Iruuku 8

Anẹẹ anaā dụ Ijeesuu zị

1Ịnị ụmẹ ọnya, di Ijeesu aa ngụ ịnị ẹkụra ọbanyị ọnịrị ẹkụra oweyii zị, dị aa kà enube ọyịza ịzị Ohomorihi yà aa mẹ ịjọva nị. Ọnịrị ezirẹma anị ẹwụrẹva ẹ zị nị. 2#Imt 27.55,56; Ịmk 15.40,41; Irk 23.49A rẹ nyị anyẹnẹẹ ẹnyị aanị, ọnị ọ vịdị mẹ ụkụ, dị ọ rẹ dụ ụhwẹ echu hụụnị ẹngụ ẹnịnị. Ịnị ẹnịnị aza ẹnẹnị yà nị: Imeri ana aā hị́ Anịmagịdara; Imeri ọnọọ Íjeesu dụ ụhwẹ echu ịhịmba hụụnị ẹngụ anị nị. 3Ẹnị ọsa vị Ijowana, ose Ichuza ana vị ozi ahụ Ịhẹrọdị, ọnịrị Isusana beri anẹẹ ọrụrụ-ọrụrụ ọsa anaā sịị ịsa ẹnẹ ẹ̀ẹ nyịị mẹ ọgụvọ yị Ijeesu ọnịrị ezirẹma anị.

Ọza ene mi ịsa ọyịna

(Imt 13.1-9; Ịmk 4.1-9)

4Aza aa haraa vẹ ịdị Ijeesu hụrẹ ẹkụra irenyi-renyi. Ịjị aza ta wara gụ, dị Ijeesu che ụhịrẹyị ọnya yị wa nị. Dị ọ ka: 5“Â nyị ọza ịnya aanị ene ne mi ịsa ọyịna. O mèe mi ọọ, dị ẹnyị hụrẹ tụ́ ụtọ oze nị, dị aza kụ́ ahụ hi ọọ, di inomi nịnị va tọ̀ọ́ yọ rị nị. 6Ihu ẹnyị ẹ rẹ hụrẹ tụ́ ịrẹsụ ịda. Ọ mẹ̀ yị chị kẹnẹ, dị ọ wụ nị, agụvị ka ịzọọ ọ yị nyị enyi. 7Dị ẹnyị rẹ hụrẹ ne ngụ ịnị akakana ikeyi nị. Ịjị ẹnịrị ikeyi ẹnẹẹ aa hụ, di ikeyi za wa rị nị. 8Ihu ẹnyị ệ hụrẹ ne ngụ ịnị ẹtẹ ozoza, dị ẹ chị, dị ẹ hụ, dị ẹ nyị ẹtụtụ ẹchẹhị-ẹchẹhị nị.” Ịjị Ijeesu vavọọ sị ịrẹyị ẹnẹẹ kà, di o nowu kà a ka, “Ọza ana àa nyị ụtọ ọyịsị wụ́ ịrẹyị, ọ̀ sị ụtọ pe ẹtẹ!”

Iruvo ụhịrẹyị ọnọọ

(Imt 13.10-23; Ịmk 4.10-20)

9Di ezirẹma anị họ̀ ọ use ka, “Sị ẹ vị iruvo ụhịrẹyị ọnọnị?” 10#Ayị 6.9Di Ijeesu ka, “Ohomorihi ọ raà mẹ ka wa yẹ nịnị ịrẹyị ịjọva Ohomorihi oni iruvo anị nyịnẹ nịnị. Ama aza ana vọ vị ana aa wụ́ ọọ ini oze ụhịrẹyị, agụvị ẹ̀ẹ daka re ẹtẹ pooro, asị ẹ yẹ ịsị eyee re. Ẹ̀ẹ sị ụtọ pe ẹtẹ pooro, di asị ẹ wụ́.”

11Di Ijeesu ka, “Iruvo ụhịrẹyị ọnọọ yị: Ịsa ọyịna ọnọọ vị ịrẹyị Ohomorihi 12Aza ẹnẹnị vị ana yà anka ihu enee mi tụ́ ụtọ oze; aza ẹnẹnị mẹ̀ yị wụ́ ịrẹyị Ohomorihi kẹnẹ, di Echu wụsẹ vẹ, dị ọ va sị ịrẹyị enee mi tụ́ ayị ẹnịnị ịzọọ nị, ka ẹ̀ yị vị avọọ, ẹ va dọ wụ́, di Ohomorihi dọ wa há. 13Aza ẹnẹnị vị ana rẹ yà anka ihu ana hụrẹ tụ́ ịrẹsụ ịda. Aza ẹnẹẹ mẹ̀ wụ́ ịrẹyị ọnọọ, ệ wụsẹ sị ịrajẹ dọ ọ. Ama agụvị ka ịrẹyị ọnọọ o yi re aha ha ẹpa ngụ ịnị ayị ẹnịnị, ệ dọ ọ tụ́ ịnị ayị chee; ịjị ẹzamare vẹ, dị ẹ và hụụnị anị nị. 14Aza ẹnẹnị vị ana yà anka ihu ene e mi tụ́ ịnị akakana ikeyi. Ẹ mẹ̀ wụ́ ịrẹyị ọnọọ, dị ẹyaa vụrị nị. Ama ariro ẹhẹ ọnịrị ẹkẹhị beri ụbanyị ẹhẹ ọnọnị ộ za ịrẹyị ọnọọ rị; agụvị avọọ ẹtụtụ ẹnịnị e yi ve vi. 15Ama aza ẹnẹnị vị ana yà anka ihu ene e mi tụ́ ịnị ẹtẹ ozoza. Ẹ mẹ̀ wụ́ ịrẹyị ọnọọ, ệ sị tụ́ ịnị ayị ẹtẹẹtẹrẹ, dị ẹ tangwa sị isuuru aa nyị ẹtụtụ nị.”

Ozotupa vị anaa sịị̄ tụ́ ẹba

(Imt 5.15; 10.26; 13.12; Ịmk 4.21-25)

16 # Imt 5.15; Irk 11.33 Di Ijeesu ka, “Ọza o mē hu ozotupa, dị ọ sị ụnọkọ kú ọọ, à vị ka dị ọ̀ sị ọọ tụ́ iruvo ịvẹẹdị. Ịzị aā sị ozotupaa gẹ, aa sị ọọ gẹ nị, agụvị aza ana aa ngụ eehi, è zụ re ẹtohweyi. 17#Imt 10.26; Irk 12.2Agụvị ka ẹ yị nyị ịsa ana tẹ, ẹnẹ ẹ̀ yị vaa tụ́ ẹhẹ; ẹ yị nyị ịsị ẹ tẹ, ọnị ọza ọ̀ yị vaa yẹ, dị ọ̀ yị rẹ vaa vẹ ịnị eyigede. 18#Imt 25.29; Irk 19.26Agụvị avọọ sị eyi pe ẹngụ awụ nịnị, ụ mẹmẹ aa wụ́ ịrẹyị nịnị! Ọza ana àa nyị ịsa, vị Ohomorihi vaa dàa tụ́ ọọ yọ nị. Ọza ẹnẹ ẹ̀ yị nyị, oyichee ọnị ọ hyakụ nyị, di aa dọ ọ hụrẹẹ ụvọ.”

Ọnyị Ijeesu ọnịrị ẹyịnyara anị

(Imt 12.46-50; Ịmk 3.31-35)

19Ọnyị Ijeesu ọnịrị ẹyịnyara Ijeesu e ve tù ọ, ama e yi zụ tù ịzị ọ yà, agụvị ka aza ẹ sị rụrụ baaba. 20Dị ọza ịnya kà a yị Ijeesu ka, “Ọnyị awụ ọnịrị ẹyịnyara awụ jẹẹ ẹhẹ, eyee sì ka eni è re wu.” 21Dị Ijeesu tụ́ wa ohi, dị ọ ka, “Ọnyị amị ọnịrị ẹyịnyara amị ẹ vị aza ana aa wụ́ ịrẹyị Ohomorihi, dị ẹ rẹ yaa mẹ̀ ẹ nị.”

Ijeesu ộ za ahị jẹẹ

(Imt 8.23-27; Ịmk 4.35-41)

22Ẹkụhị ọnya, dị Ijeesu ọnịrị ezirẹma anị ngụ ẹpa, dị ọ kà a yị wa ka, “Vẹ ya nọ akẹnẹ irehu eyi ọsọọ nịnị!” Di e si hu aa na nị. 23Ẹ màa na, dị Ijeesu aa sụ ara nị. Opomi ọbanyị ọnya aa tụ́ ini irehu; di enyi aa dàa hi ịnị ẹpa ẹnịnị, di ee vee hi nị. Ịrẹyị asigiri o si tù wa. 24Di e ne tù Ijeesu, dị ẹ ha a nị, dị ẹ ka, “Nda, Nda! Yee vee sú, ọ!” Dị ọ kwẹẹtẹ nị, dị ọ tụ́ ahị ohuvọ ọnịrị enyi ana aa dà nị, dị avaba ẹnịnị jẹẹ keri, dị ẹtẹ tịtẹ sii nị. 25Di Ijeesu kà a yị wa ka, “Ịzị ẹdọwụ awụ nịnị yà?” O si hí wa irenu, angwa ee hí wa, dị ẹ yaa kà a yị ẹngụ ka, “Ẹngụ ọza ịsị ẹ vị ọnọnị kẹ? Aa mẹ ọdaa yị ahị ọnịrị irehu bẹẹ, ẹ yaa wụ́ụ chire e.”

Ijeesu ộ dụ ụhwẹ echu hụụnị ẹngụ ọza ịnya

(Imt 8.28-34; Ịmk 5.1-20)

26Ijeesu ọnịrị ezirẹma anị ẹ va sị ngụ akẹnẹ irehu, ịnị ẹkụra Anigerasa, ana và eyi kà Igariri. 27Íjeesu mèe chíi hi ẹtẹ kẹnẹ, dị ọnọrụ ọnya aanị hụụnị ẹkụra va gẹrị ọọ nị. Ọnọrụ ọnọọ ộ nyị ụhwẹ echu nịnị; o si ku ọnị ọ̀ yị me chire awuru, ọ mā rẹ yà ini eehi, ọgaanya ọọ̄ yà nị. 28O mè re Ijeesu, di o nowu zẹtẹ, dị ọ tana tụra ẹtẹ ọ́vịdị anị, di o nowu tụ́ ẹba ka, “Sị ẹ jị gẹ ẹmịrị ẹwụ, Ijeesu ana vị Ozi Ohomorihi ana nẹba hu keekere? Aarịhịnị, mâ dá ịpẹ wụ, asị ụ sị ụya rị mị!” 29Ộ maanị kà, agụvị ka Ijeesu ộ vịdị kà a yị ụhwẹ echu ẹnẹẹ ka ẹ̀ jịnẹ hụụnị ẹngụ ọnọrụ ọnọọ. Ụmẹ tụra ụmẹ, ọ sịị̄ za a nị. Â sị ẹba sụ́ ọọ, di a rẹ sị ịchẹkẹchẹkẹ sụ́ ọọ nị, ama dị ọ jị wa và ha chẹkẹ-chẹkẹ nị. Dị ụhwẹ echu ọnọọ dụ ọ na tụ́ ịnị ụnọmị nị. 30Dị Ijeesu họ̀ ọ ka, “Ị́rẹha awụ rị?” Dị ọ ka, “Ọkọnị”, agụvị ka ụhwẹ echu ọrụrụ o hi ịnị ẹngụ anị nị. 31Dị ụhwẹ echu ẹnẹẹ dá ịpẹ yị Ijeesu ka asị ọ dụ ẹnị na ngụ ini ẹkụra nị. 32Â nyị ụ̀rá ọrụrụ ẹnyị aanị ene hi akaha ataba ịzọọ aa rị. Dị ụhwẹ echu ẹnẹẹ dá ịpẹ yị Ijeesu ka ọ̀ navọ dị ọ̀ tụ́ ẹnị dị ẹnị ẹ̀ na ngụ ịnị ụra ẹnẹẹ nị. Dị Ijeesu ka ooho nị. 33Dị ụhwẹ echu ẹnẹẹ hụụnị ẹngụ ọnọrụ ọnọọ, dị ẹ na ngụ ịnị ụra ẹnẹẹ nị. Dị avaba ụra ẹnẹẹ zwe putu-putu, di e zina và hi ini irehu, di irehu mụnẹ wa nị.

34Aza anaā kụ́ ụra ẹnẹẹ rị, ê re ịsị ẹ mẹ, di e zwe, dị ẹ na kà a ịnị ẹkụra ọnịrị aarẹ nị. 35Dị anẹkụra ẹnẹẹ na ka eni è ne re ịsị ẹ mẹ nị. Di e ve tù Ijeesu ọnịrị ọza ọnọọ dụ ụhwẹ echu hụụnị ẹngụ anị ka ộ sị ịta kú ẹngụ, ộ yaayịtẹ, ọ kụkụ sị ịrẹyọyẹ nyị nị. Dị angwa ee hí wa nị.

36Dị aza ene re e kà a yị aza, a mẹmẹ mẹ ọza ọnọọ ụkụ nị. 37Dị avaba anẹkụra ana kara Igerasa aa dá ịpẹẹ yị Ijeesu ka ọ̀ hụụ ịdị ẹnịnị nị, agụvị ka angwa ee hí wa ẹtẹẹtẹrẹ. Dị Ijeesu ngụ ẹpa, ka ọnị ọ̀ varẹma nị. 38Dị ọza ana a dụ ụhwẹ echu hụụnị ẹngụ anị aanị, aa dá ịpẹẹ yị Ijeesu ka ọnị aa saasa a nị. Ama di Ijeesu ka ọ̀ọ na, dị ọ ka: 39“Wa nọ eehi awụ, dị ụ wa sị na zụ̀ ịsa ọbanyị oni Ohomorihi mẹ wụ!” Di aa na, dị ọ naa kà a ngụ avaba ẹkụra ọnọọ zị ịsa ọbanyị oni Ijeesu mẹ yọ nị.

Ozi ọnẹẹ Ịjayịrọọsị ọnịrị ọnẹẹ ana kanyị ịta Ijeesu

(Imt 9.18-26; Ịmk 5.21-43)

40Ộ da kù chee, Ijeesu ọ sị varẹma. Dị aza sị ịrajẹ kụ́ ọọ nyaasẹ nị, agụvị ka avaba ẹnịnị vị ana jẹẹ ee zí ọọ. 41Re, ọza ịnya aanị ana vị ọdọvịdị ini irehi ahẹkẹ Aniju, ộ vẹ. Ịrẹha anị ọ rị Ịjayịrọọsị nị. Dị ọ và ku ẹtẹ ágada Ijeesu, dị aa dá ịpẹẹ yọ ẹtẹẹtẹrẹ ka ọ̀ vẹ ini eehi anị nị, 42agụvị ka Ịjayịrọọsị ộ ma ozi ikonya ọnẹẹ, ana vị ẹhụụ ịrayị ẹwụrẹva avọọ, ozi ọnọọ aa mẹrị isu.

Ìjeesu màa dụ ọọ na, dị ọkọnị aza aa dọ ọ óze nị. 43Â nyị ọnẹẹ ọnya aanị, ene ee re ịnẹ ọtọtọnya pooro hụrẹ ịrayị ẹwụrẹva. O reè du avaba ogu ọnọọ nyị ha ị́dị ọmahọnọ nịnị, ama ẹ yị nyị ana va zụ mẹ̀ ẹ ụkụ. 44Dị ọ zị oze ị́rẹma Ijeesu, dị ọ sị ụvọ kanyị ọọ ụtọ awuru nị. Obooboro ọnọọ, anya o si ji ịnị ẹngụ anị. 45Dị Ijeesu ka, “Ẹnẹ sị ụvọ kanyị mị?” Ịjị avaba aza ka ẹ yị vị ẹnị, di Ipita va kà a ka, “Nda, wee re, aza mẹ̀ hana ẹtẹẹtẹrẹ, di u kuku ee họ̀ use ka: Ẹnẹ sị ụvọ kanyị mịị?” 46Di Ijeesu ka, “Â nyị ọza ana sị ụvọ kanyị mị: agụvị ka mâ yẹ ka ụkata ộ jịnẹ hụụnị ẹngụ amị.” 47Ịjị ọnẹẹ ọnọọ re ka ọnị ọ yị zụ tẹ, dị ọ vẹ ẹgahị-ẹgahị, dị ọ tana tụra ẹtẹ ọ́vịdị Ijeesu, dị ọ kà a yọ éyi avaba aza ịsị ẹ vẹ dị ọnị va sị ụvọ kanyị Ijeesu, ọnịrị ẹ́ngụ anị mẹmẹ wụsẹ ta nị. 48Di Ijeesu kà a yọ ka, “Ozi, ẹngụ awụ ộ ta, agụvị ka wâ sị ayị tụra mị. Waa na ịnị ẹngwọọrọ!”

49Íjeesu màa yịị kà ịrẹyị, dị ọnụtụ ọnya hụụnị eehi ọdọvịdị irehi Ohomorihi ọnọọ vẹ nị. Dị ọ kà a yị Ịjayịrọọsị ka, “Ozi ewu ô wusu, asị ụ rẹ̀ kụkụ tụ́ Ọga akanya!” 50Íjeesu mẹ̀ wụ́ ịrẹyị ọnọọ, dị ọ kà a yị Ịjayịrọọsị ka, “Asị u hí angwa, wa yị sị ayị tụra mị kẹnẹ ka ẹngụ ozi ewu vaa ta!” 51Ịjị Ijeesu tù ini eehi ọnọọ, ọ yị zẹẹ ka ọzọnyị-ọzọnyị ọ̀ ngụ ini eehi dụ ọnị na, ẹ̀ yị vị Ipita ọnịrị Ịjọọnụ ne beri Ijemiisi ọnịrị ada ozi ọnọọ beri ọnyị anị kẹnẹ. 52Avaba anịzọọ ee nowu, dị ẹyaa jị òrèrè ozi ọnọọ nị. Dị Ijeesu kà a yị wa ka, “Asị u rè sụ ùnè nịnị, ka ozi ọnọọ o yi sú; vị aa sụ ara nị!” 53Dị ẹ yaa sị ọọ mẹ enyinyi nị, agụvị ka ệ yẹ ka ozi ọnọọ ô wusu. 54Dị Ijeesu dụ avaba ẹnịnị hi ẹhẹ nị. Dị ọ jị ụvọ chire ozi ọnọọ ụvọ, dị ọ hị́ ọọ nị, dị ọ ka, “Ozi ọnẹẹ, kwẹẹtẹ!” 55Dị ụhwẹ ozi ọnọọ rẹ vavẹ, dị ọ wụsẹ kwẹẹtẹ nị. Dị Ijeesu ka à sị ịsọyịrị yọ nị. 56Ô hí aza ana ma ozi ọnọọ irenu ẹtẹẹtẹrẹ. Dị Ijeesu hú wa ụvọ ka asị ẹ kà a yị ọza ịsa ana mẹ nị.

Currently Selected:

Iruuku 8: EBTP

Highlight

Copy