Iruuku 5

Ijeesu ộ hị́ ozube ivovo ẹẹna

(Imt 4.18-22; Ịmk 1.16-20; Ịjọ 1.35-42)

1 # Imt 13.1,2; Ịmk 3.9,10; 4.1 Ẹkụhị ọnya, Ijeesu ộ jẹẹ ụtọ Irehu Igenesarẹtị, dị aza aa hanaa ngụ nee tù ọ ka ẹnị ẹ̀ na wụ́ ịrẹyị Ohomorihi nị. 2Ijeesu ô re ẹpa ẹẹva anaa za jẹẹ ụtọ irehu, ama ozube ivovo ene hi ịnị anị, ẹ sị jịnẹ aa na nyịna ọha ẹnịnị. 3Dị ọ ngụ ọnya ịnị ẹpa ẹnẹẹ nị, ana vị Ịsayịmọnị. Dị ọ dá ịpẹ yọ ka ọ̀ kà a hụrẹ ụtọ irehu chee nọ ini enyi nị. Dị Ijeesu yaayịtẹ ịnị ẹpa ọnọọ, di aa zụ̀ aza ịsa nị.

4Ịjị ọ sị ịrẹyị anị kà ta, dị ọ kà a yị Ịsayịmọnị ka, “Sị ẹpa awụ nọ ịzị ẹ nyịnẹ avọọ, di u we ne ọha awụ ngụ enyi, ka u vee re ivovoo za nịnị!” 5#Ịjọ 21.3Dị Ịsayịmọnị ka, “Nda, hụrẹ ịrahụ ị hụrẹ aa mẹ akanya, dị ẹ̀ yị nyị ịsị ị za nọ! Ama anka ụ mẹ̀ kà a, jẹẹ me ne ọha amị ngụ enyi.” 6#Ịjọ 21.6Ẹnịnị ê ne ọha ẹnịnị ngụ enyi, dị ẹ hara ivovo tawụ-tawụ, dị ọha ẹnịnị aa vaa na nị. 7Di e mi ụvọ hị́ anda ẹnịnị ana yà ịnị ẹpa ọsa, ka ẹ̀ va gụ ẹnị ụvọ nị. Dị aza ẹnẹẹ vẹ nị, dị ẹ kụ́ ivovo hi ịnị ẹpa ẹyịva, di eyee vee chìi ngụ enyi nị.

8Ịjị Ịsayịmọnị maanị re e, dị ọ và ku ẹtẹ ọ́vịdị Ijeesu, dị ọ ka, “Ananyị yị, hụụ ịda amị, ka ọnịvị mị vị nị!” 9Ivovo ọrụrụ ẹnẹ ẹ vavọọ za, ô hí Ipita ọnịrị avaba aza ọnị ọnịrịị yà ịzọọ irenu. 10Ijemiisi ọnịrị Ịjọọnụ, ezi Isebede, vị ẹnẹ ẹnịrị Ịsayịmọnị dudu aa mẹ̀ ụkọrọ. Avọọ o mè re hí ẹnị irenu nị. Dị Ijeesu kà a yị Ịsayịmọnị ka, “Asị u rè hí angwa, hụrẹ ajịnị na, aza ụ kụkụ vanaa kụ́ụ vẹ nị!” 11Dị ẹ sị ẹpa ẹnịnị vẹ ụtọ irehu, dị ẹ navọ avaba anị tụ́ ịzọọ, dị ẹyaa dụ Ijeesu ịrẹma nị.

Ijeesu ộ mẹ̀ ọnịkụ ọbanyị ọnya ụkụ anị

(Imt 8.1-4; Ịmk 1.40-45)

12Ẹkụhị ọnya, Ijeesu ộ yà ịnị ẹkụra ọnya; â nyị ọnịkụ ọbanyị ọnya ịnị ẹkụra ọnọọ. O mè re Ijeesu, dị ọ tana tụra ẹtẹ ọ́vịdị anị, dị aa dá ịpẹẹ yọ nị. Dị ọ ka, “Ananyị yị, wèe sì, wa nyẹngụ mẹ ụkụ amịị mị.” 13Dị Ijeesu tana ụvọ anị, dị ọ sị kanyị ọọ nị, dị ọ ka, “Mee sì de, ụkụ awụ ọ̀ ta!” Obooboro ọnọọ, dị ụkụ ọbanyị ọnọọ wụsẹ ta hụụnị ẹngụ anị nị. 14#Ire 14.1-32Dị Ijeesu hú ọ ụvọ ka, “Re, asị ụ kà a yị ọza ọnyọọnyị, ama na sị ẹngụ awụ zụ̀ ohirẹsụ irehi Ohomorihi; dị ụ wa na mẹ̀ ịsa oni Imosiisi mẹ ọda anị, agụvị ka wa sị nị, dị ọ̀ vị ivenu yị wa ka ẹngụ awụ ộ ta.”

15Ịrẹyị Ijeesu vị anaa yịị ngụ ịrẹyịị hu avọọ. Dị aza ọrụrụ-ọrụrụ vẹ ka ẹnị ẹ̀ va wụ́ ịrẹyị anị, dị ọ̀ rẹ mẹ ụkụ ẹnịnị yị ẹnị nị. 16Ama dị Ijeesu nọ aha ọnya ịzị aza ẹ̀ yị yà, dị ọ na mẹ̀ aduwa nị.

Ijeesu ộ mẹ̀ oswẹngụ ọnya ụkụ

(Imt 9.1-8; Ịmk 2.1-12)

17Ẹkụhị ọnya, dị Ijeesu raa zụ̀ aza ịsa nị. Â nyị Anihwarisi nịnị ọnịrị ọzwọzọda nịnị ana yaayịtẹ ịzọọ. Ẹnịnị vị ana hụrẹ avaba ẹkụra Igariri vẹ, ọnịrị Ijudiya beri Ijerusarẹmị. Ụkata Ohomorihi yà rị ọọ ana aa sịị mẹ aza ụkụ. 18Ịjọnọọ dị aza ẹnyị aanị sị odooro chema oswẹngụ ọnya vẹ nị. Di eyee sì ka ẹnị ẹ̀ sị ọọ ngụ eehi, dị ẹnị ẹ̀ sị ọ na tịtẹ ọ́vịdị Ijeesu nị. 19Ẹnịnị ẹ yị nyẹngụ sị oswẹngụ ọnọọ tù ịzị Ijeesu yà, agụvị ka aza ẹ sị rụrụ baaba. Ệ sị ọọ hịrẹ ịrẹsụ irehi ọnọọ, dị ẹ hụ̀ itu, di e chí oswẹngụ ọnọọ ọnịrị odooro ọnị ọ hụtụ ịnị anị, hi ọvịdị Ijeesu ịnị akakana aza nị. 20Ịjị Ijeesu re ka ệ sị ayị tụra ọnị, dị ọ kà a yị oswẹngụ ọnọọ ka, “Ọta amị, ma raà vagu wu ịnị ịvị awụ.”

21Dị ọzwọzọda ọnịrị Anihwarisi ene hi ịzọọ aa kà a ka, “Sị ẹ vẹ dị ọ maanị aa kà? Vị aa kụ̀ Ohomorihi ụhụ aanị nọ! Ẹnẹ zụ vagu ọza ịnị ịvị anị, ẹ̀ yị vị Ohomorihi ọnịnya kẹnẹ?” 22Ijeesu ộ yẹ ịsị eyee ro, dị ọ kà a yị wa ka, “Sị ẹ vẹ dị ụ vavọọ ee ro ẹngụ ịsa ẹnịnị ịnị ayị awụ nịnị? 23Ye re ana rọ hu, ọyịkà yị oswẹngụ ọnọọ ka â vagu ọ ịnị ịvị anị, à vị ka à kà a yọ ka ọ̀ kwẹẹtẹ, dị ọ̀ọ zị ụsẹ? 24Ama mee sì ka wa yẹ nịnị ka ẹmị Ozi ọza onigirima ộ nyị ụkata ọyịvagu ọza ịnị ịvị anị ịnị ẹhẹ ọnọnị.” Dị ọ kà a yị oswẹngụ ọnọọ ka, “Ẹma kà a yị wụ nị, kwẹẹtẹ, sị odooro awụ, dị ụ waa nọ eehi awụ!” 25Obooboro ọnọọ, dị ọ kwẹẹtẹ éyi avaba ẹnịnị, dị ọ sị ịsị ọ vịdị sị hụtụ, dị aa na nị. Dị aa sị ụgaa yị Ohomorihi nị. 26Ô hí avaba ẹnịnị irenu ẹtẹẹtẹrẹ, dị ẹyaa ga Ohomorihi nị; dị angwa ee hí wa nị, dị ẹ ka, “Ya sị ịmọrịmọ re ajịnị.”

Ijeesu ộ hị́ ọdẹkẹhirehi ọnya

(Imt 9.9-13; Ịmk 2.13-17)

27Ịrẹma ịsa ẹnẹnị, dị Ijeesu nyima ụsẹ anị nị. Ô re ọdẹkẹhirehi ọnya ana aā hị́ Ireevi, ka ộ yaayịtẹ ịzị a yàā dọ ẹkẹhị irehi. Dị Ijeesu kà a yọ ka, “Vẹ, dị ụ waa dụ mị ịrẹma!” 28Di Ireevi kwẹẹtẹ, dị ọ và avaba ịsa anị hi ẹtẹ, dị aa dụ ọọ na nị.

29Di Ireevi na mẹ̀ ịsa ọkụmị-ọkụmị yị Ijeesu ini eehi anị nị. A rẹ nyị ọdẹkẹhirehi ọsa beri aza ana vọ ẹnẹ ẹnịrịị aa rị ịsa. 30#Irk 15.1,2Dị ọzwọzọda ọnịrị Anihwarisi nịnị aa rị ihuhu, dị ẹ kà a yị ezirẹma Ijeesu ka, “Sị ẹ vẹ di u wee beri ọdẹkẹhirehi nịnị ọnịrị aza edivii rị ịsa, dị ẹwụrị wa ee hú nịnị?” 31Dị Ijeesu tụ́ wa ohi, dị ọ ka, “Ịsa ọ̀ yị zị ọza, o mē sì ọmahọnọ. Ama ọza ọnị ịsa aa zị kẹnẹ, oō sì ọmahọnọ nị. 32Agụvị avọọ, mẹ yị vẹ ka ma hị́ ọnịrẹyịzẹyịza, ama mâ vẹ ka ma va hị́ ọnịvị nịnị ka è ro ịnẹ varẹma.”

Ịrẹyị awẹ

(Imt 9.14-17; Ịmk 2.18-22)

33Aza ẹnyị ẹ va ka ẹ yị Ijeesu ka, “Ezirẹma Ịjọọnụ vị anaā ba awẹ ụpọsa-ụpọsa, dị ẹ rẹ yaa mẹ̀ aduwa, avọọ ézirẹma Anihwarisi nịnị ẹnị mẹ̀ rẹẹ̄ mẹ nị. Sị ẹ vẹ di ahịka vị ezirẹma ẹwụ ẹnị aa rị, di eyee hú pooro kẹnẹ nị?” 34Dị Ijeesu tụ́ ohi dị ọ ka, “Wáá zụ mẹ ka aza ọza ana aa nyị ọnẹẹ, ẹ̀ẹ ba awẹ ịnị ụmẹ ọnị ọva ọnẹẹ yà pe wa? 35Ama ẹkụhị aa vẹ ana a vaa sị ọva ọnẹẹ hụụ ịzọọ, ịjọnọọ ẹ vaa ba awẹ.” 36Di o re che ụhịrẹyị ọnya yị wa nị. Ọ kà, “Ọza ọ mā nà awuru ọwọọwa, dị ọ̀ gẹ ẹ za awuru ọkụkụ. Ọza ọ̀ọ vavọọ mẹ, ọ sị awuru ọwọọwa ọnọọ na, dị ịta ọwọọwa ọnọọ o yi re ve rere awuru ọkụkụ ọnọọ. 37Ọza ọ mā rẹ sị eyi-eche tụ́ ini okoko ana vị ọkụmị. Ọza ọ̀ọ vavọọ mẹ, di eche ọnọọ chaka okoko ọnọọ, dị ọ và ha, di okoko si du ha. 38Agụvị avọọ â vọrọ ka à sị eyi-eche tụ́ ini okoko ọkatẹngụ. 39Ọza ọ̀ọ sị eche ozoza hú, ọ mā kụkụ hụra sì ka oni ò hú eche ene è yi zoza. Agụvị ka vị́ ọ vaa kà a ka eche oni oni vịdị hú, o zoza hu nị.”

Currently Selected:

Iruuku 5: EBTP

Highlight

Copy