Ubutukilo 12
12
Mwene Zambi yatambika Abrama
1Mwene Zambi yambila Abrama ngwenyi: “Katuka muno mu chifuchi che, hichika usoko we ni limbo lia tatenu, hanga uye mu chifuchi chize mungukulweza.
2Mungukakupwisa vungu linene
ni kukuwahisa.
Mungukafumanyisa jina lie,
mba muukawahisa atu akwo.
3Mungukawahisa waze maakakuwahisa,
mungukashinga waze maakakushinga.
Mungukawahisa mavungu eswe a hashi mumu hali yena.”
4Chenacho Abrama akatukile mu limbo lia Harane, yaya ngwe chize Mwene Zambi amulwezele. Lote neye yaya hamwe nenyi. Abrama te habwa ni miaka 75. 5Yanda mukwo pwo Sarai ni Lote, mwana wa mwanakwo, yanda nawa ubite weswe ni ndungo eswe waze abichile mu Harane. Mba yaakatuka, yaaya ku chifuchi cha Kanana.
Muze haaheta ku Kanana, 6Abrama yendangana mu chifuchi chize ndoo yaheta hamwe homa ha kuwayila, ku mutondo shene, jina liawo More, mu limbo lia Shekeme#12:6 shekeme kilometro 50 ku norde ya Yerusaleme.. (Ha matangwa waze akwa Kanana te kwenako atwama.) 7Mwene Zambi yasolokela Abrama nikwamba ngwenyi: “Chino che chifuchi mungukahana kuli vungu lie.” Mba Abrama yatunga chilumbilo homa haze, mumu kwenako Mwene Zambi amusolokelele. 8Mwabwamuze yaya ku sude ku milundu yize yili ku chivumbuko cha limbo lia Betele#12:8 betele kilometro 19 ku norde ya Yerusaleme.. Yajika ko zuwo lienyi lia makubu, hakachi ka Betele ku chitokelo ni Ayi #12:8 ayi kilometro 3 ku chivumbuko cha Betele. ku chivumbuko. Yatunga ko nawa chilumbilo. 9Mwabwamuze yakatuka ko, yendangana nikututujoka nikutalikisa ku sali lia sude mu Kanana.
Abrama mu Egiptu
10Mu chifuchi cha Kanana mwabwile zala yinji. Kashika Abrama yaya ku sude ndoo ku chifuchi cha Egiptu, akatwame ko. 11Muze te hakundama akanjile mu Egiptu, yambila mukwo pwo ngwenyi: “Tala, yena uli chileza ku meso. 12Muze akwa Egiptu maakumona maamba ngwo: ‘Awu pwo lienyi,’ mba mangushiha yami alioze yena ka. 13Ngunakulembe muwamba ngwe, ‘Nguli ndumbwenyi.’ Ha chino, keechi kungushiha, mungutwama kanawa mumu hali yena.” 14Muze haaheta mu Egiptu, akwa Egiptu yaamona mwe pwo kali chileza. 15Tuvumbi twa mwanangana yaamumona, yaaya ni kumulweza ngwo, pwo weza ni Abrama cho kubema! Mba yaamwanda, yaamutwala ku zuwo lia mwanangana. 16Mwanangana yalingila Abrama yibema mumu hali Sarai. Yakwaha ndungo a malunga ni a mapwo, ni ngombe, ni tumelu, ni yimbulu ni mapanga.
17Alioze Mwene Zambi yatumina mwanangana ni akwa zuwo lienyi misongo yibi mumu hatambula pwo lia Abrama. 18Mba mwanangana yatuma mutu ha kutambika Abrama. Yamuhula ngwenyi: “Kuchi hiwangulinga chibi chino? Mumu yika kuwangulwezele ngwe: ‘Sarai kali mukwetu pwo?’ 19Ngunakamutambula ha kubwa pwo liami mumu unakamba ngwe: ‘Kali ndumbwami.’ Haliabwila tambula mukwenu pwo, katukenu!” 20Mba mwanangana yambila atu jenyi hanga atuhwise Abrama ni pwo lienyi ni yuma yenyi yeswe mu Egiptu, no yaatuhwisa mo.
Currently Selected:
Ubutukilo 12: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
