Suku-saakị 11
11
Tomi Babịlọnị Ḅụ Geletẹ-warị Namam
1Mịọkụ bebe tomikiri mẹ gbọrụ ama ḅẹ ḅịḅị fiem, tẹ boowa ẹkwẹn-aḅịḅị nyanam. 2Tomi ịrụa-saakịarị-anga mẹ ḅụ mẹnjị ikelema-koroarị ogbo, ịn nwẹnị Babịlonịya nwẹn-sịn anga ḅụ tụndụ ofori lẹsẹrẹtẹ ye-yọ ḍọkị-ẹrị tẹ anịjụ koro anga. 3Ịn nwẹnị jụmọ-jụmọ ḅẹẹ, “Ó ḅoo, yee wa biriki tẹmẹ tẹ iḅiọkụ arị fọị ẹkẹkẹ sọma.” Tẹ ịn nwẹnị kẹ ye nama ḅẹ biriki tẹmẹ, nwẹnị pịkị ịn kẹ Ta sịn-arị kurukurutẹ ye-oḅoloye nyana. 4Anịtẹso ịn nwẹnị ḅẹẹ, “Ó ḅoo, yee wa gbọrụ opu ama nama wamịna-aḅụụ pịrị, na pịkị sịḅị mu so la tẹ gbọrụ kụrọtẹ gele-warị na, tẹ ẹrẹ nyana wamịna-aḅụụ pịrị, anieofori wa ḅofa bebe tomikiri tọrụ mẹ ḅụ gala-gala ọrụ-jụjụ da.”
5Anịtẹso KỊNỊNYANAḄỌ ḅẹ nwẹnị ideri opu ama mẹ na, kụrọtẹ gele-warị mẹ na ḍiki ḅẹ ḅo, arị aị ma tẹ tomina owiapụ-awọmẹ ma nama tẹ aị ma. 6Tẹ KỊNỊNYANAḄỌ ḅe nwẹnị ḅẹẹ, “Ḍikii, mịna tomi ma inimgba gbọrụ atomi, tẹ inimgba pịkị gbọrụ ama ḅẹ ḅịḅị fiearị; anịsakị miemẹ anie ịn tọrọkọ-jụ mịẹ ḅẹ aị ma ḅẹ suku-saakị. Ala-a ịn inetẹ ịn mịẹ ḅẹ tẹ tọn ye goyegoye mịẹ ḅa. 7Ó ḅoo, yee wa ideri-mu tẹ anịjụ ịna ama ḅẹ ḅịḅị mẹ pikirima, mịẹtẹ ịn ḅarị jụmọ-jụmọ kọn ẹkwẹn fie ye naa ḅịa ḅara.” 8Mị-ḅara mie KỊNỊNYANAḄỌ ḅe kẹ ịn gala-galama tomikiri tọrụ mẹmgba ikelema-koro ḅara, tẹ ịn nwẹnị opu ama mẹ nama mẹ wẹrịso. 9Anịẹrẹsị ini ẹrẹ kẹ anị sịnm Babẹlị, gbala anịjụ mie KỊNỊNYANAḄỌ ḅe tomikiri mẹmgba ama ḅẹ ḅịḅị mẹ pikirima ye ẹrẹsị; anịsakị ḅụ mie KỊNỊNYANAḄỌ ḅe ịn gala-galama tomikiri tọrụ mẹmgba ikelema-koro ye.
Sẹmụ Furo-ḅẹ-apụ Ma
(1 Pkị 1.24-27)
10Mịna apụ ma anie Sẹmụ furo-ḅẹ-apụ ma. Opu minji mẹ ḅọrọ tẹ maa akụra ḅọrọ tẹso, Sẹmụ sịḅị kụra sọnọa asi lam, tẹ ori Apakịsadị iyim; 11tẹ Sẹmụ Apakịsadị iyi tẹso, ọ̀ kụra gbọrụ ẹndẹ na sọnọa asi finji (500) kẹ ḍumo-sime tẹ ja owiapụ-awọmẹ na eremịna-awọmẹ na iyim.
12Kụra suei sọnọa akụra finji (35) Apakịsadị sịḅị ḅọrọ tẹso, ọ̀ Sẹla iyim; 13tẹ Apakịsadị Sẹla iyi tẹso, ọ̀ kụra gbọrụ ẹndẹ na tẹra akụra finji (403) kẹ ḍumo-sime tẹ ja owiapụ-awọmẹ na, eremịna-awọmẹ na iyim.
14Kụra suei (30) Sẹla sịḅị ḅọrọ tẹso, ori Ẹba iyim; 15tẹ Sẹla Ẹba iyi tẹso, ọ̀ kụra gbọrụ ẹndẹ na tẹra akụra finji (403) kẹ ḍumo-sime tẹ ja owiapụ-awọmẹ na, eremịna-awọmẹ na iyim.
16Kụra suei inia akụra finji (34) Ẹba sịḅị ḅọrọ tẹso, ọ̀ Pẹlẹgị iyim; 17tẹ Ẹba Pẹlẹgị iyi tẹso, ọ̀ kụra gbọrụ ẹndẹ na suei finji (430) kẹ ḍumo-sime tẹ ja owiapụ-awọmẹ na, eremịna-awọmẹ na iyim.
18Kụra suei (30) Pẹlẹgị sịḅị ḅọrọ tẹso, ò Rehu iyim; 19tẹ Pẹlẹgị Rehu iyi tẹso, ọ̀ kụra oyia asi na esenia akụra finji (209) kẹ ḍumo-sime tẹ ja owiapụ-awọmẹ na, eremịna-awọmẹ na iyim.
20Kụra asuei maa akụra finji (32) Rehu sịḅị ḅọrọ tẹso, ò Sẹrugu iyim; 21tẹ Rehu Sẹrugu iyi tẹso, ọ̀ kụra oyia asi na sọnọma akụra finji (207) kẹ ḍumo-sime tẹ ja owiapụ-awọmẹ na, eremịna-awọmẹ na iyim. 22Kụra suei (30) Sẹrugu sịḅị ḅọrọ tẹso, ọ̀ Nahọ iyim; 23tẹ Sẹrugu Nahọ iyi tẹso, ọ̀ kụra oyia asi (200) kẹ ḍumo-sime tẹ ja owiapụ-awọmẹ na, eremịna-awọmẹ na iyim.
24Gbọrụ kụra fa kụra asuei (29) Nahọ sịḅị ḅọrọ tẹso, ò Tera iyim; 25tẹ Nahọ Tera iyi tẹso, ọ̀ gbọrụ kụra fa kụra sonioa asi (119) kẹ ḍumo-sime tẹ ja owiapụ-awọmẹ na eremịna-awọmẹ na iyim.
26Kụra atesi oyi finji (70) Tera sịḅị ḅọrọ tẹso, ori Ebiramụ na Nahọ na Eranị na iyim.
Tera Furo-ḅẹ-apụ Ma
27Mịna apụ ma anie Tera furo-ḅẹ-apụ ma. Tera anie Ebiramụ na, Nahọ na, Eranị na ḍaḅọ; anị sakị Eranị anie Lọtị ḍa. 28Eranị ọ̀ ḍa Tera ḍumo wararị ogbo fịịm, Kalidisi (Babịlonịya) ḅẹ opu ama Họ ini ori iyi ama ḅụ. 29Ebiramụ na, Nahọ na nwẹnị ere-sime; Ebiramụ ta ma ẹrẹ anie Sẹrayị, anịsakị Nahọ ta ma ẹrẹ anie Milika, Eranị ẹrẹḅọtụḅọ ma, ori anie pịkị Isika ḍa. 30Sẹrayị furo pụnm; árị inetẹ awọ iyi-a.
31Tera nwẹnị ori owiḅọtụḅọ Ebiramụ na, ò taa-owiḅọtụḅọ Lọtị anie Eranị owiḅọtụḅọ ḅe na, ò fụanḅọ Sẹrayị anie Ebiramụ ta na ọkị, tẹ ịn nwẹnị gbolomatẹ Kalidisi (Babịlonịya) ḅẹ opu ama Họ ḅụ saakị so Kenanị ama mẹ mu. Kụma ịn ḅo Eranị nwẹn-sịn ama mẹ la tẹso, ịn nwẹnị anịjụ koro-sime. 32Tera sịḅị ḅọrọ aḍin anie kụra oyia asi na sọnọa akụra finji (205); tẹ Tera Eranị ḅụ fịịm.
Currently Selected:
Suku-saakị 11: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
