Jɔɔŋ 14

Yesu sɩ ʋ nɛ ŋaa wombii-la sɩɩ mʋ Wɩa teeŋ

1Ŋɩɩ nɛ Yesu bʋl, “Má sɩ́ leŋe dɩ ma tʋɔŋ vʋgʋmɛ. Má laa Wɩa dii, a laa mɩ ma dii. 2Mɩ Nyɩmma jaŋ lɛ dɩɩsɩŋ yʋga a hɛ nɩmɛ. Dɩ ŋɩɩ fa dee, mɩ bɩ jaŋ bʋla pɩma arɩ mɩ jaŋ mʋ wasɛ leriŋ a bil ma lɛ. 3Dɩ mɩ nɛ mʋa a wasɛ lee-la bil ma lɛ dɛrɛ, mɩ jaŋ bɩra kɔ a kɛmma kaa mʋ mɩ teeŋ, dɩ la kala hɛ dɩ-bala. 4Ma jɩŋ lee-la mɩ sɩɩ mʋ wombiiŋ nɛ.” 5Ŋɩɩ nɛ Tɔmas bʋla pʋ, “La Tɩɩna, la bɩ jɩŋ lee-la ŋ sɩɩ mʋ, ɛɛ nɛ la jaŋ wuo ŋaa jɩŋ ʋ wombiiŋ?”

6Ŋɩɩ nɛ Yesu bʋla pʋ, “Mɩ nɛ ŋaa wombiiŋ a mʋmʋ Wɩa-jaŋ. Mɩ nɛ bɩra wʋtɩtɩɩ Tɩɩna ma, a bɩraa pɩ nɩaa ma mɩɩsɩŋ. Nʋʋkala bɩ mɩ Nyɩmma teeŋ wuo mʋ, see dɩ ʋ to mɩ lɛ. 7Dɩ ma nɛ jɩmmɛ, ma jɩŋ mɩ Nyɩmma ma nɛ. A lɩɩ jɩnɩŋ saa ma paala jɩmʋ nɛ a naʋ ma.”

8Ŋɩɩ nɛ Fɩlɩp bʋla pʋ, “Mɩ Tɩɩna, dagɛla la Nyɩmma, wɩɩ-la kala la sɩɩ chɛ nɛ ŋɩɩ.”

9Ŋɩɩ nɛ Yesu pɩɛsʋ, “Fɩlɩp, mɩ dɩ ma hɛ nɩmɛ a dieni ŋɩɩ, ka ŋ ha bɩ mɩ jɩŋŋ? Nɩɩ-la kala sɩ namɛ, ʋ na mɩ Nyɩmma ma nɛ. Bɛɛ nɛ saa tɩɩ ŋ bʋl dɩ mɩ dagɛma mɩ Nyɩmma? 10Ŋ bɩ laa dii arɩ mɩ hɛ mɩ Nyɩmma lɛ nɛ, mɩ Nyɩmma ma hɛ mɩ lɛɛ? Wɩalɩŋ kala mɩ sɩ yie bʋlaa pɩma, mɩ tɩtɩa doluŋ lɛ dee mɩɩ bʋl. Wɩalɩŋ ma mɩ sɩɩ ŋaa, mɩ Nyɩmma sɩ hɛ mɩ lɛ nɩɩ ŋaa ŋɩɩ. 11Má laa dii arɩ mɩ hɛ mɩ Nyɩmma lɛ nɛ, mɩ Nyɩmma ma hɛ mɩ lɛ. Dɩ ma nɛ bɩ ŋɩɩ wuo laa dii, má laa dii a tɩŋ wɩalɩŋ mɩ sɩɩ ŋaa wɩaa. 12Wʋtɩtɩɩ nɛ mɩ bʋlaa pɩma, nɩɩ-la kala sɩ laa mɩ wɩaa dii, ʋ jaŋ wuo ŋɩŋaa wɩalɩŋ mɩ sɩɩ ŋaa. Ʋ jaŋ paala wuo ŋaa kɩɩ wɩalɩŋ mɩ sɩɩ ŋaa, bɛɛ wɩaa mɩ jaŋ mɩɩra mʋ mɩ Nyɩmma teeŋ. 13Kʋŋ na-kala ma sɩ pɩɛsa chɩchɛ mɩ yɩrɩŋ lɛ, mɩ jaŋ joŋo pɩma. Mɩ jaŋ ŋaa ŋɩɩ dɩ nɩaa wuo to mɩ lɛ a leŋ dɩ mɩ Nyɩmma yɩrɩŋ yɩrɛ. 14Dɩ ma nɩɩ chɛ kʋŋkala mɩ yɩrɩŋ lɛ, mɩ jaŋ ŋaa pɩma.”

Yesu bʋla arɩ ʋ jaŋ joŋ Wɩa Dɩŋ-zɔmʋŋ a hɛ nɩaa lɛ

15Ŋɩɩ nɛ Yesu bɩra bʋl, “Dɩ ma nɛ chomi, ma jaŋ tuto mɩ niiŋ wɩaa. 16Dɩ ma nɩɩ ŋaa ŋɩɩ, mɩ jaŋ sʋl mɩ Nyɩmma dɩ ʋ joŋ ʋ Dɩŋ-zɔmʋŋ pɩma, dɩ ʋ pɩpɛ ma lɛ. Ʋ jaŋ hɛ ma teeŋ a kaa mʋ wuu. 17Ʋ jaŋ dɩdagɛma wʋtɩtɩɩ. Dʋnɩa nɩaa bɩ ʋ jɩŋ. Ba bɩ jaŋ wuo naʋ, ŋɩɩ nɛ tɩɩ ʋ bɩ jaŋ wuo hɛ ba lɛ. Ama ma-na jɩmʋ nɛ. Ʋ hɛ ma teeŋ nɛ. Ʋ saa jaŋ hɛ ma lɛ.

18Mɩ bɩ jaŋ leŋ ma dʋndʋŋa ta, mɩ jaŋ mɩɩra kɔ ma teeŋ. 19Ʋ ka mʋa dʋnɩa nɩaa bɩra bɩ jaŋ namɛ, ama ma-na jaŋ namɛ. Mɩ sɩ jaŋ kɛŋ mɩɩsɩŋ ŋɩɩ, ma ma jaŋ kɛŋ mɩɩsɩŋ. 20Tapʋlɩɩ-la Wɩa sɩ jaŋ joŋ ʋ Dɩŋ-zɔmʋŋ hɛ ma lɛ nɛ, ma jaŋ jɩŋ arɩ mɩ hɛ mɩ Nyɩmma lɛ nɛ, ma ma hɛ mɩ lɛ, mɩ ma hɛ ma lɛ. 21Nɩɩ-la kala sɩ nɩɩ mɩ niiŋ wɩaa aa toba, ʋ tɩɩna nɛ chomi. Mɩ Nyɩmma ma saa jaŋ cho nɩɩ-la sɩ chomi. Mɩ ma jaŋ cho tɩɩna a kɛŋ mɩ tɩtɩa kaa dagʋ.”

22Ŋɩɩ nɛ Judas bʋl (nɩɩ-la ba sɩɩ yɩrɛ Ɩsɩkarɔt dee), “Mɩ Tɩɩna, ɛɛ nɛ ŋ jaŋ ŋaa a kɛŋ ŋ tɩtɩa dagɛla, aŋ bɩ ŋ tɩtɩa kaa dagɛ dʋnɩa nɩaa?”

23Ŋɩɩ nɛ Yesu bʋla pʋ, “Nɩɩ-la kala sɩ chomi, ʋ jaŋ tuto mɩ niiŋ wɩaa. Ʋ sɩ ŋaa ŋɩɩ, mɩ Nyɩmma ma jaŋ chou. Mɩ dɩ mɩ Nyɩmma kala jaŋ kʋ hɛ ʋ lɛ. 24Nɩɩ-la sɩ bɩ mɩ cho, ʋ bɩ mɩ niiŋ wɩaa ka to. Wɩalɩŋ ma sɩ nɩa, mɩ tɩtɩa dee bɩ bʋl. Ama mɩ Nyɩmma-la sɩ tɩmmɛ nɛ dagɛmɛ mɩɩ bʋl.

25Mɩ ha hɛ ma teeŋ nɛ, ŋɩɩ nɛ mɩ bʋl wɩaa deemba pɩpɩma. 26Ama mɩ Nyɩmma jaŋ leŋ dɩ ʋ Dɩŋ-zɔmʋŋ kʋ tuu a hɛ ma lɛ mɩ yɩrɩŋ lɛ. Ʋ jaŋ pɛ ma lɛ a wuo dagɛma wɩɩkala, a leŋ dɩ ma liisi wɩalɩŋ kala mɩ sɩ bʋla pɩma. 27Mɩ sɩɩ mʋ ŋɩɩ, ma jaŋ hɔŋ arɩ fɩɛlɩŋ. Mɩ tɩtɩa fɩɛlɩŋ nɛ mɩ joŋoo pɩma, ʋ bɩ naga fɩɛl-la dʋnɩa nɩaa sɩɩ pa nɛ. Má sɩ́ leŋe dɩ ma tʋɔbɩɩnaa vʋgʋmɛ, a bɩra sɩ́ leŋe dɩ fawʋllʋŋ ma kɛmma.

28Ma nɩa arɩ mɩ bʋla pɩma arɩ mɩ jaŋ mɩɩra viiri aŋ bɩra mɩɩra kɔ ma teeŋ. Dɩ ma nɛ chomi, ma tʋɔŋ jaŋ tɔrɛ arɩ mɩ sɩɩ mʋ mɩ Nyɩmma teeŋ, bɛɛ wɩaa ʋ nɛ kɛŋ doluŋ a kɩɩmɛ. 29Mɩ laa sɩpaaŋ bʋl wɩaa deemba pɩpɩma nɛ, ka dɩ ba-na ŋaa. Dɩ ba nɛ ŋaa, ma jaŋ laamɛ dii. 30Mɩ bɩ jaŋ wuo bʋl wɩaa ma teeŋ a dieni, bɛɛ wɩaa dʋnɩa kuoro ka kɔ nɛ. Ama ʋ bɩ dol kala kɛnɛ mɩ lɛ. 31Ama mɩɩ chɛ dɩ dʋnɩa nɩaa jɩŋ arɩ mɩ cho mɩ Nyɩmma nɛ, ŋɩɩ nɛ tɩɩ mɩ ŋɩŋaa wɩalɩŋ kala ʋ sɩ sɩ dɩ mɩ ŋaa. Má kɔ dɩ la mʋ.”

Currently Selected:

Jɔɔŋ 14: SIS

Highlight

Copy