WƖAA DƖ-SUOMUŊ 44

Nyʋnyʋala sɩ hɛ Bɛnjamɩŋ bɔtɔ tʋɔŋ

1Ŋɩɩ nɛ Josɛf bʋla pɩ ʋ dɩa tɩntɩnna, “Ŋaa kʋdiilee hɛ nɩalɩŋ bɔtɔba lɛ dɩ ba su a magɛ ŋɩɩ ba sɩ jaŋ wuo chʋŋ a pɛ joŋ nʋʋkala moribiee ma hɛ ʋ bɔtɔ tʋɔŋ. 2Joŋ mɩ nyʋnyʋala-la ba sɩ kɛŋ hɔpʋla ŋaa a hɛ ba tʋɔŋ kʋbie bɔtɔ tʋɔŋ aŋ pɛ joŋ ʋ moribie-la ma ʋ sɩ kaa kɔ dɩ ʋ yɔɔ kʋdiilee ma hɛ.” Josɛf dɩa tɩntɩnnʋ-la ŋaa ŋɩɩ ʋ sɩ daga.

3Taŋ sɩ pʋlaa kɔ, nɩalɩŋ lɩɩ kɛsɛ ba kakusuŋ a joŋ ba wombiiŋ. 4Nɩalɩŋ sɩ lɩa, ba ha bɩ dɩ-bolii mʋa, ka Josɛf tiŋ ʋ dɩa tɩntɩnna a bʋl, “Kiri nɩalɩŋ harɩŋ lɩma. Dɩ ŋ nɛ puuba, pɩɛsɛ ba, ‘Bɛɛ nɛ tɩɩ ma joŋ wʋbɔmʋŋ tiŋ wʋzɔmʋŋ lɛ? 5Bɛɛ nɛ tɩɩ ma gaa joŋ mɩ kʋhɩaŋ nyʋnyʋala? Ʋ nɛ ʋ kaa nyʋa lɩɩŋ aŋ pɛ kaa bee na wɩaa. Wʋbɔŋ nɛ ma ŋaa ŋɩɩ.’ ”

6Josɛf dɩa tɩntɩnnʋ-la sɩ puuba, wɩaa deemba nɛ ʋ pɩɛsɛba. 7Ŋɩɩ nɛ ba bʋla pʋ, “Bɛɛ nɛ tɩɩ la kʋhɩaŋ bʋl wɩɩŋ deeŋ? Wɩa bɩ jaŋ sɛɩ dɩ la ŋaa wɩɩŋ deeŋ doho. 8La sɩ kʋ yɔɔ kʋdiilee ma teeŋ a kaa mʋ Kɛnaŋ tinteeŋ, a na moribie-la la sɩ joŋo yɔɔ kʋdiile-la la bɔtɔba tʋɔŋ, la mɩɩra kaa kɔ nɛ. Bɛɛ nɛ jaŋ tɩɩ dɩ la gaa hɔpʋla koo sɛlɩmɛ ŋ kʋhɩaŋ dɩa lɛ? 9La ŋaa ŋ tɩntɩnnaa nɛ, dɩ ŋ nɛ naʋ la kʋŋkala teeŋ, leŋ dɩ tɩɩna sʋʋ, ka dɩ la kʋkaanaa ŋaa ŋ yosi, la kʋhɩaŋ.”

10Ŋɩɩ nɛ ʋ bʋl, “Ʋ zɔmɔ, mɩ jaŋ ŋaa ŋɩɩ ma sɩ bʋla. Nɩɩ-la kala teeŋ mɩ sɩ na nyʋnyʋala-la nɛ jaŋ ŋaa mɩ yomo, ka ma kʋkaanaa wiesi.”

11Ŋɩɩ nɛ ba kʋŋkala chʋgɛ ʋ bɔtɔ bil tinteeŋ lɩma lɩma a kaa puri. 12Ŋɩɩ nɛ Josɛf dɩa tɩntɩnnʋ-la suomo gbigbilli bɔtɔba-la. Ʋ suomi ba tʋɔŋ kʋhɩaŋ lɛ nɛ a gbilli ŋɩɩ a mʋ yi ba tʋɔŋ kʋbie Bɛnjamɩŋ lɛ, a na nyʋnyʋala-la ʋ bɔtɔ tʋɔŋ. 13Wɩɩŋ deeŋ leŋ ba tʋɔŋ chei. Ba kɩɛsɛ ba gɛnnɩŋ aŋ paa ba chʋgʋsʋŋ vɔɔ ba kakusuŋ lɛ a mɩɩra mʋ tabal-la ba sɩ lɩa.

14Josɛf ha hɛ dɩa lɛ nɛ, dɩ Juda arɩ ʋ naambiiriŋ nɛ mɩɩra kʋ jʋʋ ŋɩɩ a tuu titel tinteeŋ ʋ sɩpaaŋ. 15Ŋɩɩ nɛ Josɛf pɩɛsɛba, “Wʋbɛɛ nɛ ma ŋaa ŋ-la? Ma bɩ jɩŋ arɩ mɩ-na dɔŋɔ tɩɩna sɩ magɛ ŋ-la jaŋ wuo chɛ nɩna wɩaa?”

16Ŋɩɩ nɛ Juda bʋl, “Kʋhɩaŋ, wʋbɛɛ nɛ la jaŋ bʋla pɩŋ? Wʋbɛɛ nɛ la jaŋ bʋl? Wʋbɛɛ nɛ la jaŋ bʋla laa la tɩtɩa? Wɩa na la ŋaa wɩɩ-la chei nɛ. Lɛɛlɛ, la kala ŋaa ŋ yosi nɛ, la dɩ nɩɩ-la kala teeŋ ba sɩ na nyʋnyʋala-la.”

17Ŋɩɩ nɛ Josɛf bʋl, “Ma sɩ bɩɩna mɩ jaŋ ŋaa wɩɩŋ deeŋ, nɩɩ-la teeŋ mɩ sɩ na nyʋnyʋala-la dʋndʋŋa nɛ jaŋ ŋaa mɩ yomo. Ma kʋkaanaa jaŋ wuo mɩɩra mʋ ma nyɩmma teeŋ.”

18Ŋɩɩ nɛ Juda sʋʋsa yi Josɛf a bʋl, “Mɩ kʋhɩaŋ, mɩɩ chɛ dɩ mɩ bʋl wɩɩ nɛ a pɩŋ. Mɩ jɩma, ŋ dɩ Ijipiti tinteeŋ kuoro dɩchɩnɩŋ kala magɛ dɔŋɔ nɛ, ama sɩ́ baanɩŋ na mɩ-na ŋ tɩntɩnna nyuŋ a tɩŋ wɩɩ-la mɩ sɩɩ chɛ dɩ mɩ bʋl ŋ lɛ. 19La nɩhɩaŋ, ŋ pɩɛsɛla arɩ la nyɩmma ha hɛ ʋ mɩɩsɩŋ lɛ nɛɛ? A bɩra pɩɛsɛla arɩ la ha kɛŋ naambii dɔŋ ma nɛɛ? 20Ŋɩɩ nɛ la bʋl, ‘Oo, la nyɩmma ŋaa banɩhɩaŋ nɛ, ʋ kɛŋ hambolibii-bie nɛ ʋ sɩ hɩɛsa aŋ lʋl. Bile malɩma sʋba nɛ aŋ ka ʋ dʋndʋŋa ʋ naambiiriŋ tʋɔŋ. Ʋ nyɩmma saa chou nɛ woruŋ.’

21Ŋɩɩ nɛ ŋ bʋla pɩla, ‘Ma kɛnʋ kɔ mɩ teeŋ dɩ mɩ naʋ arɩ mɩ sɩɩŋ.’ 22Ŋɩɩ nɛ la bʋla pɩŋ, ‘Bile bɩ ʋ nyɩmma bʋbʋɔŋ wuo sʋʋsɛ, dɩ ʋ nɛ sʋʋsɛ ʋ nyɩmma bʋbʋɔŋ, ʋ nyɩmma jaŋ sʋʋ.’ 23Ka ŋ ha bʋl, ‘Dɩ ma bɩ ma ŋaambie kaa kɔ, ma bɩ mɩ sɩpaaŋ wuo chɩŋ.’ 24Ŋɩɩ harɩŋ la sɩ mɩɩra mʋ la nyɩmma teeŋ, la bʋl wɩalɩŋ kala ŋ sɩ bʋla pɩla pʋ nɛ.

25Ŋɩɩ nɛ la nyɩmma bʋl, see dɩ la ha bɩra mʋ a yɔɔ kʋdiilee mʋa kaa kɔ. 26Ama la bʋla pʋ, ‘La bɩ jaŋ wuo mʋ see dɩ la naambie to la harɩŋ mʋ. Dɩ la naambie bɩ la harɩŋ to mʋ, ka dɩ la mʋ ma, la bɩ jaŋ wuo mʋ ʋ sɩpaaŋ.’

27La nyɩmma ma bʋla pɩla, ‘Ma jɩma, mɩ haala lʋl hambolibiisiŋ balɩa nɛ pɩmɛ, 28dɔŋɔ lɛl mɩ nɩsɩŋ lɛ. Ŋɩɩ nɛ mɩ bʋl, magɛ ŋ-la kʋŋ nɛ kɛnʋ pʋɔsa ta. Mɩ ha bɩ ʋ na a kʋʋ yi jɩnɩŋ. 29Dɩ ma saa bɩra laa deeŋ ma mɩ teeŋ, dɩ wʋbɔŋ ŋaa ʋ lɛ, ma jaŋ leŋ dɩ mɩ sʋʋ nenigi sʋʋŋ a tuu bʋa arɩ nyu-pʋmpʋllʋŋ.’

30Mɩ nyɩmma mɩɩsɩŋ nɛ bile, dɩ mɩ nɛ mɩɩra mʋ mɩ nyɩmma teeŋ aŋ bɩ bile kaa mʋ, 31ʋ jaŋ sʋʋ nenige sʋʋŋ, a tuu bʋa arɩ nyu-pʋmpʋllʋŋ. 32Mɩ nyɩmma joŋ bile hɛ mɩ nɩsɩŋ lɛ nɛ, mɩ bʋla pʋ dɩ mɩ nɛ bɩ mɩɩra kɛŋ bile kaa kɔ, mɩ jaŋ laa cheeriŋ a ka mʋ wuu.

33Mɩɩ sʋlʋŋ mɩ kʋhɩaŋ, leŋ dɩ mɩ mɩɩra laa bile nyuŋ a hɛ ŋ teeŋ a ŋaa ŋ yomo, ka dɩ bile to ʋ naambiiriŋ harɩŋ mʋ. 34Ɛɛ nɛ mɩɩ ŋaa dɩ mɩ mʋ mɩ nyɩmma teeŋ dɩ bile nɛ bɩ mɩ harɩŋ to? Mɩ bɩ jaŋ cho dɩ mɩ ŋaa wɩɩ-la sɩ jaŋ chei mɩ nyɩmma tʋɔŋ.”

Currently Selected:

WƖAA DƖ-SUOMUŊ 44: SIS

Highlight

Copy