Luk 9
9
Jizọs Ḅe Oyimaịn Ọḅụḍukoapụ Fịnjị Ma Fịrịma Pakụmamẹ
(Mat 10.5-15; Mak 6.7-13)
1Jizọs Ḅe oyimaịn ọḅụḍukoapụ fịnjịma chịn gboloma se kụrọ na ḅẹrẹtọn na se ini pịrịmẹ se si-a-tẹmẹ mamgba desin, pịkị obima gwọḅịa ẹrẹchị. 2Ori anịsịkị ini fịrịma pakụmamẹ na ini mun Tamụnọ Amanyanakiri ḅẹrẹ mị ḍuko se pịkị obiapụma gwọ, 3Ọ̀ nwọse ini ḅẹmẹ, “Ó mun-arịye mị ọ́ gbọrịye sọnị ọlọ se chụa munma: amgbara sọnị, ye ọmgbọ akpa sọnị, fịye sọnị, igbiki sọnị, ọ́ pịkị ḅụchụaye sọnị gbanama munma. 4Ini iḅiọkụma ómine ọkị nyọ goyegoye, ómine anị gbọrị warị mị ḅie sime, ọkịmun ómine anị ama mị koroma so sịkị la 5tomoni iḅiọkụma ómine ọkịka nyọ layelaye, ómine anị ama mị nwọ koromaso se ọ́mịna ḅụọ onwun ma nwọ gugu sara se anị ḅeri jineye nwọsọ ini pịrị.”
6Ọḅụḍukoapụma pakaso nwẹngị ịwọama mamgba mun mẹ, Iḅi Ḅẹrẹ mị nwọ ḍuko pịkị nyọ layelaye ḅụ tomoni gwọma ḅọrọmẹ.
Hẹrọd Ḅe Ḅụḅalaḅalama Ye Mị
(Mat 14.1-12; Mak 6.14-29)
7Hẹrọd, Galili mị ḅie ḅẹrẹtọn ḅọ ḅe, pakarị aye mamgba nwọ naa sịkị, ọ̀ ḅụ opuma ḅalaḅalamẹ, anịatịḅị dapụ nwọ ḍukoaḅẹ, “Jọn Mengisaraḅọ ḅe ọ̀ pịkị ḍumosam!” 8Ísíapụma nwọ ḅẹmẹ, Ịlaịja ḅe ò tolupakasam, jịn apụ pa pịkị nwọ ḅẹaḅẹ na olomu sịkị ḅe ịkịankoroapụma ḅụ ḅe gbọrịḅọ sịsẹ pakaḅosam. 9Hẹrọd ḅe nwọ ḅẹmẹ, “À Jọn ḅe tịḅị nwọ pẹlẹsinmẹ; ọkụma ḅe à ḅẹrẹ ma naarịḅọ ḅe ḅọrọ pịkị nde ḅọ?” Se ọ̀ sịkịmamgba Jizọs Ḅe ọrị ḍọkịmẹ.
Jizọs Ḅe Fịye Se Kịnị Oyimẹndẹ Fịnjị Na Kịnị Oyiasi Na Pịrịmẹ
(Mat 14.13-21; Mak 6.30-44; Jọn 6.1-14)
10Okunwẹngịapụma vinpịkịḅo se ini mịẹsa yemamgba ḍuko Jizọs Ḅe pịrịmẹ. Ori ini ọkị Ọ̀ ḅụ chụa se ini sikima ngẹrị Bẹtsaịda nwọ chịn ama mun mẹ. 11Tomonikpo mị anị naa sịkị, ini Ò ḍukomẹ. Ori iḅiọkụ se ini ọkịmẹ, se Tamụnọ Amanyanakiri mị gbolomaye nwọ ḍuko ini pịrịmẹ, se pịkị gwọ ḅi apụma nwọ gwọmẹ.
12Ịrụa mị sakị tuma àrị sịkị, oyimaịn ọḅụḍukoapụ fịnjịma Ọ̀ damaḅo se nwọ ḅẹmẹ, “Tomonima fịrịma ini so, se mun ịwọamama na mịnyọ anị kelema ozuma ḅie na fịye simeḅịa nyọ na mọnọḅịa nyọ na nwọ ḍọkị, anịatịḅị mịanga mị gbọịn nyọ-ẹ.”
13Ọkụma Jizọs Ḅe nwọ seni ini ḅẹmẹ, “Ómine ḅara na ini fịḅịaye nwọse ini pịrị.”
Ini pẹkẹrẹmẹ, “Wa bebema nyanaye anị fịturu sọnọ-a okpokpo na mama inji na-ẹ. Ị́ ḅi-ao wa mun fịye fẹ mị bebe tomonikpo mị pịrị?” 14(Anịanga ḅụ owuapụ oyimẹndẹ fịnjị na oyiasi pembe ye omi-ẹ.)
Jizọs Ḅe nwọse Oria ọḅụḍukoapụma ḅẹmẹ, “Ó ye tomonima kpo kpo ḅụ kpọnjị sime, mesi oyi fịnjị gbọrị kpo gbọrị kpo ḅụ.”
15Ọḅụḍukoapụma, mịẹse inimgba kpọnjị sime sosịkị, 16Jizọs Ḅe fịturu sọnọ-a okpokpoma ọkịmẹ, mama injima na, tọrụ deki so ḍiki, àrị gose mịẹḅaka se Tamụnọ Ḅe ḅẹ, àrị pu, se àrị seni ọḅụḍukoapụma pịrị, se ini àrị ḍiama tomonima pịrịmẹ. 17Inimgba fịmẹ, se anị ini karamẹ, se ọḅụḍukoapụma ini fị konmaye ma ḅụ oyimaịn kana fịnjị nwọ tan ḅeinmamẹ.
Pita Ḅe Ḅelema Jizọs Ḅe Ḍukopakụmamẹ
(Mat 16.13-19; Mak 8.27-29)
18Gbọrị ene Jizọs Ḅe ngẹrị sime se tẹkẹarịogbo, ọḅụḍukoapụma Ọ̀ damaḅomẹ. Ori ini gbelamẹ, “Ị̀rị̀ tụḅọ-ẹ tomonikpo mị nwọ ḅẹ-ao?”
19Ini nwọ pẹkẹrẹmẹ, “Dapụ nwọ ḅẹmẹ na, ị́rị́ Jọn Mengisaraḅọ ḅe-ẹ, ísíapụma nwọ ḅẹmẹ, ị́rị́ Ịlaịja ḅe-ẹ, jịn apụ nwọ ḅẹaḅẹ na ị́rị́ olomu sịkị ḅe ịkịankoroapụma ḅie gbọrịḅọ-ẹ, pịkịmaḅo ḍumo sa ḅọ-ẹ.”
20Ọ̀ nwọse ini gbelamẹ, “Ómine kwanị? Ị̀rị̀ tụḅọ-ẹ ọ́ nwọ ḅẹ?” Pita ḅe pẹkẹrẹmẹ, “Ị́rị́ anị Tamụnọ Ḅe Mẹsaya Ḅe-ẹ.”
Jizọs Ḅe Oria Tọrụsiọrị Na Fị Na Ḅẹrẹ Ḍukomẹ
(Mat 16.20-28; Mak 8.30—9.1)
21Anịsịkị Jizọs Ḅe kụrọma tọn ini pịrịmẹ na mịn mị ini ḍuko gbọrịḅọ sọnị pịrịma. 22Ọ̀ pịkị nwọ ḅẹmẹ, “Tomoniḅọ Tọkụ Ḅe Ori opuma tọrụsiọrịḅịa, sẹnịapụma na, Agbamịẹ-tịḅịnịma na, pịkị Oloko ḍieapụma na Ọ̀ sịkịḅịa. Ini Ọ̀ ḅaaḅịa, Ọ̀ pịkị sịsẹ se ḍumoḅịa tẹrẹ-a ḍin karama ene ḅụ.”
23Se Ọ̀ nwọ seni inimgba ḅẹmẹ, “Ị̀ ḍuko nwẹngị ḅiḅọ omi-ẹ ḅẹḅẹ ye iniḅọ mịnaḅụ se ḅieḅarama, eneḅeneḅene iniḅọ mgbẹsẹchịn deki se ị̀ ḍuko. 24Anịatịḅị iniḅọ ḍumo fọịn àrị ḅọ omi-ẹ ḅẹḅẹ, iniḅọ anị famaḅịa, ọkụma ị̀ tịḅị gose iniḅọ ḍumo nwọ famaḅọ omi-ẹ ḅẹḅẹ, iniḅọ anị ḍụaḅọrọmaḅịa. 25Tomoniḅọ nyanaḅịa sọye omi iniḅọ nemikase bebe tomonikiri mị nwọ nyanaḅo se iniḅọ ḍumo nwọ fama anịkanịka iniḅọ faḅụsọ ọkụma? Anị ḅụokoromẹ na iniḅọ nyana sọye ofori-ẹ! 26Tomoniḅọ nemikase ị̀ gose pịkị ị̀ya ḍieyema gose ḅụgereremẹ ḅẹḅẹ, anịọkụma Tomoniḅọ Tọkụ Ḅe pịkị iniḅọ gose ḅụgerereḅịa Ori Oria boma na, Ḍaḅọ ḅe boma na pịkị fịafịa enjẹlapụma boma mị na ḅoḅịa sịkị. 27Kọkọmaye à nwọ ḍuko ọ́ pịrịaḅẹ, na mịanga sime dapụ ini fịẹkẹ, ọkịmun ini Tamụnọ Amanyanakiri mị nwọ ọrịḅịa sịkị mị la.”
Jizọs Ḅe Ḍinma Jịnḅara Sime Mị
(Mat 17.1-8; Mak 9.2-8)
28Ọ̀ mayema ḍuko se gbọrị wiki pembeye ḅọrọ sịkị, Jizọs Ḅe Pita ḅe na, Jọn ḅe na, Jems ḅe na nwọ ọkị ọ̀ ḅụ chụa, iwo gbọrị chịngị ọgọnọ mun tẹkẹ-ẹmun mẹ. 29Ọ̀ tẹkẹarịogbo Ọ̀ tọrụkuḅu ḍinmamẹ, se Oria ḅụchụaye mị wananị wananị ḅara ḅịamẹ. 30Ḅụ nemika simeogbo mama owuapụ pakaḅo Ori na ọkwẹịnmamẹ. Ini anị Moziz ḅe na Ịlaịja ḅe na-ẹ, 31soḅie boma ini na pakaḅomẹ, se Jizọs Ḅe na ọkwẹịnmamẹ ḅọlọka sịkị Ọ̀ wẹrị fị ḅụ Tamụnọ Ḅe tọnye mị nwọ mịẹ ḅeinmaḅịa ḅara; Jerusalẹm mị ḅie. 32Pita ḅe na ori na sime apụma na gbunma mọnọ simemẹ, ọkụma ini boma sịsẹ se Jizọs Ḅe boma mị na pịkị Ori na chịẹ sime mama owuapụma na nwọ ọrịmẹ. 33Ini Jizọs Ḅe koroma soarị sịkị, Pita ḅe nwọse Ọ̀ ḅẹmẹ, “Yeḍieḅọ, anị iḅimẹ na wa mịanga sime! Wa tẹrẹ-a ikowarị nwọ namaḅịa, gbọrịye sime ị́ pịrị, gbọrịye sime Moziz ḅe pịrị, gbọrịye pịkị sime Ịlaịja ḅe pịrị.” (Kọkọmaye-ẹ, ò ḍukoarịye tịḅị ò nemikẹ.)
34Ọ̀ pa ọkwẹịn àrịogbo gbọrị soḅuno pakaḅo ini gbẹịnmẹ se ọḅụḍukoapụma ḅalafamẹ soḅuno mị ini gbẹịn ḅara mị gose. 35Soḅuno mị ḅie gbọrị pụkọ nwọ ḅẹmẹ, “Ḅe ị̀ya Tọkụ Ḅe-ẹ, à sẹlẹ ọkịsa ḅọ ḅe, ómine ò poki!”
36Pụkọ mị ọkwẹịn so sịkị, Jizọs Ḅe anịnyọ ngẹrị kọnmẹ. Ọḅụḍukoapụma mayema ḅụ ini yawụma simemẹ, se ye ḍuko gbọrịḅọ sọnị pịrịkẹ, anịsịkị mị ḅụ ini ọrịye mamgba.
Jizọs Ḅe Sitẹmẹ Ḅie Sime Owuḅọ Gwọmẹ
(Mat 17.14-18; Mak 9.14-27)
37Anị ḍukoma ene mị ḅụ, ini chịngị mị ọgọnọ ideri koromẹ, se ḅaka tomonikpo Jizọs Ḅe na ịrịamẹ. 38Gbọrị owuḅọ tomonikpo mị ḅie wẹrị olokumẹ, “Yeḍieḅọ! Ị̀ya tọkụ ḅe ḍiki àrị ị́ tẹkẹmẹ, ị̀ya ngẹrị tọkụ ḅe! 39Tẹmẹ ḅụnemika ḅụ oloku pụkọ se ori ọlọ ọlọmẹ, se ò se gbin fụmụmafụmụmamẹ, se ọkọkọ ọ̀ ḅịpị pakapakamẹ, anị ye se ọ̀ lama gbasomẹ, ḅụfụkama sịkị re anị ọ̀ ḅụ ḅarasinsinmẹ! 40Àrị ị́ya ọḅụḍukoapụma tẹkẹmẹ anị depakụmaḅịa ḅara, ọkụma ini inedakẹ.”
41Jizọs Ḅe pẹkẹrẹmẹ, “Ómine tomonima ó ḅereni nyanaka se mịẹirimarị ọkụ ḍiki! Àrị ómine na sime ḅọlọma mun nde sịkị laḅe? Àrị ómine na anga mun nde ḅọlọ sịkị nwọ laḅe?” Anịsịkị Ọ̀ nwọ seni nweniḅọ ḅe ḅẹmẹ, “Ị́ya tọkụ ḅe ọkị mịanga ḅo.”
42Tọkụ ḅe ḅoarị sịkị, sitẹmẹ ḅe ò suma kiri gbin, se ọ̀ fụmụmẹ. Se Jizọs Ḅe kụrọma ọkwẹịn sitẹmẹ ḅe pịrịmẹ, Ọ̀ tọkụ ḅe gwọmẹ, se ò se pịkị ḍawu ḅe pịrịmẹ. 43Tamụnọ opu kụrọ mị ijira tomoni mamgba ḅụ ḅaamẹ.
Jizọs Ḅe Pịkị Oria Fị Na Gboloma Ḅẹrẹ Ḍukomẹ
(Mat 17.22-23; Mak 9.30-32)
Jizọs Ḅe mịẹarịye layelaye pa pịkị tomonima ḅụgbiripumaḅẹ, Ọ̀ nwọse Oria ọḅụḍukoapụma ḅẹ sịkị, 44“À ḍuko ọ́ pịrị-ẹ tọn-aye mị ó se ḅieḅaramama! Ini Tomoniḅọ Tọkụ Ḅe nwọ ḅọrọma mun tomoni-a kụrọ pịrị-ẹ mun aḅẹ.” 45Ọkụma ọḅụḍukoapụma mịn mị fiearịye ini nemikẹ. Anị ḅọị ye sọ ini pịrịmẹ, anịẹrẹchị ini anị kaịnḅokẹ, ọkụma inia ḅalafamẹ, ḅẹrẹ mị nwọse Ò gbela.
Tụḅọ Opu Sọtẹịn?
(Mat 18.1-5; Mak 9.33-37)
46Gbọrị jineaye ọḅụḍukoapụma ogboku pakamẹ, inia ḅie opu sọtẹịnḅọ gbolomaye. 47Jizọs Ḅe ini koromarịye nwọ nemimẹ, anị Ọ̀ gbọrị kala tọkụ ọkị se, ò seni Oria anga sịkị chịẹmaye-ẹ, 48se nwọse ini ḅẹmẹ, “Iḅiọkụ se ị̀ya ẹrẹ ḅụ mị tọkụ mị ọkịḅọ goyegoye, iḅiọkụ se ị̀ ọkịmẹ, se iḅiọkụ se ị̀ ọkịḅọ goyegoye pịkị iḅiọkụ se ị̀ se fịrịmaḅọ ḅe ọkịmẹ. Anịatịḅị ómine mgba ogboku bokatẹịnḅọ ḅe ori mị opu sọtẹịnḅọ ḅe-ẹ.”
Nwọ Ómine Na Tụḅụrụka Ḅọ Goyegoye Ọ́mịna Ḅụ Ḅọ-ẹ
(Mak 9.38-40)
49Jọn ḅe pụkọ deki ọkwẹịnmẹ, “Yeḍieḅọ, gbọrị owuḅọ wa nwọ ọrịmẹ, ị́ya ẹrẹ ḅụ sitẹmẹ nwọ depakụmaḅẹ, se wa ḍuko ọ̀ pịrịmẹ na ọ̀ ḅarị mịẹma, anịatịḅị ómine ḍuko nwẹngịkẹ.”
50“Ómine ò kikima,” Jizọs Ḅe nwọse ori na ísí ọḅụḍukoapụma na ḅẹmẹ, “anịatịḅị nwọ ómine na tụḅụrụka ḅọ goyegoye ọ́mịna ḅie ḅọ-ẹ.”
Gbọrị Sameria Ịwọama Jizọs Ḅe Ọkị Ḍụkụkẹ
51Jizọs Ḅe iwo soḅie munḅịa enema kpekiarị sịkị, Ori Ò kuḅie karakaramamẹ sịsẹ nwẹngị Jerusalẹm munḅịa ẹrẹchị. 52Ori okunwẹngịapụ nwọse tọrọkọ fịrịmamẹ, mịna apụma pakaso mun Sameria gbọrị ịwọama ḅie sọmẹ, yelayelaye nwọ karakarama Ọ̀ pịrịḅịa ẹrẹchị. 53Ọkụma anịanga sime tomonima Ori ọkị ḍụkụkẹ, anịatịḅị anị ḅelemẹ na Ò Jerusalẹm nwọ mun aḅẹ. 54Ọḅụḍukoapụma, Jems ḅe na, Jọn ḅe na, mịn mị ọrị sịkị, ini nwọ ḅẹmẹ, “Nyanaḅọ, ị́ ḅi wa soḅie fịnị chịn koroma se ini dọkịma?”
55Jizọs Ḅe vinpịkị se ini ḍiki ịganịmẹ. 56Anịatịḅị Tomoniḅọ Tọkụ Ḅe Ò ḅo tomoni-a ḍumo fama-ẹ ḅokẹ, ọkụma ini ḍụaḅọrọmaḅịa ẹrẹchị-ẹ! Se Jizọs Ḅe na Oria ọḅụḍukoapụma na nwẹngị so jịn ịwọama mun mẹ.
Jizọs Ḅe Ḍukoḅịa Apụ Ma
(Mat 8.19-22)
57Ini nwẹngịma mun-arị sịkị, gbọrị owuḅọ nwọse Jizọs Ḅe ḅẹmẹ, “Àrị ị́ ḍuko ị́ mun anga mun anga munḅịa.”
58Jizọs Ḅe nwọse ọ̀ ḅẹmẹ, “Pụnụma àrị ḅụkụ nyanamẹ, fenima pịkị feni-warị nyanamẹ, ọkụma Tomoniḅọ Tọkụ Ḅe Ọ̀ nyana se ḅọlọlọ ịnyọsaraḅịa anga ofori-ẹ.”
59Ọ̀ nwọse jịn owuḅọ ḅẹmẹ, “Ị̀ ḍuko.”
Ọkụma owuḅọ ḅe nwọ ḅẹmẹ, “Nyanaḅọ, tatarị ḅereni ọkọmụ à vinpịkị mun ị̀ ḍaḅe ḍipi.”
60Jizọs Ḅe pẹkẹrẹmẹ, “Ye fịapụma inia fịapụma ḍipi. Ị́rị́ mun Tamụnọ Amanyanakiri mị ḅe ḅẹrẹ mị nwọ ḍuko.”
61Jịn owuḅọ nwọ ḅẹmẹ, “Nyanaḅọ, àrị ị́ ḍukoḅịa, ọkụma ye à tatarị mun ‘Ómine iḅiọkụ sime’ se ị̀ furo apụma ḅẹ.”
62Jizọs Ḅe nwọse ọ̀ ḅẹmẹ, “Nwọ sakị ozu fịrịnwẹngị se tọrụ pịkị ọḅụ ḍikiḅọ goyegoye iniḅọ ḅarị Tamụnọ Amanyanakiri mị gbẹịnkẹ.”
Currently Selected:
Luk 9: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
