Jɔɔŋ 13

Yesu sɔŋ ʋ harɩ-tooroo naasɩŋ

1Ʋ fa ka tapʋl-bala nɛ, ka dɩ Juu tɩŋŋaa dɩɩsɩŋ kiele bal gbiele-la yi. Yesu jɩma arɩ bʋa-la lɛ sɩ maga dɩ ʋ lɩɩ dʋnɩa deeŋ lɛ a mʋ ʋ Nyɩmma teeŋ yie nɛ. Ʋ cho nɩalɩŋ sɩɩ to ʋ harɩŋ nɛ dʋnɩa deeŋ lɛ. Bʋa deeŋ lɛ nɛ ʋ chaasa dagɛ chono-la kɩŋkɛŋ ʋ sɩ kɛnɛ arɩ ʋ harɩ-tooroo.

2Tapʋlɩɩ-la dɩdaanɩŋ Yesu arɩ ʋ harɩ-tooroo hɔŋ dɩ ba dii kʋdiilee. Bʋa deeŋ lɛ dɩ Sɩtaanɩ kʋ jʋʋ Saamɔŋ bie Judas Ɩsɩkarɔt dɩ ʋ joŋ Yesu yallɛ. 3Yesu fa jɩma arɩ ʋ Nyɩmma joŋ kʋŋkala doluŋ hɛ ʋ nɩsɩŋ lɛ nɛ. Ʋ jɩma ʋ lɩɩ Wɩa teeŋ nɛ, a bɩra jɩŋ arɩ ʋ jaŋ mɩɩra mʋ Wɩa teeŋ. 4Ŋɩɩ nɛ Yesu sii kʋdiile-la nyuŋ, a wuri ʋ gɛrɩ-balɩŋ bil, aŋ joŋ pɔpɔ vɔɔ ʋ tɩŋa, 5a ŋaa lɩɩŋ hɛ taasɩ-gbaŋa lɛ, a suomo sʋsɔŋ ʋ harɩ-tooro-la naasɩŋ a kɛŋ pɔpɔ-la sɩ vɔɔ ʋ tɩŋa tɩtɩɩgɛ. 6Ʋ sɩ kʋ yi Saamɔŋ Pɩɩta lɛ, ŋɩɩ nɛ Pɩɩta pɩɛsʋ, “Mɩ Tɩɩna, ŋŋ chɛ dɩ ŋ sɔŋ mɩ naasɩŋ nɛɛ?”

7Ŋɩɩ nɛ Yesu bʋla pʋ, “Bʋa deeŋ lɛ ŋ bɩ jɩŋ wɩɩ-la mɩ sɩɩ ŋaa, ama ʋ harɩŋ lɛ ŋ jaŋ jɩŋ ʋ bʋbʋɔŋ.”

8Ŋɩɩ nɛ Pɩɩta bʋla pʋ, “Ŋ bɩ jaŋ sɔŋ mɩ-na naasɩŋ da.” Yesu ma bʋl, “Dɩ mɩ nɛ bɩ ŋ naasɩŋ sɔmɔ, ŋ bɩra bɩ mɩ harɩ-tooru ŋaa.”

9Ŋɩɩ nɛ Pɩɩta bɩra bʋl, “Mɩ Tɩɩna, dɩ ŋɩɩ-na nɛ, sɩ́ mɩ naasɩŋ dʋndʋŋa sɔŋ, sɔŋ mɩ nyuŋ arɩ mɩ nɩsaa ma.”

10Ŋɩɩ nɛ Yesu bʋl, “Nɩɩ-la kala sɩ fo lɩɩŋ, ʋ yaraa kala zɔmɔ nɛ, ʋ saa bɩra bɩ maga dɩ ʋ fo lɩɩŋ [see dɩ ʋ sɔŋ ʋ naasɩŋ dʋndʋŋa]. Ma kala saa bɩ disiniŋ kɛnɛ, ama nɩbala dʋndʋŋa nɛ kɛŋ disiniŋ ma tʋɔŋ.” 11Yesu paala jɩŋ nɩɩ-la sɩɩ chɛ dɩ ʋ joŋu yallɛ nɛ. Ŋɩɩ nɛ tɩɩ ʋ bʋl dɩ ba kala tʋɔŋ dee bɩ pʋlla ŋɩɩ.

12Yesu sɩ sɔŋ ʋ harɩ-tooro-la naasɩŋ dɛrɛ, ʋ bɩra joŋ ʋ gɛrɩŋ laalɛ a bɩra mʋ hɔŋ ʋ dɩhɔnʋŋ, ŋɩɩ nɛ aŋ pɩɛsɛba, “Ma jɩŋ wɩɩ-la mɩ sɩ ŋaa ma lɛ bʋbʋɔŋ nɛɛ? 13Ma kɛmmɛ kaa yɩrɛ ma Kʋhɩaŋ arɩ ma Tɩɩna. Ʋ saa kɛŋ wombiiŋ nɛ dɩ ma yɩrɛmɛ ŋɩɩ, bɛɛ wɩaa mɩ nɛ sɛnɛ ŋɩɩ. 14Mɩ sɩ ŋaa ma Tɩɩna arɩ ma Kʋhɩaŋ aŋ sɔŋ ma naasɩŋ ŋɩɩ, ʋ maga dɩ ma ma sɔŋ dɔŋɔba naasɩŋ nɛ. 15Mɩ laa sɩpaaŋ ŋaa ma na nɛ, dɩ ma ma ŋɩŋaa ŋɩɩ dɔŋɔ lɛ. 16Wʋtɩtɩɩ nɛ mɩ bʋlaa pɩma, tɩntɩnnʋ kala bɩ ʋ kʋhɩaŋ kɩɩ, nɩɩ-la ma ba sɩ tɩma, ʋ ma bɩ nɩɩ-la sɩ tɩmʋ kɩɩ. 17Ma lɛɛlɛ sɩ jɩŋ wɩaa deemba ŋɩɩ, dɩ ma nɩɩ ŋaaba, ma jaŋ kɛŋ tʋɔtɔrʋŋ. 18Ma kala dee mɩ bʋl arɩ ma jaŋ kɛŋ tʋɔtɔrʋŋ. Mɩ jɩŋ nɩalɩŋ mɩ sɩ lɩɩsa nɛ. Wɩɩ-la ba sɩ ŋmʋnsa Wɩa teniŋ tʋɔŋ sɛnɛ jaŋ ŋaa wʋtɩtɩɩ. Ba bʋla arɩ la dɩ nɩɩ-la kala sɩ pɛ dɔŋɔ lɛ dii kʋdiilee nɛ jaŋ mɩɩra sii chɩŋ mɩ lɛ. 19Mɩ bʋl wɩɩŋ deeŋ pɩpɩma nɛ, ka dɩ ʋ-na ŋaa, dɩ ŋɩɩ nɛ sɛnɛ kʋ ŋaa, ma jaŋ laa mɩ wɩaa dii arɩ mɩ nɛ ŋaa nɩɩ-la mɩ sɩ sɩ mɩ ŋaa. 20Wʋtɩtɩɩ nɛ mɩ bʋlaa pɩma, nɩɩ-la kala sɩ kɛŋ nɩɩ-la mɩ sɩ tɩma woruŋ, ʋ tɩɩna kɛŋ mɩ ma woruŋ nɛ. Nɩɩ-la ma kala sɩ kɛmmɛ woruŋ, ʋ kɛŋ nɩɩ-la sɩ tɩmmɛ ma woruŋ nɛ.”

Yesu bʋla arɩ ba jaŋ joŋu yallɛ

Mat. 26.20-25; Maak 14.17-21; Luuk 22.21-23

21Yesu sɩ bʋl wɩaa deemba dɛrɛ, ʋ tʋɔŋ bɩ dɩ-bala pɩna. Ŋɩɩ nɛ ʋ chaasa bʋl, “Wʋtɩtɩɩ nɛ mɩ bʋlaa pɩma, ma dɔŋɔ nɛ jaŋ jommi yallɛ.”

22Ŋɩɩ nɛ ʋ harɩ-tooroo mɩɩra dɩdaasɛ dɔŋɔ. Ba bɩ jɩŋ tɩɩna ʋ sɩɩ dagʋ. 23Yesu harɩ-tooro-la tʋɔŋ nɩɩ-la ʋ fa sɩ cho nɛ fa hɔnɔ kpagʋ. 24Ŋɩɩ nɛ Saamɔŋ Pɩɩta lɔgɛ ʋ harɩ-tooro-la dɔŋɔ dɩ ʋ pɩɛsɛ Yesu-na dɩ kʋbɛɛ nɛ ʋ dɩdagɛ? 25Ŋɩɩ nɛ harɩ-tooru-la fa sɩ kpagɛ Yesu wasa sʋʋsa mʋ yi Yesu a pɩɛsʋ, “Mɩ Tɩɩna, kʋbɛɛ nɛ?”

26Yesu bʋl, “Mɩ sɩ jaŋ joŋ boroboro yuu dɩsɩŋ a pɩ nɩɩ-la, ʋ nɛ ŋɩɩ.” Ŋɩɩ nɛ ʋ joŋ boroboro-la a yuu dɩsɩŋ a joŋo pɩ Judas, nɩɩ-la sɩ ŋaa Saamɔŋ Ɩsɩkarɔt bie. 27Judas sɩ yɩa laa boroboro-la dɛrɛ, Sɩtaanɩ kʋ jʋʋ-ʋ.

Ŋɩɩ nɛ Yesu bʋla pʋ, “Wɩɩ-la ŋ sɩɩ chɛ dɩ ŋ ŋaa, ŋaaʋ lɩma lɩma.” 28Nɩalɩŋ dɔnsʋŋ kala fa sɩɩ dii kʋdiile-la, ba bɩ jɩŋ wɩɩ-la kala ʋ fa sɩ bʋla bʋbʋɔŋ. 29Judas fa sɩɩ kori ba moribiee ŋɩɩ, Yesu harɩ-tooro-la dɔnsʋŋ fa bɩɩna arɩ Yesu faa chɛ dɩ ʋ mʋ yɔɔ kɩalɩŋ ba sɩɩ chɛ dɩ ba dii nɛ gbiele-la lɛ, koo dɩ ʋ joŋ kʋŋ nɛ a pɩ summoo. 30Judas sɩ laa boroboro-la dɛrɛ, ʋ guu sii a lɩɩ lɩma lɩma. Bʋa-la lɛ dɩ tɩtaŋ nɛ.

Yesu bil nii-falɩɩ nɛ a pɩ nɩaa

31Judas sɩ lɩa, ŋɩɩ nɛ Yesu bʋl, “Lɛɛlɛ nɩaa jaŋ na mɩ-na Nuhuobiine Bie doluŋ sɩ magɛ ŋɩɩ. Nɩaa jaŋ to mɩ lɛ a na ŋɩɩ Wɩa sɩ kɛŋ doluŋ. 32Mɩ sɩ jaŋ dagɛ Wɩa doluŋ sɩ magɛ ŋɩɩ, ŋɩɩ nɛ Wɩa ma jaŋ dagɛ mɩ-na Nuhuobiine Bie doluŋ sɩ maga. Ʋ jaŋ ŋaa ŋɩɩ lɩma. 33Mɩ biiriŋ, mɩ bɩra bɩ jaŋ hɛ ma teeŋ dieni. Ma jaŋ bee chɛmɛ, ama mɩ sɩ bʋl ŋɩɩ a pɩ Juu tɩŋŋaa, mɩ jaŋ bʋl ŋɩɩ a pɩ ma ma. Lee-la mɩ sɩ jaŋ mʋ, ma bɩ jaŋ wuo mʋ nɩmɛ. 34Nii-falɩɩ nɛ mɩ bilee pɩma. Ʋ nɛ ŋ-la: Má cho dɔŋɔ arɩ mɩ sɩ choma ŋɩɩ. 35Dɩ ma nɛ cho dɔŋɔ, ŋɩɩ lɛ nɛ nɩaa kala jaŋ to jɩŋ arɩ ma sɛnɛ ŋaa mɩ harɩ-tooroo nɛ.”

Yesu bʋla pɩ Pɩɩta arɩ ʋ jaŋ bʋl ʋ bɩ ʋ jɩŋ

Mat. 26.31-35; Maak 14.27-31; Luuk 22.31-34

36Ŋɩɩ nɛ Saamɔŋ Pɩɩta pɩɛsɛ Yesu, “Mɩ Tɩɩna, nɩɩ nɛ ŋ mʋmʋ?”

Ŋɩɩ nɛ Yesu ma bʋla pʋ, “Lee-la mɩ sɩ jaŋ mʋ, ŋ bɩ jaŋ wuo to mʋ, ama ʋ harɩŋ nɛ ŋ jaŋ wuo to.”

37Pɩɩta bɩra pɩɛsʋ, “Mɩ Tɩɩna, bɛɛ nɛ tɩɩ mɩ bɩ jaŋ wuo to ŋ harɩŋ lɛɛlɛ? Mɩ paala kɛŋ mɩ tɩtɩa hɛ dɔŋɔ nɛ dɩ mɩ joŋ mɩ mɩɩsɩŋ yɔɔ sʋʋŋ nɛ ŋ wɩaa.” 38Ŋɩɩ nɛ Yesu pɩɛsʋ, “Ŋ sɛnɛ kɛŋ ŋ tɩtɩa hɛ dɔŋɔ nɛ dɩ ŋ joŋ ŋ mɩɩsɩŋ yɔɔ sʋʋŋ nɛ mɩ wɩaa? Wʋtɩtɩɩ nɛ mɩ bʋlaa pɩŋ, ka dɩ ji-bele-na yel, ŋ jaŋ bʋl naansɩɩŋ butori arɩ ŋ bɩ mɩ jɩŋ.”

Currently Selected:

Jɔɔŋ 13: SIS

Highlight

Copy