Ubutukilo 11
11
Ndalo yisuku ku chana cha Babilonia
1Ha Ubutukilo atu eswe a hano hashi te liji limuwika lume akuhanjika. 2Shimbu atu maachiya ku chivumbuko, yaaheta mu chana cha Babilonia, mba yaatunga ko. 3Yaalihanjikisa ngwo: “Tuyenu tuumbenu tujolo (briki), tukooche kanawa.” Chenacho alingile, mba yaabwa ni tujolo (briki) ha kutunga no ni usolososhi (goudron) ha kwakolesa. 4Yaamba ngwo: “Tutungenu limbo ni yimwe ndalo yisuku, songo liayo yikahete mwe mwilu. Tukabwc ni lufuma ha ndalo yize, kuchina mutumwangana hashi heswe mwamwaa.”
5Hohene Mwene Zambi yahulumuka akamone lie limbo ni ye ndalo. 6Yamba ngwenyi: “Atu wano eswe kaali atu umuwika ni kaakuhanjika liji limuwika. Chuma chino haalinga chili kabutu ka yibi yize maakalinga kulutwe. Kwasala hakepe maalinga cheswe chize maazanga. 7Tuhulumukenu, tubinjise liji ho, hanga keechi kulivwa hakachi ko.” 8Chenacho Mwene Zambi aamwangine mwamwaa hashi heswe. Mba atu yaalitwantina kutunga limbo lize. 9Limbo lize jina lialio Babilone#11:9 babilonf ha kulivuluka mu hebreu linalifu ni “kubinjisa.” , mumu kwenako Mwene Zambi abinjishile liji lia akwa hashi eswe, ni kwamwanga hashi heswe.
Vungu lia Sheme
(Tala nawa 1 San 1:24-27)
10Lino lie vungu lia Sheme. Chize ku sanga lia meya kwabalikile miaka yaali, Sheme te habwa ni miaka 100, mba yasema mwana wa lunga, jina lienyi Arfashede. 11Sheme yatwama miaka yikwo 500, yasema nawa ana akwo malunga ni mapwo.
12Muze Arfashede habwa ni miaka 35 yasema mwana wa lunga, jina lienyi Shela. 13Yatwama miaka yikwo 403, yasema nawa ana akwo malunga ni mapwo.
14Muze Shela habwa ni miaka 30, yasema mwana wa lunga, jina lienyi Ebere. 15Yatwama miaka yikwo 403, yasema nawa ana akwo malunga ni mapwo.
16Muze Ebere habwa ni miaka 34 yasema mwana wa lunga, jina lienyi Pelege. 17Yatwama miaka yikwo 430, yasema nawa ana akwo malunga ni mapwo.
18Muze Pelege habwa ni miaka 30 yasema mwana wa lunga, jina lienyi Reu. 19Yatwama miaka yikwo 209, yasema nawa ana akwo malunga ni mapwo.
20Muze Reu habwa ni miaka 32 yasema mwana wa lunga, jina lienyi Seruge. 21Yatwama miaka yikwo 207, yasema nawa ana akwo malunga ni mapwo.
22Muze Seruge habwa ni miaka 30 yasema mwana wa lunga jina lienyi Nahore. 23Yatwama miaka yikwo 200, yasema nawa ana akwo malunga ni mapwo.
24Muze Nahore habwa ni miaka 29 yasema mwana wa lunga, jina lienyi Tera. 25Yatwama miaka yikwo 119, yasema nawa ana akwo malunga ni mapwo.
26Muze Tera habwa ni miaka 70, yasema Abrama, ni Nahore, ni Harane.
Vungu lia Tera
27Lino lie vungu lia Tera, tato ya Abrama, ni Nahore, ni Harane. Harane mwe tato ya Lote. 28Harane yafwila mu Ure, limbo lize akolele, mu chifuchi cha Babilonia, muze te tato kanda achifwa. 29Abrama yambata Sarai. Nahore neye yambata Milka, mwana wa Harane, tato ya Iska. 30Sarai kabwile ko ni ana, mumu te mumba.
31Mba Tera yanda mwanenyi Abrama ni mujikulu wenyi Lote, mwana wa Harane, yanda nawa tembwa mwanenyi Sarai, pwo lia Abrama, yaakatuka ku limbo lia Ure mu chifuchi cha Babilonia, yaaya ku chifuchi cha Kanana. Yaaya ndoo ku limbo lia Harane, yaatunga ko. 32Muze Tera habwa ni miaka 205, yafwa kwenyi mu limbo lia Harane.
Currently Selected:
Ubutukilo 11: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
