WƖAA DƖ-SUOMUŊ 43

Jekɔb biiriŋ bɩra mɩɩra mʋ Ijipiti tinteeŋ

1Losuŋ wasa jʋʋ Kɛnaŋ tinteeŋ. 2Jekɔb arɩ ʋ dɩa nɩaa sɩ dii kuori-mɩa-la ba sɩ yɔbɔ a lɩɩ Ijipiti tinteeŋ kʋ dɛrɛ, ŋɩɩ nɛ Jekɔb bɩra bʋla pɩ ʋ biiriŋ, “Má mɩɩra mʋ Ijipiti tinteeŋ a bɩra yɔɔ kʋdiilee mʋa kaa kɔ dɩ la pɛ la tɩtɩa lɛ.”

3Ŋɩɩ nɛ Juda bʋla pɩ ba nyɩmma, “Kʋhɩaŋ-la sɩɩ beŋ lee-la chaasa bʋla pɩla arɩ la nɛ bɩ la ŋaana kaa kɔ, ʋ bɩra bɩ jaŋ beŋ la sɩaa lɛ, see dɩ la ŋaana guoli la tʋɔŋ.” 4Dɩ ŋ nɛ jaŋ leŋ dɩ la ŋaana to la harɩŋ, ŋɩɩ-na la jaŋ mʋ yɔɔ kʋdiilee kʋ pɩŋ. 5Ama dɩ ŋ nɛ bɩ jaŋ sɛɩ dɩ ʋ to la harɩŋ mʋ, la ma bɩ jaŋ mʋ, bɛɛ wɩaa baal-la chaasa bʋla pɩla arɩ ʋ bɩ jaŋ beŋ la sɩaa lɛ, see dɩ la ŋaana guoli la tʋɔŋ.

6Ŋɩɩ nɛ Iziral pɩɛsɛ, “Bɛɛ wɩɩ nɛ ma lɔgɛ hɛ mɩ lɛ ŋ-la? Ma ŋaa ɛɛ nɛ a bʋla pɩ baal-la arɩ ma ha kɛŋ naambii nɛ?”

7Ŋɩɩ nɛ ba bʋl, “Baal-la chaasa pɩɛsɛla wɩaa nɛ woruŋ a tɩgɛ la dɩa nɩaa lɛ. Ʋ pɩɛsɛla, ‘Ma nyɩmma ha hɛ ʋ mɩɩsɩŋ lɛ nɛɛ? Ma ha kɛŋ naambii dɔŋ nɛɛ?’ Ʋ sɩ pɩɛsɛla wɩalɩŋ kala nɛ la daga pʋ. Ɛɛ nɛ la jaŋ ŋaa jɩŋ arɩ ʋ jaŋ bʋl dɩ la to kɛŋ la ŋaana kɔ?”

8Ŋɩɩ nɛ Juda bʋla pɩ ʋ nyɩmma Iziral, “Leŋ dɩ bile to la harɩŋ dɩ la mʋ, dɩ losuŋ sɩ́ la dɩ la biiriŋ kala kpʋ. 9Joŋ bile hɛ mɩ nɩsɩŋ lɛ, mɩ jaŋ pɔ dɩ wɩɩkala sɩ́ ʋ dʋa, ka dɩ mɩ mɩɩra kɛnʋ kaa kʋ hɛ ŋ nɩsɩŋ lɛ. Dɩ mɩ nɛ bɩ ʋ kaa kɔ, mɩ jaŋ sɛɩ a laa cheeriŋ a kaa mʋ wuu. 10Faafaa-la kala la sɩ bʋla, dɩ ŋ nɛ fa sɛyɛ, ŋ-la la fa vɛŋ lee-la bʋlɩa.”

11Ŋɩɩ nɛ ba nyɩmma Iziral bʋla pɩba, “Dɩ ŋ-la nɛ jaŋ chɩŋ, má leŋ dɩ la chɛ la tinteeŋ tɩɩ-nɛŋ-zɔŋŋɔɔ, tʋʋŋ mʋa, tɩɩ-kel-sʋɔrʋsʋŋ arɩ kʋdiilee tegisiŋ a kaa mʋ pɩ baal-la. 12Má joŋ moribii-la ma fa sɩ laa sɩpaaŋ kaa mʋ yɔɔ kʋdiile-la magɛ ŋɩɩ bʋlɩa, bɛɛ wɩaa moribie-la sɩ hɛ ma bɔtɔba tʋɔŋ ma kaa mɩɩra kɔ, ŋ bɩ pɔ ba perige nɛ. 13Má to kɛŋ ma ŋaana mʋ baal-la teeŋ lɩma. 14La TƖƖNA Wɩɩjarɩbakɔ jaŋ pɛ ma lɛ a leŋ dɩ baal-la leŋ dɩ ma kɛŋ ma naambiiriŋ Bɛnjamɩŋ arɩ Simioŋ mɩɩra kɔ arɩ yarɩfɩɛlaa. Mɩ-na ŋ-la, dɩ mɩ biiriŋ deemba nɛ tuo, ba tuo nɛ.”

15Ŋɩɩ nɛ ba to joŋ chɔgɩtaba-la a kɛŋ Bɛnjamɩŋ a joŋ moribii-la ma ba fa sɩ laa sɩpaaŋ kaa mʋ yɔɔ kʋdiile-la magɛ ŋɩɩ bʋlɩa a mʋ Josɛf teeŋ Ijipiti tinteeŋ lɛ. 16Josɛf sɩ na Bɛnjamɩŋ ba tʋɔŋ, ŋɩɩ nɛ ʋ bʋla pɩ ʋ dɩa tɩntɩnna, “Kɛŋ nɩaa deemba kaa mʋ mɩ dɩa. Ba jaŋ dii kʋdiilee mɩ dɩa lɛ wɩɩhɛyɛ deeŋ. Kpʋ pʋna a ŋaa kʋdiile-la.”

17Ʋ dɩa tɩntɩnnʋ-la kɛŋ nɩalɩŋ kaa mʋ Josɛf dɩa arɩ ʋ sɩ bʋl ŋɩɩ. 18Ʋ sɩ kɛmba kaa mʋ Josɛf dɩa ŋɩɩ, fawʋllʋŋ kɛmba. Ba bɩɩna arɩ moribie-la ba fa sɩ joŋo hɛ ba bɔtɔba tʋɔŋ wɩaa nɛ. Ba bɩra bɩɩna baa chɛ dɩ ba na wombiiŋ a dii doluŋ ba lɛ a laa ba kakusuŋ aŋ kɛmba ŋaa yosi.

19Ba sɩ kʋ yi Josɛf dɩa boiŋ niiŋ, ba bʋla pɩ ʋ dɩa tɩntɩnnʋ-la, 20“La laa sɩpaaŋ kɔ daha nɛ a yɔɔ kʋdiilee. 21La sɩ yɔɔ kʋdiile-la a mʋmʋ dɩa a chʋa wombiiŋ lɛ, la suri la bɔtɔba, la kʋŋkala na moribii-la la sɩ kaa kʋ yɔɔ kʋdiile-la hɛ la bɔtɔba tʋɔŋ. La mɩɩra kɛŋ moribie-la kaa kɔ nɛ. 22La kɛŋ moribiiŋ ma kɔ nɛ dɩ la yɔɔ kʋdiilee. La bɩ jɩŋ nɩɩ-la fa sɩ joŋ moribie-la hɛ la bɔtɔba tʋɔŋ.”

23Ŋɩɩ nɛ ʋ bʋla pɩba, “Ʋʋ magɛ nɛ. Ma Wɩa arɩ ma nyɩmma Wɩa nɛ joŋ dʋa a hɛ ma bɔtɔba tʋɔŋ. Ma fa joŋ ma moribiiŋ pɩmɛ nɛ. Má sɩ́ leŋe dɩ fawʋllʋŋ kɛmma.” Ŋɩɩ nɛ ʋ kɛŋ Simioŋ kaa kʋ lɩɩ pɩba.

24Josɛf dɩa tɩntɩnnʋ-la kɛmba jʋʋ Josɛf dɩa a ŋaa lɩɩŋ pɩba ba sɔŋ ba naasɩŋ a pɩba kʋdiilee ma ba pɩ ba kakusuŋ. 25Ba joŋ kɩalɩŋ kala ba fa sɩ kaa kɔ dɩ ba pɩ Josɛf chɔgɩta hɛ dɔŋɔ lɛ gbɛrʋ, bɛɛ wɩaa ba nɩa arɩ ba jaŋ dii wɩɩhɛyɛ kʋdiilee Josɛf dɩa lɛ.

26Josɛf sɩ kɔ dɩa, kɩalɩŋ ba sɩ kaa kɔ dɩ ba pʋ chɔgɩta, ba kaa jʋʋ kpirime pʋ. 27Ʋ pɩɛsɛ ba yarɩfɩɛlaa wɩaa, aŋ bʋl, “Ma nyɩmma banɩhɩaŋ-la wɩaa ma sɩ bʋla doliee? Ʋ ha hɛ ʋ mɩɩsɩŋ lɛ nɛɛ?” 28Ŋɩɩ nɛ ba bʋl, “Ŋ tɩntɩnna, la nyɩmma ha hɛ ʋ mɩɩsɩŋ lɛ nɛ a dol,” aŋ tuu kpirime chʋɔlʋ.

29Ʋ sɩ na Bɛnjamɩŋ ʋ naambie, ŋɩɩ nɛ ʋ pɩɛsɛba, “Ma naambile wɩaa ma sɩ bʋla nɛ ŋ-la? Wɩa jaŋ pɛ ŋ lɛ mɩ bii.” 30Josɛf sɩ na ʋ naambie, ʋ tʋɔŋ wɩɩ ʋ lɛ, sɩlɩɩrɩŋ chal ʋ sɩaa lɛ, ʋ fá jʋʋ ʋ dɩa a yel.

31Ʋ sɩ yele dɛrɛ, ʋ sɔŋ ʋ sɩaa aŋ kɛŋ ʋ tɩtɩa hɛ dɔŋɔ lɛ, ʋ kʋ lɩɩ ŋaa ba kpaa kʋdiilee.

32Ba ŋaa Josɛf kʋdiilee pʋ, aŋ ŋaa ʋ naambiiri-la ma kʋŋkala kɩaa pɩba, aŋ ŋaa pɩ Ijipiti tɩmma-la ma. Ba bɩ joŋo hɛ dɔŋɔ, bɛɛ wɩaa Ijipiti tɩŋŋaa sɩɩŋ jʋʋ Hiburu tɩŋŋaa nɛ ba bee lileeniba. 33Ba hɔŋ a kɩɛla kpagɛ Josɛf a chɩŋ kʋhɩaŋ lɛ a mʋ dɛrɛ kʋbie lɛ. Ʋ ŋɩɩ ŋaaba wʋkpuŋkpere, ba hɔŋ aŋ bibeŋ dɔŋɔ. 34Dɩ ba nɛ ŋaa kʋdiilee hɛ Josɛf gbaŋa lɛ, dɩ ba kpaa, Bɛnjamɩŋ kɩaa nɛ yie yʋgɛ a kɩɩ kʋkaanaa kala naansɩɩŋ bʋnɔŋ. Ba dii aŋ nyʋa kʋnyʋalaa halɩɩ. Ba tʋɔŋ kala tɔrɛ Josɛf nyuŋ.

Currently Selected:

WƖAA DƖ-SUOMUŊ 43: SIS

Highlight

Copy