Ubutukilo 50
50
1Josefe yalingila ha mujimba wa tato, yalila, yashisa huma lia tato. 2Mwabwamuze Josefe yalweza mbuki jenyi ha kukwita mujimba wa tato yitumbo, kuchina mabola. E mbuki yachilinga. 3Yamukwita yo matangwa makumi awana nikulita ni ndako yo. Akwa Egiptu yaalila Yakoba matangwa makumi shimbiali.
4Muze matangwa akulila tato haamanunuka, Josefe yambila akwa lutwe a mwanangana ngwenyi: “Nalemba, nyi nunazange, yeenu nulweze mwanangana ngwami, 5muze te tata himamba kufwa namulakenyene ngwami: ‘Nyi wafwa, mungukakufunda mu fuka lize wafulile yena mwene mu chifuchi cha Kanana. Kashika ngwehe jila nguye ngukafunde tata, mba mungukahiluka.’ ”
6Mwanangana ngwenyi: “Yenu numwambulwile ngwenu, kuheshi Chuma, yako ukafunde tatenu ngwe chize wamushikile.”
7Mba Josefe yaya ni kufunda tato. Akwa lutwe a mwanangana eswe, ni makulwana, ni alemu eswe a mu Egiptu yaaya hamwe nenyi. 8Akwa jiko lia Josefe, ni ayayo, ni akwa jiko lia tato, eswe yaaya. Shina lume ana akemba, ni mapanga, ni pembe, ni ngombe, eno asalile mu chifuchi cha Goshene. 9Matemba ni enya tuvwalu, no nawa yaaya hamwe ni Josefe; yaabwa mbunga yinene.
10Muze haaheta ku utwilo wa Atade ku chivumbuko cha lwiji Yordau, yaalila mbimbi kuhiana shimbu lisuku. Mba iye mwene Josefe yatwama ha tanda ya tato matangwa shimbiali. 11Muze akwa Kanana haamona kulila cho ku Atade, yaamba ngwo: “Talenu chize akwa Egiptu akulila afu jo.” Mba yaaluka ko ngwo, Abele Mizraime#50:11 ABELE MIZRAIME mu hebreu ha kulivuluka linalifu ni “kulila cha akwa Egiptu.”.
12Ana ja Yakoba yaalinga ngwe chize ashikile tato. 13Yaamutwala mu chifuchi cha Kanana, yaamufunda mu chivwenge chize chili ku Makapela, ku sali lia chivumbuko cha limbo lia Mamre, mu tungu lize alanjile Abrahama kuli Efrone, wa ku vungu lia Ahite, ha kubwa ni kufunda mo afu. 14Muze Josefe hafunda tato, iye ni ayayo ni waze eswe ayile no, yaahiluka ku Egiptu.
Josefe yatakamisa ayayo
15Muze Yakoba hafwa kwenyi, ayayo ja Josefe yaalihanjikisa ngwo: “Ayenwe, Josefe kechi kutuvwila kole ni kutumwesa lamba ha chize twamulingile, nyi?” 16Mba yaatumina Josefe liji ngwo: “Tatenu muze te kanda achifwa, yatushika ngwenyi: 17‘Nukalweza Josefe ngwenu: Tukonekene kama mumu ha yibi yize twakulingile.’ Kashika tunakulembe, utuvwile kama keke, yetu ndungo ja Zambi ya tatenu.” Muze Josefe hevwa maliji waze, yabutuka kulila.
18Mba e ayayo yeeza ni kufulamana ku meso ja Josefe. Yaamba ngwo: “Talenu, yetu tuli ndungo jenu.”
19Alioze Josefe yaamba ngwenyi: “Mala, kanda nwivwa woma! Yami nguli Zambi, nyi? 20Yenu nwalivwishile ha kungulinga yibi, alioze yibi yize Zambi hanayipwisa yiwape ya kulamwina atu anji waze ali ni mwono musono. 21Alioze kanda nwivwa tuhu woma. Mungunufunga kanawa hamwe ni ana jenu.” Chenacho aalembejekele mba mbunge jo yijihwima.
Kufwa cha Josefe
22Josefe yanyongonona mu chifuchi cha Egiptu ni akwa jiko lia tato. Yaheta ku miaka kulakaji ni kumi. 23Yamona ana ja Efraime ni ajikulu jenyi. Yamona nawa ana ja Makire, mwana wa Manase, yaatambula ha kubwa ana jenyi. 24Josefe yambila ayayo ngwenyi: “Talenu, himungufwa, alioze ngunanyingika ngwami, Zambi makanufunga ni makanutuhwisa mu chifuchi chino, makanuhilwisa mu chifuchi chize alakenyene Abrahama, ni Isake, ni Yakoba.” 25Mba Josefe yashingisa ana ja Israele ngwenyi: “Lishingenu ngwenu, muze Zambi makanutwala mu chifuchi chize, munukambata mujimba wami nikuya nawo.” 26Mba Josefe yafwa kwenyi, te habwa ni miaka kulakaji ni kumi. Yaamukwita yitumbo kuzekwene ku Egiptu kuchina mabola, mba yaamusa mu mushete.
Currently Selected:
Ubutukilo 50: CHK1970
Highlight
Copy
Compare
Share
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
