Okunwẹngịapụ 4
4
Pita Ḅe Na Jọn Ḅe Na Ini Nwọ Kun Mẹ
1Pita ḅe na Jọn ḅe na pa ọkwẹịn tomonima pịrịarịogbo, anị agbamịẹapụma na, Oputẹkẹwarị mị koruarị tịḅịda fịrịnwẹngịapụma na Sadusiapụ ma na ini damaḅoye-ẹ. 2Anị inia ḅụosọmẹ, anịatịḅị mama okunwẹngịapụ ma ye se tomonima ḍieaḅẹ na Jizọs Ḅe ọ̀ fịḅụsịsẹsam, anị ḍiepakụmamẹ na fịapụ fịḅụsịsẹ ḍumoḅịa. 3Anị ini ini kun se ikoli warị ḅie chu koromaye-ẹ ọkịmun anị ḅe eneḅa nwọ lamẹ, anịatịḅị saso ḅiri-ẹ gose. 4Ọkụma oku mị naasa tọn apụ ḅerenimẹ se tomonima ḅe kịẹnḅịpị pa mun kịnị oyimẹndẹ fịnjị na kịnị oyiasi pembe ye nwọ lamẹ.
5Anịḅe eneḅa Juapụma ḅe tịḅịnịma na ama sẹnịapụma na, Oloko ḍieapụma na Jerusalẹm mị ḅie koḅirimamẹ. 6Ini Gele Agbamịẹḅọ, Anas ḅe na Kayafas ḅe na ịrịamẹ, pịkị Jọn ḅe na Alẹkzanda ḅe na, pịkị ísíapụma na Gele Agbamịẹḅọ ḅe furo apụma na. 7Ini okunwẹngịapụ ma ọkịḅo inia tọrọkọ chịẹma se ini gbelamẹ, “Nde ọ́ mịn mị nwọ mịẹ ọkụ? Che kụrọ ọ́ nwọ nyana anịkanịka tụḅọ ẹrẹ ọ́ nwọse anị mịẹ?”
8Pita ḅe, Fịafịa Tẹmẹ Ḅe na ḅein ḅụ, ini pẹkẹrẹmẹ, “Ómine tomonima ḅe tịḅịnị na sẹnịapụ na: 9ó nemika se ḅe ikeliḅọ ḅe ḅụ mịmgba nwẹngị iḅi fịrị mị ḅe ḅẹrẹ nwọse wa gbelaḅẹ ḅẹḅẹ, pịkị mịẹse ọ̀ ḅụ wẹrị iḅi ḅara mị-ẹ ḅẹḅẹ, 10anị ómine mgba nemi gbẹịnmẹ, pịkị Izrẹl ḅie sime apụ mamgba nemi gbẹịnmẹ, na ḅe ḅọ ḅe anị ọ́mịna tọrọkọ gwọsa ḅara ḅụ chịẹ sime ḅọ ḅe Jizọs Kraịst Nazarẹtḅọ ḅe ẹrẹ ḅụ ọ̀ ḅọrọ gwọmẹ—ọ́ ḅakụḅaa, se Tamụnọ Ḅe fịḅụsịsẹma ḅọ ḅe. 11Jizọs Ḅe ori mị fịafịa ḍiri mị ḅẹrẹ ḍukoḅọ ḅe-ẹ,
‘Ómine warị nama apụma ḍikisima ḍụparị mị
vinpịkịḅo yelatẹịn ḍụparị sọsam!’
12Ọ̀ ḅụ kẹngẹ mị wa ḍụaḅọrọma ḍọkịḅoḅịaye-ẹ, tomonikiri mị ḅie mgba jịnḅọ ḅarị ofori-ẹ, Tamụnọ Ḅe iniḅọ ẹrẹ seni tomoni pịrị, wa iniḅọ ḅụ ḅọrọ ḍụaḅọrọma nyana nwọ ḅẹḅọ.”
13Ḅẹrẹchiri mị ḅe apụma anị ijira se inia ḅụ saramẹ Pita ḅe na Jọn ḅe na wẹrị kụrọ nyana ọkwẹịn kọn ḅara mị, ini ḍiri nemika papa apụ-ẹ nwọ ḅẹye ini nwọ na sịkị. Anị inia ḅụ okoromẹ na ini anị Jizọs Ḅe na nwẹngị gboloma apụ-ẹ. 14Ọkụma ini ineda ḍukoḅịaye ofori-ẹ, anịatịḅị ini gwọsa ḅọ ḅe ọrịsam Pita ḅe na Jọn ḅe na ḅụ sọ se chịẹsime waraḅẹ. 15Anị ini nwọse ini ḅẹye-ẹ na ini Ḅẹrẹchiri mị ḅie paka so, se sakị inia ogboku anịḅe ọkwẹịn nwọ kọn simemẹ. 16“Nde wa mịna tomonima na mịẹḅịa ọkụ?” Ini nwọ gbelamẹ, “Jerusalẹm ḅie simeḅọ goyegoye nemimẹ na ini anị mị ḅụgbiripumaye mị mịẹye-ẹ, wa pịkị ineda anị pịkị ẹkẹ. 17Ọkụma mịẹse mị ḅẹrẹ mị ḅarị wasama mun ẹka ḅara tomonima ogboku ḅụ, ye wa inia ḅeri ma jine na ini ḅarị Jizọs Ḅe ẹrẹ mị nwọse ọkwẹịn gbọrịḅọ sọnị pịrị ma.”
18Ini ini chịn warị ḅie chu se ḍuko ini pịrị mẹ, na anị simeọkụ simeọkụ sọnị ini ḅarị Jizọs Ḅe ẹrẹ mị se ọkwẹịn kọn anịkanịka yeḍie ma. 19Ọkụma Pita ḅe na Jọn ḅe na ini pẹkẹrẹmẹ, “Ómine na ọ́mịna ḅụ na ḅẹrẹkọn, nde ye Tamụnọ Ḅe tọrọkọ karakaraye sọtẹịn ḅe—ọ́ ḅịpị poki mị na Tamụnọ Ḅe ḅịpị poki mị na. 20Anịatịḅị wa ineda ḅarasin ẹkẹ wa ḅara na ọrịye na pịkị naaye na nwọ ḍuko ḅụ.” 21Ḅẹrẹchiri mị kụrọma inia ḅeri jine tẹịnmẹ, se inia ḅụ ḅarasinmẹ. Ini gose ḅụfụka se ini pịrịḅịa ḅẹrẹtịḅị ini nwọ ọrịkẹ, anịatịḅị tomonima Tamụnọ Ḅe nwọ tokoni simemẹ pakaye mị gose. 22Ini ḅụ gwọ ḅụgbiripuma fịrịnwẹngịḅọ ḅe kụra mesi nẹngịye ọ̀ nwọ lasam.
Ḅereniapụ Ma Kụrọ Nyana Gose Tẹkẹmẹ
23Ini inia ḅụḅarasin kirikiri Pita ḅe na Jọn ḅe na vinpịkị inia ogboapụ ma damamun se agbamịẹ tịḅịnịma na sẹnịapụma na kọn ọkwẹịn mị ḍuko ini pịrịmẹ. 24Ḅereniapụ ma mịn mị naa sịkị, inimgba gboloma Tamụnọ Ḅe tẹkẹmẹ: “Nyanaḅọ pịkị so na, tomonikiri na, tọrụ na, pịkị arịa ḅie simeaye mamgba Tẹmẹḅọ! 25Fịafịa Tẹmẹ Ḅe ḅụ ị́ ḅọrọ ọkwẹịn mịna ḅieju-ḍaḅọ ḅe pịrịmẹ, Devid, ị́ya fịrịnwẹngịḅọ ḅe, ọ̀ mị ḅara mị nwọ ḅẹmẹ na,
‘Nde Jịnsẹapụma gose ịganị na ḅein ye;
nde tomonima gose papa ḅẹrẹḅiarịye?
26Tomonikiri mị ḅe amanyanapụma inia ḅụ ma karakaramamẹ,
ḅẹrẹtọn apụma pịkị koḅirimamẹ
Nyanaḅọ Ḅe na, oria Mẹsaya Ḅe na tụḅụrụḅịaye gose.’
27Anịatịḅị Hẹrọd ḅe na Pọntịọs Paịlet ḅe na ịrịa gbolomamẹ mị opu ama mị ḅie Jịnsẹapụma na ini na pịkị Izrẹlapụma na Jizọs Ḅe na tụḅụrụḅịa ẹrẹchị, ị́ya fịafịa Fịrịnwẹngịḅọ ḅe, ị́ seni Mẹsaya mịẹḅọ ḅe. 28Ini koḅirimamẹ anị ị́rị́ ị́ya kụrọ ḅụ tọn pịkị ḅereni na mịẹḅịa nwọ ḅẹ ayema mịẹḅịa ẹrẹchị. 29Se mịọkụ Nyanaḅọ, ini ẹrẹmarịaye ma ḅụ elekima chụa, se ḅereni mine Ị́ya fịrịnwẹngịapụma pịrị, wa kụrọ kuḅie nyana se ị́ya oku mị nwọ ḍukopakụma. 30Ị́ ḅara ịsụn pakụma obi gwọ, pịkị ḅereni ḅụbuamaye na ḅụgbiripumaye na mịẹ ị́ya fịafịa Fịrịnwẹngịḅọ Jizọs Ḅe ẹrẹ ḅụ.”
31Ini tẹkẹ so sịkị, ini sime nyọ jikemẹ, inimgba Fịafịa Tẹmẹ Ḅe na ḅeinmẹ, seni sakị kụrọ kuḅie nwọse Tamụnọ oku mị nwọ ḍukopakụmamẹ.
Ḅereniapụ Ma Ini Nyanaye Mamgba Nwọ Ḍia Gbolomamẹ
32Ḅereniapụ ma ogbo mị gbọrịye nwọ mịẹmẹ koroma ḅụ na kuḅiemgbọlụ ḅụ na. Gbọrịḅọ sọnị ḅẹkẹ na iniḅọ nyanaye ma iniḅọ-aye-ẹ, ọkụma inimgba ini nyana yegoyegoye nwọse jịnḅọ jịnḅọ na ḍiamẹ. 33Opu kụrọ, okunwẹngịapụ ma nwọse onyechịẹ Nyanaḅọ Jizọs Ḅe oria fịḅụsịsẹ mị pịrịmẹ, Tamụnọ Ḅe pịkị yela ḅẹlẹma nwọse inimgba ọgọnọ saramẹ. 34Ogbo mị ḅie sime se ye ḅụpalịma gbọrịḅọ sọ ofori-ẹ. Inia ḅie ozu nyana anịkanịka warị nyana apụma ini àrị dẹrịmẹ, se ini dẹrịḅo igbiki mị ọkị ḅomẹ, 35ḅọrọma okunwẹngịapụ ma pịrị se ini ḍie ḅọḅọ pịrịmẹ, iniḅọ ḅụpalịmaye laḅara ḅụ.
36Se mị ḅara ḅụ, Josẹf, Livaị furo ḅọ ḅe ini Saịprọs ama ḅie yi ḅọ ḅe, okunwẹngịapụ ma, Banabas nwọse chịnḅọ ḅe (anị mị fiearịye “Kuḅie Kụrọmaḅọ”), 37ọ̀ nyana gbọrị ozu nwọ dẹrịmẹ, igbiki mị ọkịḅo se anị saḅama okunwẹngịapụ ma pịrịmẹ.
Currently Selected:
Okunwẹngịapụ 4: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
