Oyinyima 45

Ijosẹẹhụ ộ sị ẹngụ anị zụ̀ ẹnẹbẹnị anị.

1 # Ụkọ 7.13 Ijosẹẹhụ mẹ̀ vavọọ wụ́ ịrẹyị Ijuda, ọ yị kụkụ zụ sị rị anyị ini eyi avaba ezi ahụ anị ene hi ịzọọ. Di o nowu dị ọ ka, “Kà a ka avaba aza ẹ̀ jịnẹ tụ́ ẹhẹ.” Avaba aza ẹ sị jịnẹ tụ́ ẹhẹ di Ijosẹẹhụ va kà a yị ẹnẹbẹnị anị nịnị ka ọnị ọ vị Ijosẹẹhụ nị. 2Ijosẹẹhụ aa tụ́ orere booboro, dị avaba Anijipiti ene hi ịzọọ aa wụ́ nị. Aza ene hi ini eehi Ihwarawo ẹnị ẹ rẹ wụ́ ịrẹyị ọnọọ bẹẹ. 3Di Ijosẹẹhụ kà a yị ẹnẹbẹnị anị nịnị dị ọ ka, “Ọnị ọ vị Ijosẹẹhụ nọ. Dị ọ ka ada anị yị yà ẹhẹẹ?” Ẹnẹbẹnị anị nịnị mẹ̀ maanị wụ́ ẹgahị ọ sị ngụ wa ẹngụ, ẹnịnị ẹ yị zụ tụ́ ohi ịrẹyị. 4Di Ijosẹẹhụ kà a yị ẹnẹbẹnị anị nịnị dị ọ ka, “Aarịhịnị ẹ̀ kà pè ọnị.” Ịzẹyịza dị ẹ kà pè e nị. Di Ijosẹẹhụ rẹ ka, “Ọnị ọ vị Ijosẹẹhụ ọhụva ẹnịnị ẹnị ẹ ná yị ọza ana aa nọ Ijipiti nị. 5Ọ kà aarịhịnị ẹ̀ và ayị ẹnịnị nẹtẹ. Asị ẹ na tụ́ ẹngụ ohuvọ ẹngụ ka wâ ná ọnị tụ́ ịzẹnị nịnị. Ọ kà Ohomorihi ọ tụ́ ọnị dọ ọvịdị ẹnịnị vẹ ịzẹnị ka ọnị ọ̀ va dọ aza ha nị. 6Dị Ijosẹẹhụ rẹ ka ịrayị ẹẹva ọnị ụngwẹ hụrẹ nyima ịnị ẹtẹ ọnọnị yị. Ọ sị sị vọ ịrayị ẹẹhị ana ahịka ọza ọ yị vaa kụ́ ịrịkụ dị à va nyị ịsa ịnị aarẹ. 7Ọ kà Ohomorihi o yi sì ka ụngwẹ ọ̀ wụ̀ wa hụụnị ẹhẹ. Agụvị avọọ ọ tụ́ ọnị dọ ọvịdị ẹnịnị vẹ ịzẹnị ka ọnị ọ̀ va mẹ ka asị ẹ ta hụụnị ẹhẹ nị, dị aza ẹ̀ zụ ha ini oze ene hi ọza irenu. 8Ọ kà éē re avọọ ka ẹ yị vị ọnị ọ sị ọnị vẹ ịzẹnị, Ohomorihi yọ nị. Ọ kà Ohomorihi o raà mẹ ka ọnị ọ̀ vị ọza ana si eyi pe ịsa yị Ihwarawo. Ọnị Ihwarawo kụkụ sị irehi chire ụvọ nị, dị ọnị rẹ sị eyi pè avaba ẹtẹ Ijipiti nị. 9#Ụkọ 7.14Dị ọ ka ẹ̀ wụsẹ ne tù ada anị dị ẹ kà a yọ ka Ijosẹẹhụ ozi anị ka Ohomorihi ọ sị ọnị vara ọga tụ́ Ijipiti. Ẹ kà a ka ọnị ka ọ̀ wụsẹ ve tù ọnị, asị o kù. 10Dị ọ rẹ ka ini okokooro Igoseni ẹ vaa ra nị, dị ẹnịrị ezi ẹnịnị ne beri aazị ẹnịnị ọnịrị atẹmẹ beri ẹvụ ọnịrị imaaru ẹnịnị neberi avaba ogu ẹnịnị ẹ̀ ra gụrị ọnị ịzọọ nịnị. 11Ọ kà ọnị vaa sị ịsọyịrịị yị wa ịzọọ. Dị ọ rẹ ka ụngwẹ ọnọnị ọ sị vọ ịrayị ẹẹhị dị ọ̀ ta. Ọ kà ọnị ọ yị vavọọ mẹ, ẹnịrị aneehi ẹnịnị beri avaba ịsụpa ẹnịnị vị ọnị ụzọngwa aa za.”

12Di Ijosẹẹhụ rẹ ka, “Ẹnị ụvọta ee re e, Ịbẹnjamịnị ọyịnyara anị ọnị ree re e bẹẹ ka ọnị Ijosẹẹhụ aa kà ịrẹyịị yị wa aanị nị. 13Ọ kà asị a zụ nyị ka ẹ yị kà a yị ada anị avaba ụbanyị ọnị ọnị nyị ịnị ẹtẹ Ijipiti, ọnịrị avaba ịsị e re. Ọ kà ẹ̀ navọ è jintu sị ada anị vẹ ịzẹnị.” 14Di Ijosẹẹhụ hara Ịbẹnjamịnị kú ayị, di ee sụ ùnè, di Ịbẹnjamịnị ọnị ree sụ ùnè nị. 15Di Ijosẹẹhụ hara avaba ẹnẹbẹnị anị kú ayị ọnya-ọnya, dị ee sụ ùnè nị. Di ẹnẹbẹnị anị kuku ee pè e kà ịrẹyị nị.

16Ịjị a wụ́ ọ ịda Ihwarawo ka ẹnẹbẹnị Ijosẹẹhụ ộ vẹ, ayị Ihwarawo ọnịrị aza ene hi ịda anị ô hine tụ́ ọ ẹtẹẹtẹrẹ. 17Di Ihwarawo kà a yị Ijosẹẹhụ dị ọ ka, “Kà ẹ yị ẹnẹbẹnị awụ nịnị ka è kune ẹnya tụra ịkẹrịkẹtẹ ẹnịnị dị ẹ̀ varẹma nọ Ikanaani. 18Ẹ̀ na sị ada ẹnịnị ọnịrị avaba aneehi ẹnịnị dị è ve tù mi ịzẹnị. Ịzị e zoza hu keekere ịnị ẹtẹ Ijipiti m maa sịị yị wa nị. Ẹ vaa nyị ịsọyịrị ẹtẹẹtẹrẹ. 19Rẹ kà a yị wa ka ẹ̀ kụ́ ịkẹkẹ ọnị imaaruū tura hụrẹ Ijipiti dị ẹ̀ sị na kụ́ ezi eweyi ọnịrị ese ẹnịnị, dị ẹ̀ sị ada ẹnịnị beri wa dị ẹ̀ vẹ. 20Kà a ka asị e ro ịrẹyị ẹnya ẹnịnị ana vọ tụ́ Ikanaani, agụvị ka ịzị e zoza hu keekere ịnị ẹtẹ Ijipiti m maa sịị yị wa nị.” 21Ịzẹyịza di ezi Ijekọvụ vavọọ mẹ̀ ẹ nị. Di Ijosẹẹhụ kụ́ ịkẹkẹ ọnị imaaruū turaa yị wa anka Ihwarawo mẹ̀ kà a nị. Dị ọ sị ịsọyịrị yị wa ẹnị ẹ vaa rị ózee nị. 22Ijosẹẹhụ ộ kụ́ awuru ọwọọwa yị ọza ịnya ọza ịnya ẹnịnị, ama Ịbẹnjamịnị vị ọnị ọ sị ẹkẹhị ụkọrọ ẹkụhị ịrẹkẹẹchẹhị yị ne beri awuru ọwọọwa oze ẹẹhị. 23Ịsị Ijosẹẹhụ kụ́ tụ́ hi ada anị yị: ô kune ịsa ozoza-ozoza ene hi Ijipiti tụra ịkẹrịkẹtẹ ẹẹwụ: dị ọ kụ́ akụ ọnịrị ịsọyịrị ọnịrị ịsa ana vọrọ ka ẹ̀ rị ózee ẹ̀ẹ yàa vẹ tụra ịkẹrịkẹtẹ ọnẹẹ ẹẹwụ ka à sị na yị ada anị nị. 24Dị ọ ka ẹnẹbẹnị anị ẹ̀ vaa na nị. Ẹ màa na, di Ijosẹẹhụ kà a yị wa dị ọ ka, “Asị ẹ na zyaazị ózee o!”

25Dị ẹnẹbẹnị Ijosẹẹhụ hụrẹ Ijipiti di e ne si tù Ijekọvụ ada ẹnịnị ịnị ẹtẹ Ikanaani nị. 26Dị ẹ kà a yọ dị ẹ ka, “Ijosẹẹhụ yị yà ẹhẹ ộ! Ọnị ọ sị eyi pè avaba ẹtẹ Ijipiti nị.” Ijekọvụ mẹ̀ vavọọ wụ, ọ yị kuku zụ ro ịrẹyị, Ọ yị dọ ka ịzẹyịza yọ. 27Ama ịjị ẹ va kà avaba ịrẹyị ọnị Ijosẹẹhụ kà zụ̀ ọ, di o re re ịkẹkẹ oni Ijosẹẹhụ si tụ́ ka à sị na kụ́ wa nọ Ijipiti, dị ayị Ijekọvụ ada ẹnịnị tangwa aa nọ ẹtẹ nị. 28Di Ijekọvụ ka, “O kuku zee, Ọnị ọ sị dọ ka Ijosẹẹhụ ozi anị yị yà ẹhẹ. Ọ kà ọnị aa na dị ọnị o ne re e di ọnị ò ve sú.”

Currently Selected:

Oyinyima 45: EBTP

Highlight

Copy