Luk 10
10
Jizọs Ḅe Kịnị-a Tesioyifịnjị Na Mama Apụ Ma Fịrịma Pakụmamẹ
1Mịn mị ḅọrọ sịkị Nyanaḅọ Ḅe jịn owuapụ-a tesioyifịnjị na mamapụ na nwọ sẹlẹ ọkị se ini fịrịma pakụmamẹ, mamapụ mamapụ ḅụ tatarị tọrọkọ Ò munḅịa amama na nyọma na nwọ munḅịa ẹrẹchị. 2Ọ̀ nwọse ini ḅẹmẹ, “Sokuḅịa aye ḅakamẹ, ọkụma boka fịrịnwẹngịapụ mị àrị koḅirimarịye-ẹ. Ó soku ayema nyanaḅọ ḅe tẹkẹ mịẹse ọ̀ fịrịnwẹngịapụ seni fịrịma oria soku ayema nwọ koḅirima warị ḅie chuḅịa ḅara. 3Ó mun! Anana awọ se piri obirima ogboku sẹịn ọkụ à nwọse ó se sẹịn aḅẹ. 4Ómine igbiki chụa akpa ọkịma, anịkanịka yeọmgbọ akpa, anịkanịka akpaka, ọ́ pịkị ateliogbo dachịẹ gbọrịḅọ sọnị kerenima. 5Ọ́ sọmun warị layelaye ọ́ tatarị ḅẹ, ‘Deinma mị warị mị na sime.’ 6Deinma ḅẹlẹmaḅọ anịnyọ angamẹ ḅẹḅẹ, ye ọ́mịna deinma kereniḅịpị mị ori na sime, anịkẹ ḅẹḅẹ, ọ́mịna deinma kereniḅịpị mị ọ́ pịkị nwọ chịn ọkị. 7Anị gbọrị warị mị ḅie ó sime, ini se ọ́ pịrịye pịrịye ọ́ fị, pịkị ḅu, anịatịḅị fịrịnwẹngịḅọ ḅe ọ̀ gbẹịnye nyana na iḅimẹ, ọ́ nwẹngị warị warị sọma ḅọrọma. 8Ọ́ gbọrị ama ḅie sọ se ini iḅiọkụ ómine ọkịmẹ ḅẹḅẹ, ini se ọ́mịna tọrọkọ koromaḅịa fịye mị ọ́ nwọ fị, 9ómine obiapụ gwọ anị ama mị ḅie, se nwọse anịnyọ sime apụma ḅẹ, ‘Tamụnọ Amanyanakiri mị anị ḅo ómine na kpekisam.’ 10Ọkụma ó mun sọ ama layelaye, se ini anịnyọ iḅiọkụ se ómine ọkịkẹ ḅẹḅẹ, ọ́ paka amaogbo opu atelima ḅie mun, se nwọ ḅẹ, 11‘Ọ́mịna ama ḅie mịna ḅụọ oḅolo fọnma sọnị wa àrị gugu sara ọ́ pịrịsam. Ọkụma ó se ḅiekoroma na Tamụnọ Amanyanakiri mị anị ḅo ómine na kpekisam!’ 12À ḍuko ọ́ pịrịaḅẹ na Ḅẹrẹkọn Ene mị ḅụ Tamụnọ Ḅe Sọdọm mị ḍikitịḅịfointẹịn anị ama mị nẹngịḅịa!”
Ḅereni Ḍụkụka Ama Ma
(Mat 11.20-24)
13“Anị ḅalafamaye sọ ị́ pịrịḅịa ọkụ ḍiki, Korazin. Anị pịkị ḅalafamaye sọ ị́rị́ sọnị pịrịḅịa ọkụ ḍiki, Bẹtsaịda! Ọ́mịna ḅie mịẹ ḅụgbiripuma ayema ini nwọse Taya na Saịdọn na ḅie mịẹmẹ nwọḅẹ ọkụma, mgbọkụ arịa ḅie sime apụma ḅọlọsịkị ngịsị ini kpọnjị sime, ọna chụa, fọn se inia ḅụ sara se ḍiepakụmaḅịa, na ini inia sima ḅụ vinpịkịsam! 14Tamụnọ Ḅe Taya na Saịdọn na nwọ ḍikitịḅịfointẹịn ọ́ nẹngịḅịa Ḅẹrẹkọn Ene mị ḅụ. 15Ị́rị́ ọkụma, Kapanịọm! Ị́ ḅụ dekichịẹma mun so la ḅi? Ini ị́ suma gbin mun kọrị fịnị mị ḅie chuḅịa!”
16Jizọs Ḅe nwọse Oria ọḅụḍukoapụma ḅẹmẹ, “Ómine pokiḅọ goyegoye, ị̀ pokimẹ, ọ́ sịkịḅọ goyegoye, ị̀ sịkịmẹ, se ị̀ sịkịḅọ goyegoye ị̀ se fịrịmaḅọ ḅe sịkịmẹ.”
Kịnị-a Tesioyifịnjị Na Mama Apụ Ma Na Ḅe Vinpịkịḅo Mị
17Kịnị-a tesioyifịnjị na mama apụma na opu ḅieḅẹlẹ nwọse vinpịkịḅomẹ. Ini nwọ ḅẹmẹ, “Nyanaḅọ, si-a-tẹmẹma sọnị wa ị́ya ẹrẹ ḅụ tọnye nwọ mịẹmẹ!”
18Jizọs Ḅe ini pẹkẹrẹmẹ, “Àrị oru ḅe ọrịmẹ so wakam ḅara nwọse soḅie ḅịkị koroḅoarị sịkị. 19Ó poki! À kụrọ seni ọ́ pịrịsam, ómine ineda oruwuma na pirikambuloma na ọgọnọ nwẹngịḅịa ḅara, pịkị Tarakaḅọ ḅe kụrọ mamgba ọgọnọ ḅụ na, se gbọrịye sọnị ye se ọ́ lama-ẹkẹ. 20Ọkụma ó ḅieḅẹlẹma na si-a-tẹmẹ ma ó ḍukoye nwọ mịẹmẹ; anịnakaraka ó ḅieḅẹlẹ anịatịḅị ọ́mịna ẹrẹma soḅie ini gịẹịnsam.”
Jizọs Ḅe Ḅieḅẹlẹmẹ
(Mat 11.25-27; 13.16-17)
21Anịsịkị mị ḅụ Jizọs Ḅe Fịafịa Tẹmẹ Ḅe ḅụ wẹrị ḅieḅẹlẹ na ḅein se nwọ ḅẹmẹ, “Ḍaḅọ, so na kiri na Nyanaḅọ! À mịẹḅaka se ị́ ḅẹmẹ, anịatịḅị ị́ seni yeḍawọkapụma ḍiesam, ị́ seni yenemi pịkị yeḍawọsapụma ḅọịmaye mị. Iin, Ḍaḅọ, anịatịḅị mị anị ị́ ḅụḅẹlẹ ọkụ mị-ẹ.
22“Ị̀ Ḍaḅe ye mamgba nwọse ị̀ pịrịsam. Tọkụ Ḅe nemi gbọrịḅọ sọnị ofori-ẹ Ḍaḅọ Ḅe sikima ọkụma, pịkị Ḍaḅọ Ḅe simeọkụ nemiḅọ sọnị ofori-ẹ Tọkụ Ḅe sikima ọkụma, pịkị Tọkụ Ḅe sẹlẹọkị se Ò se ḍieḅịa apụma na.”
23Anịsịkị Jizọs Ḅe vinpịkị ọḅụḍukoapụma da se nwọse ini ḅẹmẹ, ḅọịma ḅụ, “Ómine iḅifụḅara nyana ọkụ ḍiki, ómine ọrịayema nwọ ọrị ḅụ! 24Tọn-a ịkịankoroapụ na amanyanapụ na, à ḍuko ọ́ pịrịaḅẹ, ómine ọrịayema nwọ ọrị ḅimẹ, ọkụma ini inedakẹ, pịkị ọ́ naayema nwọ naa ḅimẹ, ọkụma ini àrị naakẹ.”
Iḅi Sameria Ḅọ Ḅe Kaḅo Mị
25Gbọrị Oloko yeḍieḅọ ḅo ḍẹịntu Jizọs Ḅe pịrị-ẹḅomẹ, se nwọ gbelamẹ. “Yeḍieḅọ, à chemịẹ seni sime gbaso ḍumo nyana ḅe?”
26Jizọs Ḅe ọ̀ pẹkẹrẹmẹ, “Cheye Fịafịa Ḍiri mị nwọ ḍuko? Ị́ koroma ḅara anị che fie-ao?”
27Tomoniḅọ ḅe pẹkẹrẹmẹ, “‘Ị́ kuḅiemgbọlụ mgba ị́ nwọ seni ị́ Nyana Tamụnọ Ḅe ḅẹlẹmaḅịa, ị́ tẹmẹ mgba na, ị́ya ịnyọ mgba na, pịkị ị́ya koroma mgba na,’ pịkị ‘Ị́ ḅụ ḅẹlẹma ḅara nwọse ị́ juo tomoniḅọ ḅẹlẹma.’”
28“Ị́ pẹkẹrẹ ḅara mị karakaramẹ,” Jizọs Ḅe nwọse ọ̀ ḅẹmẹ, “mịn mị mịẹ anịsịkị ị́ ḍumoḅịa.”
29Ọkụma Oloko ḍieḅọ ḅe ḅimẹ ori ọ̀ ḅụ se karakaraḅọ kiri ḅụ koroma, anị ò Jizọs Ḅe gbelaye-ẹ, “Ị̀ juo tomoniḅọ anị tụḅọ?”
30Jizọs Ḅe pẹkẹrẹmẹ, “Gbọrị owuḅọ omi-ẹ Jerusalẹm ḅie ḅụ wẹrị Jẹriko mun-arị ḅọ se ò mun angaranị ogboku koromẹ, ini ò se papaḅụsin, pịkị ò fomu lamamẹ, se fịfị ḅara ḅụ ò koroma somẹ. 31Anịḅo pakamẹ na gbọrị agbamịẹḅọ anị ateli ḅụ ḅọrọaḅẹ ọkụma ò ḅe ḅọ ḅe ọrị sịkị, ọ̀ ḅụ kwa se ísí pẹkẹrẹ ḅọrọ somẹ. 32Anị gbọrị ḅara mị ḅụ, gbọrị Livaị ḅọ pịkị anị ateli ḅọrọ mun nweniḅọ ḅe ḍiki, se pịkị ísí pẹkẹrẹ ḅọrọ se nwẹngị somẹ. 33Ọkụma Sameria gbọrị owuḅọ ori sọnị anị ateli mị ḅie nwẹngị ma ḅomẹ. Ò ḅo la se tomoniḅọ ḅe ọrị sịkị, ori opuma ò ḍikitịḅịfoinmẹ. 34Ọ̀ saḅa ọ̀ damamunmẹ, pulo na iru na se ye ọ̀ la nyọma ḅụ sara se àrị fịnamẹ se tomoniḅọ ḅe seni oria nama ḅe ọgọnọ gbana se ori ọkị gbọrị igoniḅobịan warị ḅie mun mẹ, se anịnyọ iḅiọkụ se ò ḍikiḍikimẹ. 35Anị ḍukoma ene mị ḅụ ori mama seleḅa igbiki nwọ ọkị se igoniḅobịan warị koruḅọ ḅe pịrịmẹ, se nwọse igoniḅobịan warị koruḅọ ḅe ḅẹmẹ, ‘Iḅiọkụ ò ḍikiḍiki, se à vinpịkị mị ateli ḅoḅịa sịkị, ị́ fama mị nẹngịye sime sime àrị anị se ị́ gbẹịnḅịa.’”
36Se anịa kuluma Jizọs Ḅe nwọ ḅẹmẹ, “Ị́ kuḅie nde mịna tẹrẹ apụma ḅụ, angaranịma ye se lamaḅọ ḅe ò juo tomoniḅọ ḅara se ye mịẹḅọ?”
37Oloko ḍieḅọ ḅe pẹkẹrẹmẹ, “Iḅi se ọ̀ mịẹḅọ ḅe-ẹ.”
Jizọs Ḅe pẹkẹrẹmẹ, “So, ị́rị́ sọnị mun ọkọ mịẹ.”
Jizọs Ḅe Mun Mata Ma Na Meri Ma Na Lamẹ
38Jizọs Ḅe na Oria ọḅụḍukoapụma na ini mun-arị anga nwọ mun-arị sịkị, Ò ḅo gbọrị ịwọama nwọ lamẹ, Mata nwọ chịn eremeniḅọ Ori ọkị se árịa warị ḅie chumẹ. 39Meri nwọse chịn eremeniḅọ árị na mịnamẹ, anị Nyanaḅọ Ḅe ḅụọ chuku kpọnjị sime se Ò ḍiearịye mị nwọ poki ḅọ ma-ẹ. 40Mata ma á nwẹngịḅịa fịrịma á ḅụḅalaḅalama so ọkụma, anị á ḅo nwọ ḅẹye-ẹ, “Nyanaḅọ, ị́ ḅụḅẹlẹ, na ị̀ mbụrama fịrị mamgba ḅụḅarasin ị̀rị̀ ngẹrị nwọ pịrị ọkụ mị? Ḍuko á pịrị se á ḅo ḅarachụa ị̀ pịrị!”
41Nyanaḅọ Ḅe á pẹkẹrẹmẹ, “Mata, Mata! Ị́ tọn-a aye gose ḅụḅalaḅala na ḅụfụka na se ị́ ḅụ pịrịsam, 42ọkụma gbọrịye kẹngẹ mị ḅụpalịma waraye-ẹ. Meri ma á karakaraye mị nwọ sẹlẹ ọkịsam, ini á ḅara ineda anị pọkọ ọkị-ẹkẹ.”
Currently Selected:
Luk 10: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
