ́ wa và hura ịdẹba Ịrabanị ana dà achẹrẹ ọnịrị ana vị ojooji nị. Ama ịsụpa anị ụvọta vị ọnị ọ kụ́ hi aha irenyi, ọ yị zẹẹ ka ẹ̀ và hura ịsụpa Ịrabanị. 41Ịjị ịsụpa ana ahịka ẹ yị nyị ịzị aa zị aa tụra ẹngụ, di Ijekọvụ kụ́ ọchị ẹnẹẹ hi ọvịdị ẹnịnị ịzị ẹ yà ee hú enyi. Dị ịsụpa ẹnẹẹ ee re ọchị ẹnẹẹ, dị ẹ yaa tụra ẹngụ ịnị akakana ọchị ẹnẹẹ. 42Ama ịsụpa ana vị ọkụmị aa tụra ẹngụ, ọ mā sị ọchị ẹnẹẹ tụ́ ọvịdị ẹnịnị. Ịjị o nee kù, avaba ịsụpa ana vị ọkụmị kụkụ vị ịsụpa Ịrabanị, di ahịka Ijekọvụ ọ nyị avaba ịsụpa ẹnị ẹngụ anị gụ nị. 43Aanị Ijekọvụ mẹ̀ mẹ dị ọ vara ọzọbanyị rawụ-rawụ nị. Ộ nyị ịsụpa ẹtẹẹtẹrẹ, avọọ ọ mẹ̀ rẹ nyị ezi ahụ, ịnyaakụmị ọnịrị ịkẹrịkẹtẹ nị.

Currently Selected:

Oyinyima 30: EBTP

Highlight

Copy