Yilinga 8
8
1Saulu neye te kanatayiza ngwenyi, amushihe.
Saulu yahungumiona Chikungulwila
Ha tangwa lizeliene, yaabutuka kuhungumiona chikolo Chikungulwila cha Yerusaleme. Akwa Kristu eswe yaamwangana mwamwaa mu yifuchi ya Yudea ni Samaria, alioze tunganda twa Yesu kaamwanganyine ko. 2Amwe akwa kuwayila Zambi yaafunda Estevau (Etienne), yaamulila mbimbi chikolo.
3Alioze Saulu yeseka kwonona Chikungulwila, yanjila mu zuwo ni zuwo, yatuhwisa malunga ni mapwo haze, yaasa mu zuwo lia lamba.
Filipe yambujola Sango Jibema mu chifuchi cha Samaria
4Akwa kufuliela waze amwanganyine yaaya kweswe nikwambujola Sango Jibema. 5Filipe yaya ku limbo lia mu Samaria, yambujola Sango ja Chilamwina yoze Zambi alakenyene. 6Mbunga yaabanjika longeso lia Filipe ni mbunge yimuwika, yaamona yipupu yize te akulinga. 7Mumu mwiku wa luchisa yiutuhwoka muli anji nikukololoka ni liji linene. Akwa kalepa anji ni yilema yaahindwoka 8Akwa limbo lize yaawahilila kuhiana.
9Alioze mu limbo lize yimubwa mutu umuwika, jina lienyi Simone. Yashimwokesa Asamaria ha shimbu lisuku ni tufutafuta twenyi, neye yalialula kubwa mutu munene. 10Atu eswe, malunga ni mapwo, makulwana ni twanuke, te kaakumubanjika. Yaamba ngwo: “Mutu yono je tachi ja Zambi jize anajivuluka ngwo Tachi Jinji.” 11Te kaakumwivwa mumu hasuku achijile ni kwonga ni tufutafuta twenyi. 12Alioze muze malunga ni mapwo haafuliela Sango Jibema jize alongesele Filipe, yaapapachisa. Te kanalongesa hakutwala ku Wanangana wa Zambi ni jina lia Yesu Kristu. 13Chibwe Simone iye mwene yafuliela. Ni muze te hamupapachisa, yanyongonona ni Filipe, yalishimwoka ha yipupu ni yikomokeso yize te akulinga.
14Muze tunganda twa Yesu heevwa ngwo, Asamaria haatambula liji lia Zambi, yaatumina Petulu ni Yoano. 15No, muze te haaheta, yaalemba hanga akwa kufuliela atambule Mwiku wa Linanga. 16Mumu te hanaapapachisa mu jina lia Mwene Yesu, alioze Mwiku te kanda uchihulumuka kama muli umwe wa kuli ayo. 17Mba Petulu ni Yoano yaasa moko; no yaatambula Mwiku wa Linanga.
18Muze mwe Simone hamona ngwenyi, kusa cha moko cha tunganda hichahana Mwiku wa Linanga, yazanga kwaha mbongo, 19nikwamba ngwenyi: “Ni yami ngwehenu tachi jino, hanga mweswawo mungusa moko atambule Mwiku wa Linanga.” 20Alioze Petulu ngwenyi: “Fwako hamwe ni mbongo je, mumu hiwanyonga kuzuka chawana cha Zambi ni mbongo. 21Kuushi Chihanda chibwe chitundo mu milimo yino, mumu mbunge ye kuyalulamine ku meso ja Zambi. 22Lemba Mwene Zambi, nyi muchilita, akukonekene kama nyonga lia mbunge ye. 23Mumu ngunamono ngwami, mbunge ye yinasase ngwe kasashisa mu jimo lia mutu. Unakashiwa mu ngoji ja shili.” 24Simone yamba ngwenyi: “Ngulembelenu kama Mwene Zambi, hanga yuma yize hinwamba kanda yinguwana kama chibwe hakepe.”
25Mba muze tunganda haashindakenya ni haalongesa liji lia Mwene Yesu, yaahiluka ku Yerusaleme. Mu jila yaambujola Sango Jibema mu yihunda yinji ya mu Samaria.
Filipe ni Kaetiopia
26Kanganda ka mwilu yambila Filipe ngwenyi; “Katuka, uye ku sude, mu jila yize yinakatuka ku Yerusaleme, yiipalumuka ku Gaza#8:26 GAZA: limwe limbo kilometro 85 ku sude ku chitokelo cha Yerusaleme, hehi ni mbumbulu ya kalunga lwiji Mediterane..” (Jila yize te hiyinalambe.) 27-28Filipe yakatuka, yaya. Kuma mu jila yamona umwe mutu, Aetiopia, wakutunguna, kafufuchi ka mwanangana wa pwo Kandase, wa ku chifuchi cha Etiopia. Mwenawo te wakulama ubite wenyi weswe. Te ku Yerusaleme anakatuka, kwe ayile ni kuwayila. Muze anahiluka ku mahio, yatwama mu temba lienyi nikutanga mukanda wa mukwa munanyi wa Zambi, Izaya. 29Mwiku wa Linanga yiwambila Filipe ngwenyi. “Kundama ku temba lino.”
30Filipe yazomboka fuji, yamwivwa nikutanga mukanda wa mukwa munanyi Izaya. Yamuhula ngwenyi: “Kuunevu yize unatange, nyi?” 31Neye ngwenyi: “Ngwe kuchi munguhasa, nyi kukushi yoze mangulumbunwina yo?” Yaliumba kuli Filipe anyine atwame nenyi. 32Chihanda cha Mukanda wa Zambi chize atangile chino ngwo:
“Yaamutwala ku chishihilo ngwe panga.
Ngwe mwana panga yoze unaholo kuluu ku meso
ja yoze unamukambe mona.
Kabakwile ko kanwa lienyi.
33Yaamulelesa, kaamubatwilile ko ni ululi.
Iya mahasa kwambulula sango ja vungu lienyi?
Mumu mwono wenyi hiunahu hano hashi.”
34Kafufuchi yahula Filipe ngwenyi: “Ngunakulembe ungulumbunwine kama, iya mukwa munanyi wa Zambi anambila chino? Iye mwene, nyi? Hanji mukwo weka?” 35Filipe yabutuka kuhanjika. Chize ku Chisoneko chize, yamulumbunwina Sango Jibema ja Yesu. 36Muze te anayi mu jila, yaaheta ku amwe meya, mba kafufuchi yamba ngwenyi: “Talenu meya, yika yinanguvumu ha kungupapachisa?” [ 37Filipe ngwenyi: “Nyi unafuliela ni mbunge ye yeswe, muchilita.” Neye yamukumbulula ngwenyi: “Ngunafuliela ngwami, Yesu Kristu mwe Mwana Zambi.”] 38Yamanyisa temba lienyi. Eswe aali yaanjila mu meya, mba Filipe yamupapachisa. 39Muze haatuhuka mu meya, Mwiku wa Linanga yiuzundula Filipe. Kafufuchi kamwene ko nawa Filipe, alioze yaya ni uwahililo mu jila yenyi. 40Filipe yasolokela ku limbo lia Azoto#8:40 azoto: ku norde ya Gaza, ku mbumbulu ya kalunga lwiji Mediterane. Sesarea te kali ku norde ya Azoto.. Mba yabalika mu limbo ni limbo nikwambujola Sango Jibema kweswe, ndoo yaheta ku Sesarea.#8:40 SESAREA: ku mbumbulu ya kalunga lwiji Mediterane, kilometro 90 ku norde ku chitokelo cha Yerusaleme. Lie limbo lia lufuma mu Palestina kuze te mukwa kuyula, Karoma, akutwama.
Currently Selected:
Yilinga 8: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
