Okunwẹngịapụ 2
2
Fịafịa Tẹmẹ Ḅe Ḅo Mị
1Pẹntikọst ene mị ḅo lasịkị, ḅereniapụ mamgba gbọrị anga ḅụ koḅirima simemẹ. 2Ḅụnemika ḅụ ye sotọrụ fiema ḅomẹ, opu fọrụ fie ọkụ kịkẹye ḅara anị nwọse fiemẹ, se anị ini koḅirima sime bebe warị mị ḅie mgba ḅeinmẹ. 3Anịsịkị ini fịnịḅẹlẹ ọkụ simeye ọrịmẹ, anị wasama mun ḅọḅọ ọgọnọ gbanamẹ. 4Inimgba Fịafịa Tẹmẹ Ḅe na ḅeinmẹ, se sakị jịn ama ọkwẹịn kọn aḅẹ Tẹmẹ Ḅe se ini pịrị ịnyọ laḅara ḅụ.
5Jerusalẹm mị ḅie anga Juapụ omi-ẹ, anị bebe tomonikiri mị ḅie, sẹsẹ ma ḅie ḅo tẹkẹtẹkẹ apụ. 6Fiearịye mị ini nwọ naa sịkị, ḅaka tomonikpo koḅirimamẹ. Inimgba inia ḅụ jikemẹ, anịatịḅị tomoniḅọ goyegoye ḅereniapụma ḅịpị iniḅọ amama ọkwẹịn ḅẹlẹ nwọ naamẹ. 7Ijira ḅụ sara na ḅụgbiripu na ḅụ ini nwọ ḅẹmẹ, “Nwọ mị ḅara se ọkwẹịn apụma Galiliapụ-ẹ! 8Nde anịọkụma, anị gose ọkọ pakaye na mine mgba inia ḅịpị mịna ama ọkwẹịn ḅẹlẹ ma naa ọkụ? 9Wa sime ḅo anga ma anị Patia, Midia, na Ilam na-ẹ; pịkị Mẹsopotemịa, Judia, Kapadosia pịkị Pọntọs na Esia na, 10pịkị Frijia na, Pamfilia na, Ijipt na, pịkị Libya Saịrini kpekima irima na, mịna ḅie dapụ Rom sẹ ḅie ḅomẹ, 11Juapụ na Jịnsẹapụma na, anị vinpịkị Juapụ Tamụnọ ḅẹrẹ nemi ḅụ sọsa apụma, mịna ḅie dapụ pịkị Krit na Arebia na ḅie sime ḅomẹ, anị sọnị mine mgba ini mịna ama ọkwẹịn ma kọn-arị ḅara nwọ naa aḅẹ, Tamụnọ Ḅe mịẹsa opuaye ma ḅụ!” 12Ḅụgbiripu na ḅụḅalaḅala na ḅụ ini nwọse jịnḅọ jịnḅọ gbelamẹ, “Mịn mị anị che fie-ao?”
13Ọkụma ísíapụma ḅereniapụma se kpọtimẹ, se nwọ ḅẹaḅẹ na, “Mịna apụma ini iruḅu tọrụḅaamasam!”
Pita Ḅe Oku Mị
14Anịsịkị Pita ḅe na ísí oyigbọrị okunwẹngịapụ fịnjịma na sịsẹ chịẹ, se gele pụkọ nwọse ọkwẹịn tomonikpo mị pịrịmẹ: “Ị̀ juo Juapụ pịkị ómine Jerusalẹm mị ḅie angarị apụ mamgba na, ómine ị̀ poki, à mịn mị fiearịye nwọ ḍuko ọ́ pịrị. 15Mịna tomonima ini iruḅu tọrụḅaamakẹ, anị ó koroma ḅara; mị kọkọ dede ḅie esenia-a so ḅiri. 16Anịnakaraka mịn mị, anị ịkịankoro Joẹl ḅe koro ịkịan mị na gbolomaye-ẹ:
17‘Mịn mị, anị kuluma enema ḅie à mịẹḅịaye-ẹ, Tamụnọ Ḅe nwọ ḅẹmẹ:
Àrị ị̀ Tẹmẹ sara pakụma tomoni mamgba ọgọnọ gbanaḅịa.
Ọ́mịna owuapụ awọma na ọ́mịna eremeni awọma na ịkịankoroḅịa;
ọ́mịna asẹmẹnị awọma ịkịan ọrịḅịa,
pịkị ọ́mịna olomu apụma ḍawọ kọnḅịa.
18Iin, ị̀ya fịrịnwẹngịapụma sọnị, owuapụ na eremeni na,
àrị ị̀ Tẹmẹ nwọ seni inia ọgọnọ saraḅịa àrị enema ḅie
ini pịkị ịkịankoroḅịa.
19À ḅụgbiripuma aye mịẹḅịa so mị ḅie ọgọnọju
pịkị tomonikiri mị chukuḅie na à mayema mịẹḅịa.
Pulo na, fịnị na, pịkị kanakana kposa onwoin na simeḅịa;
20ịrụa mị kanakanaḅịa,
akalụ mị ḍinma pulo-pulo-pulo tọrụ chụaḅịa,
anịsịkị re boma nyana Nyanaḅọ Ḅe Ene mị ḅo laḅịa.
21Anịsịkị mị ḅụ, Nyanaḅọ Ḅe ẹrẹ mị chịnḅọ goyegoye ḍụaḅọrọma nyanaḅịa.’
22“Ọ́ ma ọkwẹịn ma nwọ poki, Izrẹlapụ! Jizọs Nazarẹtḅọ Ḅe ori anị Tamụnọ Ḅe se ọ́ sẹịnmaḅọ ḅe-ẹ, se oria ḅụgbiripuma ayema na, ḅụbuama ayema na, elekima ma ḅụ na, Tamụnọ Ḅe ọ̀ ḅụ ḅọrọ se mịẹaye ma ḅụ ḅọrọ ḅelema anị se ó ḍiesam. Ómine ma sọnị mịn mị ó nemimẹ, anịatịḅị mịnyọ ọ́mịna ogboku anị mịẹmẹ. 23Tamụnọ Ḅe, ò ḅereni ọkị ḅara na, oria nemi ḅụ na tọn pẹlẹsam na ini Jizọs Ḅe nwọ ḅọrọma ọ́ pịrị se ómine ọ̀ ḅaamẹ, ḅereni siapụma pịrị se ini ò seni mgbẹsẹchịn ọgọnọ ḅakụḅaamẹ. 24Ọkụma Tamụnọ Ḅe fịḅụ ọ̀ sịsẹmamẹ, fị mị ḅe ḅụọyị ḅụ ò sin pakụmaḅomẹ, anịatịḅị anị mị ineda mịẹ ẹkaye-ẹ, na fị mị ò seni ikoliḅọ nwọ mịẹḅịa. 25Devid ḅe ò gbolomaye ḅụ nwọ ḅẹmẹ,
‘À sịkịmamgba Nyanaḅọ Ḅe nwọ ọrịmẹ ị̀ tọrọkọ;
ori ị̀ya amaḅara anga ḅụ omi-ẹ, mịẹse ye ị̀ ḅụfụkama ẹka ḅara.
26Mịn mị gose ị̀ kuḅiemgbọlụ ḅieḅẹlẹ nyanamẹ,
ị̀ya ọkwẹịn ma pịkị ḅieḅẹlẹ na ḅeinmẹ.
Se ị̀rị̀, fịḅịa tomoniḅọ-ẹ nwọ ḅẹ sọnị,
tọrụseḍikiḅịaye à nwọ nyana kụrọmamẹ,
27anịatịḅị ị́ ị̀ tẹmẹ wẹrịso ẹkẹ ḍụẹịn ama mị ḅie;
ị́ ḅereni ẹkẹ kuḅie se ḅụgbana na iḅi fịrịnwẹngịḅọ ḅe ḅụrụ iḍupu mị ḅie.
28Ḅọrọ mun ḍumo ḅie sọḅịa ẹmbẹ ma ị́ nwọse ị̀ ḍiesam,
ị́rị́ ḅe sime mị anị ḅieḅẹlẹ se ị̀ pịrịḅịa.’
29“Ị̀ya mịnapụ, à gaịnma mịna ẹrẹpaka opu ḍaḅọ, Devid ḅe gbolomaye nwọ ḍuko ọ́ pịrịḅịa. Ọ̀ fị se ini pịkị ò ḍipimẹ, se oria iḍupu mị mine na omi-ẹ, ọkịḅo mịmgba ene mị sọ lamẹ. 30Ori ịkịankoroḅọ-ẹ, ọ̀ pịkị Tamụnọ Ḅe ḅereni ọ̀ pịrịye nemimẹ: Tamụnọ Ḅe ye ḅereni ọ̀ pịrịmẹ, na ori ò furo ḅie pakaḅo ḅọ nwọ seni amanyanaḅọ mịẹḅịa, ò Devid ḅe se mịẹ ḅara mị. 31Devid ḅe Tamụnọ Ḅe mịẹḅịaye mị nwọ ọrịmẹ, anị gose ọ̀ Mẹsaya Ḅe fịḅụsịsẹ mị gboloma ḅẹrẹ nwọ ḍukomẹ, ọ̀ mịn mị nwọ ḍuko sịkị,
‘Ini ḍụẹịn ama mị ḅie, ọ̀ wẹrịso ẹkẹ;
oria ojumịnị ḅụrụkẹ iḍupu mị ḅie.’
32Tamụnọ Ḅe fị ḅụ Ḅe gbọrị Jizọs Ḅe nwọ sịsẹmasam, wa onyechịẹapụ sọ mị kọkọma mịẹye mị nwọ pịrịmẹ. 33Ini ọ̀ sịsẹma Tamụnọ Ḅe amaḅara anga ḅụ koroma waraḅẹ, wa pịkị ọ̀ ḅara Fịafịa Tẹmẹ Ḅe nwọ ọkịsam, Ḍawu Ḅe ḅereni ḅara mị. Ọ́ mịọkụ ọrị, pịkị naaye mị anị oria ḍiepịrịye-ẹ ò seni mịna ọgọnọ sara sa ye mị. 34Anịatịḅị Devid ḅe na mịnaḅụ na ori iwo soḅie munkẹ; anịnakaraka ọ̀ nwọ ḅẹmẹ,
‘Nyanaḅọ Ḅe nwọse ị̀ Nyanaḅọ Ḅe ḅẹmẹ:
Mịnyọ ị̀ya amaḅara anga kpọnjị sime
35ọkịmun àrị ị́rị́ na tarakapụma se ḅụọgbanaye mịẹ ị́ pịrịḅịa sịkị la.’
36“Anịọkụma ye Izrẹlapụ mamgba nemi na ḅe Jizọs Ḅe ó seni mgbẹsẹchịn mị ọgọnọ ḅakụḅaaḅọ Ḅe, ori mị Tamụnọ Ḅe seni Nyanaḅọ na Mẹsaya na nwọ mịẹsaye-ẹ!”
37Tomonima mịn mị nwọ naa sịkị, anị gbunma ḅụfụka se ini pịrịmẹ, se nwọse Pita ḅe na ísí okunwẹngịapụ ma na ḅẹmẹ, “Mịnapụ, cheye wa nwọ mịẹ ḅe?”
38Pita ḅe nwọse ini ḅẹmẹ, “Ómine ọ́mịna sima ḅụ vinpịkị, simeḅọ simeḅọ, se ini mengi se Jizọs Kraịst Ḅe ẹrẹ ḅụ ọ́ sara, mịẹse ini ọ́mịna sima ḅụ ḅarasin ọ́ pịrị, se ọ́ Tamụnọ ḍiepịrịye mị nwọ nyanaḅịa ḅara anị Fịafịa Tẹmẹ Ḅe. 39Anịatịḅị Tamụnọ Ḅe ḅereniye mị, anị sime ómine na ọ́mịna awọma na nwọ pịrịmẹ, pịkị sime sasaju ḅụ simearịapụ mamgba na pịrịmẹ anị Nyanaḅọ, mịna Tamụnọ Ḅe chịn ọ̀ ḅụ pịrị apụ mamgba na.”
40Pita ḅe iḅiọkụma ọkwẹịn kọn ini pịrịmẹ, se tọn-a ḅọkọ ḅụ inia ḅeri jinemẹ mịẹse ọkwẹịn ma inia ḅụokoromẹ, nwọse ini ḅẹaḅẹ, “Ómine ọ́mịna ḅụ ma ḍụa mị si ḅụọ mị damaḅo àrị ḅụfụka ma ḅie!” 41Inia ḅie tọn-a apụ oria oku mị ḅereni se mengi saramẹ, kịnị-a sọnọma ẹndẹ oyiasi fịnjị pembe ye ogbo mị ḅie sọ ḅomẹ anị ene mị ḅie. 42Ini inia sịkị fama okunwẹngịapụ ma ḅara yeḍawọmẹ, ḅarachụa mịẹgbolomaye mị ḅụ fịrịnwẹngịmẹ, inia ḅụ sọ fịye fị se pịkị tẹkẹmẹ.
Ḅereniapụ Ma Inia Ogboku Ḍumo kọn Ọkụ Mị
43Okunwẹngịapụ ma tọn-a ḅụbuamaye na ḅụgbiripumaye na nwọ mịẹmẹ, mịn mị mịẹse ḅalafa ḅẹḅọ ḅẹḅọ ḅie sọ ḅeinmẹ. 44Ḅereniapụ mamgba inia ḅụ ma se gbọrị mịẹmịẹye ḅụ wẹrịmẹ se ini nyanaye ma se jịnḅọ jịnḅọ na ḍiamẹ. 45Ini ḅerenimẹ ini nyananye na sime ini pịrịaye na nwọ dẹrị, se anịḅe igbiki ḍia nweni mgba pịrị, ḅọḅọ ḅụpalịmaye laḅara ḅụ. 46Eneḅeneḅene ini kunokẹ ḅo gboloma mị ḅụ, gbọrị ogbo apụ ḅara ḅụ Oputẹkẹwarị mị ḅie, ini pịkị inia warịma ḅie fịye fị gbolomamẹ ḅieḅẹlẹ na ḅụiderima kuḅiemgbọlụ ḅụ na, 47Tamụnọ Ḅe tokoniaḅẹ, pịkị tomonima inia ḅụ nyana iḅi kuḅie mị ḅụ inia ḅụ ma nwọ timaḅẹ. Se eneḅeneḅene Tamụnọ Ḅe ḍụaḅọrọma nyanaḅịa apụ nwọse inia ogbo kịẹn ḅịpị mị ḅụ chụamẹ.
Currently Selected:
Okunwẹngịapụ 2: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
