Oyinyima 46

Ijekọvụ ọnịrị aza anị ệ nọ Ijipiti.

1Isirẹrị ô kụ́ avaba ẹnya anị di e nyima ụsẹ nị. Ệ vẹ, ẹ va sị ngụ Ịbẹẹsẹba. Dị ọ yà ịzọọ dị ọ mẹ̀ ịsọvọ yị Ohomorihi ana Ayiziiki ada anịị̄ hẹkẹ nị. 2Ijekọvụ mẹ̀ yà ịzọọ, dị ọ ra ụra ịrahụ ẹkụhị ọnya nị. Ịnị ụra ọnọọ di Ohomorihi hị́ ọ dị ọ ka, “Ijekọvụ, Ijekọvụ!” Di Ijekọvụ ka, “Hèé, ụ mẹ̀ kà?” 3Di Ohomorihi ka, “Ọnị ọ̀ vị Ohomorihi ana ada Ijekọvụ hẹkẹ nị. Ọ kà ọ màa nọ Ijipiti aanị, asị o hí angwa, ka ọnị vaa mẹ ka ọ̀ vara anẹkụra ọbanyị tụ́ ịzọọ. 4Ọ kà ọnị aa saasa a naa ngụ Ijipiti. Ọ kà ọnị raa sị sị ọ hụrẹ Ijipiti vaa vẹ. Dị ọ rẹ ka Ijosẹẹhụ ọ vaa dà ịtaa kú ọ eyi nị.”

5Di Ijekọvụ sị ụsẹ hụrẹ Ịbẹẹsẹba nị. Di ezi anị sị ọ ne beri ezi eweyi ẹnịnị ọnịrị ese ẹnịnị dị ẹ kụ́ wa hi ịnị ịkẹkẹ ọnọọ oni Ihwarawo sị tụ́ ka à sị na kụ́ wa vẹ nị. 6#Ụkọ 7.15Ẹ rẹ kụ́ ịsụpa ọnịrị ogu ẹnẹ nyị e mè hi Ikanaani, dị e hu aa nọ Ijipiti nị. Ijekọvụ ọnịrị avaba aza anị, 7ezi anị ọnịrị aazị anị, ezi anị anẹẹ ne beri aazị anị anẹẹ; avaba aza anị saka-saka ẹnịrịị zị nọ Ijipiti nị.

8Ezi ana hụrẹ ịpa Ijekọvụ vẹ m maa vaa hị́ aanị nị. Avaba ẹnịnị ẹ nọ Ijipiti nị. Ijekọvụ ọnịrị ezi anị yị: Irubẹnị ana vị ozi ọzọkụ Ijekọvụ. 9Ezi Irubẹnị ẹ vị Ịhanọkị, Iparu, Ihezironi ọnịrị Ikarimi. 10Isimiyọnị ọnị rẹ vị ozi Ijekọvụ ezi Isimiyọnị ẹ vị Ijemuweri, Ijamini, Ohadi, Ijakini, Izohari ọnịrị Ịsọọrụ oni ose anị Anikenaani maa yọ. 11Ezi Ireevi ẹ vị: Igerisoni, Ikohati, ọnịrị Imerari nị. 12Ezi Ijuda ẹ vị Eri, Onani, Isera, Ịpẹrẹzị ọnịrị Ịzẹra. Ama Eri ọnịrị Onani ẹnị ee wusu ịnị ẹtẹ Ikanaani. Ezi Ịpẹrẹzị ẹnị vị Ihezironi, ọnịrị Ihamiri. 13Ezi Iisaka ẹ vị Itora, Ipuva, Iyobi ọnịrị Isimironi nị. 14Ezi Izeburuni ẹ vị Iseredi, Ẹrọnị, ọnịrị Ijahereeri nị. 15Ẹsẹnị ẹ vi ezi anọrụ ọnị Iriya ma yị Ijekọvụ nị ne beri ezi ọnẹẹ anị Idina. E me hi akẹbẹẹba Imesopotamiya avaba ezi (ọnịrị aazị) Ijekọvụ ana hụrẹ ịpa Iriya vẹ vị ohurẹẹwụ tụra ẹẹta. 16Ezi Igadi ẹ vị Iziponi, Ihagi, Isuni, Eziboni, Eri, Arodi ọnịrị Areri nị. 17Ezi Aseri ẹ vị Imina, Isiva, Isivi ọnịrị Iberiya ọnyị ozi anị ọnẹẹ ana aā hị́ Ịsẹra. Ezi Iberiya ẹ vị Iheberi ọnịrị Imarikẹrị nị. 18Ezi ọnị mị hị́ aanị vị ezi oni Iziripa ma yị Ijekọvụ. Iziripa vi oni Ịrabanị sị yị ozi anị Iriya ọnị ọ sị ga Ijekọvụ. Avaba ezi ọnị ọ ma yị Ijekọvụ vị ẹwụrịhịnọnyị. 19Ezi Irechẹrị ose Ijekọvụ ẹ vị Ijosẹẹhụ ọnịrị Ịbẹnjamịnị nị. 20#Oyn 41.50-52Ijosẹẹhụ ọnị vị ana yà Ijipiti. Ezi oni ose anị maa yọ ẹ vị Ịmanasẹ ọnịrị Ehwireemi nị. Ose anị ana ma wa yọ ọ rị Asenati nị. Oni ọ vị ozi Ipotihera ana vị ohirẹsụ irehi Ohomorihi tụ́ Oni nị. 21Ezi Ịbẹnjamịnị ẹ vị Ibera, Ibekeri, Asiberi, Igera, Inaamani, Ehi, Irosi, Imupimi, Ihupimi ọnịrị Aadi. 22Avaba ẹnẹẹ ẹ vị ezi ọnị Irechẹrị ma yị Ijekọvụ nị. Avaba ẹnịnị vị ẹnị ẹwụrẹna. 23Ịdaanị ọnị ộ ma Ihusimi. 24Di ezi Inahwitari ẹnị vị Ijahizeeri, Iguni, Ijezeri ọnịrị Isiremi. 25Ẹnẹẹ vị ozi oni Ibiriha ma yị Ijekọvụ. Ibiriha ọnọọ Ịrabanị sị yị ozi anị Irechẹrị ọnị ọ sị ga Ijekọvụ nị. Avaba ozi ọnị ọ ma yị Ijekọvụ vị ẹnị ịhịmba. 26Avaba aza Ijekọvụ ana vị ezi ana hụrẹ ịpa anị vẹ ẹhẹ ẹnị ẹnịrịị zị nọ Ijipiti vị ẹbẹẹta tụra ịhịnọnyị. Ọza ọ yị za ese ezi Ijekọvụ vaka wa. 27#Ụkọ 7.14Ezi oni ose Ijekọvụ maa yọ Ijipiti vị ẹnị ẹẹva. Avaba aza ana vị aneehi Ijekọvụ ana nọ Ijipiti vị ẹnị ẹtarẹwụ.

Ijekọvụ ọnịrị aza ệ na ra Ijipiti.

28Ijekọvụ ọnịrị aza anị ẹ va sị ngụ Ijipiti. Dị Ijekọvụ tụ́ Ijuda dọ ọvịdị ka ò ne tù Ijosẹẹhụ dị ọ̀ kà a yọ ka ọ̀ va gẹrị ẹnị Ígoseni. Dị ẹnịnị nọ Igoseni nị. 29Di Ijosẹẹhụ tenyi ụkẹkẹ anị, ọnị umaataā tura, dị ọ na gẹrị ada anị Igoseni nị. Ẹ mẹ̀ na gẹ, di Ijosẹẹhụ ne na hara ada anị kú ayị, di o sụ́ ùnè pooro nị. 30Di Ijekọvụ kà a yị Ijosẹẹhụ dị ọ ka, “Ọnị mè si o re di oni si re ka ọ yị yà ẹhẹ aanị, oni òo kuku sú booro aanị, ẹ yị nyị ọ mẹ̀ kà.” 31Di Ijosẹẹhụ kà a yị ẹnẹbẹnị anị ọnịrị avaba aneehi ada anị dị ọ ka, “Ọnị aa naa kà a yị Ihwarawo ka ẹnẹbẹnị anị ọnịrị aneehi ada anị ene hi Ikanaani e ve si tù ọnị ịzẹnị aanị. 32Ọ kà dị ọnị ka vị ẹẹ̄ pá ịsụpa nị. Dị ọnị rẹ ka hụrẹ ụmọrụmọ ẹẹ̄ pá ịsụpa nị. Dị ọnị ka ẹ raà kụ́ ẹvụ ọnịrị atẹmẹ beri imaaru ẹnịnị ọnịrị avaba ẹnya ẹnịnị vẹ. 33Ọ kà Ihwarawo ọ̀ọ hị́ wa di o họ̀ use ka sị ẹ vị ụkọrọ ẹnị ẹẹ̄ mẹ nị, 34dị ẹ̀ kà a yọ ka ẹ mẹ̀ hụrẹ vi ozweyi ẹẹ̄ pá ịsụpa pooro ve tù ọyaanị nị. Ọ kà ẹ̀ kà a ka ụkọrọ ẹnịrị ohiku ẹnịnị ọ vị ọnọọ nị. Ọ kà ẹẹ̀ vavọọ ka, ọ vaa zẹẹ ka ẹ̀ ra Igoseni. Ọ kà avaba aza anaā pá ịsụpa vị anị Anijipiti nini nyị ịsị anị”.

Currently Selected:

Oyinyima 46: EBTP

Highlight

Copy