Yilinga 5
5
Anania ni Safira
1Alioze umwe mutu, jina lienyi te Anania, hamwe ni mukwo pwo Safira, yalanjisa umwe munda, 2yasweka Chihanda cha mbongo, ni mukwo pwo nawa yachinyingika, yaneha jize jasalile ho nikujikunjika kuli tunganda twa Yesu. 3Petulu yamwamba ngwenyi: “Anania, kuchi kevwe Sakwonga anjilanga mu mbunge ye uhanjike mahuza kuli Mwiku wa Linanga, ni kusweka Chihanda cha mbongo ja munda? 4Shimbu kanda uchilanjisa we munda, te hi niwe ko, nyi? Chibwe muze hiwaulanjisa, je mbongo hindu te hi nije ko, nyi? Mba ngwe kuchi walinyonganga kulinga Chuma ngwe chino? Tala, kuwahanjikile mahuza kuli atu, alioze kuli Zambi.” 5Anania, muze hevwa maliji wano yalimbuka hashi, yafwa kwenyi. Eswe waze achivwile yeevwa woma unji. 6Akweze yaakatuka, yaamuvunga ha mahina, yaamutwala haze, yaamufunda.
7Yikubwa ngwe shimbu lia ola jitatu, mukwo pwo neye yanjila, te kanyingikine chize chabwile ko. 8Petulu yamuhula ngwenyi: “Ngwambulwile, ndando yiyene ye nunakalanjisa we munda, nyi?” Neye ngwenyi: “Ewa yiyene.” 9Mba Petulu yamwamba ngwenyi: “Ehee! Kuchi kevwe nunakalitesa ha kwonga Mwiku wa Linanga? Tala, waze afundanga lunga lie, ku chikolo ali. Ni yena nawa kumaakumbata.” 10Hazehene, neye yalimbuka lume ku molu ja Petulu, yafwa kwenyi. Akweze yaamuwana te hafwa kulu, yaamwanda, yaamufunda ku sali lia lunga lienyi. 11Chikungulwila cheswe ni waze achivwile yeevwa woma unji.
Tunganda yaalinga yalayi ni yikomokeso
12Zambi yalinga yilayi ni yikomokeso yinji hakachi ka atu ku moko ja tunganda twa Yesu. Akwa kufuliela te kaakulikungulula hamuwika ni mbunge yimuwika mu chisambwe cha Solomone. 13Mutu mukwo niumwe wahamukine kulinunga no, alioze atu te kaakwachichimieka. 14Kwoka cha waze afulielele Mwene Yesu, malunga ni mapwo, te chakuliweza tangwa ha tangwa. 15Mumu ha yuma yize alingile tunganda, atu yaanehaneha mieji jo haze mu majila, yaasa ha mihela ni ha yikanga, hanga muze Petulu mabalika, chibwe chizulie chenyi chizulamine umwe wa kuli ayo. 16Te kwakwiza yendo ya atu waze akatwokele ku yihunda yakusulangana ni Yerusaleme, anambata waze te ayiza ni waze akwachikile kuli mwiku wa luchisa. No eswe yaahindwoka.
Akwa lutwe ja Ayuda yaahungumiona tunganda
17Mwata wa mahako ni waze te akuliendela nenyi, kafwa ngwe mbunga ya Asaduseu,#5:17 Asaduseu: tala 4:1. yaakatuka ni ukwa unji, 18yaakwata tunganda, yaasa mu zuwo lia lamba. 19Alioze ha ufuku uze, kanganda ka mwilu yazulula yajilo ya zuwo lia lamba, yaatuhwisa haze, yaamba ngwenyi: 20“Yeenu numane mu zuwo lia Zambi nikulongesa atu eswe hakutwala ku mwono uze anehene Yesu.” 21Tunganda yoononoka. Muze hikwacha, yaaya mu zuwo lia Zambi, yaabutuka kulongesa.
Muze mwata wa mahako ni waze te akuliendela nenyi haaheta, yaakungulula makulwana eswe hanga Mbunga ya Ngaji ja Ayuda asopese tunganda twa Yesu. Mba yaatuma liji ku zuwo lia lamba hanga anehe tunganda. 22Tujita, muze haaheta kwe ku zuwo lia lamba, kaawanyine ko. No yaahiluka nikwamba ngwo: 23“Twawananga zuwo lia lamba liakukasa mbembembe, ni tufunga kaanamana kulutwe lia yikolo ya zuwo. Alioze muze twazululanga, kutwawanyine mo niumwe.” 24Muze mwata wa tufunga twa zuwo lia Zambi#5:24 tufunga twa zuwo lia ZAMBI: Alevi, te akulujika ni kufunga zuwo lia Zambi. ni mahako a lutwe haachivwa, yaakakashana kuhiana chize yuma yino muyibwa. 25Hohene yikwiza umwe mutu ni kwalweza ngwenyi: “Achivwenu! Atu waze nunakasa mu zuwo lia lamba, mu zuwo lia Zambi ali, kaanamana ni kulongesa atu.” 26Mba mwata wa tujita hamwe ni tufunga yaaya, yaaneha, alioze hi ni tachi ko, mumu yeevwila atu woma ngwo, maashiha ni mawe.
27No yaaneha tunganda, yaamika ku meso ja Mbunga ya Ngaji ja Ayuda. Mwata wa mahako yaamba ngwenyi: 28“Tunakanukanda ngwetu, kanda nulongesa nawa mu jina lia mutu yoze. Alioze yenu hinunamwange longeso lienu mu Yerusaleme mweswe. Nunazange kutukokela uhiso wa manyinga ja mutu yono, nyi?” 29Petulu ni tunganda akwo yaakumbulula ngwo: “Chatutamba kwononokena Zambi, hi atu ko. 30Zambi ya tushakulu twetu hahindwisa Yesu ku kufwa, yoze nwashihile muze nwamuhachile ha kulusu. 31Zambi hanamuzundula ha kubwa ku kwoko lienyi lia chindume, hanga abwe Tetekeli ni Chilamwina. Chenacho Aisraele maahasa kwalumuka ku mbunge jo, ni Zambi maakonekena milonga yo. 32Yetu tuli yela ja yuma yino, yetu ni Mwiku wa Linanga uze Zambi ahanyine kuli waze akumwononokena.”
33Muze Mbunga ya Ngaji ja Ayuda heevwa liji lino, yeevwa ufwatulo, yaatwama punga ya kwashiha. 34Alioze mu Mbunga yize yimubwa Kafariseu#5:34 afariseu: yimwe mbunga ya Ayuda waze asele tachi kufunga Shimbi ja Mose ni Shimbi jikwo jize Ayuda te haanawezela ku Shimbi jize. umuwika, jina lienyi te Gamaliele, longeshi ya Shimbi. Atu eswe te kaakumusa vumbi. Neye yakatuka, yahana Shimbi atuhwise tunganda haze hakepe. 35Mba yambila Mbunga ya Ngaji ngwenyi: “Yenu malunga ja Israele, kanyamenu yenwene ha chize nunambe kulinga wano atu. 36Mumu miaka kanda yichoka muze kwasolokele Teuda yoze wambile ngwenyi: ‘Nguli munene.’ Atu ngwe kulakaji jiwana akawile longeso lienyi. Alioze atu akwo yamushiha, ni waze eswe te akumukaula yaamwangashana, kukwasalile niumwe. 37Kulutwe, yikusoloka Yudase,#5:37 YUDASE: umwe lunga yoze ambile kuvundula Ayuda ha kwasa jita ni Aroma ha mwaka 6. wa ku chifuchi cha Galilea, ha matangwa a kwalula atu. Neye nawa yakoka atu anji ha kubwa tumbaji twenyi, neye nawa yatoka. Ni waze eswe alibalakenyene nenyi yaamwangashana. 38Kashika ha mulonga uno, ngunanwambe ngwami, atu wano echenu. Yize analingi, nyi kuli atu yinakatuka, kumuyikahwa. 39Alioze, nyi kuli Zambi yinakatuka, kunuchi kuhasa kuyihwisa. Kanyamenu, nyi ka, muchibwa ngwe nunalitachika ni Zambi.” No eswe yaamutayiza. 40Hohene yaatambika tunganda, yaalambisa, yaaha koki ngwo, kanda alongesa nawa mu jina lia Yesu. Mba yeecha kwo. 41Tunganda yaakatuka ku meso ja akwa kuyula nikuwahilila, mumu Zambi yaatayiza ngwenyi, kaanatela kwivwa sonyi mumu ha jina lia Yesu. 42Mba tangwa ha tangwa kaalitwaminyine ko kulongesa mu zuwo lia Zambi ni mu mazuwo ja atu, nikwambujola Sango Jibema jakutwala kuli Yesu, Chilamwina yoze Zambi alakenyene.
Currently Selected:
Yilinga 5: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
