Ubutukilo 25
25
Mavungu akwo a Abrahama
(Tala nawa 1 San 1:32-33)
1Abrahama yambata nawa pwo mukwo, jina lienyi Ketura. 2Yasema nenyi ana wano: Zimrane, ni Jokshane, ni Medane, ni Midiane, ni Ishbake, ni Shua. 3Jokshane yasema Sheba ni Dedane. Wano e mavungu ja Dedane: Ashurime, ni Aletushime, ni Aleumime. 4Midiane yasema ana a malunga wano: Efa ni Efere, ni Hanoke, ni Abida, ni Elda. Wano eswe te vungu lia Ketura.
5Yuma yize yeswe te abita Abrahama, yamwaha yo Isake. 6Alioze muze te Abrahama kanda achifwa, ana malunga waze asemene ni mapwo akwo, yaahaha yawana. Mba yaalweza ha kuhichika chifuchi cha Isake ni kuya ku chifuchi cha ku sali lia chivumbuko.
Abrahama yafwa, Isake ni Ishmaele yaamufunda
7-8Abrahama yatwama miaka kulakaji ni makumi shimbiali ni yitano. Yatwama miaka yinji ni yibema nawa, mba yafwa kwenyi. 9Ana jenyi, Isake ni Ishmaele, yaamufunda mu chivwenge cha Makapela, mu tungu lize liabwile te lia Efrone, mwana wa Zohare, wa ku vungu lia Hite. Tungu lize liabwile ku sali lia chivumbuko ku limbo lia Mamre. 10Tungu lize alanjile Abrahama kuli Ahite. Kwenako afunjile Abrahama ni mukwo pwo Sara. 11Muze Abrahama hafwa, Zambi yawahisa Isake. Isake te katwama hehi ni Shima lia Zambi wa Mwono Yoze Wakungumona.
Vungu lia Ishmaele
(Tala nawa 1 San 1:28-31)
12Atu wano kaali vungu lia Ishmaele. Ishmaele te mwana wa Abrahama yoze asemene ni Hagare, mukwa Egiptu. Hagare neye te ndungo ya Sara. 13Majina ja ana ja Ishmaele a malunga nikulita ni kusemuka cho wano: mwana mutangu Nebayote, ni Kedare, ni Adbele, ni Mibsame, 14ni Mishma, ni Duma, ni Masa, 15ni Hadade, ni Tema, ni Jeture, ni Nafishi, ni Kedema. 16Atu wano kaali tushakulu twa mavungu kumi ni aali. Majina jo e majina ja yihunda yo ni ye misumba yo. 17Ishmaele te habwa ni miaka kulakaji ni makumi atatu ni shimbiali, mba yafwa kwenyi. 18Vungu lia Ishmaele te kaatwama hakachi ka chifuchi cha Havila ni chihunda cha Shure, ku sali lia chivumbuko cha chifuchi cha Egiptu, ku jila ya kuya ku chifuchi cha Asuria. Te keeshi kutwama hehi ni mavungu akwo ja Abrahama.
Kusemuka cha Esau ni Yakoba
19Jino je sango ja Isake, mwana wa Abrahama. 20Isake te habwa ni miaka makumi awana muze ambachile Rebeka, ndumbu ya Labane, mwana wa Betuele. Mwe Betuele wa ku chikota cha Arameane mu chifuchi cha Mesopotamia. 21Rebeka, pwo lia Isake te mumba. Kashika Isake yaliumba kuli Mwene Zambi mumu hali iye. Neye yamwivwa, mba Rebeka yaka ufumba. 22Muze te ana a pasa analitachika mu jimo lienyi, Rebeka yamba ngwenyi: “Mumu yika Chuma chino?” Yahula Mwene Zambi ha chikuma chino. 23Neye yamukumbulula ngwenyi:
“Mavungu aali ali mu jimo lie.
Muukasema mavungu aali waze maakalitachika.
Vungu limuwika maakabwa ni tachi kuhiana likwo.
Vungu lia mukulwana maakalingila vungu lia kanuke.”
24Muze tangwa lia kusema hiliaheta, Rebeka yasema ana a pasa 25Mwana mutangu muchila, mukwa ukulukumbwa. Yaamuluka ngwo, Esau#25:25 ESAU ha kulivuluka mu hebreu linalifu ni “ukulukumbwa.”. 26Mwana wa muchaali, ha kusemuka chenyi, te kanakwata ku kashijino ka yayo Esau. Yaamuluka ngwo, Yakoba#25:26 YAKOBA ha kulivuluka mu hebreu linalifu ni “kashijino.”. Muze asemukine ana waze Isake te habwa ni miaka makumi asambano.
Esau yalanjisa wata wenyi
27Ana ja Isake yaakola. Esau yabwa yanga munene te kakwenda mu yambu. Alioze Yakoba te chihumikiji, mukwa kunamina ha chihunda. 28Isake te kakuzanga Esau kuhiana mumu ha yifwo yize akumushihila, alioze Rebeka yazanga Yakoba kuhiana.
29Limwe tangwa Yakoba te kanateleka mutato. Esau yakatuka mu yambu kuze ayile ni kuzomba, yeza, te hijamuhwa kuhiana. 30Mba yambila Yakoba ngwenyi: “Zala yinji ngunevu, ngwehe kama mutato uze uchila, ngulie kama.” (Kashika yaluka Esau jina likwo ngwo, EDOME#25:30 EDOME ha kulivuluka mu hebreu linalifu ni “uchila.”.)
31Alioze Yakoba ngwenyi: “Kuheshi Chuma, mungukwaha mutato uno nyi wangulanjisa uswana#25:31 USWANA mu Israele unalumbununa ngwo, mwana mutangu mahasa kubwa mwata wa jiko. Matambula yihanda yaali ya chihinga. we.”
32Esau ngwenyi: “Ngunafu ni zala, uswana chika muungukwasa?”
33Yakoba ngwenyi: “Achilishinge.”
Esau yalishinga, yalanjisa uswana wenyi kuli Yakoba. 34Yakoba yamwaha mbolo ni mutato. Esau yalia, yanwa, mba yaya kwenyi. Chenacho Esau alelesele wata wenyi.
Currently Selected:
Ubutukilo 25: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
