WƖAA DƖ-SUOMUŊ 45

Josɛf kɛŋ ʋ tɩtɩa dagɛ ʋ naambiiriŋ

1Juda sɩ bʋl wɩalɩŋ dɛrɛ, Josɛf kɛŋ ʋ tɩtɩa lɔl, aŋ yel ʋ tɩntɩnna-la sɩpaaŋ a leŋ nɩwogusu-la kala lɩɩ, ka ʋ kɛŋ ʋ tɩtɩa dagɛ ʋ naambiiriŋ. 2Ʋ sɩ faasa yel ŋɩɩ, Ijipiti tɩŋŋaa arɩ ba kuoro dɩa nɩaa kala nɩɩ.

3Josɛf bʋla pɩ ʋ naambiiriŋ, “Mɩ-na nɛ Josɛf. Mɩ nyɩmma ha hɛ ʋ mɩɩsɩŋ lɛ nɛɛ?” Fawʋllʋŋ faasa kɛŋ ʋ naambiiri-la, ba bɩ wuo bʋl wɩɩkala pʋ.

4Ŋɩɩ nɛ Josɛf bʋla pɩ ʋ naambiiriŋ, “Ma yaa sʋʋsa kʋ yimi.” Ba sɩ sʋʋsa kʋ yiu, ʋ bʋla pɩba, “Mɩ-na nɛ Josɛf, ma naambile ma sɩ yalla pɩ Ijipiti tɩŋŋaa. 5Má sɩ́ leŋe dɩ ma tʋɔŋ chei, a sɩ́ baanɩŋ ma na dɔŋɔba nyuŋ a tɩŋ ma sɩ yallɛmɛ pɩ Ijipiti tɩŋŋaa, bɛɛ wɩaa Wɩa nɛ dagɛ ŋɩɩ dɩ mɩ laa nɩaa ta. 6Jɩsɩŋ balɩa nɛ ŋ-la losuŋ sɩ jʋʋ tinteeŋ, aŋ ha ka jɩsɩŋ banɔŋ ma, ma sɩ bɩ jaŋ pɛrɛ, a bɩ jaŋ kʋŋ ma. 7Wɩa leŋe mɩ laa ma sɩpaaŋ kɔ daha dɩ ʋ to mɩ lɛ nɛ a laa ma dɩ ma doho nɩaa ta dɩ ʋ ŋaa wʋmagɩl.

8Ma dee bɩ mɩ kaa kɔ daha, Wɩa nɛ kɛmmɛ kɔ, a leŋ mɩ nɛ tɩtɩgɛ Ijipiti tinteeŋ kuoro lɛ a ŋaa ʋ dɩa nɩhɩaŋ a bibeŋ Ijipiti tinteeŋ kala. 9Má ŋaa lɩma a mʋ bʋla pɩ mɩ nyɩmma, arɩ ʋ bie Josɛf, Wɩa leŋe ʋ ŋaa Ijipiti tɩŋŋaa kala sɩpaalaarʋ nɛ. Ʋ sɩ́ dienu aŋ kɔ mɩ teeŋ. 10Dɩ ma nɛ kɔ, ma jaŋ hɔŋ Goseŋ tinteeŋ lɛ a kpagɛmɛ, ma dɩ ma biiriŋ, ma nihee, ma pʋsʋŋ, ma jiŋŋee arɩ kʋŋ na-kala ma sɩ kɛnɛ. 11Mɩ jaŋ bibemma, dɩ losuŋ sɩ́ ma dɩa jʋʋ, bɛɛ wɩaa losu-la ha jaŋ hɛ nɩmɛ jɩsɩŋ banɔŋ.

12Lɛɛlɛ ma tɩtɩa na nɛ, mɩ ŋaana Bɛnjamɩŋ ma na arɩ mɩ-na Josɛf nɩɩ bʋl wɩaa deemba ma teeŋ. 13Má bʋla pɩ mɩ nyɩmma, arɩ ŋɩɩ ba sɩɩ zilmi Ijipiti tinteeŋ lɛ, arɩ wɩalɩŋ kala ma sɩ na, aŋ kɛŋ mɩ nyɩmma kaa kɔ daha lɩma.”

14Ŋɩɩ nɛ Josɛf arɩ Bɛnjamɩŋ guori dɔŋɔ a kala yiyel. 15Ʋ guori ʋ naambiiri-la kala cheŋ aŋ yiyel. Ŋɩɩ harɩŋ nɛ ʋ naambiiriŋ ma bʋl wɩaa ʋ teeŋ.

16Ijipiti tinteeŋ kuoro sɩ nɩa dɩ Josɛf naambiiriŋ kɔ ʋ teeŋ, ʋ dɩ ʋ dɩa nɩhɩasɩŋ kala tʋɔŋ tɔrɛ. 17Ŋɩɩ nɛ Ijipiti tinteeŋ kuoro bʋla pɩ Josɛf, “Bʋla pɩ ŋ naambiiriŋ dɩ ba vɔɔ kʋdiilee a daŋ ba kakusuŋ lɛ a mɩɩra mʋ Kɛnaŋ tinteeŋ. 18Leŋ dɩ ba kɛŋ ma nyɩmma arɩ ʋ dɩa nɩaa kala kɔ Ijipiti tinteeŋ. Mɩ jaŋ pɩba Ijipiti tinteeŋ lee-la sɩ sɩma a kɛŋ dʋa dɩ ba hɔŋ arɩ tʋɔtɔrʋŋ.

19Bʋla pɩba dɩ ba to paa pʋsʋŋ torukoba dɔnsʋŋ, a kaa lɩɩ Ijipiti tinteeŋ mʋ paa ba biiriŋ, ba haalaa arɩ ba nyɩmma kaa kɔ. 20Má sɩ́ leŋe dɩ ma kɩalɩŋ ma sɩ bɩ jaŋ wuo paa wɩaa walɩmɛma, bɛɛ wɩaa Ijipiti tinteeŋ kʋzɔŋŋɔɔ kala jaŋ ŋaa ma kɩaa.”

21Ŋ-la nɛ Iziral biiriŋ ŋaa. Josɛf pɩba pʋsʋŋ torukoba-la arɩ Ijipiti tinteeŋ kuoro sɩ dagɛ ŋɩɩ a pɩba kʋdiile-la ba sɩ jaŋ dii vɛŋ wombiiŋ lɛ. 22Ʋ pɩ nʋʋkala gɛrɩ-falɩŋ, aŋ joŋ warɩpʋla zɔɔ-batori arɩ gɛrɩ-falaa banɔŋ a pɩ Bɛnjamɩŋ. 23Kɩalɩŋ ma ʋ sɩ joŋo pa dɩ ba kaa mʋ pɩ ba nyɩmma nɛ ŋ-la: Kaku-belliŋ fii chʋŋ Ijipiti tinteeŋ kʋzɔŋŋɔɔ, aŋ ka kaku-haalaa ma fii chʋŋ kuori-mɩaa arɩ kʋdiilee dɔnsʋŋ a kaa mʋ pɩ ba nyɩmma dɩ ʋ kaa dii aa vɛŋ wombiiŋ lɛ. 24Ŋɩɩ nɛ ʋ kɛŋ ʋ naambiiriŋ lɩɩ hɛ wombiiŋ lɛ, aŋ bʋla pɩba, “Má pɔ dɩ ma sɩ́ dɔŋɔ yuo.”

25Ba lɩɩ Ijipiti tinteeŋ lɛ a mʋ ba nyɩmma Jekɔb teeŋ Kɛnaŋ tinteeŋ lɛ. 26Ba sɩ yie, ba bʋla pɩ ba nyɩmma Jekɔb arɩ Josɛf ha hɛ ʋ mɩɩsɩŋ lɛ nɛ. Ʋ nɩɩ tɩgɛ Ijipiti tinteeŋ kuoro lɛ aa beŋ Ijipiti tinteeŋ kala. Jekɔb sɩ nɩɩ ŋɩɩ, ʋ niiŋ maa, ʋ bɩ laa dii arɩ Josɛf ha hɛ ʋ mɩɩsɩŋ lɛ. 27Ŋɩɩ nɛ ba bʋl wɩalɩŋ kala Josɛf sɩ bʋla pɩba a pʋ, aŋ ka ʋ na pʋsʋŋ torukoba-la Josɛf sɩ joŋo tɩa dɩ ba kaa kʋ joŋu kɔ, ʋ yaraa pɛ dɔŋɔ lɛ. 28Ŋɩɩ nɛ Iziral bʋl, “Lɛɛlɛ mɩ laa dii arɩ mɩ bie Josɛf ha hɛ ʋ mɩɩsɩŋ lɛ nɛ, mɩ jaŋ mʋ naʋ aŋ-na sʋʋ.”

Currently Selected:

WƖAA DƖ-SUOMUŊ 45: SIS

Highlight

Copy