Ubutukilo 26
26
Isake yatunga mu limbo lia Gerare mba mu limbo lia Bersheba
1Mu chifuchi yimubwa nawa zala, ngwe yize yabwile ha matangwa ja Abrahama. Mba Isake yaya maha Abimeleke, mwanangana wa Afilistia, yoze te watwama mu limbo lia Gerare#26:1 ABIMELEKE… Gerare tala 20:2. . 2Mwene Zambi hanalisolola kulu kuli Isake ni kumwamba ngwenyi: “Kanda uya ku chifuchi cha Egiptu, alioze twama mu chifuchi chino. 3Twama hano, mungubwa hamwe ni yena, mungukuwahisa. Mungukwaha chifuchi chino cheswe, yena ni vungu lie. Mungukakolesa Shingo lize nalishingile ni tatenu Abrahama. 4Mungukakupwisa vungu linene, ngwe matongonoshi a mwilu. Mungukaaha chifuchi chino cheswe. Ku vungu lie mungukawahisa mavungu akwo eswe, 5mumu Abrahama wangwononokenene, wafungile Shimbi jami.”
6Mba Isake yatunga mu Gerare. 7Malunga a mu limbo lize yaahula Isake hakutwala kuli mukwo pwo. Neye yaamba ngwenyi: “Kali ndumbwami.” Mumu yevwa woma hanji malunga waze maamushiha, mba maatambula Rebeka, mumu te kali chileza ku meso. 8Isake te hatwama kulu matangwa anji mu Gerare. Limwe tangwa Abimeleke, mwanangana wa Afilistia, te kanatalila ha kapenda, yamona ngwenyi Isake kanahehe ni Rebeka. 9Mba Abimeleke yatambika Isake, yamuhula ngwenyi: “Yono kali mukwenu pwo, nyi? Kuchi mba unakamba ngwe: ‘Kali ndumbwami?’ ”
Isake ngwenyi: “Ngunakanyonga ngwami, munungushiha nyi namba ngwami, kali mukwetu pwo.”
10Abimeleke ngwenyi: “Kuchi mba watulinga chichize? Nyi umwe wa kuli yetu unakalimona nenyi, te muutwamba ngwe: ‘Kali atu abi,’ alioze kuma mulonga uno uli wa yena mwene.” 11Abimeleke yambila atu eswe ngwenyi: “Nyi umwe wamwesa lamba mutu yono ni mukwo pwo, mutu yoze chamutamba kufwa.”
12Isake yalima minda mu chifuchi chize. Mwene Zambi yamuwahisa, mba ha mwaka uzewene minda yenyi yiyima mbuto yinji kuhiana. 13Isake yalibichisa ndoo yabwa pichi munene. 14Afilistia yaamuvwila chipululu mumu yabwa ni mapanga ni ngombe ni ndungo anji. 15Kashika Afilistia yaashikila mashima ja meya eswe waze Abrahama, tato ya Isake, afulile ni ngamba jenyi.
16Mba Abimeleke yambila Isake ngwenyi: “Katukenu mu chifuchi chetu. Hinwatuhiana tachi.” 17Mba Isake yakatuka mu chifuchi chize, yaya ni kutunga mu chana cha Gerare. 18Abrahama, ha matangwa jenyi, yafula mashima a meya. Alioze muze hafwa, Afilistia yaashikila. Mba Isake yaashikulula nawa, yaaluka majina waze ene aalukile tato.
19Ngamba ja Isake yaafula shima likwo mu chana chize, yaawana shima libema liakuvelwoka. 20Tufunga twa Gerare yaazwelesa tufunga twa Isake ngwo: “Shima lino ni lietu.” Kashika Isake yaluka shima lize ngwenyi; Kuzwela, mumu amuzwelesele.
21Ngamba ja Isake yaafula nawa shima likwo. Afilistia yaalizwelela nawa. Isake yaliluka jina ngwenyi, Kole. 22Neye yakatuka ko, yaya ni kufula likwo. Chisuho chino Afilistia kaazwelesele ko nawa. Kashika yaliluka jina ngwenyi, Chihela Chinene, mumu yamba ngwenyi: “Haliabwila mba Mwene Zambi hatwaha chihela chinene mu chifuchi chino, kuma mututwama kwetu kanawa.”
23Isake yakatuka ko, yaya ku limbo lia Bersheba#26:23 BERSHEBA tala 22:19. 24Ha ufuku uzewene Mwene Zambi yamusolokela, yamwamba ngwenyi, “Kanda wivwa woma. Nguli Zambi ya tatenu Abrahama, nguli hamwe ni yena. Mungukakuwahisa, mungukokesa vungu lie mumu hali kavumbi kami Abrahama.”
25Isake yatunga ko chilumbilo, mba yawayila Mwene Zambi. Homa haze yajika ho zuwo lienyi lia makubu, ni ngamba jenyi yaafula shima likwo lia meya.
Isake ni Abimeleke yaakolesa Usendo
26Abimeleke yakatuka ku limbo lia Gerare, hamwe ni mukwa kuyula, Ahuzata, ni mwata wa tujita twenyi Fikole, yeza ni kunangisa Isake. 27Isake yaahula ngwenyi: “Kuchi, nuneza ni kungunangisa, nyi? Ngwami, te nwakunguvwila kole yinunguhuma mu chifuchi chenu.”
28Ayo ngwo: “Mumu hitwamona ngwetu, Mwene Zambi kali hamwe ni yena. Kashika twanyonga ngwetu, chinalite tukalikunde ni Shingo hakachi ka yetu ni yena tukakolese Usendo. 29Tunazange ulishinge ngwe, kuuchi kutulinga chibi, ngwe chize yetu kutwakulingile ko chibi. Twakulingile kanawa, yitwamba ngwetu, yako ni sambukila. Haliabwila chinamoneka zwalala Mwene Zambi hanakuwahisa.” 30Isake yaalingila chiwanyino. No yaalia, yaanwa. 31Yaalimeneka chichamene, yaalishinga. Mba Isake yaalishika no, no yaakatuka ni sambukila.
32Ha tangwa lizeliene ngamba ja Isake, waze te anafulu shima lia meya, yeeza ni kumulweza ngwo: “Hitwawana meya.” 33Isake yaluka shima lize ngwenyi, Sheba. Kashika akuvuluka limbo lize ngwo, Bersheba#26:33 BERSHEBA mu hebreu linalumbunuka ngwo: “Shima lia Kulishinga” hanji “Shima lia Shimbiali” (tala 21:31)..
Esau yambata mapwo a mavungu
34Esau te habwa ni miaka makumi awana muze ambachile mapwo aali Ahite: Judite, mwana wa Beri, ni Basemate, mwana wa Elone. 35Mapwo wano aali yeevwisa Isake ni Rebeka chinyengo chinji.
Currently Selected:
Ubutukilo 26: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
