Suku-saakị 12
12
Tamụnọ Ebiramụ Sịn Tẹ Ori Na Ọḅọkụ Fịm
1 #
Fịr 7.2,3; Hib 11.8 KỊNỊNYANAḄỌ ḅe Ebiramụ ḅẹẹm, “Ị́ paka-furo na, ị́ opu ama na, ị́ ḍa warị na ḅụ paka-so ama mẹ tẹ à kẹ í ḍie ḅarị ama mẹ muu. 2Anịsakị àrị ị́ ḅụụ gburo-gburotẹ opu sịẹ pakama ḅa, àrị í boma ḅa, tẹ mịẹtẹ ị́ ẹrẹ gburo-gburo ḅa, anie ḅụ í boma sọ ḅa.”
3 #
Gal 3.8
“Àrị í bomapụ-bomapụ boma ḅa,
kụma àrị í woriapụ-woriapụ wori ḅa.
Anịsakị ị́ ḅụụ ḅụ mie tomikiri ḅẹ afuro mamgba
ḅọrọ tẹ boma ḅarịye.”
4Mie ḅụ Ebiramụ KỊNỊNYANAḄỌ ḅe ḍuko ọ̀ pịrị tẹ ḅara ḅụ mum; Lọtị ọ̀ ḅụụ sọ tẹ ori na mum. Ebiramụ Eranị ama ḅụ so sakị ọ̀ sịḅị kụra atesi oyi finji na sọnọa akụra na (75) ḅọrọ tẹ. 5Ebiramụ ọ̀ ta Sẹrayị na, Lọtị ori iyimbere owiḅọtụḅọ na, ịn nyana aị tẹ ịn kobiri tẹ aị mamgba na, Eranị ama ḅụ tomi tẹ ịn nyana tẹ apụ ma na ọkịm; tẹ ịn saakị paka-so Kenanị ama mẹ mum. Ịn ḅo Kenanị ama mẹ la tẹso, 6Ebiramụ nwẹnị mẹnjị ama mẹ ḅio tolu-ḅọrọ Sẹkẹmụ ḅụ ịn More ḅẹ oku nwẹn-sịn opu sịn mẹ sime anga mẹ mu. Anị sakị mẹ Kenanị ḅẹ apụ ma sọ ama mẹ ḅio emi.
7 #
Fịr 7.5; Gal 3.16 Anịtẹso KỊNỊNYANAḄỌ ḅe nwẹnị ḅụụ pakama Ebiramụ ḍie tẹ ḅẹẹ, “ị́ ḅụụ ḅụ paka-ḅo apụ mie à mị ama mẹ kẹ pịrị ḅarị ye” Mie ḅụ ọ̀ nwẹnị gbọrụ agbamịẹ-anga nama kẹ KỊNỊNYANAḄỌ ḅe tẹ ḅụụ pakama ò ḍie ḅọ ḅe pịrị. 8Anịjụ ọ̀ nwẹnị pịkị saakị so Bẹtẹlị ḅụ ịrụa-saakịarị-anga mẹ ḅẹ tụndụ mẹ mu tẹ ori akpụrụ-warị pike, Bẹtẹlị ịrụa-ideriarị-anga emi, anịsakị Ayị ịrụa-saakịarị-anga mẹ ḅụ emi; tẹ anịjụ ọ̀ nwẹnị pịkị gbọrụ agbamịẹ-anga nama KỊNỊNYANAḄỌ ḅe pịrị tẹ KỊNỊNYANAḄỌ ḅe ẹrẹ mẹ sịn. 9Tẹ Ebiramụ paa mẹnjịma Kenanị suku-jụ simearị samụnọtẹ kiri mẹ da-da mum.
Ebiramụ Mu Ijiputi Ḅụ Simem
10Mịọkụ Kenanị ama mẹ ḅio ịnụ pakam. Mie ḅụ Ebiramụ ideri-so Ijiputi anịjụ sime ḅẹ ḅara, gbala ama mẹ ḅio ịnụ mẹ kụrọ ḅakam ẹrẹsị. 11Ori Ijiputi sọ-mu ḅẹ-yearị ogbo, ọ̀ nwẹnị ọ̀ ta Sẹrayị ḅẹẹ, “À nimi wararị mịnẹ ị́yẹrị anie ḍiki ḅụụ-ḅẹlẹmarị iḅi-fịtẹ ẹrẹḅọ. 12Ijiputi-ḅẹ-apụ ma ị́ ẹrị sakị ịn ḅẹẹ ḅa, ‘Ma-ma anie ọ̀ ta.’ Anị sakị ini ị̀ ḅaa ḅa, kụma ini ị́ wẹrịso tẹ í ḍumo-sime ḅa. 13#Suk 20.2; 26.7Ḅẹẹ ị́yẹrị anie ị̀ ịyịmbara, mịẹtẹ í gotẹ ye ị̀nịna iḅi ḅẹ ḅara, mịẹtẹ ini ị́ sịḅị ẹrẹsị ì ḍumo ḅọrọma ḅẹ ḅara.” 14Ebiramụ mẹnjị ijiputi sọ-mu tẹso, Ijiputi-ḅẹ-apụ ma nwẹnị ẹrị mịnẹ ẹrẹḅọ ma iḅi lama wararị. 15Fero, amadaḅọ ḅe owiapụ-awọmẹ ma arị ẹrị tẹso, ịn nwẹnị mu á boma Fero pịrị. Tẹ ịn nwẹnị ẹrẹḅọ ma ọkị Fero warị mu. 16Á sịḅị ẹrẹsị ọ̀ nwẹnị iḅi ḅara kẹ Ebiramụ na mịẹ; tẹ ori anana na, pootẹ-anambulo na, owi yedogi-anama na, fịrịmẹnjị-owiapụ na, fịrịmẹnjị-eremịna-awọmẹ na, ịyọrọ yedogi-anama na, ike-sụa-anama na nyanam.
17Kụma KỊNỊNYANAḄỌ ḅe gburo-gburotẹ si obi kẹ Sẹrayị, Ebiramụ ta sịḅị gotẹ Fero na, ọ̀ warị na fomum. 18Mie ḅụ Fero nwẹnị Ebiramụ sịn, tẹ nwẹnị ò gbela, “Miemẹ tẹ ị́ nwẹn kẹ ị̀ mẹẹ ye mẹ ḅọrọ tiye? Í tiegotẹ ḍuko ị̀ pịrị-a mịnẹ árị ị́ ta? 19Í tiegotẹ ḅẹẹ, ‘Árị ị̀ ịyịmbara’ tẹ anie ḅụ àrị árị ọkị ị̀ ta sọma? Mịọkụ tẹrẹmẹ, mie ị́ ta ma, árị ọkị tẹ paka-soo.” 20Tẹ Fero nwẹnị Ebiramụ gboloma ye tọn owiapụ pịrị tẹ ini ọ̀ ta na, ọ̀ nyana aị mamgba na kẹ ọ̀ ḅụụ sụa tẹ ọ̀ pakamam.
Currently Selected:
Suku-saakị 12: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
