Iruuku 9

Ijeesu ộ tụ́ ezirẹma anị jịnẹ

(Imt 10.5-15; Ịmk 6.7-13)

1Ẹkụhị ọnya, Ijeesu ộ hị́ ezirẹma anị ẹwụrẹva gụ, dị ọ sị ọda ọnịrị ụkata yị wa ka ẹ̀ naa dụ avaba ụhwẹ echu nịnị ị jịnẹ hụụnị ẹngụ aza, dị ẹ̀ rẹẹ mẹ aza ụkụ nị. 2Ộ tụ́ wa ka ẹ̀ naa kà enube ọyịza, Óhomorihi mẹmẹ aa mẹ ịjọva, dị ẹ̀ rẹẹ mẹ aza ụkụ. 3Ọ kà asị ẹ sị ịsọnyị-ịsọnyị ẹ̀ẹ yaa na, ẹhụụ okutẹ ọnịrị ampo beri ịsọyịrị na vaka ẹkẹhị, asị ẹ hyakụ sị awuru gụ ẹẹva. 4Ọ kà, “Irehi tụra irehi ọnị ụ wàa ngụ nịnị, yà ịzọọ nịnị pooro dị ụ wa va hụrẹ ẹkụra ọnọọ nịnị! 5#Ụkọ 13.51#Irk 10.4-11Aha tụra aha ọnị ọza è yi sì wu nịnị ọzọga, ịjị ụ wàa hụrẹ ẹkụra ọnọnị nịnị, bànyị edudu ịnị ahụ awụ nịnị hi ịzọọ, dị ọ̀ vị ivenu yị wa ka ịsị ẹ mẹ, ô divi!”

6Dị ẹ jịnẹ na, dị ẹyaa ngụ avaba ẹkụraa zị, dị ẹ yaa kà enube ọyịza, dị ẹ rẹ yaa mẹ aza ụkụ avaba aha nị.

Ayị Ịhẹrọdị ọ sị vazi

(Imt 14.1-2; Ịmk 6.14-29)

7 # Imt 16.14; Ịmk 8.28; Irk 9.19 Ohinọyị ana aā hị́ Ịhẹrọdị ộ wụ́ avaba ịrẹyị oni Ijeesu aa mẹ. Ayị Ịhẹrọdị ọ sị vazi, agụvị ka aza ẹnyị ka Ịjọọnụ yọ nị, ka vị ọ ha hụụnị isu nị. 8Aza ẹnyị rẹ ka Erija ọ vẹ nị; dị aza ẹnyị ka ọnya ịnị ọnịsẹ ịyẹẹyẹ nịnị ọ ha hụụnị isu vẹ nị. 9Ama dị Ịhẹrọdị ka, “Mâ yẹ ka ma sị Ịjọọnụ jị ịrẹsụ, ẹnẹ kụkụ va vị ọnọnị, ọnị mị maanị aa wụ́ ịrẹyị anị aanị?” Di ee sì ka oni ò re Ijeesu nị.

Ijeesu ộ sị ịsọyịrị pá aza ọrụrụ-ọrụrụ

(Imt 14.13-21; Ịmk 6.30-44; Ịjọ 6.1-14)

10Ịjị odeyi ẹnẹẹ vẹ, dị ẹ kà a yị Ijeesu avaba ịsị ẹ mẹ nị. Dị Ijeesu sị wa, dị ọnịrị wa ịnya kẹnẹ zị aa nọ ịzị aza ẹ̀ yị yà ana yà ịnị ẹkụra ana aā hị́ Ịbẹtịseda nị. 11Ịjị aza sị yẹ, dị ẹ yaa dụ ọọ na nị. Dị Ijeesu dọ wa pe ẹngụ, di aa kà ịrẹyị ịjọva Ohomorihii yị wa, dị ọ raa mẹ aza ẹnẹ ẹngụ aa zị ụkụ nị.

12Ịjị oruva si tù, di ezirẹma Ijeesu ẹwụrẹva va kà a yọ ka, “Ẹ yị nyị aza ana ra ịzẹnị aanị. Kàa ka ẹ̀ẹ na, dị ẹ̀ na hị́ ịsa rị ịnị aarẹ ọnịrị ịnị ẹkụra ana gụrị ẹyị aanị, di è re sì aha sụ̀ ịzọọ!” 13Dị Ijeesu ka, “Sị ẹ vẹ, ẹwụ nịnị ụvọta ọ̀ sị ịsọyịrị yị wa!” Di ezirẹma anị ka, “Akara ẹẹhị beri ivovo ẹẹva kẹnẹ, ị nyị nọ! Ụ wáá vana ka ya na hị́ ịsọyịrị va yị ọkọnị aza ẹnẹnị nị?” 14Ẹnị anọrụ ene hi ịzọọ vị ẹhụụ akahị-akahị oze ẹẹhị (5,000).

Dị Ijeesu kà a yị ezirẹma anị ka, “Kà ẹ yị aza ẹnẹẹ ka ẹ̀ ga ẹngụ ẹnịnị ẹvarẹwụ-ẹvarẹwụ yaayịtẹ!” 15Di ezirẹma anị vavọọ mẹ, dị ẹ ka aza ẹnẹẹ ẹ̀ yaayịtẹ nị. 16Ijeesu ộ sị akara ẹẹhị ọnịrị ivovo ẹẹva ẹnẹẹ, dị ọ sị eyi tụ́ ẹba, dị ọ kụ́ Ohomorihi avọ tụ́ ọọ nị. Dị ọ dà akara ẹnẹẹ yị ezirẹma anị ka ẹnịnị ẹ̀ gà ẹ yị ọkọnị aza ẹnẹẹ nị. 17Avaba ẹnịnị ệ rị, dị ịnẹ há wa nị. Dị ẹ sị uji kụ́ ana vẹtẹ, dị ọ vị ohihi uji ẹwụrẹva nị.

Ẹnị Ijeesu vị?

(Imt 16.13-23; Ịmk 8.27-33; Ịjọ 6.66-71)

18Ẹkụhị ọnya, di Ijeesu ọnịnya na aa mẹ̀ aduwa nị; ezirẹma anị ê ve tù ọ, dị ọ họ̀ wa ka, “Ẹnị aza sị ọ hị́ ka máa vị?” 19#Imt 14.1,2; Ịmk 6.14,15; Irk 9.7,8Dị ẹnịnị ka, “Aza ẹnyị ka Ịjọọnụ ọhwọzenyi ụ vị nị; dị aza ẹnyị rẹ ka Erija; dị aza ẹnyị ka ọnya ịnị ọnịsẹ ịyẹẹyẹ nịnị ọ ha hụụnị isu vẹ nị.” 20#Ịjọ 6.68,69Dị Ijeesu ka, “Ẹwụ nịnịị yọ, ẹnẹ ẹwụ nịnị sị ọọ hị́ ka máa vị?” Di Ipita tụ́ ohi, dị ọ ka, “Ẹwa vị Ikirisiti Ohomorihi nị.” 21Dị Ijeesu hú wa ụvọ ẹtẹẹtẹrẹ, dị ọ ka asị ẹ kà ịrẹyị ọnọọ yị ọzọnyị-ọzọnyị nị.

Ijeesu ộ kà ịrẹyị isu anị

(Imt 16.24-28; Ịmk 8.34—9.1; Ịjọ 12.25-26)

22Dị ọ rẹ ka, “Â nyị ka ẹmị Ozi ọza onigirima ọ̀ rị ụya ẹtẹẹtẹrẹ. Ọdọvịdị nịnị ẹnịrị ohirẹsụ ẹbanyị irehi Ohomorihi beri ọzwọzọda nịnị vee yi mii tịtẹ. A rẹ vaa wụ̀ mị; ama ịhyẹgwẹta anị, mị vaa ha hụụnị isu.”

23 # Imt 10.38; Irk 14.27 Dị Ijeesu kà a yị avaba ẹnịnị ka, “Àa nyị ọza ana ka ọnị aa dụ mị ịrẹma, â nyị ka ò hí ayị ẹngụ anị, dị ọ̀ sị apavahị anị, dị ọ̀ sịị dụ mị ịrẹma eyinị-eyinị. 24#Imt 10.39; Irk 17.33; Ịjọ 12.25Agụvị ka ọza tụra ọza ana àa ka oni ee tenyi ụhwẹ anịị tẹ, vi ee vú ọọ nị; ama ọza ene èe ne ụhwẹ anị ta agụvị amị, ọnị ụ́hwẹ anị vaa há nị. 25Ọza ọ̀ọ sị avaba ẹhẹ rị ọgụ, dị ọnị ụvọta vene si vú nị, à vị ka dị à dụ ọọ kwooze nị, ọgụ ịsị ọ kụkụ va rị? 26Agụvị avọọ, àa nyị ọza ana aa nyị ụhị ọyịkà a ka áamị ọnị vị nị, à vị ka dị aa nyị ụhị ịrẹyị amị nị, ẹmị Ozi ọza onigirima rẹ vaa mẹ nyị ụhị ọyịkà kà a ka ọza ọnọọ vị áamị, ịjị màa vavẹ ini igirima amị beri igirima Ada amị ọnịrị áanggẹẹrị ọnịnị nịnị. 27Ịzẹyịza, m maa kà a wụ nịnị nị, â nyị aza ẹnyị ana jẹẹ ịzẹnị, ana ahịka e yi vee sú pooro di è re, Óhomorihi mẹmẹ vaa mẹ ịjọva.”

Ezirẹma ẹẹta ée re igirima Ijeesu

(Imt 17.1-8; Ịmk 9.2-8)

28Ịnị ana tụ́ ọọ ẹkụhị ịhịnta oni Ijeesu maanị sị ịrẹyị ẹnẹnị kà, dị ọ sị Ipita ọnịrị Ịjọọnụ beri Ijemiisi nọ ịnị ataba ọnya aanị, dị ọ na mẹ̀ aduwa ịzọọ nị. 29Ọ màa mẹ̀ aduwa, di eyirẹsụ anị sị vara, dị awuru anị kụkụ aa vwẹtẹ sẹnẹ-sẹnẹ nị. 30Re, aza ẹnị ẹẹva, Erija ọnịrị Imosiisi, ee beri Ijeesuu kà ịrẹyị. 31Ẹnịnị ệ vavọọ ve tù Ijeesu ini igirima, dị ẹyaa kà a yọ, ọ mẹmẹ vaa hụụnị ẹhẹ Íjerusarẹmị, anka Óhomorihi mẹ̀ mẹ eto anị. 32Ipita ọnịrị aza ana yà beri ọọ ẹnị vị ana aa sụ ara ẹtẹẹtẹrẹ. Ẹ mẹ̀ ha, di e re igirima Ijeesu ọnịrị aza ẹnị ẹyịva ana jẹẹ pee nị. 33Ịjị aza ẹnẹẹ sị hụụ ịdị Ijeesu, dị Ipita kà a yị Ijeesu ka, “Nda, ộ da zoza ka yâ yà ịzẹnị. Jẹẹ ya jị ajẹngụ ẹẹta tụ́ ịzẹnị: ọnyara ọ̀ọ vị áawụ, dị ọnyara vị Íimosiisi, dị ọsa vị Éerija.” Ipita ọ yị yẹ ịsị aa kà. 34Ọ màa yịị kà ịrẹyị, di eguhi ọnya aanị dà ve kú wa nị. Dị angwa ee hí ezirẹma ẹnẹẹ, éguhi mẹ̀ kara wa nị. 35#Ayị 42.1; Imt 3.17; 12.18; Ịmk 1.11; Irk 3.22#2 Ipi 1.17,18Dị ọngwẹ ọnya hụụnị eguhi ọnọọ vẹ ka, “Ozi emi oni mi sì ịrẹyị anị yị, waa wụ́ ịrẹyị anị nịnị!” 36Ịjị ọngwẹ ọnọọ sị ịrẹyị anị kà ta, dị ahịka Ijeesu ọnịnya ọ rẹ kụkụ jẹẹ ịzọọ nị. Dị ezirẹma ẹnẹẹ sị ịrẹyị ẹnẹnị tẹ nị; ẹnịnị ẹ yị kà a yị ọza ịnị ụmẹ ọnọọ ịsị ẹnịnị re.

Ijeesu ộ dụ ụhwẹ echu hụụnị ẹngụ ozi ọnọrụ ọnya

(Imt 17.14-18; Ịmk 9.14-27)

37Eyinẹhẹ anị, di e chí hụrẹ ịrẹsụ ataba ọnọọ, dị aza ọrụrụ-ọrụrụ ve tù Ijeesu nị. 38Re, dị ọza ịnya aanị nowu tụ́ ẹba ịnị akakana aza ẹnẹẹ nị, dị ọ ka, “Nda, aarịhịnị kana eyi ozi ọnọrụ amị ọnọnị mị de; aanị m mẹ̀ yị ma a ọnya nọ. 39Ộ nyị ụhwẹ echu ọnya aanị; ọ̀ọ sị ọọ za, dị ọ wụsẹ ee nowu tatata, di o henyi ọọ jigi-jigi, di ee kú irenu, dị ọ sị ọọ tụ̀ ụnava, dị ọ yị hụra hụrẹ ẹ ụvọ. 40Mâ dá ịpẹ yị ezirẹma awụ ka ẹ̀ dụ ụhwẹ echu ọnọọ jịnẹ; ama ẹnịnị ẹ yị zụ dụ ọọ.” 41Dị Ijeesu ka, “Ho! Sị ẹ vẹ dị ẹwụ nịnị anị ụmẹ ọnọnị ẹ̀ yị dọ wụ́, dị ụ maanị nyeeyi nịnị aanị? M mẹ̀ kụkụ vaa yà ịda awụ nịnị hu aanị? Ịzị mị vaa sị ẹngụ dọ ịrẹyị awụ nịnị nee tù? Sị ozi ewu ọnọọ vẹ ịzẹnị!”

42Ózi ọnọọ màa yịị na kẹnẹ, dị ụhwẹ echu ọnọọ rẹ za a nya ẹtẹ, dị ọ mẹ ka ọ̀ọ dà evutu nị. Ijeesu ộ tụ́ ụhwẹ echu ọnọọ ohuvọ, dị ọ mẹ ozi ọnọọ ụkụ, dị ọ rẹ sị ọọ chire ada anị ụvọ nị. 43Ụkata ọbanyị Ohomorihi o si hí aza ẹnẹẹ irenu ẹtẹẹtẹrẹ.

Ijeesu ọ rẹ kà ịrẹyị isu anị

(Imt 17.22-23; Ịmk 9.30-32)

Ịjị avaba ịsa oni Ijeesu mẹ ee hí wa irenu, dị Ijeesu kà a yị ezirẹma anị ka: 44“Asị ayị hí wu nịnị ịrẹyị ọnị maa vaa kà a wụ nịnị aanị: A vaa sị ẹmị Ozi ọza onigirimaa chire aza ụvọ.” 45Ama ẹnịnị ẹ yị yẹ iruvo ịrẹyị ọnọnị, agụvị ka a raà sị iruvo anị tẹ yị wa, agụvị asị ẹ yẹ. Angwa ee hí wa ọyịhọ Ijeesu ini oze ịrẹyị ọnọọ.

Ẹnẹ vene hu kere-kere?

(Imt 18.1-5; Ịmk 9.33-37)

46 # Irk 22.24 Ezirẹma Ijeesu ệ kwẹẹtẹ aa nyị ahankata ka ẹnẹ vị ene hu keekere ịnị ẹnịnị. 47Ijeesu ộ yẹ ịsị eyee ro ịnị ayị ẹnịnị, dị ọ sị ozweyi ọnya jẹẹ pe ẹngụ anị nị. 48#Imt 10.40; Irk 10.16; Ịjọ 13.20Dị ọ kà a yị wa ka, “Ọza ana àa dọ ẹngụ ozweyi ọnọnị pe ẹngụ agụvị amị, ẹmị ọ rẹ dọ pe ẹngụ avọọ nị. Ọza ana àa dọ mị pe ẹngụ, ọza ana tụ́ mị vẹ ẹhẹ, ọ rẹ dọ pe ẹngụ avọọ nị. Ọza ana ka ẹngụ anị chi hu ịnị awụ nịnị, oni o hu keekere nị.”

Ọza ẹnẹ ẹ̀ yị bàrà yị, ẹ yị rị ọọ ọ yà nị

(Ịmk 9.38-40)

49Ịjọọnụ ộ kà a yị Ijeesu ka, “Nda, yê re ọza ịnya ana aa sị ịrẹha awụụ dụ ụhwẹ echu nịnị ị jịnẹẹ hụụnị ẹngụ aza. Dị ị kà a yọ ka ọ̀ navọ nị, agụvị ka ọ yị dụ yị zịịzị.” 50Dị Ijeesu ka, “Naavọ, agụvị ka ọza ẹnẹ ẹ̀ yị bàrà yị, ẹ yị rị ọọ ọ yà nị.”

Anịsamarịya nịnị ẹ yị dọ Ijeesu ọzọga

51Ịjị ẹkụhị aa gụrị ẹtẹ ana aa vaa sịị sị Ijeesu nọ ẹbẹẹba, dị Ijeesu sị tụ́ ịnị ayị ka ẹ yị zụ nyị ka ọnị ọ yị nọ Ijerusarẹmị nị. 52Ộ tụ́ ọnụtụ, ka ẹ dọ ọvịdị anị. Dị ẹ na ngụ ịnị ẹkụra Anịsamarịya ọnya ka eni è ne tenyi ẹtẹ zí ọọ nị. 53Ama Anịsamarịya nịnị ẹ yị dọ ọ ọzọga, agụvị ka ệ yẹ ka vị aa nọ Ijerusarẹmị nị. 54#2 Ohi 1.9-16Ịjị ezirẹma anị ẹnyị, Ịjọọnụ ọnịrị Ijemiisi, maanị re aza ẹnẹnị, dị ẹ ka, “Ananyị yị, ụ wáá ka ya hị́ ịra hụrẹ ẹbẹẹba vẹ, dị ọ̀ wụ̀ wa, anka Érija mẹ̀ vịdị mẹ avọọ nị?” 55Dị Ijeesu vara eyi, di aa tụ́ wa ohuvọ nị. Dị ọ ka, “Aanịka wẹ yị yẹ ẹngụ ụhwẹ ana aa sị oze zụ̀ wụ nịnị? 56Ẹmị Ozi ọza onigirima ọ yị vẹ ka ma va wụ̀ ọza, ẹ̀ yị vị ka ma dọ aza há”. Di e si hu aa nọ ẹkụra ọsa nị.

Aza ana ka ẹnị aa saasa Ijeesu

(Imt 8.19-22)

57Íjeesu ọnịrị ezirẹma anị màa na óze, dị ọza ịnya aanị kà a yọ ka, “Maa dụ wụụ nọ aha tụra aha ọnị ụ wàa nọ.” 58Dị Ijeesu kà a yọ ka, “Ahaka nịnị ệ nyị ụsị, inomi nịnị ẹ rẹ nyị ịrẹngwẹ, ama ẹmị Ozi ọza onigirima ọ yị hyakụ nyị aha ana a vọrọ ka ma yà tụ́ ụhwọ́.” 59Dị Ijeesu kà a yị ọsa ka, “Waa dụ mị ịrẹma!” Ama dị ọnọọ ka, “Jẹẹ me vịdị ne ne ada amị da de!” 60Dị Ijeesu kà a yọ ka, “Navọ oku nịnị èe ne oku ẹnịnị; ama ẹwà naa kà enube ọyịza ịjọva Ohomorihi!” 61#1 Ohi 19.20Dị ọza ẹnẹsa ọnị rẹ ka, “Nda, maa dụ wụ ịrẹma, ama jẹẹ ma vịdị na kụ́ anda ayị nịnị ene hi eehi da.” 62Dị Ijeesu rẹ kà a yị ọnọọ ka, “Ọza ene èe sì nyima aa jị ịrụkụ di o sị eyi tụ́ ịrẹma nị, ẹngụ aza ẹnẹẹ ẹ yị vọrọ tụra ịzị Ohomorihi yà aa mẹ ịjọva.”

Currently Selected:

Iruuku 9: EBTP

Highlight

Copy