Yilinga 3
3
Petulu ni Yoano yaawuka Chilema
1Petulu ni Yoano yaakanduka ku zuwo lia Zambi lia Ayuda ha ola ya kulemba, ola ya muchitatu, ya chingoloshi. 2Hehi ni chikolo cha ku zuwo lia Zambi, chize anachivuluka ngwo, Chikolo Chibema, mutu umuwika wabwile ko, te Chilema chize ku kusemuka chenyi. Tangwa ha tangwa yaamuneha nikumusa kwe kuze, hanga ete yawana kuli waze te akunjila mu zuwo lia Zambi. 3Ha kumona Petulu ni Yoano himanjila mu zuwo lia Zambi, yeeta chawana. 4No yaamuhulikila meso. Mba Petulu yamwamba ngwenyi: “Tutale!” 5Iye yaatala nikunyonga ngwenyi, kota chimwe Chuma mangwaha. 6Alioze Petulu ngwenyi: “Mbongo Chishi najo, alioze chize nguli nacho ngunakwehe cho. Ngwami, mu jina lia Yesu Kristu Kanazare, katuka, wende!” 7Mba yamukwata ku kwoko lia chindume, yamukatwisa. Hazehene yiliato yenyi ni tusendengele twenyi yijikiza. 8Neye yanyangumuka, yamana, yabutuka kwenda, yanjila hamwe no mu zuwo lia Zambi, nikutumbuka, nikuchichimieka Zambi. 9Atu eswe yaamunona nikwenda nikuchichimieka Zambi. 10Yaamusa chinyingi ngwo, yono mwe uze te wakutwaminyina yawana ku Chikolo Chibema cha ku zuwo lia Zambi. No yaakomoka, yaalishikishila ha chize amulingile.
Petulu yambujola mu chisambwe cha zuwo lia Zambi
11Shimbu mutu yoze unachikwachilila Petulu ni Yoano, atu eswe yaalishimwoka nikuzomboka kuli ayo mu chisambwe cha ku zuwo lia Zambi chize anachivuluka ngwo, Chisambwe cha Solomone. 12Ha kuchimona, Petulu yaamba ngwenyi: “Malunga Aisraele, kuchi nunatuhulikila meso ngwe ni tachi hanji ni kulinanga cha yetwene twamwendesanga? 13Zambi ya Abrahama, ni ya Isake, ni ya Yakoba, ni ya tushakulu twetu hanahenyesa kavumbi kenyi Yesu. Yenwene nwamukunjikile kuli mianangana, nwalitunyine ye ku meso ja Pilatu#3:13 PILATU: Karoma, mukwa kuyula wa yifuchi ya Yudea, ni Samaria, ni Idumea mu wanangana wa Aroma ha miaka 26-36. muze iye abatwile ha kumutusula, 14nwalitunyine mwe Munangi kanda mukwa ululi, nwechile Pilatu hanga anutuswile mukwa kushiha atu, 15nwashihile Kabutu ka mwono, alioze Zambi hanamuhindwisa ku kufwa. Yetu tuli kwetu yela ja yuma yino. 16Ndundo ja jina lia Yesu hijahindwisa mutu yono. Nunamumono, nunamunyingika. Habwa ni tachi mumu hafuliela jina lize. Jina lia Yesu hiliamwaha ufulielo, kushika habwa mungunu ngwe chize nunamono yenu eswe.
17“Akwetu, ngunanyingika kanawa ngwami, yenu ni akwa kuyula jenu nwachilingile ni kwalajala. 18Alioze Zambi hanamanununa chize ahanjikile shimbu kanda kuli akwa munanyi jenyi ngwenyi, Chilamwina wa kuli Zambi, yoze iye mwene alakenyene, makamona lamba. 19Kashika alumukenu ku mbunge, nuhiluke kuli Zambi, hanga anukonekene milonga yenu, 20hanga Zambi akanwehe matangwa ja kuhwima, ni kunutumina Yesu, Chilamwina yoze iye mwene atongwele shimbu kanda. 21Yesu makashimbula mwilu ndoo ni muze Zambi makalulika yuma yeswe, ngwe chize hanachambulula kuli akwa munanyi jenyi a kulinanga ku miaka yikulu. 22Mumu Mose hanambe ngwenyi: ‘Mwene Zambi yenu makanutumina mukwa munanyi ngwe yami. Makabwa wa kuli usoko wenu. Chanutamba kumwivwa ha yuma yeswe yize makanwamba. 23Mweswawo kechi kwivwa mukwa munanyi wa Zambi yoze, Zambi makamuchiza hakachi ka Aisraele nikumwonona liakulu.’ 24Akwa munanyi eswe waze ahanjikile, chize kuli Samuele ndoo kuli waze asulile ko, ambujolele yuma ya matangwa wano. 25Yenu nuli ana ja akwa munanyi a Zambi. Nuli ni Chihanda mu Usendo uze Zambi hanamanununa ni tushakulu twenu, muze ahanjikile kuli Abrahama ngwenyi: ‘Ni vungu lie mungukawahisa mavungu eswe a hashi.’ 26Ha chino, Zambi hanahindwisa Kavumbi kenyi, hanamutumu hatangu kuli yenu, mu kunuwahisa nikutewulula mutu mweswe hakachi kenu ku shili yenyi.”
Currently Selected:
Yilinga 3: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
