Yilinga 4
4
Petulu ni Yoano ku meso ja Mbunga ya Ngaji ja Ayuda
1Shimbu te Petulu ni Yoano anahanjika ni atu, mahako a Zambi, ni mwata wa tufunga twa zuwo lia Zambi, ni Asaduseu#4:1 Asaduseu: yimwe mbunga yikepe ya Ayuda, chibichibi ya mahako waze atayijile shina mikanda ya Ubutukilo ndoo ku Shimbi ya Mukanda wa Zambi. yaaheta. 2Yaabihilila chikolo mumu tunganda wano yaalongesa atu ngwo, Yesu hanahinduka. Chize chinalumbunuka ngwo, afu kumaakahinduka. 3Yaakwata nikwasa mu zuwo lia lamba ndoo hikwacha, mumu te hikwatoka kulu. 4Alioze anji a kuli waze evwile liji, yaafuliela; malunga abwile ngwe tununu atano.
5Muze hikwacha, akwa kuyula ja Ayuda, ni makulwana, ni alongeshi a Shimbi yaalikungulula mu Yerusaleme. 6Mukachi ko yimubwa atu wano: Ana, mwata wa mahako, ni Yoano, ni Alexandre, ni Kaifa, ni akwo a ku vungu lia mwata wa mahako. 7Yaatumbika tunganda mukachi ko, yaahula ngwo; “Ni tachi jika, hanji mu jina liaya nunakalinga chino?” 8Hohene Petulu, nikuzala ni Mwiku wa Linanga, yaakumbulula ngwenyi: “Akwa kuyula ja atu ni makulwana, 9nyi musono nunatusopesa hakutwala ku chitanga chibema chize chinalingiwa hali Chilema yono, hanji ngwe chize hahinduka, 10Aisraele eswe ni yenu eswe chanutamba kunyingika ngwenu, mutu yono kanamana ku meso jenu mungunu ku tachi ja jina lia Yesu Kristu wa ku Nazare, yoze nwahachile ha kulusu, alioze Zambi hanamuhindwisa ku kufwa. 11Yesu mwe yoze Mukanda wa Zambi unambe ngwo:
‘Liwe lize yenu tungi nwalitunyine
hiliabwa liwe lia mu mbango, lize liakolesa zuwo.’
12Kukushi ulamwino muli mukwo niumwe, mumu Zambi kahanyine ko jina lia mutu mukwo kuli atu hano hashi lize mutuhasa kulilamwina nalio.”
13Ha kumona hamu lia Petulu ni Yoano, akwa lutwe yaalishimwoka, mumu te kaananyingika ngwo, kaali atu waze kaajaminyine ha kulilongesa. No yaasa chinyingi ngwo, wano e abwile hamwe ni Yesu. 14Alioze ha kumona mutu yoze awukile kanamana hamwe ni Petulu ni Yoano, hikaahashile kwamba nawa nichimwe. 15Yatuhwisa mu chibatulo cha kusopela. Mba yaabutuka kulihanjekesa. 16Ngwo: “Atu wano, kuchi mutwalinga? Mumu eswe a mu Yerusaleme kaananyingika ngwo, haalinga chipupu chinene, ni yetu kutwahashile kulikala cho. 17Alioze, hanga kuchichi kafumana kuhiana hakachi ka atu, twaakanjisenu ngwetu, kanda akahanjika nawa kuli mutu niumwe mu jina lino.” 18Mba yaatambika nikwaha koki ngwo: “Litwaminenu lume kuhanjika, chibwe kulongesa mu jina lia Yesu.”
19Alioze Petulu ni Yoano yaakumbulula ngwo: “Batulenu yenwene, nyi chinalite ku meso ja Zambi kwononokena atu kuhiana Zambi. 20Mumu yetu kutwahashile kuhola ha yize twevwile ni yize twamwene.” 21Muze akwa lutwe haaha chikolo koki, yeecha aye. Kaamwene ko chikuma nichimwe cha kwahela lamba, mumu atu eswe yaachichimieka Zambi ha chikuma chize. 22Mutu yoze alingilile chipupu cha kumuwuka, te hahiana kulu miaka makumi awana.
Akwa kufuliela yaalemba Zambi hanga akabwe ni hamu
23Mba muze akwa kuyula heecha, Petulu ni Yoano yaahiluka ku mbunga yo, yalumbunwina yeswe yize akwa lutwe ni makulwana aambile. 24Ha kwivwa liji lino, yaalemba Zambi ni mbunge yimuwika ngwo: “Mwene, yena watangile lilu, ni hashi, ni kalunga lwiji, ni yeswe yize yilimo. 25Yena, ku tachi ja Mwiku wa Linanga, wahanjikile kuli David, tata yetu, kavumbi ke ngwe:
‘Kuchi mba waze hi Ayuda ko analikungulula ni chizungozungo,
kuchi mba atu anatwama punga jamokomoko?
26Mianangana a hashi haalilulika,
ni akwa kuyula haakunguluka hamuwika
mu kulimika ni Mwene Zambi ni Chilamwina chenyi yoze alakenyene.’
27Mumu chamwenemwene mu limbo lino Herode#4:27 HERODE: Herode Antipase, mukwa kuyula yifuchi ya Galilea ni Perea. ni Ponteu Pilatu#4:27 PILATU: tala 3:13. haalichinga ni yilambala ni Aisraele mu kulimika ni Kavumbi ke wa Linanga, Yesu, Chilamwina yoze walakenyene. 28Haalinga chino amanunune chize yena wabatwile kulu mu upale we ni zango lie. 29Mba haliabwila, Mwene, tala kama kuhalila cho. Ha chino, twehe kama hamu, yetu tuvumbi twe, lia kwambujola nalio liji lie. 30Olola kwoko lie ha kuwuka, ni kwokesa yilayi ni yikomokeso mu jina lia Kavumbi ke wa Linanga, Yesu.” 31Muze haalemba, muma muze akungulukile yimunyika. Ayo eswe yaazala ni Mwiku wa Linanga, mba yaabutuka kwambujola liji lia Zambi ni hamu.
Akwa kufuliela yaachinga yuma yo yeswe hamuwika
32Mbunga ya akwa kufuliela yaabwa ni mbunge yimuwika ni nyonga limuwika. Mutu niumwe hakachi ko wambile ngwenyi: “Chuma chize nguli nacho cha yami mwene.” Alioze yaalianyina yuma yo mukachi ko eswe. 33Ni tachi jinji tumbaji twa Yesu yaashindakenya uhindukilo wa Mwene Yesu. Zambi yaawahisa eswe. 34Mutu niumwe hakachi ko wahonene Chuma, mumu eswe waze abwile ni minda hanji mazuwo, yaayilanjisa. Yaaneha mbongo ja yuma yize alanjishile, 35yaajikunjika kuli tunganda twa Yesu. No yaalianyina mbongo jize kuli mutu ni mutu nikulita ni kuhona chenyi.
36Yikubwa mutu umuwika jina lienyi te Josefe, Kalevi, yoze wasemukine ku tungu lia Shipre. Tunganda twa Yesu yaamuluka jina likwo ngwo, Barnaba (kulumbunuka ngwo, mukwa kutakamisa atu.) 37Neye yalanjisa umwe munda wenyi, yaneha mbongo, yajikunjika kuli tunganda twa Yesu.
Currently Selected:
Yilinga 4: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
