Yilinga 2
2
Mwiku wa Linanga yiuhulumuka
1Muze tangwa lia chiwanyino cha Pentekoste hiliaheta, ayo eswe yaabwa hamuwika, muma mumuwika. 2Susumuku mwilu yimwiza lundunjila ngwe fuji ya tachi, yiizalisa zuwo lieswe muze te anatwama. 3Yimusoloka malimi ngwe milengi ya kahia, yaalihandununa, mba yaabwa hali mutu ni mutu. 4No eswe yaazala ni Mwiku wa Linanga, yaabutuka kuhanjika mu maliji eka ni eka ngwe chize Mwiku waahele yakuhanjika.
5Ku Yerusaleme te Ayuda atwama ko, akwa kuwayila Zambi waze akatukile ku yifuchi yeswe ya hashi. 6Muze te heevwa zungo lize, mbunga yaalikungulula. Eswe yaakakashana, mumu mutu ni mutu yevwa akwa kufuliela nikuhanjika mu liji lienyi mwene. 7Yaatungumuka, yaalishimwoka kuhiana nikwamba ngwo: “Puu! Atu wano eswe anahanjika, hi akwa Galilea ko, nyi? 8Kuchi mba tunevu mutu ni mutu mu liji lienyi lia Chisemuko? 9Tuli atu ja mu yifuchi ya Parte, ni Meda, ni Elame, ni Mesopotamia, ni Yudea, ni Kapadosia, ni Pontu, ni Asia, 10ni Frigia, ni Pamfilia, ni Egiptu, ni ku Chihanda cha Libia chize chasulangana ni Sirene, ni njize waze akatukile ku Roma, 11ni Ayuda, ni akwa kufuliela a ku mavungu akwo, ni akwo tuli akwa Kreta ni akwa Arabia. Alioze yetu eswe tuneevu nikuhanjika mu maliji ja yetwene milimo yinene ya Zambi!” 12No eswe yaakomoka, yaakakashana nikulihula ngwo: “Ayiyene yika?” 13Alioze akwo yaaseha ngwo: “Haazengewa ni vinyu.”
Petulu yambujola ha tangwa lia chiwanyino cha Pentekoste
14Mba Petulu yakatuka hamwe ni tumbaji akwo kumi ni kashi, yakololoka ngwenyi: “Akwetu Ayuda, ni yenu eswe waze nwatwama mu Yerusaleme, achivwenu, ngubanjikenu. 15Ngwami, atu wano kaazengewele ni vinyu ngwe chize nunanyongo, mumu tuli lume ha ola ya muchilivwa ya chichamene. 16Alioze Chuma chino nunamono, Zambi walambile kuli mukwa munanyi wenyi Joele, ngwenyi:
17‘Ha matangwa akusula mungukalinga chino.
Mungukamwangina Mwiku wami wa Linanga muli atu eswe.
Ana jenu a malunga ni a mapwo maakambujola yuma yize muyikeza ho.
Akweze jenu maakamona Usolwelo;
tushinakaji twenu maakalota yilota.
18Ewa, ha matangwa waze, mungukamwangina Mwiku wami wa Linanga,
chibwe muli tuvumbi twami a malunga ni a mapwo,
mba maakambujola yuma yize muyikeza ho.
19Mungukasolola yuma ya kulishimwoka ya mwilu,
ni yikomokeso ya hano hashi, ni manyinga, ni kahia, ni mwishi unji.
20Tangwa mulikalaa,
kakweji makachila ngwe manyinga,
mba Tangwa lia Mwene Yesu mulikeza,
tangwa linene ni lia uhenya.
21Hohene mweswawo malemba ngwenyi, Mwene ungulamwine kama, mamulamwina.’
22“Malunga ja Israele, ngubanjikenu! Zambi hanashindakenya hakutwala kuli Yesu wa ku Nazare, ni yipupu, ni yikomokeso, ni yilayi. Yuma yino Zambi wayilingile muli iye, ngwe chize nunanyingika yenwene, mumu wayilingile hakachi kenu. 23Zambi, mu upale wenyi ni chinyingi chenyi, hanabatula kulu kunukunjika Yesu. Nwamushihile muze nwatayijile yivulumunyi amuhate ha kulusu. 24Alioze Zambi hanamuhindwisa, hanamujitula ku lamba lia kufwa, mumu kufwa kuchahashile kumukwata nawa. 25Mumu David hanahanjika kulu hakutwala kuli iye ngwenyi:
‘Namwene mwe Mwene ku meso jami matangwa eswe.
Kali ku chindume chami, chichi kwivwa woma nichimwe.
26Kashika nakuwahilila, nakuhanjika ni chiseke.
Chibwe nguli mu mujimba wa uutu, mungukalinduluka ni kusa mbunge ha yibema,
27mumu kuuchi katayiza mwono wami kusala muma lia afu,
kuuchi katayiza munangi we kubola.
28Hiunangunyingikisa jila jize jakutwala ku mwono.
Nakuwahilila nyi nguli ku meso je.’
29“Akwetu, ngutayizenu kama kuhanjika mwazu kuli yenu hakutwala kuli kashakulu ketu David. Hanafu, haanamufundu. Fuka lienyi#2:29 fuka lienyi: fuka lia David te mu Yerusaleme. Tala 1 Yit 2:10. lili mukachi ketu ndoo musono uno. 30Te mukwa munanyi wa Zambi, mba yanyingika ngwenyi, Zambi hanamulakenya ni Shingo ngwenyi: ‘Mungukapwisa umwe wa ku vungu lie mwanangana ngwe yena.’ 31David yanyingika yuma yize Zambi makalinga kulutwe. Kashika yahanjika hakutwala ku uhindukilo wa Kristu ngwenyi:
‘Kamwehukile ko muma lia afu,
mujimba wenyi kuwabolele.’
32Yono Yesu, Zambi hanamuhindwisa ku kufwa. Yetu eswe tuli yela ja chikuma chino. 33Zambi hanamuzundula, hanamuse ku kwoko lienyi lia chindume. Ni Yesu hanatambula kuli Tata, Mwiku wa Linanga uze alakenyene, hanatumwangina wo. Yuma yize nunevu ni yize nunamono yili yitanga ya Mwiku uze. 34Mumu David kazezukile ko iye mwene mwilu, alioze yamba ngwenyi:
‘Mwene Zambi yambila Mwene wami ngwenyi:
Twama ku chindume chami
35ndoo mungukasa akwa kole je
ngwe Chuma cha kunangika molu je.’
36“Aisraele eswe chaatamba kunyingika kanawa ngwo, Yesu yoze nwahachile ha kulusu, Zambi hanamupwisa Mwene kanda Chilamwina yoze iye mwene alakenyene.”
37Muze atu haachivwa, yaalibikala mu mbunge, yaahula Petulu ni tunganda twa Yesu ngwo: “Akwetu, kuchi kevwe mutulinga?” 38Petulu ngwenyi: “Mutu ni mutu hakachi kenu alumuke ku mbunge, amupapachise mu jina lia Yesu Kristu ha ukonekeno wa milonga. Mba munutambula chawana cha Zambi, Mwiku wa Linanga. 39Mumu chilakenyo chino chili cha yenu, ni cha ana jenu, ni cha eswe waze ali kusuku, ni cha eswe waze Mwene Zambi yetu hanaatambika iye mwene.”
40Ni maliji anji akwo Petulu yashindakenya, yaalembejeka ngwenyi: “Lilamwinenu ku ubatwilo uze muukeza hali atu wano abi!” 41Mba waze afulielele longeso lienyi, yaapapachisa. Ha tangwa lize tununu atatu yaalichinga no. 42Yaalihanahana ha kwivwa longeso lia tunganda twa Yesu, ni kuliendela, ni kulia hamuwika, ni kulemba.
Chikungulwila chitangu
43Tunganda twa Yesu yaalinga yikomokeso ni yilayi yinji. Atu eswe yeevwa woma. 44Akwa kufuliela yaanyongonona ni kulikata, yaachinga yuma yo yeswe hamuwika, 45yaalanjisa yuma ni yikumba yo, yaalitetela mbongo jize nikulita ni kuhona cha mutu ni mutu. 46Tangwa ha tangwa yaalikungulula mu zuwo lia Zambi lia Ayuda, yaalia yakulia yo hamuwika mu mazuwo jo ni kutuwika cha mbunge, 47yaachichimieka Zambi. Atu eswe yaasa vumbi. Tangwa ha tangwa Mwene yawezela ku mbunga yo waze te Zambi analamwina.
Currently Selected:
Yilinga 2: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
