Okunwẹngịapụ 1
1
1Yela Tiofịlọs:
Ị̀ya tatarị ḍiri mị ḅie Jizọs Ḅe mịẹ aye mamgba na Ò ḍieaye ma na à nwọ gịẹịnsam, Oria fịrị Ọ̀ nwọ sakị sịkị ngịsị, 2ọkịmun ini Ori ọkị iwo soḅie mun sịkị mị la. Ma ini Ori ọkị iwoka simeogbo Ọ̀ Fịafịa Tẹmẹ Ḅe kụrọ ḅụ ḅọrọ ye se Ọ̀ sẹlẹsa Oria okunwẹngịapụ ma ḍiemẹ. 3Ọ̀ fịḅụsịsẹ ḅe ḍin-a mesi ḅụ Ori Ọ̀ ḅụ se tọn-a sịkị ḅụ ini ḍiemẹ, pikiḅịa ọkụ oforika ḅara ḅụ na Ò ḍumo waraḅẹ. Ini Ori ọrịmẹ, Ori ini na ọkwẹịnmẹ, Tamụnọ Amanyanakiri mị gbolomaye ḅụ. 4Se ini ḅo koḅirima sịkị, Ọ̀ mịn mị nwọ tọn ini pịrịmẹ: “Ó Jerusalẹm mị koroma soma, ọkụma ómine ị̀ Ḍaḅe ḅereni ọ́ pịrị ḍiepịrịye mị nwọ koru, à ḍuko ọ́ pịrịsaye mị gbolomaye ḅụ. 5Jọn ḅe mengi se nweni saramẹ, ọkụma ḍin kalaye ḅo laḅịa sịkị ini Fịafịa Tẹmẹ Ḅe se mengi se ọ́ saraḅịa.”
Ini Jizọs Ḅe Ọkị Iwo Soḅie Mun mẹ
6Okunwẹngịapụ ma Jizọs Ḅe na koḅirima sime sịkị ini Ò gbelamẹ, “Nyanaḅọ, mịn sịkị mị ḅụ Amanyanakiri mị Ị́ se pịkị Izrẹl mị pịrị ḅe?”
7Jizọs Ḅe nwọse ini ḅẹmẹ, “Sịkịma na mịẹmịẹaye ma na, ị̀ Ḍaḅe kụrọ ḅụ kẹngẹ mị àrị omiye-ẹ, anị pịkị sime ọ́ pịrịkẹ ómine àrị mịẹḅịa sịkị nwọ nemi. 8Ọkụma kụrọ ọ́ ḅụ ḅeinḅịa Fịafịa Tẹmẹ Ḅe ḅo ọ́mịna ọgọnọ gbanaḅịa sịkị, ó Jerusalẹm ḅie na, pịkị Judia ḅie mgba na, Sameria na ḅie ị̀ya onyechịẹapụ sọḅịa, pịkị ọkịmun tomonikiri mị ḅe kulumama la.” 9Ọ̀ mịn mị ḅẹ so sịkị ini Ori ọkị iwo soḅie mun mẹ ini tọrụ se Ò ḍikiarịogbo, se soḅuno inia tọrụkuḅu Ò kikimamẹ.
10Ini pa inia tọrụ se kweinma sotọrụ ḍikiarịogbo Ori ini koroma somẹ, anịsịkị abalala ḅiri mama owuapụ ḅo ḅụnemika ḅụ inia anga chịẹsimemẹ, 11se nwọse ini ḅẹmẹ, “Galili apụ, nde ó gose anịanga chịẹsime se tọrụ se kweinma sotọrụ ḍikiarịye? Ḅe Jizọs Ḅe, ini ọ́mịna ogboku ọkị iwo soḅie mun sa Ḅọ Ḅe, mịn gbọrị ḅara mị, ómine ọrị, ini Ò se iwo soḅie mun ọkụ mị Ọ̀ nwọse vinpịkị ḅoḅịa.”
Judas Ḅe Tịḅị Ḍinmaḅọ Ḅe
12Anịsịkị okunwẹngịapụ ma Oliv Tụndụ mị ọgọnọ vinpịkị so Jerusalẹm mun mẹ, gbọrị tombi se maịn pu ḅe gbọrị kiri na gbasịḅịaye anị nwọse opuama mị ḅụ sikimamẹ. 13Ini Jerusalẹm mun mẹ, se tanjị mun ini sime sime ọgọnọ warị mị ḅie sọmẹ, Pita ḅe na, Jọn ḅe na, Jems ḅe na, Andru ḅe na, Filip ḅe na, Tọmọs ḅe na, Batolomiu ḅe na, Matio ḅe na, Jems Alfịọs yaḅe na, Saịmọn Amatarịḅọ ḅe na, pịkị Judas Jems yaḅe na. 14Ini sịkịmamgba gbọrị kpo ḅụ eremeni ma na sime tẹkẹtẹkẹmẹ, Jizọs nyengi Meri ma na pịkị Oria owuapụ mịnapụma pịkị inia ḅụ sọmẹ.
15Ḍin kalaye ḅo ḅọrọ sịkị, ḅereniapụma koḅirimamẹ, inimgba ini pa kịnị-a sonioasi la ḅịa, anị Pita ḅe sịsẹ ọkwẹịnye-ẹ. 16“Mịnapụ,” ọ̀ nwọ ḅẹmẹ, “Fịafịa ḍiri mị ḍuko na Fịafịa Tẹmẹ Ḅe Devid ḅe ḅụ ḅọrọ Judas ḅe ḅụ koro ịkịan mị ḅo kọkọmaye sọsam, ori anị achọ se Jizọs Ḅe kun apụma ḍie ḅọ ḅe. 17Judas ḅe mịna ḅie gbọrịḅọ-ẹ, anịatịḅị ini ọ̀ sẹlẹ ọkị se pịkị mịna fịrị mị ḅie ọ̀ lalama kiri se ọ̀ pịrịmẹ.”
18(Si fịrị ḅụ Judas ḅe nyanaḅo igbiki ọ̀ nwọse kiri fẹmẹ, ọ̀ tịḅị pịkị kiri da, ḅịkị se fị nyọ mị, ọ̀ ḅụlọ polomẹ, se ọ̀ ḅụlọ ḅie sime ịla mamgba ọsụn saramẹ. 19Jerusalẹm ḅie anga apụ mamgba anị naamẹ, anịẹrẹchị inia ama ọkwẹịn ḅụ ini nwọse nyọ mị chịnmẹ Akẹldama, anị mị fiearịye, “Tomoni Pulo Ele.”)
20“Anịatịḅị Fịafịa Nime ḍiri mị ḅie ini gịẹịnmẹ,
‘Ye oria warị mị gbinkoro sime;
ye gbọrịḅọ sọnị anịa ḅie anga ma.’
Anị pịkịna gịẹịn waraḅẹ na,
‘Ye jịnḅọ oria fịrị kiri mị ọkị.’
21“Anịọkụma jịnḅọ mịna ḅụ sọ ẹka sịkị ofori-ẹ, onyechịẹḅọ sọ Nyanaḅọ Jizọs Ḅe fịḅụsịsẹ mị nwọ pịrịḅịa ẹrẹchị. Ori ḅọ ḅe pịkị mịna kpo ḅie sime apụma ḅie gbọrịḅọḅịa, Nyanaḅọ Jizọs Ḅe mine na nwẹngị na paka na sịkịmamgba. 22Jọn ḅe mengi se ọ̀ sara sịkị mị ḅụ sakị mun mịna ogboku ini ori ọkị iwo soḅie mun ene mị la.”
23Anị ini mama apụ ẹrẹ nwọ tọn pakụmaye-ẹ, Josẹf, ini Basabas nwọse chịn ḅọ ḅe, (ini pịkị Jọstọs nwọse ọ̀ chịnmẹ,) pịkị Matayas ḅe na. 24Anịsịkị ini tẹkẹmẹ, “Nyanaḅọ, tomoni mamgba kuḅie ị́ nemimẹ. Anịgose mịna mama apụma ḅie ị́ sẹlẹ ọkị ḅọ nwọse wa ḍie, 25Judas ḅe kiri mị nwọ ọkịḅịa ḅọ, okunwẹngịḅọ ḅara ḅụ, Judas ḅe koroma so ò sime gbẹịn nyọ nwọ mun kiri mị.” 26Anịsịkị ini ịkịan wakịmẹ se mama ẹrẹ ma ḅụ anị sime pịrịḅọ nwọ nemiḅịa ẹrẹchị, ini sẹlẹ ḅọ anị Matayas ḅe-ẹ, se ini ò se oyigbọrị okunwẹngịapụ fịnjịma ḅie chụamẹ.
Currently Selected:
Okunwẹngịapụ 1: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
