Iruuku 10

Ijeesu ộ tụ́ ezirẹma anị ẹtarẹwụ jịnẹ

1Ịrẹma ịsa ẹnẹnị, dị Ijeesu rẹ tụ́ ezirẹma anị ẹtarẹwụ ẹvẹẹva jịnẹ dọ ọvịdị anị nọ ịnị avaba ẹkụra ọnị ọnị ụvọta vaa nọ nị. 2#Imt 9.37,38Dị ọ kà a yị wa ka, “Ịsa ịnị aarẹ ọ sị hụrẹ tụ́ ịnị aarẹ, ộ rụrụ; ama ẹ yị nyị ọnụkọrọ yà. Waa dá ịpẹẹ yị ọza ana nyị aarẹ nịnị ka ọ̀ tụ́ aza, dị ẹ̀ na mẹ̀ ịsa ịnị aarẹ. 3#Imt 10.16Waa na nịnị! Re, mị tụ́ wụ nịnị aa na anka ozi atẹmẹ ana aa nọ ịnị akakana akatapooro nịnị avọọ nị. 4Asị ụ sị asụnụ za nịnị, asị ụ rẹ sị ampo nịnị! Asị ụ za adava nịnị, asị ụ rẹ jẹẹ kụ́ ọza óze nịnị. 5Irehi tụra irehi ọnị ụ wàa ngụ nịnị, vịdị kụ́ anịzọọ nịnị ka, ‘Ẹngwọọrọ ọ̀ yà ini eehi ọnọnị!’ 6Àa nyị ọza ene sì ịrẹyị ẹngwọọrọ ịzọọ, ẹngwọọrọ awụ nịnị vaa yà ịzọọ; ẹ̀ yị vavọọ nyị ọza, dị ẹngwọọrọ awụ nịnị ọ̀ và ká wụ nịnị vẹ. 7#1 Ịkọ 9.14; 1 Itim 5.18Yà ini eehi ọnọọ nịnị; ịsa tụra ịsa ẹnẹ ẹ̀ẹ sị wụ nịnị, dị ụ rị ọọ nịnị! Ịsa oyihù ẹnẹ ẹ̀ẹ sị wụ nịnị, di u hú ọọ nịnị, agụvị ka â vọrọ ka ọnụkọrọ ọ̀ dọ ẹkẹhị ụkọrọ anị. Asị u hụụnị eehi ẹnyị na ngụ ọsa nịnị. 8Ẹkụra tụra ẹkụra ọnị ụ wàa ngụ nịnị, dị ẹ dọ wụ nịnị nị, ịsị ẹ̀ẹ sị wụ nịnị, ụ rị ọ nịnị; 9mẹ ọnịkụ ene èe hi ịzọọ ụkụ nịnị! dị ụ wa kà a yị wa ka: ‘Ohomorihi aa vaa mẹ ịjọva tụra wụ nịnị ịrẹsụ!’ 10#Ụkọ 13.51Ẹkụra tụra ẹkụra ọnị ụ wàa ngụ, dị ọza ọ̀ yị dọ wụ nịnị nị, jịnẹ tụ́ ini orere ẹkụra ọnọọ nịnị, dị ụ wa kà a ka: 11#Imt 10.7-14; Ịmk 6.8-11; Irk 9.3-5‘Edudu ẹkụra awụ nịnị ene hira kú yị ahụ, yâ bànyị ọọ hi ẹtẹ wụ nịnị. Ama dị ụ wa yẹ nịnị ka Ohomorihi aa vaa mẹ ịjọva nịnị o!’ 12#Oyn 19.24-28; Imt 11.24; Imt 10.15Dị ma kà a wụ nịnị ka ịnị ẹkụhị ọkarẹyị, ọ vaa daahi yị anẹkụra Isodọmị hu anẹkụra ẹnẹẹ.”

Anẹkụra ẹnẹ ẹ̀ yị dọ wụ́

(Imt 11.20-24)

13 # Ayị 23.1-18; Ezk 26.1—28.26; Ijow 3.4-8; Emọ 1.9,10; Iza 9.2-4 Di Ijeesu ka, “Wa sị dà nịnị, ẹwụ nịnị Anikorasini. Wa rẹ sị dà nịnị, ẹwụ nịnị Anịbẹtịsayịda. Àa yaanị maanị mẹ̀ ụkọrọ ohyozirenu ịnị ẹkụra Ịtaya ọnịrị Ịsịdọnị, ẹ yaanị sị ịnẹ ro varẹma hụrẹ ụmọrụmọ, dị ẹ sị ịta arụwẹ kú ẹngụ, dị ẹ yaayịtẹ ịnị atịtọ. 14Ọ vaa daahi yị anẹkụra Ịtaya ọnịrị Ịsịdọnị huna wu nịnị ịnị ẹkụhị ọkarẹyị. 15#Ayị 14.13-15Ẹwụ nịnị Anikapanawumi, wéé ro ka a vaa kà wụ nịnịị hịrẹ na ngụ ẹbẹẹba? Vụrụ-vụrụ! Va vaa sị wụ nịnị di e ne wu nịnị ngụ ini ẹkụra nị.” 16#Imt 10.40; Ịmk 9.37; Irk 9.48; Ịjọ 13.20Dị Ijeesu kà a yị ezirẹma anị ka, “Ọza ana àa wụ́ ịrẹyị awụ nịnị, ẹmị ọ rẹ wụ́ ịrẹyị anị avọọ nị. Ọza ana àa sị eyi wụ wụ nịnị, ẹmị ọ rẹ sị eyi wụ avọọ nị. Ọza ana àa sị eyi wụ̀ mị, Ohomorihi ana tụ́ mị, ọ sị eyi wụ avọọ nị.”

Aza ẹnị ẹtarẹwụ ẹnẹẹ ệ vavẹ.

17Aza ẹnị ẹtarẹwụ ẹnẹẹ ệ vavẹ. Dị ẹyaa jẹ ẹtẹẹtẹrẹ nị, dị ẹ ka, “Ananyị yị, ụhwẹ echu nịnị ệ wụ́ ịrẹyị chire yi bẹẹ, ị mẹ̀ sị ịrẹha awụ mẹ ọda yị wa.” 18Dị Ijeesu ka, “Mê re, Échu mẹ̀ hụrẹ ẹbẹẹba anka ịnyanya avọọ. 19#Ahẹ 91.13Re, mâ sị ụkata wụ nịnị ka waa kụ́ ahụụ hi ẹwụ ọnịrị iku, dị ụ wa rẹ zụ nyị ehuna ụkata Echu nịnị. Ẹ yị nyị ịsị ẹ va zụụ mẹ wụ nịnị. 20Ama asị ụ rẹ̀ jẹ nịnị ka ụhwẹ echu ệ ká ịrẹsụ hi wu nịnị! Ama wa vanaa jẹ nịnị ka a sị ịrẹha awụ nịnị chẹrẹ tụ́ ịdị Ohomorihi!”

Ijeesu ộ jẹ ịrajẹ

(Imt 11.25-27; 13.16-17)

21Ịnị ụmẹ ọnọọ gẹdẹ-gẹdẹ dị Ụhwẹ Ọnịnị mẹ ka ịnẹ Ijeesu ò hine ẹtẹẹtẹrẹ nị. Dị ọ ka, “Nda ana nyị ẹbẹẹba ọnịrị ẹhẹ, mâ kụ́ wụ avọ, agụvị ka ịsa ọnị ụ sị tẹ yị aza ana yẹ ịsa, wa raà sị zụ̀ aza ẹnẹ ẹ̀ yị nyị ịsị ẹ yẹ. Nda, avọọ gẹdẹ-gẹdẹ o mè zé wu eyi nị. 22#Ịjọ 3.35; Ịjọ 10.15Ada amị ọ raà sị avaba ịsa chire mi ụvọ. Ẹ yị nyị ọza ana yẹ Ozi, ẹ̀ yị vị Ada ọnịnya. Ẹ yị rẹ nyị ọza ana yẹ Ada, ẹ̀ yị vị Ozi ọnịnya ọnịrị aza ene èe zé Ozi eyi ka ọnị ọ̀ sị zụ̀.”

23Dị Ijeesu và eyi kà ezirẹma anị, dị ọ tangwa kà a yị wa ka, “Wâ da jẹ nịnị ka eyi awụ nịnị ee re ịsị u wee re nịnị aanị. 24Dị ma kà a wụ nịnị ka ọnịsẹ ọrụrụ-ọrụrụ ọnịrị ohinọyị nịnị ê sì ka eni è re ịsị u wee re nịnị aanị; ama eyi re e. E re sì ka ẹnị ẹ̀ wụ́ ịrẹyị ọnị ụ waa wụ́ nịnị aanị; ama ẹ yị wụ́ ọọ.”

Ụhịrẹyị Anịsamarịya anayamva

(Imt 22.34-40; Ịmk 12.28-31)

25 # Imt 22.35-40; Ịmk 12.28-34 Ẹkụhị ọnya, ọzwọzọda ọnya ộ kwẹẹtẹ, di ee sì ka ọnị ọ̀ zama Ijeesu re nị. Dị ọ ka, “Ọga, si a vọrọ ka ma mẹ, dị ma zụ yàra pooro zịna-zịna ị́dị Ohomorihi?” 26Dị Ijeesu tụ́ ọ ohi, dị ọ ka, “Sị a chẹrẹ tụ́ ini iwe ọda? Ụ mẹmẹ kà a?” 27#Ọda 6.5; Ire 19.18Dị ọnọrụ ọnọọ ka, “Sị avaba ayị awụ sì ịrẹyị Ohomorihi Ananyị yị, beri avaba ivehu awụ ọnịrị avaba ụkata awụ ne beri avaba ịrẹyọyẹ awụ! Di u we re sì ịrẹyị ọnọhụva awụ anka ẹngụ awụ!” 28#Ire 18.5Dị Ijeesu ka, “Wê tụ́ ohi ẹtẹẹrẹ. Vavọọ naa mẹ ka ụ vaa yàra pooro zịna-zịna.”

29Ama ọzwọzọda ọnọọ ee sì ka ọnị ọ̀ jị ịhị yị ẹngụ anị; dị ọ họ̀ Ijeesu ka, “Ẹnẹ vị ọnọhụva amị kẹ?” 30Dị Ijeesu tụ́ ohi, dị ọ ka, “Â nyị ọnọrụ ọnya aanị, ene chí hụrẹ Ijerusarẹmị aa nọ Ijeriko. Ọ màa na, dị ọ hụrẹ na ngụ oyi nịnị ụvọ nị. Dị ẹ dọ ọ ịta, dị ẹ tụ̀ ọọ ụnava, dị ẹ hụrẹ ẹ ụvọ tụ́ ịzọọ nị. Ọ sị vọ chee, ẹ̀ sị ọọ wụ. 31Dị ohirẹsụ irehi Ohomorihi ọnya ọnị zị oze avọọ ee chíi vẹ kẹnẹ nị. O mè re ọnọrụ ọnọọ ka ọ tịtẹ, dị ọ zị oze ọsa para hu nị. 32Avọọ Ánireevi ọnya ọnị mẹ̀ raa vẹ nị. O mè re tù ịzọọ, di o re ọnọrụ ọnọọ, dị ọnị rẹ zị oze ọsa para hu nị. 33#2 Ịtọ 28.15Ama a va nyị Anịsamarịya ọnya aanị, ana rẹ zị oze avọọ aa jịnẹ, di oni re ve tù ọza ọnọọ nị. O mè ree, ayị anị ộ va. 34Di o ne tù ọọ, dị ọ ká angwẹ ọnịrị eche hi ịnị ụnava anị, dị ọ sị ịta sụ́ ọọ yọ nị. Ịjị ọ vavọọ sị ọọ mẹ, dị ọ sị ọọ tụra uye ọnị ọnị vịdị tụra, dị ọ sị ọọ nọ ini eehi ọnị ọzọgaā chí, di aa tẹsị anị nị. 35Eyinẹhẹ anị, ọ màa na, dị ọ sị Ịnayịra ẹẹna yị adarehi ọnọọ, dị ọ ka ọ̀ọ tẹsị anị. Ọ kà ịsị ọ̀ọ vana mẹ ịhị tụ́ ịrẹsụ anị, ọnị ọ̀ọ vẹ, oni vee sí ọọ yọ.”

36Dị Ijeesu ka, “Ini eyi ẹwụ, eni u ro ka ộ vị ọnọhụva ọza ana hụrẹ ngụ ịnị ụvọ oyi nịnị aanị?” 37Dị ọzwọzọda ọnọọ ka, “Ọza ana vayị anịị yọ nị.” Dị Ijeesu kà a yọ ka, “Waa na, dụ wa vavọọ naa mẹ kẹ!”

Ijeesu o ne heeyi Ịmata ọnịrị Imeri

38 # Ịjọ 11.1 Íjeesu ọnịrị ezirẹma anị màa na óze, dị ẹ na ngụ ẹkụra ọnya aanị nị. Dị ọnẹẹ ọnya aanị ana aā hị́ Ịmata hị́ ọọ nọ ini eehi anị nị. 39Ọnẹẹ ọnọọ ộ nyị ọyịnyara ọnya ana aā hị́ Imeri; dị ọ yaayịtẹ pe Ijeesu, di aa wụ́ ịrẹyị anị nị. 40Ụkọrọ Ịmata ọ sị rụrụ baaba, agụvị ka ee sì ka oni ò sì wa ọzọga. Di o ve tù Ijeesu, dị ọ ka, “Ananyị yị, vị ọhụva amị navọ ẹmị ịnya ka maa mẹ̀ ịsa, du wè yi tụ́ ohi nịị? Kàa yọ ka ọ̀ va gụ mị ụvọ!” 41Dị Ijeesu tụ́ ohi, dị ọ kà a yọ ka, “Ịmata, Ịmata, ayị awụ ọ yị nẹtẹ, wee ro ịrẹyị ịsa ọrụrụ-ọrụrụ. 42Â nyị ịsa ọnya chọchọchọ anaa vọrọ ka ya nyị; ịsa ana vọrọ ọnọọ, Ímeri nyị aanị nị. Ọza ọ yị vaa dọ ọ hụrẹ ẹ ụvọ.”

Currently Selected:

Iruuku 10: EBTP

Highlight

Copy