Oyinyima 31

Ijekọvụ mẹmẹ zwe hụrẹ ịda Ịrabanị nọ eehi.

1Ụmẹ ọnya, Ijekọvụ ộ wụ́ ezi Ịrabanị màa kà a ka, “Ijekọvụ ọ raà kụ́ avaba ogu ada ẹnịnị. Ẹ ka avaba ogu anị ọnọọ, ịnị ogu ada ẹnịnị ọ kụ́ ọ hụrẹ nị. 2Ijekọvụ o re re ka Ịrabanị o yi kuku sị eyi ọyịza re ọnị. 3Di Ẹnẹyịmavara va kà a yị Ijekọvụ dị ọ ka: Ọ̀ kwẹẹtẹ dị ọ̀ọ nọ ịnị ẹtẹ ada anị ịzị anda ẹnịnị hi, ka ọnị vaa yàa pe e.”

4Di Ijekọvụ va tụ́ na hị́ Irechẹrị ọnịrị Iriya ka è ve tù ọnị ịnị avị ịzị ịsụpa anị hi nị. 5Dị ọ kà a yị wa ka ọnị o si re ka ada ẹnịnị ọ yị kụkụ sị eyi ọyịza re ọnị anka ịyẹẹyẹ. Ama Ohomorihi ada anị vị ana jẹẹ ọnị ịrẹma. 6Ọ kà ọ yẹ ka avaba ọchẹngụ anị ọnị sị mẹ̀ ụkọrọ yị ada awụ nịnị nị, 7ama ada ẹnịnị ộ mẹ̀ ọnị rị. Ụta ọnị ọ ka oni vee si ọnị, ụpẹ ẹẹwụ ọ vara a dị ọ̀ yị vavọọ ve si ọ nị. Ama Ohomorihi ọ yị zẹẹ ka à nyị ịsị ọ sị mẹ̀ ọnị. 8Ọ̀ ka ọ̀ọ ka ịsụpa ana dà achẹrẹ pòtópótò ọ vaa vị aanị, dị avaba ezi anị ẹ ma dà achẹrẹ potopoto. Ọ̀ọ rẹ vaka ana dà achẹrẹ wòówóró ọ kụkụ vaa vị aanị nị, di avaba ezi anị ẹ ma rẹ dà achẹrẹ wooworo. 9Dị ọ rẹ ka avọọ Ohomorihi mẹmẹ dọ ada ẹnịnị ịsụpa dị ọ sị yị ọnị nị.

10Dị ọ rẹ ka ịnị ụmẹ ọnị ịsụpa ẹnẹẹ aa sịị tụra, ọnị ộ ra ụra ọnya. Ịnị ụra ọnọọ ọnị ộ kana eyi, di ọnị re ka ịdẹ ana aa tụra ọnyẹvụ vị ana nyị achẹrẹ wooworo, dị ẹ rẹ nyị achẹrẹ potopoto nị. 11Ịnị ụra ọnọọ, di anggẹẹrị Ohomorihi hị́ ọnị, dị ọnị zẹẹ nị. 12Dị ọ ka ọnị ọ̀ kana eyi di ọnị o re nị. Di ọnị re ka avaba ịdẹ ana aa tụra ịsụpa ẹnẹẹ vị ana dà achẹrẹ wooworo dị ẹ rẹ nyị achẹrẹ potopoto. Ọ kà anggẹẹrị ọnọọ ka ọnị ô re avaba ịsa ọnị Ịrabanị aa mẹ̀ ọnị. 13#Oyn 28.18-22Dị anggẹẹrị ọnọọ ọ kà ọnị ọ vị Ohomorihi ọnị ọnị Ijekọvụ re Ịbẹtẹrị nị. Ịzọọ ọ yà hi ịrẹta jẹẹ dị ọ ká angwẹ kụ ọ, dị ụ zẹẹ ịzẹzẹ yị ọnị nị. Dị ọ ka ọnị ọ̀ kwẹẹtẹ hụụ ịzẹnị dị ọnị ọ nọ ịnị ẹtẹ ịzị a yà ma ọnị. 14Di Irechẹrị ọnịrị Iriya tụ́ ohi dị ẹ ka, sị kụkụ vị ogu ene zu tu ẹnị ịnị eehi ada ẹnịnị? 15Aanị ka ẹ yị vị eyi ọzọga a hyakụ kụkụ ee sii re ẹnị? Ẹ ka ọ sị ẹnị ná, ọ sị ẹkẹhị ẹnịnị rị. 16Avaba ogu oni Ohomorihi dọ ada ẹnịnị aanị kụkụ vị ẹẹnịnị ọnịrị ezi ẹnịnị. Ẹ ka agụvị avọọ ịsị Ohomorihi ọ̀ọ ka Ijekọvụ ọ̀ mẹ, ọ mẹ̀ ẹ. 17Di Ijekọvụ kwẹẹtẹ dị ọ kụ́ ezi anị ọnịrị ese anị tụra ịnyaakụmị 18dị ọ kụ́ avaba ịsụpa anị, ọnịrị avaba ịsa ọnị ọ nyị ọ mẹ̀ yà akẹbẹẹba Imesopotemiya dị ọ kụ́ wa aa nọ ẹtẹ Ikanaani ana vị ẹtẹ ada anị Ayiziiki nị. 19Ịrabanị oni o si hu aa naa yẹrẹ ẹyị atẹmẹ anị, di Irechẹrị reè yi ori ene hi ini eehi ada anị nị. 20Ijekọvụ ọnị ọ yị rẹ kà a yị Ịrabanị Anakẹbẹẹba Imesopotemiya ka ọnị aa na, vị o vene e nị. 21Ijekọvụ ọ raà kụ́ avaba ịsị ọ nyị, o si zwe. Ọ na sị jịnẹ Okuha Iyuhwireti, di o và eyi ka ẹtẹ ịnị ataba ana aā hị́ Igiriyadi di aa na nị.

Ịrabanị ộ dụ Ijekọvụ na za

22Ọ sị mẹ ẹkụhị ẹẹta di a va kà a yị Ịrabanị ka Ijekọvụ o si zwe. 23Dị ọ kụ́ aza anị dị ẹ kụ́ hi Ijekọvụ nị. Ệ dụ ọ mẹ ẹkụhị ịhịmba dị ẹ va na saasa a ịnị ẹtẹ ịnị ataba Igiriyadi. 24Ịnị ịrahụ, di Ịrabanị anakẹbẹẹba Imesopotemiya ra ụra re Ohomorihi nị. Di Ohomorihi kà a yọ dị ọ ka, “Mẹ hẹẹ, ọ ka asị a nyị ịsị ọ mẹ Ijekọvụ vụrụ-vụrụ.” 25Ijekọvụ vị ana sị ajẹngụ ẹnịnị tụ́ ịnị ẹtẹ ataba Igiriyadi. Dị Ịrabanị, na saasa a, dị ọnịrị aza anị ẹnị re sị ajẹngụ ẹnịnị tụ́ ịnị ẹtẹ ataba Igiriyadi nị. 26Di Ịrabanị ne tu Ijekọvụ dị ọ ka: Sị ọ mẹ aanị? Ọ kà sị ẹ vẹ di o vene ọnị, dị ọ kụ́ ezi anị si zwe anka ọza ọnị ọza na za ịnị ịrẹkụ avọọ? 27Sị ẹ vẹ di o vene ọnị, di o were si zwe, dị ọ̀ yị kà a yị ọnị. Ọ kà ọọ kà yị ọnị dị ọnị yaanị jẹrị ẹngụ, di ẹnị hú ịsa, di ọnị sị kụ́ ọ nyaatụ. 28Ọ kà ọ máá daba zẹẹ ka ọnị ò hara ezi anị kụ́ ayị, dị ọnị ọ kụ́ wa nyaatụ. Ọ kà ebira ụra ọ mẹ aanị nị. 29Ọ kà Â nyị ịsị ọnị yaanị zụ sị mẹ̀ ẹ. Ama Ohomorihi ada Ijekọvụ ộ kà a yị ọnị ịrahụ ẹẹrị ka ọnị ọ̀ mẹ hẹẹ asị a nyị ịsị ọnị mẹ̀ ẹ. 30Dị ọ rẹ ka ọnị ọ yẹ ka o si hu agụvị ka eyi eehi ada anị aa tụra a ẹtẹẹtẹrẹ, ama sị ẹ vẹ di o yi ori anị? 31Di Ijekọvụ tụ́ ohi dị ọ ka angwa anị ô hi ọnị ọnị o ro ka ọ nyayịnẹ dọ ọnị ezi anị ụkata-ụkata. 32Ọ kà ọza oni oo re ori anị ịda anị, à wụ̀ ọ. Dị ọ rẹ ka Ini eyi anda ẹnịnị ene hi ịzẹnị aanị, ọ tana ụvọ hị́ ịsa anị ana vị Ịrabanị di ọ̀ sị ọ. Ama Ijekọvụ ọnị ọ yị yẹ ka Irechẹrị o reè yi ori ẹnẹẹ. 33Di Ịrabanị ngụ ịnị ajẹngụ Ijekọvụ ọnịrị ajẹngụ Iriya ne beri ajẹngụ ezi ahụ anẹẹ ẹyịva nị, ama o yi re ori ẹnẹẹ. Dị ọ jịnẹ hụụnị ajẹngụ Iriya dị ọ na ngụ ajẹngụ Irechẹrị nị. 34Irechẹrị mẹ̀ sị ori ini eehi ẹnẹẹ dị ọ sị wa tẹ̀ ịnị ampo ana a jị tụ́ ịnị ịsa ana a sịị̄ yàyịtẹ tụra ịnyaakụmị, dị ọ yaayịtẹ tụra wa nị. Ịrabanị ộ gara avaba ajẹngụ anị o yi re e. 35Dị Irechẹrị kà a yị ada anị dị ọ ka, “Nda, aarịhịnị asị ọ kụ́ ayị ka ọnị ọ yị zụ kwẹẹtẹ. Ọ kà ọnị o si nyima ee re ịsa ụhwẹ anị.” Ịrabanị ô hee ajẹngụ Irechẹrị, ama o yi re ori ini eehi ẹnẹẹ. 36Ayị ọ sị kụ́ Ijekọvụ dị ọ ka, “Sị ọnị mẹ̀ ẹ? Ye re ịsa odivi ọnị ọnị mẹ dị ọ maanị kụ́ chire ọnị ịrịịra. 37Ọ kà ọ raà zama avaba ịsị ọnị nyị re, áá nyị ogu anị ẹnyị-ẹnyị oni o re ini ogu anị? Ọ kà àa nyị, ọ sị ọ̀ tụ́ ẹhẹ ịzẹnị eyi aza anị ọnịrị aza Ịrabanị dị ẹ vị onivenu ẹnịnị. 38Dị Ijekọvụ rẹ ka ịrayị oohu ọnị ọnị hụrẹ yà ịda anị avọọ yị. Ọ kà atẹmẹ anị ọnịrị ẹvụ anị ẹ yị wọrọ ịrẹẹ. Ọnị ọ yị wụ ịdẹba anị rị. 39Ọ rẹ ka ọnị uye ịnị avị ọ̀ọ wụ̀, ọnị ẹ yị sị ọ ve tù ọ, ọnị ee si ụta anị nị. Ọ kà àa nyị oni oyi yi ụmẹ ọọdụ à vị ịrahụ, vị aa dọ ọnị ẹkẹhị anị nị. 40Ọ kà Ọọdụ vị ọnị ọyị aa rị ọnị, di ahị aa za ọnị ịrahụ, dị ọnị ọ yị zụ sụ ara. 41Ọ rẹ ka ịrayị oohu ọnị ọnị hụrẹ yà ịda anị avọọ yị. Ọ kà ọnị ọ sị ịrayị ẹwụrẹna hẹkẹ ẹ agụvị ezi anẹẹ anị ẹẹva. Ọnị ọ rẹ sị ịrayị ịhịnọnyị sị eyi pè ịsụpa anị. Dị ọ rẹ ka ụpẹ ẹẹwụ ọ vara ụta ọnị ọ ka ọnị ee si ọnị nị. 42Ọ kà Ohomorihi ada anị ana vị Ohomorihi Abụrahamị ọnịrị Ohomorihi ana Ayiziiki hí angwa anị ộ jẹẹ ọnị ịrẹma. À yị vị avọọ, ọ yaanị tụ ọnị avọ osusu nị. Ọ kà Ohomorihi ô re ụya ọnị ọnị aa rị, ô re ọnị mẹmẹ aa mẹ̀ ụkọrọ, ọnị ọ mẹ ka ọ̀ tụ́ o ohuvọ ịrahụ ẹẹrị nị.”

43Di Ịrabanị tụ́ Ijekọvụ ohi dị ọ ka, “Ezi anẹẹ ẹnẹnị vị ezi anị. Ezi ẹnẹnị rẹ ma vị ezi anị. Ịsụpa ẹnẹnị vị aanị Avaba ịsị ee re aanị, vị anị. Si ọnị kụkụ zụ si mẹ ezi ẹnẹnị àa vị ezi ẹnị ẹ ma? 44Dị ọ ka ọ vẹ vị ọnịrị ọ hị́ eku yị ẹngụ, dị a nyị ịsị ẹ vị ivenu yị ọnịrị ọ.” 45Di Ijekọvụ sị ịrẹta ọnya di o hi ọ jẹẹ nị. 46Di Ijekọvụ kà a yị aza anị dị ọ ka, “Kụ́ ịrẹta gụ nịnị.” Dị ẹ kụ́ ịrẹta dị ẹ sị hi ụta ịsọvọ jẹẹ nị. Dị ẹ rị ịsa ịzọọ nị. 47Di Ịrabanị ka atakuji ọnọọ ọ rị Ijega-Isahaduta, di Ijekọvụ ọnị hị́ ọ Igareedi nị (Iruvo Ijega-Isahaduta ịnị ẹkụra Anarami ọnịrị Igareedi ịnị ẹkụra Anihiburu vị ataba ivenu). 48Di Ịrabanị ka: Atakuji ọnọnị ọ̀ vị onivenu yị ọnịrị ọ ajịnị. Agụvị avọọ ọ sị hị́ ọ Igareedi nị. 49Atakuji ọnọọ a rẹẹ̄ hị́ Imizipa nị, agụvị ka Ịrabanị ộ kà a ka: Ẹnẹyịmavara ee re ọnịrị ọ ịjị ẹnị ẹ̀ sị ha hi. Imizipa: ịrẹha ọnọnị ô vene ịzị a yà sị eyi pè ẹtẹ ịnị ẹkụra Anihiburu. 50Wàa na me ezi emi eyi ngwẹngwẹ, wàa daka na nyị ọnẹẹ ọsa ịrẹma ezi emi ẹnẹnị, à yị daka nyị ọza ana yà ịzẹnị, tamayị ka Ohomorihi vi onivenu ẹmịrị ẹwụ.

51Di Ịrabanị va kà a yị Ijekọvụ dị ọ ka, “Ò re atakuji ọnịrị ịrẹta oni ọnị hi aanị. Ọ kà ọnị ộ sị wa jẹẹ ịnị akakana ọnịrị ọ. 52Atakuji ọnịrị ịrẹta ọnọnị vị ivenu yị ẹnị ka ọnị ọ yị vaa para ịzẹnịị hu vẹ ịdị Ijekọvụ, Ijekọvụ ọnị ẹ yị rẹ vaa para ịzẹnịị hu vẹ ịdị anị dị ẹnị ẹ̀ va mẹ ẹngụụ ịrẹyị. 53Ohomorihi ana Abụrahamị hẹkẹ ọnịrị ori Ịnahọ̀, ẹ̀ mẹ̀ ọkarẹyị ịrẹyị ọnịrị ọ.” Di Ijekọvụ sị Ohomorihi ana Ayiziiki ada anị hí angwa anị hị́ eku nị. 54Di Ijekọvụ mẹ̀ ịsọvọ yị Ohomorihi ịnị ataba ọnọọ nị Dị ọ ka aza anị ẹ̀ rị ịsa nị. Ịjị ẹ sị ịsa rị, dị ẹ yà ịnị ataba ọnọọ ịrahụ ịhị ọnọọ nị.

55Ẹnẹnẹ viri-viri eyinẹhẹ anị, di Ịrabanị kwẹẹtẹ dị ọ hara aazị anị ọnịrị ezi anị, kụ́ ayị dị ọ kụ́ wa nyaatụ, di o si hu di aa nọ eehi nị.

Currently Selected:

Oyinyima 31: EBTP

Highlight

Copy