Luuk 11

Yesu dagɛ nɩaa Wɩa chʋɔlʋŋ

Mat. 6.9-13; 7.7-11

1Tapʋlɩɩ kʋbala Yesu chʋchʋɔlɛ Wɩa lee kʋbala. Ʋ sɩ chʋɔlɛ Wɩa dɛrɛ, ʋ harɩ-tooroo tʋɔŋ kʋbala kɔ ʋ teeŋ a bʋla pʋ, “La Tɩɩna, dagɛla ŋɩɩ la sɩ jaŋ chʋɔlɛ Wɩa, arɩ Jɔɔŋ fa sɩ dagɛ ʋ harɩ-tooroo ŋɩɩ.” 2Ŋɩɩ nɛ Yesu bʋla pɩba, “Ŋ-la nɛ ma jaŋ chʋchʋɔlɛ Wɩa: Má bʋl,

‘La Nyɩmma,

leŋ dɩ ŋ yɩrɩŋ yɩrɛ,

leŋ dɩ ŋ kuorii-la kɔ.

3Pɩla la niiŋ kʋdiiliŋ tapʋlɩɩ-na kala.

4Joŋ la wʋbɔŋŋɔɔ chɛla

arɩ la ma sɩ joŋ la dɔnsʋŋ tɩŋŋaa wʋbɔŋŋɔɔ chɛba ŋɩɩ.

Sɩ́ leŋe dɩ wɩɩkala kɛnla hɛ wʋbɔmʋŋ lɛ.’ ”

5Ŋɩɩ nɛ Yesu bʋla pɩ ʋ harɩ-tooroo, “Má leŋ dɩ la joŋ arɩ ma kʋŋ nɛ mʋ ʋ nandɔŋɔ dɩa tɩta-siesee, a bʋla pʋ, ‘Mɩ nandɔŋɔ, chɩmmɛ boroboro batori. 6Mɩ nandɔŋɔ nɛ lɩɩ wombiiŋ a kɔ mɩ teeŋ tɩtaŋɩŋ deeŋ, ka mɩ bɩ kʋŋ kɛnɛ dɩ mɩ ŋaa pʋ dɩ ʋ dii.’ 7Ŋ bɩɩna arɩ ŋ nandɔŋ-la nɛ hɛ dɩa tʋɔŋ aŋ bʋla pɩŋ, ‘Sɩ́ mɩ walɩmʋ, boiŋ yaga nɛ. Ka la dɩ mɩ biiriŋ pɩŋ doŋ. Mɩ bɩ jaŋ wuo sii a pɩŋ kʋŋkala.’ 8Mɩ jaŋ bʋla pɩma, dɩ ŋ nɛ chɩna pɛsɛ, ma nandɔnsʋŋ wɩaa dee ʋ jaŋ sii doŋ lɛ a pɩŋ kʋdiile-la. Ama ŋ sɩ pɛsɛ ŋɩɩ aŋ bɩ hɩɩsɩŋ fá nɛ tɩɩ ʋ jaŋ sii a pɩŋ kʋ-la kala ŋ sɩɩ chɛ. 9Ŋɩɩ wɩaa mɩ jaŋ bʋla pɩma, má sʋl kɩaa, ma jaŋ laa. Má chɛ kɩaa, ma jaŋ na. Má du boro, ba jaŋ kaa suro pɩma. 10Nɩɩ-la kala sɩ sʋl kɩaa Wɩa teeŋ, ʋ yie laa nɛ. Nɩɩ-la kala sɩɩ chɛ kɩaa, ʋ yie na nɛ. Nɩɩ-la ma kala sɩ du boro, ba yie kaa suro pʋ nɛ. 11Nyɩŋ bɛɛ nɛ hɛ ma tʋɔŋ sɩ jaŋ joŋ dɩmɩŋ a pɩ ʋ bie dɩ ʋ nɛ pɩɛsa chɩchɛ chenfiliŋ? 12Koo dɩ ʋ ka chɛ jɩ-halɩŋ, ma tʋɔŋ nyɩŋ bɛɛ nɛ jaŋ joŋ nʋɔmʋŋ pɩ ʋ bie? 13Dɩ ma nɛ bɔmɔ aŋ joŋ kʋzɔŋŋɔɔ pɩpɩ ma biiriŋ, ɛɛ nɛ ma Nyɩmma sɩ hɛ Wɩa-jaŋ bɩ jaŋ joŋ ʋ Dɩŋ-zɔmʋŋ a pɩ nɩalɩŋ sɩ sʋla chɩchɛ?”

Yesu arɩ Bɛlizibul

Mat. 12.22-30, 43-45; Maak 3.20-27

14Baal kʋbala ma nɛ fa kɔ Yesu teeŋ. Jɩŋ-bɔmʋŋ kɛnʋ a ŋaa ʋ taŋ. Ŋɩɩ nɛ Yesu ŋaa jɩŋ-bɔŋ-la lɩɩ baal-la lɛ, ka baal-la wuo bʋbʋl wɩaa. Nɩ-daŋ-la sɩ hɛ nɩmɛ a na wɩɩ-la, ʋ ŋaaba wʋkpuŋkpere. 15Ŋɩɩ nɛ nɩaa dɔnsʋŋ ma sɩ dɩ jɩŋ-bɔŋŋɔɔ kuoro ba sɩɩ yɩrɛ Bɛlizibul nɛ pʋ doluŋ dɩ ʋ kikiri jɩŋ-bɔŋŋɔɔ ŋɩɩ. 16Nɩaa dɔnsʋŋ ma chɩchɛ dɩ ba magɩsʋ. Ŋɩɩ nɛ ba sɩ dɩ ʋ ŋaa wʋmagɩlɩŋ dɩ ba na a jɩŋ arɩ Wɩa doluŋ nɛ ʋ kaa ŋɩŋaa ŋɩɩ. 17Yesu wuo jɩŋ ba tʋɔbɩɩnaa a bʋla pɩba, “Dɩ taŋ nɩaa nɛ hɛ nɩmɛ a bɩ nii-bala kɛnɛ, ba taŋ jaŋ tel. Dɩ naambiiriŋ ma nɛ bɩ nii-bala kɛnɛ, ba dɩa jaŋ tel. 18Dɩ Sɩtaanɩ nɩaa nɛ bɩ nii-bala kɛnɛ, ba taŋ bɩ jaŋ wuo chɩŋ. Ma bʋla arɩ Bɛlizibul nɛ pɩmɛ doluŋ mɩ kaa kiri jɩŋ-bɔŋŋɔɔ nɩaa lɛ. 19Dɩ mɩ nɩɩ kiri jɩŋ-bɔŋŋɔɔ Bɛlizibul doluŋ lɛ, kʋbɛɛ nɛ saa joŋ doluŋ pɩ nɩaa deemba sɩɩ to ma harɩŋ ba ma kikiri jɩŋ-bɔŋŋɔɔ nɩaa lɛ? Nɩaa deemba tɩtɩa daga arɩ maa nyɩɛ nɛ. 20Wɩa doluŋ nɛ mɩ kaa kiri jɩŋ-bɔŋŋɔɔ nɩaa lɛ. Wɩɩŋ deeŋ nɛ daga arɩ Wɩa kuorii-la paala kɔ ma teeŋ nɛ. 21Dɩ nɩduoŋ nɛ vɔɔ ʋ tʋɔnʋŋ a hɔnɔ pɔ ʋ dɩa, nʋʋkala bɩ ʋ dɩa kʋŋkala wuo jʋʋ joŋ. 22Ama nɩɩ-la ma sɩ kɛŋ doluŋ a kɩɩʋ nɛ wuo kʋ kɛŋ baal-la, a laa ʋ tʋɔnʋ-la kala ʋ sɩ kaa pɔ ʋ kɩaa, ʋ jaŋ wuo paa ʋ kɩalɩŋ kala kaa viiri. 23Nʋʋkala sɩ bɩ mɩ nʋʋ ŋaa, ʋ lɩɩ mɩ harɩŋ nɛ. Nɩɩ-la ma kala sɩ bɩ mɩ lɛ pɛ dɩ la kiri kɩaa hɩhɛ dɔŋɔ lɛ, ʋ kaa pɩsa tɩta nɛ.”

24Ŋɩɩ nɛ Yesu bɩra bʋla pɩ nɩaa, “Dɩ jɩŋ-bɔŋ nɛ lɩɩ nʋʋ lɛ, ʋ yie gɔllɛ tintee-hɩlɩŋ lɛ a chɩchɛ dɩ-wiesiŋ. Dɩ ʋ nɛ bɩ lee na, ʋ yie bʋl ʋ tɩtɩa lɛ, ‘Mɩ jaŋ mɩɩra mʋ lee-la mɩ sɩ lɩa.’ 25Ʋ jaŋ mɩɩra mʋmʋ, dɩ disiniŋ tuo dɩa-la lɛ, ba wasʋ ʋ kala zɔŋ. 26Ʋ jaŋ mɩɩra lɩɩ, a kɛŋ jɩŋ-bɔŋŋɔɔ balɩpɛ, kɩalɩŋ sɩ bɔmɔ kɩɩʋ, dɩ ba ma kʋ jʋʋ a pɛ ʋ lɛ. Ŋɩɩ harɩŋ lɛ nɛ baal-la yie wasa kperi a kɩɩ bumbuŋ-la.”

Ŋɩɩ la sɩ jaŋ ŋaa a kɛŋ tʋɔtɔrʋŋ kɩŋkɛŋ

27Yesu sɩ bʋl ŋɩɩ dɛrɛ, dɩ haal kʋbala fa hɛ nɩ-daŋ-la tʋɔŋ a faasa bʋla pʋ, “Wɩa jaŋ pɛ haal-la sɩ lʋlʋŋ lɛ a dɩɛsɩŋ arɩ yɩlɩŋ.” 28Ŋɩɩ nɛ Yesu mɩɩra bʋla pʋ, “Nɩɩ-la sɩ nɩɩ Wɩa niiŋ wɩaa a tutoba, ʋ-na tɩɩna tʋɔŋ nɛ jaŋ tɔrɛ.”

Nɩalɩŋ chɛ dɩ Yesu ŋaa wʋmagɩlaa

Mat. 12.38-42

29Nɩalɩŋ sɩ golli Yesu ŋɩɩ, ʋ bʋla pɩba, “Bee na, jɩnɩŋ nɩaa deemba bɔmɔ nɛ. Ba sɩ dɩ mɩ ŋaa wʋmagɩlɩŋ dɩ ba na a jɩŋ arɩ mɩ dol-la lɩɩ Wɩa teeŋ nɛ. Aɩ, mɩ bɩ ŋaa. Wʋmagɩlɩŋ ma sɩɩ chɛ, ma bɩ jaŋ wuo na, see wʋmagɩl-la Wɩa fa sɩ ŋaa a tɩgɛ Jona lɛ. 30Wɩa joŋ Jona a kɛnʋ ŋaa wʋmagɩlɩŋ Nɩnɩvɛ nɩaa teeŋ. Ŋɩɩ tɩtɩa nɛ ʋ jaŋ joŋ mɩ-na Nuhuobiine Bie ma a kɛmmɛ ŋaa wʋmagɩlɩŋ jɩnɩŋ nɩaa teeŋ.”

31Ŋɩɩ nɛ Yesu bɩra bʋl, “Haal kʋbala nɛ fa hɛ nɩmɛ. Ʋ dii kuoruŋ tintee kʋbala lɛ baa yɩrɛ Sɩɩba. Ʋ sii lɩɩ ʋ jaŋ lɛ a mʋ dɩ-bolii dɩ ʋ jegile nɩɩ kuoru kʋbala wʋjɩmɩŋ. Ʋ yɩrɩŋ nɛ fa Solomoŋ. Ʋ fa kɛŋ wʋjɩmɩŋ kɩŋkɛŋ kɩŋkɛŋ. Sarɩya chɛ-diiliŋ, haal-la jaŋ sii a joŋ cheeriŋ a pɩ jɩnɩŋ nɩaa woruŋ. Mɩ jaŋ bʋla pɩma arɩ nʋʋ nɛ hɛ nɩmɛ, ʋ yʋga a kɩɩ Solomoŋ, ka ma bɩ sɛɩ dɩ ma jegile nɩɩ ʋ wɩaa. 32Sarɩya chɛ-diiliŋ, Nɩnɩvɛ nɩaa ma jaŋ sii a joŋ cheeriŋ a pɩma woruŋ. Bʋa-la lɛ Jona ma fa sɩ mʋ bʋl Wɩa wɩaa pɩ Nɩnɩvɛ nɩaa, ba bɩrɩma lɩɩ ba wʋbɔŋŋɔɔ lɛ nɛ aŋ to Wɩa. Mɩ jaŋ bʋla pɩma arɩ nʋʋ nɛ hɛ ma tʋɔŋ a yʋga kɩɩ Jona, ka ma bɩ sɛɩ dɩ ma jegile nɩɩ ʋ wɩaa.”

Yesu dagɛ nɩaa a tɩgɛ pʋlʋmʋŋ lɛ

Mat. 5.15; 6.22-23

33Ŋɩɩ nɛ Yesu bɩra dagɛ nɩaa a bʋl, “Nʋʋkala bɩ jaŋ nyɩgɛ chaanɩŋ ʋ dɩa lɛ a joŋo faa koo a joŋ gbaŋa chu tɔ. Ʋ yie joŋo daŋ chaaŋ daaŋ nyuŋ nɛ, dɩ nʋʋkala nɛ kʋ jʋʋ dɩ ʋ wuo na pʋlʋmʋŋ. 34Ŋ sɩaa nɛ ŋaa ŋ yaraa pʋlʋmʋŋ. Dɩ ŋ sɩaa nɛ zɔmɔ, ŋ yaraa kala kɛŋ pʋlʋmʋŋ nɛ, ama dɩ ŋ sɩaa nɛ bɩ zɔŋ, ŋ yaraa kala hɛ birimiŋ tʋɔŋ nɛ. 35Má pɔ dɩ pʋlʋŋ-la ma sɩ kɛnɛ sɩ́ birimiŋ bɩrɩmʋ. 36Dɩ ŋ yaraa kala nɛ kɛŋ pʋlʋmʋŋ aŋ ka ŋ lee-kala bɩ birimiŋ kɛnɛ, ʋ jaŋ chaanɛ lee-kala, arɩ chaanɩŋ sɩ yie chaanɛ ŋɩɩ.”

Yesu bʋl Farisii tɩŋŋaa arɩ Wɩa teniŋ kerichiba teeŋ woruŋ

Mat. 23.1-36; Maak 12.38-40

37Yesu sɩ bʋl wɩaa deemba dɛrɛ, Farisii tɩɩna kʋbala yɩrʋ dɩ ʋ kɔ ʋ dɩa a dii kʋdiilee. Ŋɩɩ nɛ Yesu mʋ hɔŋ dɩ ʋ dii kʋdiile-la. Ʋ bɩ lɩɩŋ sɔmɔ aŋ didii kʋdiile-la. 38Farisii tɩɩna-la sɩ na ŋɩɩ, ʋ ŋaaʋ wʋkpuŋkpere. 39Ŋɩɩ nɛ La Tɩɩna Yesu bʋla pʋ, “Ma-na Farisii tɩŋŋaa, ma yie chɛsɛ ma gbansɩŋ arɩ ma nyʋnyʋalʋsʋŋ harɩŋ woruŋ dɩ ba zɔŋ aŋ bɩ ba tʋɔŋ ka tiisi, ka ba tʋɔŋ kala birisi. Ma nagɛ nyʋnyʋalʋsʋŋ arɩ gbansɩŋ deemba nɛ. Ma yaraa nɛ zɔmɔ, ama ma tʋɔŋ lɛ ma kɛŋ yarɩ-bieriŋ arɩ tʋɔbɔmʋŋ. 40Ma ŋaa nɩyaara nɛ. Wɩa sɩ ŋaa ma harɩŋ, ʋ nɛ ŋaa ma tʋɔŋ ma. 41Dɩ ma nɩɩ chɛ dɩ ma tʋɔŋ pʋllɛ, má kɛŋ ma tʋɔŋ a cho summoo a fɩfá ba nenige.

42Ma Farisii tɩŋŋaa, ma jaŋ na hɛɛŋ. Kʋbiisiŋ ma yie kaa kpaa leree fii fii, a joŋ leriŋ kʋbala a pɩ Wɩa. Dɩ ma nɛ jaa pɩpaarɩ-la sʋɔra sɩ sɩma arɩ pɩpaarɩ-la sʋɔra sɩ bɩ sɩŋ arɩ pɩpaa-diilee maa, ma yie kɛmba kaa kpaa leree fii fii, a joŋ ba kʋŋkala leriŋ dɔŋɔ a pɩ Wɩa, ama ma vɩa wʋtɩtɩɩ wombiiŋ a bɩ Wɩa cho. Ʋ maga dɩ ma kpaa ma kɩalɩŋ leree fii fii, a joŋ leriŋ kʋbala a pɩ Wɩa, ama ʋ bɩ maga dɩ ma vɩa wʋtɩtɩɩ wombiiŋ. 43Ma Farisii tɩŋŋaa, ma jaŋ na hɛɛŋ. Dɩ ma nɛ jʋʋ Wɩɩchʋɔlɛ dɩɩsɩŋ, ma yie cho nɩbalaa dɩhɔnʋŋ nɛ. Dɩ ma nɩɩ gɔllɛ yɔbɔ lɛ maa, ma yie cho dɩ nʋʋkala nɩɩ zilma a chʋchʋɔlɛma. 44Ma jaŋ na hɛɛŋ kɩŋkɛŋ kɩŋkɛŋ. Ma nagɛ vaamaa ba sɩ kaa jɛrɛ, dɩ ba dɩ tinteeŋ kala magɛ dɔŋɔ nɛ, ka nɩaa bɩ jɩŋ aŋ vɩvɛŋ ba nyuŋ.”

45Yesu sɩ bʋl ŋɩɩ dɛrɛ, dɩ Wɩa teniŋ kerichi dɔŋɔ bʋla pʋ, “Kʋhɩaŋ, ŋ sɩ bʋl ŋ-la, ŋ tʋʋsɛla ma nɛ.” 46Ŋɩɩ nɛ Yesu bɩra bʋl, “Ma-na Wɩa teniŋ kerichiba, ma jaŋ na hɛɛŋ. Ma yie joŋ chʋga a daŋ nɩaa harɩŋ lɛ, ka ba bɩ wuo chʋŋ. Aŋ ka ma tɩtɩa bɩ jaŋ pɛ ba lɛ a laa chʋga-la. 47Ma jaŋ na hɛɛŋ kɩŋkɛŋ, bɛɛ wɩaa ma saa vaamaa pɩ Wɩa wʋlaabʋlla-la nɛ, ma naabalɩmaba nɛ fa kpʋba. 48Ma sɛɩ wɩalɩŋ ma naabalɩmaba sɩ ŋaa nɛ a bʋl dɩ ba ŋaa wʋtɩtɩɩba nɛ. Ba kpʋ Wɩa wʋlaabʋllaa nɛ, ma ma nɛ saa ba vaamaa. 49A tɩŋ wɩɩŋ deeŋ wɩaa, ba ŋmʋnsɛ Wɩa teniŋ sɛmɛ dɔŋɔ ba sɩɩ yɩrɛ Wɩa wʋjɩmɩŋ a bʋl, ‘Mɩ jaŋ ta mɩ wʋlaabʋllaa arɩ mɩ nanzɔɔba dɩ ba mʋ ba teeŋ. Ba jaŋ kpʋ dɔnsʋŋ aŋ to dɔnsʋŋ naasɩŋ a dɔgɩsɛba.’ 50Wɩa jaŋ dɔgɩsɛ jɩnɩŋ nɩaa a tɩŋ ba sɩ kpʋ ʋ wʋlaabʋllaa a lɩɩ dʋnɩa dɩ-suomuŋ, 51a chɩŋ bʋa-la lɛ ba sɩ kpʋ Ebil a kaa mʋ yi bʋa-la lɛ ba sɩ kpʋ Zɛkarɩya. Ba kpʋʋ Wɩa dɩa tʋɔŋ nɛ a kpagɛ koru-la nyuŋ ba sɩ yie ŋaa Wɩɩsʋlʋŋ nɛ. Wʋtɩtɩɩ, mɩ jaŋ bʋla pɩma, Wɩa jaŋ dɔgɩsɛ jɩnɩŋ nɩaa kala kɩŋkɛŋ a tɩŋ wɩaa deemba kala lɛ. 52Ma Wɩa teniŋ kerichiba, ma ma jaŋ na hɛɛŋ kɩŋkɛŋ. Ma tɔ wombii-la nɩalɩŋ sɩ jaŋ na wʋjɩmɩŋ nɛ. Ma tɩtɩa bɩ chɛ dɩ ma to wombiiŋ deeŋ, aŋ pɔ dɩ nɩalɩŋ ma sɩɩ walɩmɛ dɩ ba to sɩ́ to.”

53Yesu sɩ lɩɩ lee-la, Wɩa teniŋ kerichiba-la arɩ Farisii tɩmma-la suomo chaasa bʋl wɩaa a lɩlɩɩ ʋ harɩŋ a pɩɛsʋ wɩaa yʋgɛ. 54Baa walɩmɛ dɩ ba bɛrɛ kɛnʋ dɩ ʋ nɛ bʋl wɩɩ chei.

Currently Selected:

Luuk 11: SIS

Highlight

Copy