Iruuku 6

Ịrẹyị ẹkụhị ụhwọtụ

(Imt 12.1-8; Ịmk 2.23-28)

1 # Ọda 23.25 Ịnị ẹkụhị ụhwọtụ ọnya, dị Ijeesu aa parahu ịnị aarẹ ọnya aanị, ana a tụ́ akụ tụ́ nị. Dị ezirẹma anị jị akụ, di e sisi ọọ ụvọ, dị ẹ yaa rị ọ nị. 2Anihwarisi ẹnyị aanị ệ kà a yị wa ka, “Sị ẹ vẹ dị ụ waa mẹ̀ ịsa ọnị ọda ọ̀ yị zẹẹ ka à mẹ ịnị ẹkụhị ụhwọtụ nịnị?” 3Dị Ijeesu tụ́ wa ohi, dị ọ ka, “Aanịka wẹẹ̀ yị kà ịsa oni Idevidi mẹ ịjị ụngwẹ aa kụ̀ ọọ ọnịrị aza anị? 4#Ire 24.9#1 Ịsa 21.1-6Ộ ngụ ini irehi Ohomorihi na, dị ọ rị akara ana a sị yị Ohomorihi, dị ọ rẹ dà yị aza anị nị. Anka ọ́da mẹ̀ kà a, ohirẹsụ irehi Ohomorihi nịnị kẹnẹ a vọrọ ka ẹ̀ rị ẹngụ akara ọnọọ nị.” 5Di Ijeesu kụkụ kà a yị wa ka, “Ẹmị Ozi ọza onigirima ọ rẹ vị ọga ẹkụhị ụhwọtụ nị.”

Ijeesu ộ mẹ̀ osuvọ ọnya ụkụ

(Imt 12.9-14; Ịmk 3.1-6)

6Ịnị ẹkụhị ụhwọtụ ọsa, di Ijeesu rẹ ngụ ini irehi ahẹkẹ Aniju, dị aa zụ̀ aza ịsa nị. Â nyị ọza ịnya aanị ịzọọ, ene sú ụvọrị. 7Dị ọzwọzọda ọnịrị Anihwarisi nịnị sị eyi pe Ijeesu gegege ka ahịka ọ vaa mẹ ọza ụkụ ịnị ẹkụhị ụhwọtụ nị, agụvị dị ẹ̀ nyẹngụ re ịrẹyị ẹnẹẹ vaa sị za Ijeesu. 8Ama Ijeesu ộ yẹ ịsị eyee ro, dị ọ kà a yị osuvọ ọnọọ ka, “Kwẹẹtẹ, dị ụ wa vẹ ọvịdị ịzẹnị!” Dị ọnọrụ ọnọọ kwẹẹtẹ vẹ nị. 9Dị Ijeesu kà a yị wa ka, “Maa họ̀ wụ nịnị use ịrẹyị ọnya: Áá vọrọ ka à mẹ ọyịza ịnị ẹkụhị ụhwọtụ, à vị odivi? Áá rẹ vọrọ ka à dọ ọza tụ́, à vị a vọrọ ka à wụ̀ ọza nị?” 10Dị Ijeesu kana eyi sì avaba aza ẹnẹẹ nị, dị ọ kà a yị ọnọrụ ọnọọ ka, “Tana ụvọ awụ!” Di osuvọ ọnọọ tana ụvọ anị, dị ụvọ anị ta nị. 11Dị ayị aa kụ́ aza ẹnẹẹ ẹtẹẹtẹrẹ nị, dị ẹyaa kà a yị ẹngụ ka sị ẹnị vaa mẹ Ijeesu nị.

Ijeesu ộ nyị odeyi ẹwụrẹva

(Imt 10.1-4; Ịmk 3.13-19)

12Ẹkụhị ọnya, dị Ijeesu hịrẹ nọ ịnị ataba ka ọnị aa na mẹ̀ aduwa nị. Dị ọ yà ịzọọ ịnị avaba ịrahụ, dị aa mẹ̀ aduwa nị. 13Ịjị eyi sị nị, dị ọ hị́ ezirẹma anị ka ẹ̀ vẹ nị. Dị ọ nyị ẹwụrẹva ọnị ọ hị́ odeyi nịnị nị. 14Ịrẹha ẹnị ẹwụrẹva ẹnẹẹ yị: Ịsayịmọnị oni Ijeesu rẹ yị Ipita, beri Andụrụ ọyịnyara anị; Ijemiisi ọnịrị Ịjọọnụ; Ihwiripi ọnịrị Ibatoromiwu; 15Imatiwu ọnịrị Ịtọmọsị; Ijemiisi, ozi Arịhwịyọsị ọnịrị Ịsayịmọnị ana aā hị́ Izirọtị (Anakwẹngụhi); 16Ijudasi, ozi Ijemiisi ọnịrị Ijudasi Isikarịyọtị, ọza ana vana sị Ijeesu chire ọnịvị anị ụvọ.

Aza ọrụrụ-ọrụrụ ệ ká Ijeesu vẹ

(Imt 4.23-25; 12.15-16; Ịmk 3.7-12)

17Ịjị Ijeesu ọnịrị ezirẹma anị zi chí vẹ, dị ọ Jẹẹ inozi nị. Dị aza ịrẹma anị ọrụrụ-ọrụrụ ẹnịrị ọkọnị aza ana hụrẹ Ijudiya ọnịrị Ijerusarẹmị ne beri ẹkụra Ịtaya ọnịrị Ịsịdọnị ene hi ụtọ oku va gụ kara a nị. Di eyee sì ka ẹnị ẹ̀ wụ́ ịrẹyị anị, dị ẹ̀ rẹ mẹ ẹnị ụkụ nị. 18Aza ọnị ụhwẹ echu nịnị aa sị ụyaa rị, ẹnị ẹ rẹ vẹ, dị ọ mẹ wa ụkụ nị. 19Avaba aza ee sì ka ẹnị ẹ̀ sị ụvọ kanyị ọọ, agụvị ka ụkata aa hụụnị ẹngụ anịị jịnẹ, ana aa mẹ avaba aza ụkụ.

Inohine obooro

(Imt 5.1-2)

20Ijeesu ộ kụ̀rà eyi re ezirẹma anị, dị ọ kà a yị wa ka, “Ẹwụ nịnị onosiye ẹnẹnị vaa daa jẹ, agụvị ka ụ vaa ngụ ịzị Ohomorihi yà aa mẹ ịjọva nịnị. 21Ẹwụ nịnị ọnị ụngwẹ aa kụ̀ booro aanị vaa daa jẹ, agụvị ka Ohomorihi vaa sị ịnẹẹ há wụ nịnị. Ẹwụ nịnị ene ee sụ ùnè booro aanị vaa daa jẹ, agụvị ka u vee nyinyi nịnị. 22#1 Ipi 4.14Ẹwụ nịnị vaa daa jẹ, aza àaa kụ́ ayị awụ nịnị, di e si wu nịnị yi tịtẹ, dị ẹ rẹ yaa kụ̀ wụ nịnị ụhụ, dị ẹ ka aza edivi ụ vị nịnị nị agụvị ẹmị Ozi ọza onigirima. 23#2 Ịtọ 36.16; Ụkọ 7.52Waa jẹ nịnị, ịhị àa vavọọ mẹ wụ nịnị; di u we ji iriga, ụ wàa màa jẹ nịnị, agụvị ka Ohomorihi ọ raà sị ọgụ ọbanyị tẹ wụ nịnị tụ́ ẹbẹẹba. Avọọ gẹdẹ-gẹdẹ óhiku ẹnịnị mẹ̀ rẹ mẹ hi ọnịsẹ nịnị ịyẹẹyẹ nị. 24Ama ẹwụ nịnị opisa, ọ sị dà, agụvị ka wa sị ẹhẹ ẹngwọọrọ awụ nịnị rị da. 25Ẹwụ nịnị ọnị ịnẹ sị há, agụvị ka ụngwẹ vaa kụ̀ wụ nịnị. Ẹwụ nịnị ene ree nyinyi booro aanị, ọ sị dà, agụvị ka u vee nowu, dị ụ waa jị òrèrè nịnị. 26Wa sị dà nịnị, wèe re ka avaba aza ee gono wu nịnị, agụvị ka avọọ gẹdẹ-gẹdẹ óhiku ẹnịnị mè re gono ọnịsẹ ireche nịnị nị.”

Sì ịrẹyị ọnịvị awụ

(Imt 5.38-48; 7.12)

27“Ẹwụ nịnị ana aa wụ́ ịrẹyị amị aanị, jẹẹ ma kà ịsa ọnyaa wụ nịnị: Wee sì ịrẹyị ọnịvị awụ nịnị, waa mẹ ọyịzaa hi aza ana a kụ́ ayị awụ! 28Waa mẹ̀ aduwa yị aza ene ee chìi hi wu nịnị, dị ụ wa rẹẹ mẹ̀ aduwa yị aza ana aa mẹ wụ nịnị kẹnẹ-kẹnẹ! 29Ọza ana àa nya wụ arụhwọtọ eyi ụvọ ọnya, rẹ vara eyi ọsa ka a bẹẹ! Ọza ana àa dọ wụ nịnị awuru, rẹ sị ọtịnịnẹ anị vaka a yọ bẹẹ! 30Ọza tụra ọza ana àa họ̀ wụ use ịsa, ụ sị yọ nịnị! Ọza ana àa va sị wụ nịnị ịsa, asị ụ dọ ọ varẹma! 31#Imt 7.12Ịsị u wèe sì ka ọza ọ̀ọ mẹẹ hi wu nịnị, ẹwụ nịnị ọ̀ rẹ vavọọ mẹẹ hi wa! 32Àa vị ọza ene sì ịrẹyị awụ nịnị kẹnẹ, ẹwụ nịnị reē sì ịrẹyị anị nị, ye re ọgụ ọnị ụ nyị? Áa vavọọ aza edivi nịnị ẹnị mẹ̀ rẹẹ̄ mẹ. 33Àa vị ọza anaā mẹ ọyịzaa wụ nịnị kẹnẹ, ẹwụ nịnịị̄ rẹẹ mẹ ọyịza yị nị, ọgụ ịsị ụ nyị nịnị? Avọọ aza edivi nịnị mẹ̀ẹ̄ mẹ nị. 34Àa rẹ vị ọza ọnị ụ yẹ ka wàa sị ịsa rere ọ vaa vàa vẹ, ụụ̄ sị ịsaa yị nị, ọgụ ịsị ụ nyị nịnị? Aza edivi vị anaā sịị ịsaa rere aza edivi kẹnẹ, agụvị ẹ̀ zụ dọ ọ varẹma. 35Ama sì ịrẹyị ọnịvị awụ nịnị, dị ụ waa mẹ ọyịzaa yị aza nịnị! Waa sị ịsaa rere ọza, ama asị u tụra eyi ka ụ vaa dọ ọ varẹma! Ịjọnọọ ọgụ awụ nịnị vaa banyị, dị ụ zụ vị ozi Ohomorihi ana aha ene hu keekere nịnị. Ọọ̄ ngụ ayị aza ẹnẹ ẹ̀ yị mā kụ́ avọ, ọnịrị aza edivi. 36Waa vayị ọza, anka Áda awụ nịnị mẹ̀ẹ̄ vayị ọza.”

Asị ụ jị ịvị yị aza

(Imt 7.1-5; 15.14; 10.24-25)

37“Asị ụ sị ẹngụ awụ vị ọmọkarẹyị ọza, agụvị asị Ohomorihi mẹ̀ ọkarẹyị wụ! Asị ụ rẹ jị ịvị yị ọza, agụvị asị Ohomorihi jị ịvị wụ! Waa vagu ọza, agụvị Ohomorihi ọ̀ rẹ vagu wu ịnị ịvị awụ. 38Waa sị ịsaa yị ọza, agụvị à rẹ sị ịsa wụ, ana ahịka a vaa mọ ọ ohihi, di e chì ọọ, di e re henyi ọọ, dị aa ká a wà, di a sị wụ. Ịsị ụ wàa sị mọ ịsa yị ọza, a rẹ vaa sịị mọ ọ yị wụ nị.”

39 # Imt 15.14 Dị Ijeesu sị ụhịrẹyị dị aa sịị kà ịrẹyịị yị wa ka, “Ogweyi ọ́ọ́ zụ sị oze zụ̀ ogweyi? Wéé ro ka ẹ yị vị ẹnị ẹyịva aa hyẹdụ nee ngụ orosi? 40#Imt 10.24,25; Ịjọ 13.16; 15.20Ọza ana aa kọsẹ ịsa, o yi zụ huna ọga anị, ama ọ̀ọ sị eyi ụkọrọ anị yẹ ta, dị ọ yà anka ọga anị. 41Sị ẹ vẹ di u wee re ẹchịchị ana yà ini eyi ọnọhụva awụ, dị ụ wẹ̀ yị tẹsị ọvọọvọrọ ana yà ịnị ẹ́ẹwụ? 42Wáá zụ ka ẹ yị ọnọhụva awụ ka: ‘Ọhụva amị, jẹẹ ma sị ẹchịchị hụụnị eyi awụụ wụ’, ama dị ẹwụ e yi re ọvọọvọrọ ana yà ini eyi awụ? Ẹwụ ọmọzakụyẹ, wẹ rẹ̀ vịdị sị ọvọọvọrọ ana yà ini eyi awụ daa! Ịjọnọọ di u wee re ẹtẹ ẹtẹẹrẹ, dị ụ wa va zụ sị ẹchịchị ana yà ini eyi ọnọhụva awụ.”

Ọchị ọnịrị ẹtụtụ anị

(Imt 7.16-20; 12.33-35)

43“Ọchị ozoza ọ mā tụ́ ẹtụtụ odivi; ọchị ọnị ụkụ za ọnị ọ mā rẹ tụ́ ẹtụtụ ozoza. 44#Imt 12.33Ẹtụtụ ọchị nịnị a sịị̄ yẹ wa nị. Ọza ọ mā há ezu hụụnị ọchị ikeyi-ikeyi. Ọza ọ mā rẹ há osinkara hụụ ịrẹsụ agagana. 45#Imt 12.34Ịsa ọyịza ana yà ịnị ayị ọza ọyịza, ọọ̄ mẹ̀ ka ọ̀ọ mẹ̀ ebira ozoza nị. Ịsa odivi ana rẹ yà ịnị ayị ọza odivi, ọnị ọ rẹẹ̄ mẹ ka ọ̀ọ mẹ̀ ebira odivi nị. Ịsa ene hi ịnị ayị ọza, írenu anịị̄ kà a jịnẹẹ vẹ nị.”

Aza ẹnị ẹẹva ana dà irehi

(Imt 7.21,24-27)

46“Sị ẹ vẹ dị waa hị́ mị ‘Ananyị yị, Ananyị yị’, ama dị ụ wẹ yị mẹ̀ ịsa ọnị mị kà? 47Ọza tụra ọza ana àa vẹ ịdị amị, dị ọ wụ́ ịrẹyị amị dị ọ rẹ mẹ̀ ịsa ọnị mị kà nị, mị vaa sịị zụ̀ wụ ịsị o véné. 48Vị ọ sị mẹẹ anka ọza ana aa dà irehi, dị ọ vịdị chị ẹtẹ nyịnẹ, dị ọ kà ẹtẹ tụ́ ịrẹsụ ịda nị. Ịjị ọhaara vẹ, di okuha dà nya irehi ọnọọ ẹtẹẹtẹrẹ nị, ọ yị hyakụ zụ zizi ọọ; agụvị ka â ká a ẹtẹ katẹngụ. 49Ama ọza ana àa wụ́ ịrẹyị amị, dị ọ̀ yị mẹ ịsị mị kà nị, vị ana sị mẹẹ anka ọza ana dà irehi tụ́ ịrẹsụ ezi, dị ọ̀ yị ká a ẹtẹ vụrụ-vụrụ. Ịjị okuha vẹ, dị ọ dà nya irehi ọnọọ nị, dị ọ wụsẹ wú nị; avaba irehi ọnọọ o wú ha saka-saka nị.”

Currently Selected:

Iruuku 6: EBTP

Highlight

Copy