Ubutukilo 47
47
1-2Mba Josefe yaya ni ayayo atano maha mwanangana, ngwenyi: “Vulie mwanangana! Tata ni ayaya haakatuka ku chifuchi cha Kanana, heeza ni yimuna yo ni yuma yo yeswe. Haatulila mu chifuchi cha Goshene.” Mba yaasolola kuli mwanangana. 3Mba mwanangana yaahula ngwenyi: “Milimo yenu yika?”
Ayo ngwo: “Vulie mwanangana! Twakufunga yimuna ngwe chize te akulinga akaka. 4Kutwejile kuno chamokomoko. Ku Kanana zala yinji yiliko ni yakulia yakuhi hakulisa yimuna yetu. Twalemba mwanangana, tutayizenu tutwame kwetu mu Goshene.” 5-6Mwanangana yambila Josefe ngwenyi: “Muze tatenu ni ayayenu heeza kulu kuli yena, chifuchi cha Egiptu cheswe chili nicho. Atwame kwo homa habema mu Goshene. Chikwo, nyi wamona ngwe kuli nawa amwe akwa tachi, waalweza hanga akangufungile yimuna ya yami mwene.”
7Mba Josefe yeza ni tato ha kumusolola ku meso ja mwanangana. Yakoba ya wahisa mwanangana. 8Mwe mwanangana yamuhula ngwenyi: “Uli ni miaka yingahi?”
9Yakoba ngwenyi: “Miaka ya kwendangana chami yili kulakaji ni makumi atatu. Miaka ya tata ni akaka te yinji alioze ya yami yili yikepe ni ya lamba.” 10Yakoba yawahisa nawa mwanangana mba yaya kwenyi. 11Hohene Josefe yatungisa tato ni ayayo ku Ramesese, chifuchi chibema kuhiana cha mu Egiptu, ngwe chize ambile mwanangana. 12Josefe yamwaha tato yakulia hamwe ni ayayo ni akwa jiko lia tato, nikulita ni ana jo.
Milimo ya Josefe ha miaka ya zala yinji
13Zala yiibwa yinji, yaahona yakulia mu chifuchi cheswe. Chenacho akwa Egiptu ni akwa Kanana alekumukine ni zala. 14Josefe yatambula mbongo jeswe ja akwa Egiptu ni ja akwa Kanana, jize te akuneha ha kulanda yakulia, yajitwala twala maha mwanangana. 15Muze akwa Egiptu ni akwa Kanana mbongo jo hijahwa ja kulanda najo yakulia, akwa Egiptu yeeza ni kuhanjika ni Josefe ngwo: “Vulie mwane! Mbongo jetu hijahwa. Kuchi, tufwe lume ni zala, nyi? Twehenu yakulia?”
16Josefe ngwenyi: “Nyi mbongo jenu hijahwa nehenu yimuna yenu, mba ngunulanjise yakulia.” 17No yaaneha neha yimuna yo: tuvwalu, ni mapanga, ni pembe, ni ngombe, ni yimbulu, mba Josefe yaalanjisa yakulia. Ha mwaka uze atu yaasumbakenya yimuna yo ni yakulia kuli Josefe.
18Mwaka wasulile ko yaalweza Josefe ngwo: “Mwanangana, kutwahashile kunuswekela Chuma nichimwe, mbongo jetu hijahwa, yimuna yetu hiyabwa niyenu, kutwasalile nawa ni Chuma cha kuwaha shina yetwene ni minda yetu. 19Nunazange tufwe ni zala, nyi? Twalemba tukwasenu kama mwanangana. Kanda tufwa, minda yetu yilisalile. Twandenu ni ye minda yetu mumu ha yakulia. Tubwe kwetu ndungo ja mwanangana, ni ye minda yetu yibwe niyenyi. Twalemba, twehenu yakulia ni mbuto ya kutumba mu minda yetu.”
20Josefe yalanjila mwanangana chifuchi cheswe cha Egiptu. Akwa Egiptu eswe yaalanjisa minda yo, mumu zala yabwile naye yinji. Mba chifuchi cheswe yichibwa cha mbala cha mwanangana. 21Akwa Egiptu eswe Josefe yaapwisa ndungo. 22Shina lume mahako a Zambi, enoo kaalanjishile ko minda yo, mumu te mwanangana kaakwahoka. 23Josefe yambila atu ngwenyi: “Nwamona, haliabwila hinanulanda ni ye minda yenu, hinwabwa a mbala a mwanangana. Tambulenu mbuto ya kutumba. 24Muze munukahela mbuto mu minda, Chihanda chimuwika cha ku yihanda yitano chanutamba kuchilambula kuli mwanangana. Yize muyikasala, yikwo munukatumba mu minda yenu, yikwo munukalia hamwe ni ana jenu.”
25Ayo ngwo: “Vulie mwanangana! Nwatulamwina, nwatulinga yibema. Kuheshi Chuma, mutubwa kwetu ndungo ja mwanangana.” 26Mba Josefe yahana Shimbi mu chifuchi cheswe cha Egiptu ngwenyi: Ku mbuto yeswe ya mu minda, Chihanda chimuwika cha ku yihanda yitano cha mbala cha mwanangana. Ye Shimbi kuyili ndoo ni musono uno. Shina chifuchi cha mahako a Zambi mwanangana kalanjile ko.
Yakoba yashika Josefe akamufunde mu Kanana
27Aisraele yaatwama mu chifuchi cha Goshene mu Egiptu, yaabita kuhiana ni yaasema ana anji. 28Yakoba yatwama mu Egiptu miaka kumi ni shimbiali, ndoo ni muze abwile ni miaka kulakaji ni makumi awana ni shimbiali. 29Muze Israele hamona ngwenyi, nguli hakamwihi ni kufwa, yatambika mwanenyi Josefe, yamwamba ngwenyi: “Mwanami, sako kwoko lie mu molu jami, ulishinge ngwe, kuuchi kangufunda muno mu chifuchi cha Egiptu. 30Nyi nafwa, uya ukangufunde ku mafuka ja akaka.”
Josefe yakumbulula ngwenyi: “Mungulinga ngwe hiwamba.”
31Israele ngwenyi: “Lishinge ngwe: ‘Munguchilinga.’ ” Josefe yalishinga Zambi, mba Israele yahetamina ha muhela wenyi#47:31 ha muhela wenyi mu greke “Ha lukanda wenyi.” nikuwayila Zambi.
Currently Selected:
Ubutukilo 47: CHK1970
Highlight
Copy
Compare
Share
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
